පුවත්

නව ජනාධිපති ලෙස පත්ව සිටින රනිල් වික්‍රමසිංහට ‘රනිල් ගෝ හෝම්’ කියමින් රට අරාජික නොකර ඔහුට වැඩ කරගෙන යාමට මාස දෙකක වත් කාලයක් ලබා දිය යුතු බව අපේ ජනබල පක්ෂයේ පාර්ලිමේන්තු මන්ත්‍රී පූජ්‍ය අතුරලියේ රතන හිමි පවසති .

එම කාලයේ දී රටේ අර්බුද විසඳීමට සම්පූර්ණයෙන්ම නොහැකි වූවද අර්බුද විසඳීමේ ක්‍රියාමාර්ගය ජනතාවට දැක ගන්න හැකිවනු ඇතැයිද උන්වහන්සේ පවසා සිටී.

කොලඹදී පැවති මාධ්‍ය හමුවක් අමතමින් උන් වහන්සේ තවදුරටත් කියා සිටියේ විජය ධරනි ධර්මය ජාතික සභාව ලෙස තමන් ජනාධිපතිවරයා මුණ ගැසී සාකච්ඡා කළ බවයි.

මේ අතර අතුරලියේ රතන හිමි සහ පාර්ලිමේන්තු මන්ත්‍රී කුමාර වෙල්ගම සර්ව පාක්ෂික ආණ්ඩුවක් පිහිටුවීම සඳහා වන සාකච්ඡා සඳහා සම්බන්ධ වී ඇත.

මේ වන විට එම සාකච්ඡාවල දෙවන වටය ද සිදුකර අවසන් බවත් වාර්තා වෙයි .

ගෝල්ෆේස් අරගල බිමේ සක්‍රීය පාර්ශ්වයක් වූ සමාජ මාධ්‍ය ක්‍රියාකාරිකයන්ගේ එකමුතුව' එහි ක්‍රියාන්විතය අවසන් කිරීමට තීරණය කර ඇත .

මේ සම්බන්ධයෙන් ඔවුන් නිවේදනයක් නිකුත්කර ඇති අතර එය පහත දැක්වෙයි .

2022 අප්‍රේල් 09 වැනිදා එක් අරමුණක් වෙනුවෙන් කොළඹ ගාලුමුවදොරට පැමිණි අතිවිශාල ජනතාවකගෙන් ඇරඹි ගෝල්ෆේස් අරගල භූමියේ සිටි කණ්ඩායම් අතර 'සමාජ මාධ්‍ය ක්‍රියාකාරිකයන්ගේ එකමුතුව' ලෙස අපි ස්ථානගත වීමු.

ගාලුමුවදොර උද්ඝෝෂණ ස්ථානය මූලික කොටගනිමින් බිහිවුණු 'ගෝඨාගෝගම'ට සමගාමීව එහි ස්ථාපිත කෙරුණු මුල්ම කණ්ඩායම් අතරින් එකක් ලෙස අප එකමුතුව එදා සිට මේ මොහොත දක්වාම 'අරගලයේ සමාජ මාධ්‍ය භූමිකාව'ට වඩා ප්‍රශස්ත හා සාධනීය කාර්යභාරයක් ඉටු කළ බව අපි විශ්වාස කරමු.

වි⁣ශේෂයෙන්ම රාජපක්ෂ ආණ්ඩුව සහ එහි හිතෛෂී බලවේග ලක්ෂ ගණනින් මුදල් වඅය කරමින් අරගලයට විරුද්ධව, අරගලය දියාරු කරවන සමාජ මාධ්‍ය ප්‍රචාරක ව්‍යාපෘති දියත් කරන විට, ඒ සියල්ල යටපත් කරවමින් අරගලයේ සැබෑ තතු සහ තත්ත්වයන් සමාජ මාධ්‍ය අවකාශ තුළ තහවුරු කරන්නටත්, අරග⁣ලයේ නිශ්චිත තත්ත්වයන් සමාජ මාධ්‍ය තුළ සටහන් කරන්නටත් අප එකමුතුව දිවා රෑ නොබලා එකා සේ වෙහෙසී කටයුතු කිරීම සතුටට කරුණකි.

එමෙන්ම මැයි 09වැනිදා ආණ්ඩුවේ කුලී මැරයන්ගේ ම්ලේච්ඡ ප්‍රහාරය ඇතුළු ඊට පෙර හා පසු අරගලයේ සුවිශේෂී සන්ධිස්ථාන සමාජ මාධ්‍ය තුළ වාර්තා කිරීමටත්, ඒවා ලෝකය පුරා රැගෙන යන්නටත් අප සාමාජිකයන් සිය සමාජ මාධ්‍ය අවකාශ සහ වේදිකා භාවිත කළ ආකාරය ප්‍රශංසනීය ය.

තවද අප සාමාජිකයන් උක්ත සියලු කාර්යභාරයන් නොපිරිහෙළ ඉටුකළේ කිසිදු මූල්‍යමය හෝ වරදාන වරප්‍රසාද බලාපොරොත්තුවෙන් නොව හුදෙක් රට වෙනුවෙන්, අරගලය වෙනුවෙන් තමන්ට පැවරී ඇති ජාතික වගකීම සිය යුතුකමක් සේ සලකමින් බවද සිහිපත් කළ යුතුය. එහිදී ගෝල්ෆේස් අරගල භූමියේ මෙන්ම ඉන් පිටතද, විශේෂයෙන් විදෙස්ගතව සිටියදී පවා සිය සමාජ මාධ්‍යමය කාර්යභාරය අකුරට ඉටු කළ අප සාමාජිකයෝ බොහෝ පිරිසක් වූහ.

කෙසේ වුවද සමාජ මාධ්‍ය ක්‍රියාකාරිකයන්ගේ එකමුතුව ලෙස අපි අද (05දා) ගාලුමුවදොර අරගල භූමියේ අපගේ මෙහෙයුම් නතර කිරීමට තීරණය කර ඇත්තෙමු. එහෙත් තවදුරටත් අරගලය පවතින බවත්, ජනතා ඉල්ලීම් දිනනතුරු අරගලය පවත්වාගෙන යා යුතු බවත් අපි තරයේ විශ්වාස කරමු.

එහෙයින් මේ දක්වා සිදු කරගෙන ආ පරිදිම ඉදිරියටත් එකමුතුවක් සහ කණ්ඩායමක් ව⁣ශයෙන් ⁣අප පොදු මහජන අරගලයේ සමාජ මාධ්‍ය මෙහෙවර නොපිරිහෙළා ඉටු කිරීමට මැදිහත් වන බවද මෙයින් දැනුම් දෙමු.

අවසාන වශයෙන් ගෝල්ෆේස් අරගලයේ ආරම්භක මොහොතේ පටන් මේ දක්වා අප පිළිබඳ ඔබ තැබූ අචල විශ්වාසයට අපගේ ගෞරවනීය ආචාරය පිරිනමමු. ඉදිරියටද සමාජ මාධ්‍ය පරිශීලකයන් සහ රටේ පුරවැසියන් ලෙස අප සමග එක්ව මේ පොදු මහජන අරගලය ජනතා ජයග්‍රහණයකින් කෙළවර කිරීම සඳහා එක්ව කටයුතු කරන්නැයිද හෘදයාංගමව ඉල්ලා සිටිමු.

-- සමාජ මාධ්‍ය ක්‍රියාකාරිකයන්ගේ එකමුතුව

පැරණි ආර්ථික මොඩලය තවදුරටත් අපට භාවිතා කළ නොහැකි අතර නව්‍ය ලෙස සිතමින් ගෝලීය වෙනස්වීම් පිළිබඳ කඩිනම් අවධානය යොමු කළ යුතු බව ජනාධිපති රනිල් වික්‍රමසිංහ පවසයි .

