පුවත්

ශ්‍රී ලංකාවේ රාජ්‍ය මුල්‍ය කලමණාකරන කටයුතු සදහා තාක්ෂණික සහාය ලබා දිමට ඇමරිකාව එක්සත් ජනපදය එකඟ වි තිබෙන බව අග්‍රාමාත්‍ය මාධ්‍ය ඒකකය වාර්තා කරයි.

අග්‍රාමාත්‍ය මාධ්‍ය ඒකකය මේ සම්බන්ධයෙන් නිකුත්කළ නිවේදනයේ සඳහන් වන්නේ මෙරට සංචාරයක නිරත එක්සත් ජනපද රාජ්‍ය දෙපාර්තමේන්තුවේ දකුණු හා මධ්‍යම ආසියාව සදහා නියොජ්‍ය රාජ්‍ය ලේකම් කෙලී කීඩර්ලින්ග්(kelly keiderling) හා අග්‍රාමාත්‍ය රනිල් වික්‍රමසිංහ අතර පැවැති අද(27) පැවැති සාකච්ඡාව අවස්ථාවේදී මේ බව සඳහන් වූ බවයි .

ඊට අනුව ශ්‍රී ලංකා රජය හා ජාත්‍යන්තර මුල්‍ය අරමුදල අතර සිදු කරන සාකච්ඡා සදහා ද සිය සහායෝගය ලබා දෙන බවත් ඇමෙරිකානු රාජතාන්ත්‍රික කාණ්ඩයම ප්‍රකාශ කර ඇත .

අග්‍රාමාත්‍ය කාර්‍යාලයේ දී පැවති මෙම සාකච්ඡාව සදහා ඇමෙරිකා එක්සත් ජනපදයේ ආසියාව සදහා නි⁣යෝජ්‍ය සහාකාර භාණ්ඩාගාර ලේකම් රොබට් කැප්රොත් (Robert kaproth) , මෙරට ඇමෙරිකා එක්සත් ජනපද තනාපතිනි ජුලි චැන්ංග්( julie chung ) සහාභගිව ඇති බවත් වාර්තා වෙයි .

මිට අමතරව අග්‍රාමාත්‍ය ලේකම් සමන් එකනායක සහා අග්‍රාමාත්‍ය ජ්‍යෙෂ්ඨ උපදේශක ආචාර්ය ආර්.එච්. එස් සමරතුංග ද සහාභගිව සිට ඇත .

රටේ උද්ගත වී තිබෙන උග්‍ර දේශපාලන-ආර්ථික-සමාජ සහ සංස්කෘතික අර්බුදය හමුවේ අතිශය කලකිරීමට පත්ව සිටින විශ්වවිද්‍යාල ශිෂ්‍ය ශිෂ්‍යාවන් ඇතුළු තරුණ තරුණියන් සිය දිවි පරදුවට තබා උත්සහ දරමින් සිටින්නේ කෙසේ හෝ සිය මව්බිම අත හැර විදේශ රටකට පැන ගැනීමට යැයි විශ්වවිද්‍යාල තරුණ තරුණියෝ අවධාරණය කර සිටිති.

මේ තත්ත්වය අතිශය භයානක සහ ඉතා ශෝක ජනක බව පෙන්වා දෙන එම විශ්ව විද්‍යාල ශිෂ්‍ය ශිෂ්‍යාවෝ උද්ගත වී තිබෙන උග්‍ර අර්බුදකාරී තත්ත්වයෙන් රට මුදවා ගෙන, අපේක්ෂා භංගත්වයට පත්ව සිටින තරුණ තරුණියන්ට නව බලාපොරොත්තුවක් ඇති කිරීමට දේශපාලන පක්ෂ, පාට, ජාති සහ ආගම් භේදයෙන් තොරව සියලු දෙනා එකට ඒකරාශී විය යුතු කාලය එළැඹ ඇතැයි ද තරයේ කියා සිටිති.

