ශ්‍රී ලංකාව අවට මුහුදු සීමාව සිතියම් ගත කිරීමේ එකාබද්ධ වැඩසටහනට සහභාගීවිම සඳහා පසුගිය ඔක්තෝබර් මස 26 වන දින කොළඹ වරායට සේන්දු වූ ඉන්දියානු නාවික හමුදාවට අයත් ‘සට්ලෙජ්’ නෞකාව එම කාර්යයන් සාර්ථක ලෙස නිමා කරමින් ඊයේ (21) දිවයිනෙන් පිටත් විය.
එහිදී නාවික සම්ප්‍රදායානුකූලව ශ්‍රී ලංකා නාවික හමුදාව විසින් එම නෞකාවට සමු දෙන ලදී.
වාර්තා වන ආකාරයට ශ්‍රී ලංකා නාවික හමුදාව සමඟ ඒකාබද්ධව ඔවුන් විසින් ආරම්භ කරන ලද ඉන්දු-ලංකා නාවික හමුදා ඒකාබද්ධ ජලමානක මිනුම් දෙවන අධියර පසුගිය දෙසැම්බර් 19 වන දින සාර්ථක ලෙස නිමා කර ඇති අතර එම මිනුම් කටයුතු කොළඹ සිට ගාල්ල දක්වා වෙරළ තීරය ආවරණය වන පරිදි මීටර් 200 ක පමණ මුහුදු ප්‍රදේශයක සිදු කර ඇත.
එසේම මෙහි තෙවන අදියර ලබන වසරේ ක්‍රියාත්මක කිරීමට නියමිත අතර, ඒ මහා රාවණා කො‍ටුවේ සිට සංගමන්කන්ද දක්වා කලාපයය. මීට අමතරව නෞකා කාර්යය මණ්ඩලය දිවයිනේ රැදී සිටින කාල සීමාව තුළදී මෙරට වෙරළ තීරයන් පිරිසිදු කිරීම ඇතුළු වැඩසටහන් ගණනාවක් සඳහා ද සහභාගී ඇති බවද වාර්තා වෙයි.