ඔහු මේ බව සඳහන් කර සිටියේ අද (05) පෙරවරුවේ කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේ දී පැවැති ශ්‍රී ලංකාවේ ආර්ථික ප්‍රතිසංස්කරණ පිළිබඳ පර්යේෂණ වාර්තා එළිදැක්වීමේ සහ විද්වත් කථිකාවේ ආරාධිත දේශනය සිදු කරමින් ය.

“LET’S RESET SRI LANKA” තේමාව යටතේ ඇඩ්වකාටා ආයතනය (Advocata Institute) මගින් මෙම සමුළුව සංවිධානය කර තිබෙන අතර අද සහ හෙට එය බණ්ඩාරනායක ජාත්‍යන්තර සම්මන්ත්‍රණ ශාලාවේ ලෝටස් ශාලාවේ දී පැවැත් වේ.

ජාත්‍යන්තර මූල්‍ය අරමුදල (IMF) යෝජනාව හොද හෝ නරක වුව ද, කවුරුන් කැමති හෝ අකමැති වුවද රට මුහුණදී ඇති ආර්ථික අර්බුදයෙන් නැවත නැගිසිටීමට එය ක්‍රියාත්මක කළ යුතු බව පෙන්වා දුන් රනිල් වික්‍රමසිංහ ජනාධිපතිවරයා ඒ සඳහා යම් පාර්ශ්වයක් විරුද්ධ වන්නේ නම් ඊට ඔවුන්ගේ යෝජනා මොනවාදැයි ප්‍රශ්නකිරීමට රජයට අයිතියක් ඇති බව ද කියා සිටියේය.

මෙහිදී වැඩිදුරටත් අදහස් දැක් වූ ජනාධිපති රනිල් වික්‍රමසිංහ මෙසේ ද පැවසීය .

මුලින්ම අප ජාත්‍යන්තර මූල්‍ය අරමුදල සමග ගිවිසුමක් ඇති කර ගත යුතුයි. දෙවනුව වඩාත්ම වැදගත් වන්නේ තිරසර ණයක් ලබා ගැනීමයි. මෙම ණය ලබා ගැනීම පිළිබඳ යමෙකුට යෝජනා තිබේ නම් එය පහසු වනු ඇති. ඇත්ත වශයෙන්ම මම හිතන්නේ අප එම යෝජනාවලට ඇහුම්කන් දිය යුතු අතර, පාර්ලිමේන්තුවට මෙම යෝජනා පිළිබඳ තීරණයක් ගත හැකියි.

රජයන්, රාජ්‍ය ප්‍රතිපත්තින් වෙනස්වීම ජාත්‍යන්තර මූල්‍ය අරමුදල සමග සාකච්ඡා පැවැත්වීමේදී අපට මුහුණපෑමට සිදුවන මූලික ගැටලුවක්. නිසැකවම ඉදිරි මාස 06 තුලදීත් අපට දුෂ්කරතාවන්ට මුහුණදීමට සිදුවනවා. ආර්ථික අර්බුදය හමුවේ පීඩාවට පත්වන ජනකොටස් කෙරෙහි අවධානය යොමුකළ යුතු බව ජාත්‍යන්තර මූල්‍ය අරමුදල ද පිළිගන්නවා.

රට මුලින්ම විදේශ ණය කෙරෙහි අවධානය යොමු කළ යුතුයි. එමෙන්ම ආසියනු කලාපයේ භූ දේශපාලනයට හසු නොවී ගමන් කළ යුතු වෙනවා.

අපට විශාල ණය මුදලක් ගෙවීමට තිබෙනවා. අපනයන කේන්ද්‍රීය ආර්ථිකයක්, පුනර්ජනනීය බලශක්ති ක්ෂේත්‍රය, පරමාණු බලශක්තිය භාවිතය වැනි ක්ෂේත්‍ර පිළිබඳ සම්ප්‍රදායික රාමුවෙන් බැහැරව සිතිය යුතුය. රටේ ආර්ථිකය වර්ධනය නොකොට රටේ අනාගතය ප්‍රතිසංවිධානය කළ නොහැකියි.

වර්තමානයේ ශ්‍රී ලංකාව ප්‍රථමයෙන් සිදුකළ යුතු කාර්යය වන්නේ ශ්‍රී ලංකා ආර්ථිකය ස්ථාවර කිරීමයි. 1997 ආසියානු මුල්‍ය අර්බුද අවස්ථාවේදී සහ 1997 තායි ආර්ථික අර්බුදය අවස්ථාවේ දී ජාත්‍යන්තර මූල්‍ය අරමුදල මෙම ආර්ථික අර්බුදකාරී අවස්ථාවන්ගෙන් යලි නැගී සිටීමට ඔවුන්ට මග පෙන්නුවා.

මම පසුගියදා මහා නායක හිමිවරුන් බැහැ දුටු අවස්ථාවේදී ස්වාමින්වහන්සේලාද විහාරස්ථාන කේන්ද්‍රකර ගනිමින් ජනතාවට සහන සැලසීමට එකග වුණා. ඇති- නැති පුද්ගලයන් අතර පරතරය පසුගිය කාලයේදී වර්ධනය වී තිබෙනවා.

කොවිඩ් සහ ඉන්ධන අර්බුදය හේතුවෙන් පාසල් අධ්‍යාපනය අඩපනවී තිබෙනවා. එය කඩිනමින් යථා තත්ත්වයට පත්කළ යුතුයි. පළමුව ආර්ථික ස්ථායිතාව ඇති කළ යුතු අතර දෙවනුව ඒ තුළින් සමාජ ස්ථායීභාවය ඇති කළ හැකියි.

කෘෂිකර්මාන්තය හා ධීවර ක්ෂේත්‍රය නවීකරණය, නිෂ්පාදනයේදී නව තාක්ෂණය යොදා ගැනීම, දේශගුණික විපර්යාස අවම කිරීම, කාන්තාවන් මුහුණ දෙන ගැටලු, ජනතාවගේ නිවාස අවශ්‍යතා, ග්‍රාමීය ප්‍රදේශවල දරිද්‍රතාව වන කරුණු කෙරෙහි අවධානය යොමු කළ යුතු වෙනවා.

ඉහළ වේතන ලබන, ඉහළ නිෂ්පාදන ධාරිතාවක් ඇති තරඟකාරී ආර්ථිකයක් අප නිර්මාණය කළ යුතුයි. වර්ධනය වන විශාල වෙළෙඳපොළක් සහිත ආසියානු රටවල් සමග වෙළෙඳ සබඳතා ගොඩනගාගත යුතු වෙනවා. වත්මන් ලෝක ආර්ථික තත්ත්වය කිසිදු රටකට හිතකර වන්නේ නැහැ.

තායිලන්තයේ හිටපු බැංකු ප්‍රධානී ආචාර්ය Veerathai Santiprubhop මහතා ද මෙහිදී අදහස් දැක්වමින් පෙන්වා දුන්නේ ජාත්‍යන්තර මාධ්‍ය තුළ පෙන්වන තරම් ශ්‍රී ලංකාව තුළ මූල්‍ය අර්බුදයක් දක්නට නොමැති බවයි.

තායිලන්ත ආර්ථික අර්බුදයෙන් යළි නැගි සිටීමට රාජ්‍ය ආයතන පෞද්ගලිකරණය, වඩාත් දුෂ්කරතාවන්ට ලක්වන පුද්ගලයන් ආරක්ෂා කිරීම, ආයතනික ප්‍රතිසංස්කරණ, බැංකු ක්ෂේත්‍රයේ විශ්වාසනීයත්වය ඇති කිරීම, කැබිනට් මණ්ඩලයට ආර්ථික විශේෂඥයන් ඇතුලත් කිරීම, ජාත්‍යන්තර මූල්‍ය අරමුදල සමග ගනුදෙනු කිරීම, අවශ්‍ය නීති සංශෝධනය, විදේශ විශේෂඥයින්ගේ සහාය ලබාගැනීම ආදී පියවර ගත් බව ද ඔහු සඳහන් කළේය.