ශ්‍රී ලංකා තාක්ෂණික විශ්ව විද්‍යාලයේ හේෂාන් සම්පත් තිලකරත්න, ඇන්ටනී අගාෂ් වාස්, ගීත් තාරුක මුණසිංහ, ශ්‍රී ලංකා ගණකාධිකරණ ආයතනයේ, එරන්දි අනුරාධා සුභසිංහ, අකිලා ශේහාරි දුලාන්ජලී, ශ්‍රී ජයවර්ධන පුර විශ්ව විද්‍යාලයේ අචින්ත මදුර සමරසිංහ, සමිත් ඉසුරංග, ලුම්බිණී ප්‍රමෝධ්‍යා, නිලන්ති මානෙල්, සහ හේමන්ත තුෂිත කුමාර යන විශ්ව විද්‍යාල තරුණ තරුණියන් මේ බව කියා සිටියේ, එක්සත් ජාතික පක්ෂයේ කොළඹ දිස්ත්‍රික් නායක සහ හිටපු මුදල් අමාත්‍ය රවී කරුණානායක මහතා සමග කොළඹ දී පැවැත් වූ විශේෂ සාකච්ඡාවකදීය.

විදේශ විනිමය උපයා ගනිමින් රාජ්‍ය ආදායම ද වැඩි කර ගෙන රටේ උද්ගත වී තිබෙන උග්‍ර ආර්ථික අර්බුදය විසඳා ගැනීම සඳහා ආසියාවේ හොඳම මුදල් ඇමති ලෙස සිය දැනුම, අවබෝධය, පළපුරුද්ද, අත්දැකීම සහ නායකත්වය රට-ජනතාව වෙනුවෙන් ලබා දෙන ලෙස එම ශිෂ්‍ය ශිෂ්‍යාවන් හිටපු අමාත්‍ය රවී කරුණානායකගෙන් එහිදී ඉල්ලා සිටියේය.

එම ශිෂ්‍ය ශිෂ්‍යාවන්ගේ අදහස් සහ යෝජනාවලට සාවදානව ඇහුම්කන් දුන් රවී කරුණානායක හිටපු අමාත්‍යවරයා , රට-ජනතාව වෙනුවෙන් ඕනෑම බරක් කරට ගෙන ඇපකැප වී ක්‍රියා කිරීමට තමා සූදානම් බව ද, රට-ජනතාව උදෙසා වන සිය වගකීම, යුතුකම සහ කාර්ය භාරය කිසිසේත් පැහැර හැරීමට ක්‍රියා නොකරන බව ද අවධාරණය කර සිටියේය.

මේ සාකච්ඡාවෙන් පසුව අදහස් දැක්වූ ශ්‍රී ලංකා තාක්ෂණික විශ්ව විද්‍යාලයේ හේෂාන් සම්පත් තිලකරත්න, ඇන්ටනී අගාෂ් වාස්, ගීත් තාරුක මුණසිංහ, ශ්‍රී ලංකා ගණකාධිකරණ ආයතනයේ, එරන්දි අනුරාධා සුභසිංහ, අකිලා ශේහාරි දුලාන්ජලී, ශ්‍රී ජයවර්ධන පුර විශ්ව විද්‍යාලයේ අචින්ත මදුර සමරසිංහ, සමිත් ඉසුරංග, ලුම්බිණී ප්‍රමෝධ්‍යා, නිලන්ති මානෙල්, සහ හේමන්ත තුෂිත කුමාර යන ශිෂ්‍ය ශිෂ්‍යාවෝ මෙසේ පැවැසූහ.

1994 සිට මේ දක්වා වූ කාලය ඇතුළත දී චන්ද්‍රිකා බණ්ඩාරනායක, ආචාර්ය සරත් අමුණුගම, කේ.එන් චොක්සි, මහින්ද රාජපක්ෂ, රවී කරුණානායක, මංගල සමරවීර, බැසිල් රාජපක්ෂ සහ ජනාධිපති නීතීඥ අලි සබ්රි ඇතුළු පිරිසක් මේ රටේ මුදල් අමාත්‍ය ධූර දරා තිබෙනවා.

එහෙත් රවී කරුණානායක මහතා හැරුණු කොට අනෙකුත් මුදල් ඇමතිවරුන් කිසිවෙකු සිය වගකීම, රාජකාරිය, කාර්ය භාරය සහ යුතුකම සාධනීය ලෙස රට වෙනුවෙන් ඉටු කළා කියා ජාත්‍යන්තර සම්මානයට පාත්‍ර වී නොමැති අතර ජාතික වශයෙන් ද ඇගයීමකට ලක් වී නැහැ.