එක්සත් ජාතික පක්ෂයේ සභාපති පාර්ලිමේන්තු මන්ත්‍රී වජිර අබේවර්ධන, සමගි ජන බලවේගයේ පාර්ලිමේන්තු මන්ත්‍රීවරුන් වන ආචාර්ය හර්ෂ ද සිල්වා, කබීර් හෂීම්, මයන්ත දිසානායක සහ ඇඩ්වකාටා ආයතනයේ සභාපති Murtaza Jafferjee ඇතුළු නියෝජිතයන් මීට එක්ව සිටියහ.

රාජ්‍ය පාලනයේදී ජනාධිපතිවරයා දිනාගත යුත්තේ පොහොට්ටුවේ මන්ත්‍රීවරුන්ගේ විශ්වාසය නොව ජනතා විශ්වාසය බවත්, සියලු පක්‍ෂ එක්කරගත් සර්ව පාක්‍ෂික වැඩපිළිවෙලකට යොමුවන්නේ නම් ඒ සඳහා ජනාධිපතිවරයාට සහය ලබාදෙන බවත් පාර්ලිමේන්තු මන්ත්‍රී පාඨලී චම්පික රණවක පැවසීය.

පාඨලී චම්පික රණවක මන්ත්‍රීවරයා මේ බව පැවසුවේ කොළඹ විහාර මහා දේවී උද්‍යානයේ දී අද (31) පැවති කොස් පැල සිටුවීමේ වැඩසටහනකට සම්බන්ධවීමෙන් පසුව මාධ්‍යවේදීන් හමුවේ අදහස් දක්වමිනි.

රජයේ වත්මන් වැඩපිළිවෙල යටතේ සහ රට බංකොලොත් කළ දේශපාලකයන් සහ නිලධාරීන් පැත්තක සිටියදී තරුණ සමාජ ක්‍රියාකාරිකයන් හඹා ගොස් හදිසි නීතිය යටතේ ප්‍රශ්න කරන්නට, පැහැර ගන්නට යාමෙන් ආණ්ඩුව ගැන රටේ විශ්වාසයක් ගොඩනොනැගෙන බව ද මන්ත්‍රීවරයා එහිදී සඳහන් කළේය.

මේ වන විට ආණ්ඩුව යන ආකාරයට රටේ ප්‍රතිරූපය තවත් ඇද වැටෙන බව කී මන්ත්‍රීවරයා ජනාධිපතිවරයා පොහොට්ටුවේ විශ්වාසය දිනාගත්තාට අමතරව ජනතා විශ්වාසය දිනාගත යුතු බවත්, පොහොට්ටුව ගැන ජනතා විශ්වාසයක් නොමැති බවත් කීවේය.

දේශපාලන පක්ෂ හා කණ්ඩායම් කිහිපයක් සමග එක්ව නව දේශපාලන ව්‍යාපාරයක් ගොඩනැගීමට ඩලස් අලහප්පෙරුමගේ නායකත්වයෙන් යුත් කණ්ඩායම තීරණය කර ඇතැයි වාර්තා වෙයි .

මේ සම්බන්ධයෙන් ඩලස් අලහප්පෙරුම ගේ කණ්ඩායම, හිටපු අමාත්‍ය විමල් වීරවංශ ඇතුළු හවුල් පක්ෂ කණ්ඩායම සමඟත්, අනුර ප්‍රියදර්ශන යාපා ගේ නායකත්වයෙන් යුත් ස්වාධීන මන්ත්‍රී කණ්ඩායම සමගත් , චම්පික රණවක මන්ත්‍රීවරයා සමගත් සාකච්ඡා කරමින් සිටින බව දේශපාලන ආරංචි මාර්ග සඳහන් කරයි.

පවුල්වාදය ,විප්ලවවාදය යන අන්ත දෙකෙන් මිදී ,ප්‍රතිසංස්කරණවාදී දේශපාලන ව්‍යාපාරයක් බිහි කිරීම සඳහා මෙම පිරිස සැලසුම් කරමින් සිටින බව ඩලස් අලහප්පෙරුමගේ කණ්ඩායමේ ප්‍රකාශකයෙක් සඳහන් කළේය.

පාර්ලිමේන්තුවේ පක්ෂ සමග එකගතාවක් ඇති කර ගැනීම,දිස්ත්‍රික්ක හා ආසන මට්ටමින් මැතිවරණ ජාලයක් ගොඩනැගීම, ජාත්‍යන්තර හා දේශීය දේශපාලන සංවිධාන සමඟ සම්බන්ධතාවක් ගොඩනැගීම, ප්‍රතිසංස්කරණයක් මත පදනම් වූ දේශපාලන වැඩපිළිවෙළක නිරත වීම යන අරමුණු මුල්කරගෙන මෙම නව දේශපාලන සන්ධානයගොඩ නැගීමට බලාපොරොත්තු වන බව ද ඔහු සඳහන් කළේය.

රට ආර්ථික වශයෙන් කඩා වැටුණු සෑම අවස්ථාවකදීම ජනාධිපති රනිල් වික්‍රමසිංහගේ විශිෂ්ඨ ආර්ථික දැක්ම උපයෝගි කරගෙන යළි ආර්ථිකය ගොඩනඟා රටේ අනාගතය සුරක්ෂිත කළ බව කෘෂිකර්ම අමාත්‍ය මහින්ද අමරවීර පවසයි.

අමාත්‍යවරයා මේ අදහස් දක්වා සිටියේ ඊයේ(30)අගුණුකොළපැලැස්ස ප්‍රදේශයේ පැවති ශ්‍රි.ල.නි.ප හමිබන්තොට දිස්ත්‍රික් කොට්ඨාස සංවිධායකවරුන් ගේ හමුවක් අමතමින්ය.

2001 වසරේ මෙරට ආර්ථිකය රින වර්ධනයක් පෙන්නුම් කරමින් දැවැන්ත ආර්ථික පසුබැසිමකට ලක් වු අවස්තාවේ රනිල් වික්‍රමසිංහ අගමැතිවරයා ලෙස පත්ව ඒ තත්ත්වය වෙනස් කරමින් රටේ ආර්ථිකය ගොඩනැගු බවත් එහිදී ඇමතිවරයා පැවසිය.

යල්පැන ඇති සමාජවාදි ආර්ථික ප්‍රතිපත්ති මගින් බංකොලොත් වු රටක් ගොඩනැගිය නොහැකි බවත් නව ලිබරල්වාදි ආර්ථික ප්‍රතිපත්ති මගින් පමනක් බංකොලොත් වු රටක් ගොඩනැගිය හැකි බවත් ඔහු වැඩිදුරටත් අදහස් දක්වමින් පැවසිය.

මෙරට තෙල් අර්බුදයට කඩිනම් විසදුම් සේවිමට නම් රුසියානු ණය යෝජනා ක්‍රමය යටතේ තෙල් ලබාගැනිමට ගිවිසුම් ගත විය යුතු බවද රාජපක්ෂ පවුල විශාල ජනතා අප්‍රසාදයකට ලක් වි ඇති නිසා සහ අයහපත් සෞඛ්‍ය තත්ත්වයද සැලකිල්ලට ගෙන මහින්ද රාජපක්ෂ දේශපාලනයෙන් විශ්‍රාම ගැනිම කාලෝචිත බවද ඇමතිවරයා පැවසිය.

ජාත්‍යන්තර මූල්‍ය අරමුදල සහ මෙරට අතර පැවැත්වෙන සාකච්ඡා සම්බන්ධයෙන් මුදල් අමාත්‍යංශය විසින් නිවේදනයක් නිකුත්කර ඇත .