කෙසේ නමුත් 2017 වර්ෂයේ දී ආසියානු ශාන්තිකර කලාපයේ හොඳම මුදල් අමාත්‍යවරයා ලෙස රවී කරුණානායක මහතා තෝරා පත් කර ගනිමින්, ජාත්‍යන්තර "The Banker" සඟරාව නිවේදනය කර සිටියේ, "ගෙවුම් ශේෂ අර්බුදයක් හේතුවෙන් මතු වී තිබුණු මුල්‍ය අර්බුදය වළක්වාලීමටත්, රටෙහි මුදල් සංචිතය යථා තත්ත්වයට පත් කර ගැනීමටත්, එමගින් විදේශ ආයෝජකයින් කෙරෙහි විශ්වාසය නැවත ගොඩනගා ගැනීමටත් සමත් වීම වෙනුවෙන්" ඔහුට එම සම්මානය ලබා දෙන බවයි.

රජයේ බදු ආදායම දෙස අවදානය යොමු කිරීමේදී 2014 වර්ෂයේදී රුපියල් බිලියන 1050 ක් වූ බදු ආදායම 2015 වර්ෂයේදී රුපියල් බිලියන 1355ක් දක්වා, රුපියල් බිලියන 305කින් එනම් 30%කින් පමණ ඉහළ නංවා ගැනීමට සමත් වූ රවී කරුණානායක මහතා 2014 වර්ෂයේදී දී රුපියල් බිලියන 256ක් වූ නිෂ්පාදන ආශ්‍රිත බදු 2015 වර්ෂයේදී රුපියල් බිලියන 497ක් දක්වා, රුපියල් බිලියන 241 කින් ඉහළ නංවා ගැනීමට සමත් වුණා.

රජයේ ආදායම සහ දළ දේශීය නිෂ්පාදිතය අතර අනුපාතය දශක ගණනාවක් මුළුල්ලෙහි පහළ අගයක් ගැනුණු අතර එම අගය දිගින් දිගටම අඩු වෙමින් පැවතීම ශ්‍රී ලංකාවේ රාජ්‍ය මුල්‍ය ගැටලු බොහොමයකට හේතු වී තිබුණා. මෙලෙස එම අනුපාතය දිගින් දිගටම පහළ වැටීමට හේතු වූයේ රජයේ ආදායම පහළ යාමයි.

2000 වර්ෂයේදී 17.2%ක් ලෙස පැවති එම අගය 2014 වර්ෂයේදී 11.6%ක් දක්වා පහළ වැටුණා. 2015 වර්ෂයේදී එම අගය 13.3%ක් ලෙස ඉහළ නංවා ගැනීමට සමත් වූ රවී කරුණානායක මහතා 2016 වර්ෂයේදී එම අගය 14.1%ක් දක්වා ඉහළට එසෙව්වා. අනතුරුව නව මුදල් අමාත්‍යවරයෙකු පත් කිරීමත් සමගම මෙම අනුපාතය නැවත පහළ යාම ආරම්භ වූ අතර 2020 වර්ෂයේදී එම අගය නැවතත් 9.6% දක්වා අඩු වුණා.

2014 වර්ෂයේදී නිෂ්පාදන බදු ආශ්‍රිත මත්පැන් බදු රුපියල් බිලියන 69ක් වූ අතර 2015 වර්ෂයේදී දී එම ප්‍රමාණය රුපියල් බිලියන 105 ක් දක්වා ද, 2014 වර්ෂයේදී සිගරට් ආශ්‍රිත බදු රුපියල් බිලියන 57ක් වූ අතර 2015 වර්ෂයේදී එම බදු ආදායම රුපියල් බිලියන 80 දක්වා වැඩි කර ගැනීමට ඔහුට හැකි වුණා. මේ ක්‍රියා මාර්ගවලින් රුපියල් බිලියන 60ක පමණ ආදායමක් උපයා ගැනීමට සමත් වූ රවී කරුණානායක මහතා බදු දැල තාක්ෂණිකව එළා ප්‍රසාරණය කරමින් ධනවතුන්ගෙන් වැඩිපුර බදු ලබා ගෙන දුප්පතුන්ට විශාල වශයෙන් සහන දුන්නා.

මේ අතර ශ්‍රී ලංකාවේ උද්ගත වී තිබෙන වත්මන් උග්‍ර ආර්ථික අර්බුදය විසඳීම සඳහා මූල්‍ය ප්‍රතිපත්ති දැඩි කරමින් ප්‍රතිපත්ති පොලී අනුපාත සහ බදු මුදල් තව දුරටත් වැඩි කර නම්‍යශීලී විනිමය අනුපාත අනුගමනය කළ යුතු බව ජාත්‍යන්තර මූල්‍ය අරමුදල (IMF) අවධාරණය කර සිටින බව අප කවුරුත් දන්නවා.