ඊට අනුව ශ්‍රී ලංකා බලධාරීන් ණය ප්‍රතිව්‍යුහගත කිරීමේ උපදේශකවරුන් සමග එක්ව ණයහිමියන් ණය ප්‍රතිව්‍යුහගත කිරීමේ වැඩපිළිවෙළ පිළිබඳ එකඟතාවකට පැමිණීමට කටයුතු කරමින් සිටියි.

එසේම ජාත්‍යන්තර මූල්‍ය අරමුදල සමග පැවති සාකච්ජාවල ප්‍රගතිය ඇතුළත් කරමින්, අමාත්‍යාංශය නිකුත් කළ නිවේදනයක දැක්වෙන්නේ ශ්‍රී ලංකාවේ ණයහිමියන් සමග විධිමත්ව කටයුතු ආරම්භ කිරීමට පෙර ණය මෙහෙයුම සඳහාවූ විශ්ලේෂණාත්මක රාමුව සමග ණය උපදේශකයන් සැළකිය යුතු ප්‍රගතියක් ලබාගෙන ඇති බවයි.

සියලු පාර්ශවකරුවන් වෙත සාධාරණ හා තිරසාර ප්‍රතිඵල ළඟාකරගත හැකි පුළුල් ණය ප්‍රතිව්‍යුහගත කිරීමේ වැඩසටහනක් ඇති කරගැනීමට රජය සිය ණයහිමියන් සමග සද්භාවයෙන් කටයුතු කිරීමට බැඳී සිටින බව ද එම අමාත්‍යාංශය නිකුත් කළ නිවේදනයේ සඳහන් වේ.

ශ්‍රී ලංකා රක්ෂණ සංස්ථාවේ නව සභාපති ලෙස ජනාධිපති නීතිඥ රොනල්ඩ් පෙරේරා පත්කිරීමට ජනාධිපති රනිල් වික්‍රමසිංහ කටයුතු කර ඇත .

ජනාධිපති නීතිඥ රොනල්ඩ් පෙරේරා යහපාලන ආණ්ඩුව සමයේ ලංකා බැංකුවේ සභාපතිවරයා ලෙස ද කටයුතු කර ඇත.

"ගෝල්ෆේස් එකෙන් අරගලකරුවන් එලවන්න රජය තීන්දුවක් අරගෙන ..

ආරංචි විදිහට මේ තීන්දුව ගත්තයි කියන්නේ පහුගිය ආරක්ෂක මණ්ඩල රැස්වීමේදී ලු..

ගාළුමුවදොර අසළ භූමිය මින් ඉදිරියට විරෝධතා සඳහා ලබානොදෙන්න තීරණේ කරලා. ඒකට හේතුව ශැංග්‍රිලා, ගලධාරි ඇතුළු ප්‍රධාන පෙළේ හෝටල් රැසක් මේ ප්‍රදේශයේ පිහිටීමලු. ඒ නිසා සංචාරක මර්මස්ථානයක පැවැත්මට හානි වෙන්න දෙන්න විදියක් නැති බවත් රජය තීන්දු කරලා. සංචාරක කර්මාන්තය අවුලට යන කිසිම දෙයක් නොවෙන්න මේ ප්‍රදේශය අධිආරක්ෂක කළාපයක් කරන්න යනවා කියලයි කියන්නේ .

දේශපාලන ආරංචි මාර්ග සඳහන් කරන ආකාරයට ගෝල්ෆේස් අරගලකරුවන්ට පැය 24 ක දැනුම්දීමක් කරලා අගෝස්තු මාසේ මුල් සතියේ දී විරෝධතාවලට ගෝල්ෆේස් එක තහනම් කරන්න ලු යන්නේ..

තහනම් කරන්න දෙයක් නැහැ දැනටම ඔතන මාස තුනක් හිටපු සංවිධාන සේරම වගේ බඩු පැක් කරගෙන ගිහින්.. දැන් ඉන්නේ බොහොම සුළු පිරිසක් .

ජනාධිපති කාර්යාලේ ළඟ ඔය උද්ඝෝෂණ ස්ථානය කියල තැනක් වෙන් කෙරුවේ හිටපු ජනාධිපති ගෝඨාභය රාජපක්ෂ. වැඩේ කියන්නේ ගෝඨා විරෝධතා තියන්න දුන්න තැන ගෝඨා ගේ දේශපාලන ගමනේ අවසානය තීන්දු කරන තැන වුනා.

ඔන්න රනිල් ආවා විතරයි දැන් එතන තහනම් කලාපයක් කරන්නයි යන්නේ..

විරෝධතා තියන්න අලුතින් තැන් 3ක් නම් කරන්නයි යන්නේ..

විහාරමහදේවී එළිමහන් රංග පීඨය, නව නගර ශාලාව සහ හයිඩ් පාර්ක් පිටිය කිසිදු ගාස්තුවකින් තොරව මහ ජනතාව ලබාදෙන්න රජය තීරණේ කරලලු..

ඒ වුනාට ඒ තැන්වල අනවසරයෙන් පදිංචි වීමට අවසර ලබා දෙන්නේ නෑ කියලා මහජන ආරක්ෂක අමාත්‍යාංශය තීරණේ කරලා කියලත් ආරන්චියි.. ඒ කියන්නේ ටෙන්ට් වානා.

දැන් ගෝල්ෆේස් අරගල බිමේ ඉන්න කට්ටියට එතනින් යනවද ? ගේමක් ඉල්ලනවාද කියන එක ගැන තීන්දුවක් ගන්න වෙලාවක් දීලා.

එහෙම තමයි රාජ්‍යය හැසිරෙන්නේ. කොහොම හරි ඔය විදියට මර්ධනේ ඉස්සරහ අරගලේට සහයදීපු සමහරු මගහැරලා යද්දී දකුණේ අරගලකරුවන් වෙනුවෙන් උතුරු නැගෙනහිර මිනිස්සු පාරට බැහැල.

රාජපක්ෂවරුන්ගේ දුෂිත පාලනය ප්‍රජාතන්ත්‍රවාදිව වෙනස් කිරීමට දායක වෙච්ච , ජනතා අරගලය නිසා බලයට ඇවිත් , අරගලකරුවන්ට එරෙහිව වීම, අවස්ථාවාදය කියලා උතුරු නැගෙනහිර සම්බන්ධිකරණ කමිටුව ආණ්ඩුවට චෝදනා කරනවා..

උතුරු නැගෙනහිර සම්බන්ධීකරණ කමිටුව මගින් පෙරේදා [29] මන්නාරමේ, මඩකලපුවේ හා යාපනයේ දී උද්ඝෝෂණය කෙරුවේ ගෝල්ෆේස් අරගලකරුවන්ට පහර දීම හා ඔවුන් අත් අඩංගුවට ගෙන සිරගත කිරීමට එරෙහිව..

සමාජ ක්‍රියාකාරීන්ට හා මාධ්‍යවේදීන්ට ආණ්ඩුව විසින් පහර දීම තරයේ හෙළා දකින ඒ කමිටුව කියන්නේ, දෙමළ ජන සංහාරයට හා යුද අපරාධ වලට වගකිව යුතු රාජපක්ෂවරුන් අරගලකරුවන් විසින් දණගැස්සුවා කියල..

උතුරු -නැගෙනහිර සම්බන්ධිකරණ කමිටුව ඒ ගැන අරගලකරුවන්ට උත්තමාචාරය පුද කරනවා.

ආණ්ඩුක්‍රම ව්‍යවස්ථාව මගින් ජනතාවට ලබා දී ඇති හිමිකම් උල්ලංඝණය නවත්වා,නීතිය හා සාමය මෙන්ම ප්‍රජාතන්තරවාදය රැක ගනිමින්, දැනට සිරගත කර සිටින අරගලකරුවන් සියළු දෙනාම නිදහස් කරන ලෙසද එම කමිටුව බලකර සිටිනවා.

කොහොමද , දකුණේ අරගලය කොච්චර දුරට උතුරේ ප්‍රශ්න ගැන සංවේදී වුණාද කියලා වෙනම හිතන්න ඕන . හැබැයි උතුර දකුණේ අරගලකරුවන් වෙනුවෙන් අසීරුම අවස්ථාවේ සීරුවෙන් පෙළගැසීම අමතක කරන්න නරකයි . එහෙම මිනිස්සුන්ට බර අවි වලින් ගහලා තමයි මෙහෙ කිරිබත් කෑවෙත්.

දේශපාලන වාර්තාකරු

19 වැනි සංශෝධනය බලාත්මක කිරීමට රජය තීරණයක් ගත් බවත්, එය ඉදිරි සති කිහිපය තුළ ක්‍රියාත්මක කිරීමට පියවර ගන්නා බවත්, ජනාධිපතිතුමා, අගමැතිතුමා හා අධිකරණ ඇමතිතුමා සාධාරණ සමාජයක් සඳහා වූ ජාතික ව්‍යාපාරය වෙත දන්වා තිබෙන බව හිටපු කතානායක කරූ ජයසූරිය පවසයි .

සාධාරණ සමාජයක් සඳහා වන ජාතික ව්‍යාපාරය සහ ජාතික හා ආගමික සංහිඳියාව සඳහා වන එකමුතුව විසින් සංවිධානය කරන ලද යහපත් රටක් උදෙසා නව ආණ්ඩුක්‍රම ව්‍යවස්ථාවක් - ගාල්ල දිස්ත්‍රික් සමුළුවේදී ඔහු මේ බව පැවසීය .

"20 වැනි සංශෝධනය ගෙන ඒමෙන් මේ රටේ පැවති ප්‍රජාතන්ත්‍රවාදය මුළුමනින්ම විනාශ වුණා.

අපි එදා සිට 19 වන සංශෝධනය බලාත්මක කරන ලෙස විශාල හඬක් නැගුවා. 2015 එම සංශෝධනය ගෙන ඒමෙන් ශිලාචාර රටක් ලෙස ලෝක ප්‍රජාව ගේ ගෞරවයට ශ්‍රී ලංකාව පාත්‍ර වුණා. රටේ පිරිහීම, ආර්ථිකයේ පිරිහීම, දූෂණය ඉහ වහා යෑම හා නීතියේ බිඳවැටීම මෙන්ම එක රටක නීති දෙකක් ඇති වූයේත් 20 වැනි සංශෝධනය හරහා ලබාදුන් අසීමිත බලතල තුළයි.

රට විනාශ වී ඇති මෙම අවාසනාවන්ත අවස්ථාවේ අප අතර ඇති විවිධ භේද අතහැර අත්වැල් බැඳගන්න පුලුවන්නම් රට බේරාගැනීමට හැකි බව අපගේ බලවත් විශ්වාසයයි. පාර්ලිමේන්තුව තුළ ඒ සමගිය අපි තවමත් දකින්නේ නැහැ. අපි මෙම අවස්ථාවේ දී රාජ්‍ය නායකයන් ඇතුළු සියලුම දෙනාට ආයාචනය කර සිටින්නේ සමගිව සාමකාමීව අනාගත පරපුර ගැන සිතා පාර්ලිමේන්තුව තුළින් විසඳුමක් සොයා ගන්නා ලෙසයි.

සර්ව පාක්ෂික ආණ්ඩුවක් පිහිටුවා ගනිමින් සීමිත කාලයකට අදාළව නිශ්චිත හා පැහැදිලි වැඩපිළිවෙලක් ක්‍රියාත්මක කළ යුතු බව අප මේ අර්බුදයට විසඳුමක් ලෙස යෝජනා කළා. එමෙන්ම විධායක ජනාධිපති ක්‍රමය අවසන් කිරීම සඳහා මූලික පදනම එම පාලනය මගින් ස්ථාපිත කළ යුතුව තිබෙනවා. එකී නිශ්චිත කාලය තුළ සිදුකරන එම වගකීම් සම්පූර්ණ කිරීමෙන් පසු මහ මැතිවරණයක් පවත්වා ජනතාවට කැමති පාලනයක් ඇති කර ගැනීමට අවස්ථාව සලසා දිය යුතුයි. මේ සෑම දේශපාලන ප්‍රතිසංස්කරණ මගින් අප වඩාත්ම විශ්වාස කරන්නේ පොදු සම්මුතියකින් කටයුතු කිරීමට අවස්ථාව ලැබෙන පාර්ලිමේන්තු ක්‍රමය තවදුරටත් ශක්තිමත් කිරීම කෙරෙහියි.
දැන් අපි සන්සුන් විය යුතු කාලය පැමිණ තිබෙනවා. පාර්ලිමේන්තුව තුළ ඒ සමගිය ඇති විය යුතුයි.

රට ඉදිරියට ගෙනයෑමට නම්, අපට අන්තර්ජාතික ප්‍රජාවගේ සහාය අවශ්‍ය වනවා. පෙරටුගාමී සමාජවාදී පක්ෂයේ කාර්යාලයට හදිසි නීතිය යටතේ ඇතුළු වීම ද අපට අනුමත කළ නොහැකියි. මේ සිදුවීම් නිසා අන්තර්ජාතිකව රජයේ කීර්තිනාමයට විශාල වශයෙන් හානිවන බව නිලධාරීන් වටහාගත යුතුයි.

සමගිව සාමකාමීව අනාගත පරපුර ගැන සිතා පවතින අර්බුදයට පාර්ලිමේන්තුව තුළින් විසඳුමක් සොයා ගන්නා ලෙස රාජ්‍ය නායකයන් ඇතුළු සියලුම දෙනාගෙන් ඉල්ලීමක් කරන බවත් එහිදී හිටපු කතානායක වැඩිදුරටත් පැවසීය .

රට විනාශ වී ඇති මෙම අවාසනාවන්ත අවස්ථාවේ විවිධ භේද අතහැර අත්වැල් බැඳගැනීමෙන් රට ගොඩනැඟිය හැකි බවත් පාර්ලිමේන්තුව තුළ එම සමගිය දක්නට නොමැති බවත් ඔහු සඳහන් කළේය .

රනිල් වික්‍රමසිංහ ජනාධිපති ධූරයට පත්වීමත් සමග එක්සත් ජාතික පක්ෂය යළිත් අළුගසා නැගිටීමේ ලක්ෂණ පෙන්නුම් කරන බව දේශපාලන ආරංචි මාර්ග සඳහන් කරයි.

එම ආරංචි මාර්ග සඳහන් කරන ආකාරයට සමගි ජනබලවේගය , ශ්‍රී ලංකා නිදහස් පක්ෂය , පොදුජන පෙරමුණ නියෝජනය කරන මැති ඇමතිවරුන් පිරිසක් පළමුව සර්ව පාක්ෂික ආණ්ඩුවේ වගකීම් ගෙන පසුව ඉදිරි මැතිවරණයක් අවස්ථාවේ එක්සත් ජාතික පක්ෂයේ සාමාජිකත්වය ලබා මැතිවරණය සඳහා තරග කිරීමට නියමිතව ඇත.

මෙම පිරිස අතරට අදාළ පක්ෂවල ජ්‍ජ්‍යෙෂ්ඨයන් කිහිපදෙනෙකු ඇතුළත් බවත් දේශපාලන ආරංචි මාර්ග පවසයි .
එසේම මේ වන විට තරුණ නායකයන් රැසක්ද එක්සත් ජාතික පක්ෂය විසින් නැගීඑන නායකයන් ලෙස දේශපාලන වශයෙන් ඉදිරියට ගැනෙනු ඇති බවත් වාර්තා වෙයි .

මේ තරුණ පිරිස පසුගිය කාලයක් තිස්සේ ජනාධිපති රනිල් වික්‍රමසිංහ සමග ගැඹුරු දේශපාලන සාකච්ඡාවක පසුව ඇති බවත් එම ආරංචි මාර්ග පවසයි .