ජාත්‍යන්තර මූල්‍ය අරමුදල (IMF) මේ කියන්නේ තාක්ෂණික සහ ප්‍රායෝගික උපාය උපක්‍රම භාවිතා කරමින් රවී කරුණානායක මහතා රටේ ආර්ථිකය එදා මෙහෙය වූ ආකාරයට මෙහෙය වන ලෙසයි. මහා බැංකු බැඳුම්කර චෝදනාවක් එල්ල කරමින් දේශපාලන වශයෙන් පරමාණු බෝම්බයක් ගැසුවේ රටේ ආර්ථිකය ගොඩනැගූ සහ ජාත්‍යන්තරයේ ගෞරව සම්මානයට පාත්‍ර වූ එහෙව් රවී කරුණානායකටයි.
ඇත්තටම මේ ක්‍රියාදාමය රවී කරුණානායක මහතාට එරෙහි කුමන්ත්‍රණයක් බව ඕනෑම ළදරුවෙකුට වුණත් තේරෙන අතර ඔහුට එරෙහිව පවරා ඇති මේ බැඳුම්කර නඩුව මේ වන විට පවත්වා ගෙන යාමටත් නොහැකි තත්ත්වයක් උදා වී තිබෙන බව කිව යුතුයි.

ශ්‍රී ලංකා මහා බැංකුව එවකට පැවතියේ රවී කරුණානායක මහතා යටතේ නොව තමා යටතේ බව අග්‍රාමාත්‍ය රනිල් වික්‍රමසිංහ මහතා මේ වන විට පැහැදිලිවම ප්‍රකාශ කරමින් එම සත්‍ය පිළි ගෙන තිබෙනවා. එමෙන්ම සියලුම රාජ්‍ය සහ වාණිජ්‍ය බැංකු පැවැතියේ ද රවී කරුණානායක මහතා යටතේ නොව කබීර් හෂීම් මහතා යටතේයි.

එවකට ජනාධිපති මෛත්‍රීපාල සිරිසේන සහ නීතිපති දප්පුල ද ලිවේරා රවී කරුණානායකට නඩු පවරමින් ඔහුට එළව එලවා ගැහුවේ හොඳම මුදල් ඇමති ලෙස පිදුම් ලැබීමත් සමග ද..?

මේ රටේ ජනතාව දැන්වත් මේ ප්‍රශ්න දෙස විචාර බුද්ධියෙන් බලා නිවැරදි තීන්දු තීරණ ගත යුතු අතර මේ ප්‍රශ්න සඳහා රට-ජනතාව හමුවේ ප්‍රසිද්ධියේ උත්තර ලබා දෙමින් රවී කරුණානායක මහතා ද සැබෑ හොරුන් කවුරුන්ද යන්න පිළිබඳව කරුණු හෙළි කළ යුතුයි.

ඉන්ධන මිල ඉහළ දැමීම සමග දෙවැනි කිලෝමීටරය සඳහා අය කළ රුපියල් 80 ක මුදල රුපියල් 90 දක්වා, ඉහළ දැමීමට සමස්ත ලංකා ත්‍රිරෝද රථ රියදුරන්ගේ වෘත්තීය සමිතියේ සභාපති පවසයි.

සමස්ත ලංකා ත්‍රිරෝද රථ රියදුරන්ගේ වෘත්තීය සමිතියේ සභාපති ලලිත් ධර්මසේකර තවදුරටත් සඳහන් කර සිටියේ දෙවැනි කිලෝමීටරය රුපියල් 10.00 කින් වැඩි කළත් පළමු කිලෝමීටර සදහා අයකළ රුපියල් 100 යේ ගාස්තුව ඉහළ නොදැමූ බවය.

එසේම පවතින තත්ත්වය අනුව ත්‍රිරෝද රථ සඳහා ස්ථිර ගාස්තුවක් නියම කිරීම සදහා බලධාරීන් ඉක්මණින් මැදිහත් වියයුතු බවත් ඔහු පැවසීය .

ශ්‍රී ලංකා පොදුජන පෙරමුණේ ජාතික සංවිධායක හිටපු අමාත්‍ය බැසිල් රාජපක්ෂ, දැනට ඔහුට හිමි ද්විත්ව පුරවැසිභාවයෙන් ඉවත්වීමට තීරණය කර ඇති බව ,සති අන්ත 'දේශය' පුවත්පත වාර්තා කරයි.