අගෝස්තු මස මුල් සතියේ නව පාර්ලිමේන්තු සැසිවාරය ආරම්භ වීමත් සමඟ මන්ත්‍රීවරුන් 20 දෙනකුට වැඩි පිරිසක් පක්ෂ මාරු කරනු ඇතැයි "දේශය" වාර්තා කරයි.

අදාළ පුවත වැඩිදුරටත් මෙසේද සඳහන් කර ඇත .

පිරිසක් විපක්ෂයෙන් ආණ්ඩුවට පැමිණීමට නියමිතය. තවත් පිරිසක් ආණ්ඩුවෙන් විපක්ෂයට එක්වීමට නියමිත බව ඉතා විශ්වාස කටයුතු ආරංචි මාර්ග කියයි.

දැනට විපක්ෂයේ සිටින විවිධ සුළු පක්ෂ නියෝජනය කරන ඒ.එල්.එම්. අතාවුල්ලා, ජෝන් සෙනෙවිරත්න, සුදර්ශනී ප්‍රනාන්දුපුල්ලේ, ජීවන් තොණ්ඩමන්, එස්. රාමේෂ්වරන්, අසංක නවරත්න, චාමර සම්පත් දසනායක, ජයරත්න හේරත් යන මහත්ම මහත්මීන් සර්ව පාක්ෂික ආණ්ඩුවකට එක්වීම සඳහා රජයට සහාය පළ කරනු ඇතැයි වාර්තා වෙයි.

එසේම සමගි ජන බලවේගයේ කුමාර් වෙල්ගම, කබීර් හෂීම්, මයන්ත දිසානායක, ජේ.සී. අලවතුවල, , අජිත් මාන්නප්පෙරුම සහ කිංස් නෙල්සන් යන මන්ත්‍රීවරුන් සර්ව පාක්ෂික රජයකට සහාය දීමට ඉඩ ඇති බවද ඉහළ පෙළේ ආරංචි මාර්ග වැඩිදුරටත් පවසයි.

දැනට ආණ්ඩු පක්ෂය නියෝජනය කරන මහාචාර්ය ජී.එල්. පීරිස්, ඩලස් අලහප්පෙරුම, නාලක ගොඩහේවා, චන්න ජයසුමන, උදයන කිරිඳිගොඩ, වසන්ත යාපා බණ්ඩාර, ඩිලාන් පෙරේරා, තිලක් රාජපක්ෂ, උපුල් ගලප්පත්ති, සරත් කුමාරසිරි සහ ලලිත් එල්ලාවල යන මන්ත්‍රීවරුන් නව සභා වාරය ආරම්භ වීමත් සමඟ විපක්ෂයේ අසුන් ගැනීමට සූදානමින් පසුවන බව දැනගන්නට තිබේ.

ඒ අතර ශ්‍රීලනිපය නිල වශයෙන් සර්ව පාක්ෂික ආණ්ඩුවකට එක් නොවන්නේ නම් ශ්‍රීලනිපයේ මන්ත්‍රීන් තිදෙනකු හැර අන් සියලු දෙනාම සර්ව පාක්ෂික රජයකට සහාය පළ කරනු ඇතැයි ද වාර්තා වෙයි.

සියලු දේශපාලන පක්ෂ එක්කර ගනිමින් සර්වපාක්ෂික ආණ්ඩුවක් පිහිටුවා රට මුහුණපා ඇති සමාජ, ආර්ථික හා දේශපාලන අභියෝග ජය ගැනීම සඳහා නව මාවතක ගමන් කිරීම තම අරමුණ බව ජනාධිපති රනිල් වික්‍රමසිංහ පැවසීය.

රට ගොඩනැගීම සඳහා දියත් කරන එම වැඩපිළිවෙලේදී මහා සංඝරත්නයේ අවවාද, අනුශාසනා නොමදව අපේක්ෂා කරන බව ජනාධිපතිතුමා සඳහන් කළ අතර ඒ අද (30) පස්වරුවේ මල්වතු මහා නායක අතිපූජ්‍ය තිබ්බටුවාවේ ශ්‍රී සුමංගල නාහිමි ප්‍රමුඛ මහා සංඝරත්නය බැහැ දකිමිනි.

ජනාධිපති ධූරයට පත්වීමෙන් පසු සාම්ප්‍රදායනුකූලව ජනාධිපති රනිල් වික්‍රමසිංහ අද (30) මල්වතු, අස්ගිරි මහා නා හිමිවරුන්, අනුනායක හිමිවරුන් ප්‍රමුඛ කාරක සංඝ සභික මහා සංඝරත්නය බැහැ දැක ආශිර්වාද ලබා ගත්තේය.

මල්වතු මහා විහාරයීය උපෝසථාගාරය වෙත රැස්ව සිටී මල්වතු පාර්ශ්වයේ මහා නායක හිමි ප්‍රමුඛ අනුනායක හිමිවරුන් සහ කාරක සංඝ සභික භික්ෂුන් වහන්සේ සාම්ප්‍රදායානුකූලව ආගමික වතාවත් සිදු කරමින් ජනාධිපතිතුමාට ආශිර්වාද පළ කළහ.

එහිදී කෙටි අනුශාසනාවක් කරමින් මල්වතු මහා විහාරයීය කාරක සංඝ සභික රාජකීය පණ්ඩිත අතිපූජ්‍ය මහවෙල රතනපාල හිමිපාණන් වහන්සේ සඳහන් කළේ ආර්ථිකය යළි ප්‍රකෘතිමත් කර රට සංවර්ධනය කරා ගෙන යාමට ජනාධිපති රනිල් වික්‍රමසිංහ මැතිතුමාට ශක්තිය ඇති බවයි.

ජාතික තලයේ සහ ජාත්‍යන්තරයේ කීර්තියක් අත්කරගත් පරිනත, දක්ෂ දේශපාලනඥයෙකු වන එතුමා මහජනතාව මුහුණ දී ඇති දෛනික ගැටලුවලට කඩිනමින් විසඳුම් ලබාදී රටට අවශ්‍ය සමාජ, ආර්ථික, දේශපාලන වෙනස්කම් සිදු කරනු ඇතැයි මහා සංඝරත්නය විශ්වාස කරන බව ද උන්වහන්සේ සඳහන් කළහ.

අනතුරුව මල්වතු මහා විහාරයේ දී මල්වතු පාර්ශ්වයේ මහා නායක අතිපූජ්‍ය තිබ්බටුවාවේ ශ්‍රී සුමංගල නායක හිමිපාණන් වහන්සේ බැහැ දුටු ජනාධිපතිතුමා උන්වහන්සේගේ සුව දුක් විමසීය.

අස්ගිරි මහා විහාරය වෙත ද පැමිණි ජනාධිපති රනිල් වික්‍රමසිංහට අස්ගිරි මහා විහාරයීය මංගල උපෝසථාගාරය වෙත රැස්ව සිටී අස්ගිරි පාර්ශ්වයේ මහා නායක හිමිපාණන්, අනුනායක හිමිවරුන් ප්‍රමුඛ කාරක සංඝ සභික භික්ෂුන් වහන්සේ සෙත් පිරිත් සජ්ජායනා කර ආශිර්වාද කළහ.

අස්ගිරි පාර්ශ්වයේ මහා නායක අතිපූජ්‍ය වරකාගොඩ ශ්‍රී ඥානරතන හිමිපාණන් වහන්සේ බැහැදුටු ජනාධිපතිතුමා උන්වහන්සේගේ සුවදුක් විමසමින් කෙටි පිළිසඳරක නිරත විය.

එක්සත් ජාතික පක්ෂයේ නියෝජ්‍ය නායක, ජනාධිපති ජ්‍යෙෂ්ඨ උපදේශක රුවන් විජයවර්ධන මහතා ඇතුලු පිරිසක් මෙම අවස්ථාවන්ට එක්ව සිටියහ.

ජනාධිපති මාධ්‍ය අංශය

මහ මැතිවරණයක් පවත්වා ජනවරමක් සහිත ආණ්ඩුවක් බලයට පත්කර ගැනීම ගැන පාර්ලිමේන්තුව නියෝජනය කරන දේශපාලන පක්ෂ අතර බෙදුණු මතයක් නිර්මාණය වී ඇත.

එහිදී සමගි ජන බලවේගය, ජනතා විමුක්ති පෙරමුණ, දෙමළ ජාතික සන්ධානය හා ශ්‍රී ලංකා මුස්ලිම් කොංග්‍රසය මහජනතාවගේ මූලික අවශ්‍යතාවලට විසඳුමක් ලබා දී කඩිනමින් මැතිවරණයක් පැවැත්විය යුතු බව පවසයි.

එහෙත් ශ්‍රී ලංකා පොදුජන පෙරමුණ, එක්සත් ජාතික පක්ෂය, ජාතික නිදහස් පෙරමුණ යන පක්ෂ කඩිනම් මැතිවරණයකට සුදුසු තත්ත්වයක් රටේ නැතැයි සඳහන් කරයි.

මේ අතර, ශ්‍රී ලංකා නිදහස් පක්ෂය කඩිනම් මැතිවරණයක් සම්බන්ධයෙන් පැහැදිලි අදහසක් ඉදිරිපත් නොකළද හැකිතාක් ඉක්මනින් ජනතාවගේ ප්‍රශ්න විසඳා ජනමතය විමසීම සුදුසුය යන ස්ථාවරයේ පසුවේ.

සමගි ජනබලවේගයේ මහ ලේකම් පාර්ලිමේන්තු මන්ත්‍රී රංජිත් මද්දුමබණ්ඩාර

“අපි කියන්නේ මහ මැතිවරණයක අවශ්‍යතාව තියනවා. මේ පත්වුණ ජනාධිපතිවරයා ඡන්දයකින් පත්වූ ජනාධිපතිවරයෙක් නෙවෙයි. 2020 පාර්ලිමේන්තු මැතිවරණය තියද්දී තිබ්බ ජනමතය නෙමෙයි මේ තියෙන්නේ. අපි කියනවා ජනතාවගේ මේ හදිසි අවශ්‍යතාවන් ටික වහාම ඉෂ්ට කරල මැතිවරණයකට යන්න කියලා.”

ශ්‍රී ලංකා පොදුජන පෙරමුණේ ප්‍රධාන ලේකම් පාර්ලිමේන්තු මන්ත්‍රී නීතිඥ සාගර කාරියවසම්

“මේ වෙලාවේ මැතිවරණයක් තියෙන එක පක්ෂයක් විදිහට අපට වාසි යි. නමුත් අපට පෞද්ගලික දේශපාලන වුවමනා මේ වෙලාවේ සපුරා ගන්න අවශ්‍ය නෑ. මේක රටේ අර්බුදයක් පවතින වෙලාවක්. ඒ නිසා අපිට මේ වෙලාවේ මැතිවරණයකට යෑමේ අවශ්‍යතාවක් නෑ. ඉස්සෙල්ලා රටේ ප්‍රශ්න ටික විසඳගන්න ඕනෙ. ඊට පස්සේ අපට මැතිවරණයකට යන්න පුළුවන්. මේ වන විට කොවිඩ් අවදානමත් ආයෙ ඇවිත්. ඒ නිසා රටේ මිනිසුන්ගේ ජීවිත අවදානමේ දාන්න බෑ අපට. එම නිසා මේ මැතිවරණයකට සුදුසු වෙලාවක් නෙවේ.”

එක්සත් ජාතික පක්ෂයේ සභාපති, පාර්ලිමේන්තු මන්ත්‍රී වජිර අබේවර්ධන

“නියත වශයෙන්ම මේ මොහොත ප්‍රජාතන්ත්‍රවාදයට තර්ජනයක් තිබෙන අවස්ථාවක්. නීතිය හා සාමයට තර්ජනයක් තිබෙන අවස්ථාවක්. කිසිසේත්ම මැතිවරණයකට නොයා යුතු අවස්ථාවක්. එවැනි අවස්ථාවල කළ යුතු ප්‍රධාන ම දේ තමයි ප්‍රජාතන්ත්‍රවාදය තහවුරු කිරීම. නීතිය හා සාමය තහවුරු කිරීම. ඒවා තහවුරු වූ පසු බලන්න පුළුවන් ඊළඟ කාරණා ගැන. ප්‍රජාතන්ත්‍රවාදී දේශපාලන ව්‍යුහයට ආපු නවක මන්ත්‍රීවරුන් 77ක් ඉන්නවා. ඒ අය වැටුණොත් අනාගතයේ ඊටත් වඩා සුදුසු දක්ෂ පුද්ගලයන් ප්‍රජාතන්ත්‍රවාදයට යොමු වීම වැළැක්වෙනවා. පක්ෂ අමතක කරලා ප්‍රජාතන්ත්‍රවාදය තහවුරු කරන්න නම් මුලින් ඒ ආපු නියෝජිතයන් ආරක්ෂා කළ යුතුයි "

ජාතික නිදහස් පෙරමුණේ නියෝජ්‍ය ලේකම් පාර්ලිමේන්තු මන්ත්‍රී නිමල් පියතිස්ස

“රටේ අර්බුද ගණනාවක් තියෙන වෙලාවක් මේක. මැතිවරණයක් පැවැත්වුණොත් කොහොම ද රාජ්‍ය නිලධාරීන් ඒ මැතිවරණයට දායක වෙන්නේ. ඒක ලොකු ප්‍රශ්නයක්. ඡන්ද පත්‍රිකාවලට අවශ්‍ය කඩදාසිවත් ගන්න බැරි තත්ත්වෙක තියෙන්නේ. ඡන්දයයක් ගණන් කරන්නේ කොහොම ද? විදුලිය විසන්ධි වෙන වෙලාවක් මේක. රටේ ඉන්ධන ප්‍රශ්නයක් තියෙනව. කොහොම ද මිනිස්සු ඡන්ද දාන්න යන්නේ. මැතිවරණ තියන්න කියන්නේ රටේ බංකොළොත් ම දේශපාලන පක්ෂ. එයාල හදන්නේ එයාලගෙ ගොඩ වැඩිකර ගන්න මිසක් රට හදන්න නෙමේ. අපි පක්ෂයක් ලෙස මේ වෙලාවේ මැතිවරණ අවශ්‍ය නෑ කියන ස්ථාවරයේ ඉන්නේ.”

ශ්‍රී ලංකාවේ කොමියුනිස්ට් පක්ෂයේ ප්‍රධාන ලේකම් විශේෂඥ වෛද්‍ය ජී. වීරසිංහ

“ප්‍රජාතන්ත්‍රවාදී රටක අනිවාර්ය අංගයක් මැතිවරණ පැවැත්වීම. නමුත් මේ වෙලාවේ මැතිවරණයකට යෑම සුදුසු නෑ. ඉක්මනින් අපි රටේ අර්බුද විසඳාගත යුතුයි. ඉන් පසුවයි මැතිවරණයක් පැවැත්විය යුත්තේ. රටේ ආහාර, ඉන්ධන, පොහොර, බලශක්ති, ගෑස්, කෘෂිකර්මාන්තයට අවශ්‍ය යෙදවුම්, කාර්මික ක්‍ෂේත්‍රයේ, අපනයන ක්‍ෂේත්‍රයේ අර්බුද විසඳා ගැනීමෙන් පසු අනිවාර්යයෙන් මැතිවරණයක් රටේ පැවැත්විය යුතුයි. සැබෑ ජනමතය විකෘති කරන්න කාටවත් බෑ. සැබෑ ජනමතය පිළිබිඹු විය යුතුමයි. කඩිනමින් මැතිවරණයක් පැවැත්වීමට අවශ්‍ය වටපිටාව ඉක්මනින් සකසා ගත යුතුයි. නමුත් සතියකින් දෙකකින් මැතිවරණයක් පවත්වන්නට බෑ.”