එහි සඳහන් ආකාරයට හිටපු පාර්ලිමේන්තු මන්ත්‍රී බැසිල් රාජපක්ෂ තමන්ගේ තීරණය පසුගියදා පොහොට්ටුව පක්ෂයේ ජ්‍යෙෂ්ඨයන් හමුවේ හෙළිදරව් කර ඇත.

ද්විත්ව පුරවැසියන්ට පාර්ලිමේන්තු මන්ත්‍රී ධූර දැරිය නොහැකි වන විධිවිධාන ඇතුළත්, ආණ්ඩුක්‍රම ව්‍යවස්ථාවේ 21 වැනි සංශෝධනය කැබිනට්ටුවට ඉදිරිපත් කිරීමට තීන්දු කිරීමත් සමඟ, බැසිල් රාජපක්ෂ තමන් දැරූ ජාතික ලැයිස්තු මන්ත්‍රී ධූරයෙන් ඉවත් විය.

ඊට හේතු වුනේ, ඔහු ශ්‍රී ලංකාවේ සහ අමෙරිකා එක්සත් ජනපදයේ ද්විත්ව පුරවැසියකුවීමය.

කෙසේ වුවත් අනතුරුව , සිය පක්ෂයේ ජ්‍යෙෂ්ඨයන් සහ ප්‍රාදේශීය සංවිධායකවරුන් සමඟ කරන ලද , දීර්ඝ සාකච්ඡාවකට පසුව බැසිල් ඇමරිකානු පුරවැසිභාවය ඉවත්කරගෙන, මෙරට දේශපාලනයේ දිගටම ඉන්න තීන්දු කර ඇත .

දේශපාලන ආරංචි මාර්ග සඳහන් කරන ආකාරයට පක්ෂයේ ප්‍රධානීන් අතර ඇති අවබෝධය වන්නේ බැසිල් ගේ ඉලක්කය ඊළඟ (2024) ජනාධිපතිවරණය බවයි.

ඒ හේතුවෙන් ඔහු මේ වන විට පක්ෂයේ සංවිධාන කටයුතු නැවත අරඹා ඇති බවත් වාර්තා වෙයි .

දේශපාලන ආරංචි මාර්ග වැඩිදුරටත් සඳහන් කර ඇත්තේ පසුගිය වතාවේ මෙන්ම මෙවරත් පළාත් පාලන ආයතන මැතිවරණය ජයගෙන 2024 සඳහා මුහුණදීම බැසිල්ගේ මෙවරත් උත්සාහය වී ඇති බවයි. පළාත් පාලන මැතිවරණය 2023 මාර්තු මාසයේ පැවැත්වීමේ සූදානමක් ගැනත් තොරතුරු වාර්තා වෙයි .

ශ්‍රී ලංකන් ගුවන් සේවය පවත්වාගෙන යෑමේ අසීරුතා ඇති වී තිබීම හේතුවෙන් මැදපෙරදිග රටකට ලබාදීම සඳහා රජයේ අවදානය යොමුවී ඇති බව දේශපාලන ආරංචි මාර්ග සඳහන් කරයි.

ශ්‍රී ලංකන් ගුවන් සේවය සඳහා ඉන්ධන වැඩි වශයෙන් අවශ්‍ය කෙරෙන ආයතනයක් වන බැවින් මැදපෙරදිග වැනි තෙල් පවතින රටකට ලබාදුනහොත් එය ඉතා පහසුවෙන් පවත්වාගෙන යෑමට හැකියාව ලැබීම හේතුවෙන් ඒ ගැන වැඩි අවධානයක් රජයේ යොමුවී ඇති බවත් එම ආරංචි මාර්ග පවසයි .

එසේම රුපියල් කෝටි තිස් එක් දහස් පන් සියයක පමණ ණය ප්‍රමාණයක් සහිතව ශ්‍රී ලංකන් එයාර් ආයතනය පවත්වාගෙන යන්නේ ණය කන්දරාවක් යටතේ හෙයින් මේ ආයතනය මේ රටේ ජනතාවට තවදුරටත් බරක් නොවනු පිණිස ප්‍රතිව්‍යුහගත ගත කිරීම මේ වසරේදීම අවසන් කළ යුතුව ඇතැයි වරාය,නාවික හා ගුවන් සේවා අමාත්‍ය නිමල් සිරිපාල ද සිල්වාගේ ද ස්ථාවරය වී ඇති බවත් වාර්තා වෙයි .