ශ්‍රී ලංකා නිදහස් පක්ෂයේ දේශපාලන මණ්ඩල සභික, මාධ්‍ය ප්‍රකාශක වීරකුමාර දිසානායක

ජනතාව පීඩාවට පත් කරන ප්‍රශ්නවලට තාවකාලිකව විසඳුම් ලබා දීමෙන් අනතුරුව ජනමතයකට ගොස් ජනතාවගේ කැමැත්ත පරිදි ආණ්ඩුවක් පත් කර ගත යුතුයි.

සර්වපාක්ෂික ආණ්ඩුවක් ස්ථාපනය කිරීම සඳහා ශ්‍රී ලනිපය ඉදිරිපත් කළ යෝජනා මාලාව තුළ ද මේ බව පැහැදිලිව සඳහන් කර තිබෙනවා "

දෙමළ ජාතික සන්ධානය, ශ්‍රී ලංකා මුස්ලිම් කොංග්‍රසය ඇතුළු විපක්ෂයේ බහුතරයක් දේශපාලන පක්ෂ වත්මන් පාර්ලිමේන්තුව වහාම විසුරුවා හැර වහා ම මහ මැතිවරණයකට යා යුතු යැයි අවධාරණය කරයි.

ප්‍රජාතන්ත්‍රවාදී වාමාංශික පෙරමුණේ ප්‍රධාන ලේකම් පාර්ලිමේන්තු මන්ත්‍රී වාසුදේව නානායක්කාර…

“රට තුළ මේ වනවිට උද්ගත වෙලා තියෙන තත්ත්වය අනුව මැතිවරණයක් තියන්න හැකියාවක් නැහැ. ඡන්දයක් තිබ්බත් සියයට පනහක්වත් ඡන්ද වැටෙන්නේ නැහැ. ඡන්දයක් තියන්න නම් මිනිස්සුන්ගෙ හිත නිදහස්ව තියෙන්නත් ඕනෑ. මිනිසුන්ගේ හිත නිදහස් නැතිව ඡන්දයක් තියලා ඇති තේරුමක් නැහැ. අනෙක් කාරණය ඉන්ධන නොමැතිව අදාළ නිලධාරීන්ට ඒ ඡන්ද කටයුතු සඳහා යන්න හැකියාවකුත් නැහැ.

කොහොම වුණත් රට සාමාන්‍ය අතට හැරුණට පස්සේ මහජන නියෝජිතයන් තෝරා ගන්න ඡන්දයක් තියන්න ඕනෑ. ඒක තමයි රටක ප්‍රජාතන්ත්‍රවාදී ක්‍රමය.”

මූලාශ්‍රය - මව්බිම

අභහවප්‍රාප්ත හිටපු පාර්ලිමේන්තු මන්ත්‍රී මංගල සමරවීරයන් විසින් වරාය හා සිවිල් ගුවන්සේවා,ජනමාධ්‍ය,නාගරික සංවර්ධන අමාත්‍ය ධූර වලින් පසුව විදෙස් හා මුදල් අමාත්‍ය ධූරයන්ගේ රාජකාරි ආරම්භ කිරීමත් සමගම ඔහු විසින් ගෝලීයකරණය සමග ඉදිරියට ඇදෙන ලෝකයට ලංකාවද සම්බන්ධ කිරීම පිණිස ඉතා වැදගත් රැඩිකල් ඉදිරිගාමී ආන්දෝලනාත්මක තීන්දු තීරණ රාශියක් ගැනින…..

එහි ප්‍රතිඵලයක් ලෙස මුදල් ඇමති ලෙස වහාම මිනිසුන් සතුටින් සිටීම හා ආශ්වාදය විනෝදය වෙනුවෙන් බීර හා වයින් වැනි මෘදු මධ්‍යසාර වල මිළ පහත හෙලින. මක්නිසාදයත් මත්පැන් මිළ අධික වීමත් සමග මහජනයා ප්‍රමිතියෙන් තොර අධික විෂ රසායන සහිත මත්පැන් වලට යොමු වීම වැලැක්වීමත් සංචාක ක්ෂේත්‍රයේ උන්නතිය වෙනුවෙන් සංචාරක ව්‍යාපාරිකයන් හට රුකුලක් වීමටත් ය.

පාර්ලිමේන්තු දේශපාලනයෙන් ඉවත්වූ මංගලගේ " සැබෑ දේශප්‍රේමීන් හා රැඩිකල් මැද" යෝජනා කරළියට….!

පාර්ලිමේන්තු දේශපාලනයෙන් ඉවත්ව සැබෑ දේශප්‍රේමී ශ්‍රී ලාංකික සමාජයක් නිර්මාණය කරමින් තාරුණ්‍යයට එහි වගකීම් පවරමින් ත්‍රාඩ දේශපාලන ක්‍රමය වෙනස් කිරීමේ රැඩිකල් තීරණ වලින් සමන්විත වූ විද්වත් ප්‍රායෝගික සමාජ වැඩපිළිවෙළක් හා යෝජනාවයක් සහිතව ගෝලීයකරණය වෙමින් පවතින ලොව ජයගන්නට සියල්ල සූදානම් කළ මංගල සමරවීරයන් හදිසියේම ශ්‍රී ලාංකික සමාජයට ගුඩ් බායි කියූවේ රටම පමණක් නොව ලොවක් හඬවමිනි..

කෙසේ නමුත් වත්මන් ජනපති රනිල් වික්‍රමසිංහ විසින් මංගල සමරවීරයන් ගේ ඉදිරිගාමී යෝජනාවක් අද යතාර්ථයක් බවට පත්කිරීමට සමත්ව ඇත..සැබවින්ම එය අගය කළ යුතු වටිනා තීරණයක් වනු ඇත… මක්නිසාදයත් සංචාරක ක්ෂේත්‍රයෙන් ඩොලර් උපයාගැනීමට බලාසිටින රටක් ලෙස සංචාරකයන් වෙනුවෙන් ලභාදිය යුතු එහෙත් මේ වනතුරු ඉටුනොවූ මූලික අවශ්‍යතාවක්වන මෘදු මධ්‍යසාර විකිණීමේ නීති රීති ලිහිල් කිරීමය.

තවදුරටත් මෙය දිවයින පුරා සාර්ථකව හා ප්‍රායෝගිකව විශේෂයෙන්ම සංචාරකයින් බහුලව සැරිසරන ප්‍රදේශයන් වෙත ව්‍යාප්ත කිරීමට නම් එකී බලපත්‍ර නිසි අධීක්ෂණක් යටතේ සරළව කුඩා හා මධ්‍ය පරිමාණ සංචාරක ක්ෂේත්‍රයේ නියැලෙන්නන්ට ලබා දීම කාලෝචිත වනු ඇත.

ඊට අදාල නිල නිවේදනය පහතින් දැක්වේ…….

සැබෑ ශ්‍රී ලාංකිකයන් ලෙස හණමිටි අදහස් දුරලා ගෝලීයකරණය වෙමින් හැල්මේ දුවන ලෝකයේ අපට නිසි තැන වෙන් කරගැනීමට කාලෝචිත පරිකල්පනාත්මක රැඩිකල් තීන්දු තීරණ ගනිමින් ඊට අවශ්‍ය පුරවැසි වගකීම ඉටු කරමින් ශිෂ්ඨ සම්පන්න විනය ගරුක නීතිගරුක තෘප්තිමත් සමාජයක් ගොඩනගන්න එක්වෙමු….

සුමුදු මද්දුමආරච්චි,
මිලානෝ,
ඉතාලිය.