ඊට අදාළව ශ්‍රී ලන්කන් ප්‍රතිව්‍යුහගත කිරීම සම්බන්ධයෙන් ලැබී ඇති විවිධ විකල්පයන් හා ගැටලු පිළිබඳ විස්තරාත්මක වාර්තාවක් තමාට සති දෙකක් ඇතුළත ලබාදෙන ලෙස අමාත්‍යවරයා විසින් ශ්‍රී ලංකන් ගුවන් සමාගමේ අධ්‍යක්ෂ මණ්ඩලයට දැනුම්දී ඇතැයිද වාර්තා වෙයි .

මෙම ප්‍රතිව්‍යුහගත කිරීමේ වැඩපිළිවෙළේදී කිසිදු සේවකයෙකු බලෙන් ඉවත් කිරීමට ඉඩ නොදෙන බවත් ඔවුන්ට ගෞරවනීය ස්වර්ණමය වන්දි ප්‍රතිලාභයක් ලැබෙන පරිදි ස්වේච්ඡාවෙන් විශ්‍රාම ගැන්වීම යෝජනා කරන ලෙස අමාත්‍යවරයා ශ්‍රී ලංකන් පාලනාධිකාරියට දැනුම්දුන් බවත් දැනගන්නට ඇත .

වාර්ෂික උද්ධමන අනුපාතය අනුව ශ්‍රී ලංකාව ලෝකයේ දෙවන ස්ථානයට පත්ව ඇත .

මේ බව මහාචාර්ය ස්ටීව් හැන්කේ සඳහන් කර ඇත්තේ ඇමරිකාවේ ජොන් හොප්කින්ස් විශ්වවිද්‍යාලයේ ‘හැන්කේ උද්ධමන දර්ශකය’ යාවත්කාලීන කරමිනි .

ඊට අනුව ශ‍්‍රි ලංකාවට වඩා උද්ධමනයක් පෙන්වන්නේ සිම්බාවේ රාජ්‍යය පමණි.

ඊට අදාළ දර්ශකය පහත දැක්වෙයි .

රාජ්‍ය ආයතන ප්‍රධානීන් විසින් නිලධාරීන් සේවා ස්ථානය වෙත කැඳවීම සම්බන්ධයෙන් තීරණය කිරීමේදී ආයතනයේ එදිනෙදා රාජකාරි කටයුතු බිඳ වැටීමකින් තොරව පවත්වාගෙන යෑමට අත්‍යවශ්‍ය අවම කාර්ය මණ්ඩලය පමණක් සේවා ස්ථානය වෙත කැඳවීමට කටයුතු කරන ලෙස රාජ්‍ය පරිපාලන වන නව චක්‍රලේඛය අද (26 ) නිකුත් කර ඇත.

රාජ්‍ය පරිපාලන ස්වදේශ කටයුතු, පළාත් සභා හා පළාත් පාලන අමාත්‍යාංශයේ ලේකම් එස්.එම්. පී. කේ මායාදුන්නේ විසින් මෙය නිකුත්කර ඇත .

ඉන්ධන පිරිමසා ගැනෙන අයුරින් නිලධරයන්ගේ ගමන් බිමන් සීමා කරන ලෙසත් සියලු රැස්වීම් හා සාකච්ඡා මාර්ගගත ක්‍රමයට පවත්වන ලෙසත් එහි සඳහන් කර ඇත.

අදාළ චක්‍රලේඛය පහත දැක්වෙයි .

ඉන්ධන මිල දරාගත නොහැකි ආකාරයට ඉහළ යාම හේතුවෙන් බත් පාර්සලය ඇතුළු සියලු ආපන ශාලා ආහාරවල මිල ගණන් 10%කින් ඉහළ දමන බව ආපන ශාලා හිමියන්ගේ සංගමයේ සභාපති අසේල සම්පත් පවසයි.

ඔහු මේ බව සඳහන් කර සිටියේ අද ( 26) පැවති මාධ්‍ය හමුවකදී අදහස් දක්වමින් ය.

මිල සංශෝධනයක් සිදු නොකළහොත් මේ වන විට 60%ක් වැසී ඇති ආපන ශාලා සම්පූර්ණයෙන් ම වසා දැමීමට සිදු වන බවත් ඔහු පැවසීය .

බේකරි නිෂ්පාදන මිල විවෘතව තබයි !

මේ අතර සමස්ත ලංකා බේකරි හිමියන්ගේ සංගමයේ සභාපති එන්. කේ. ජයවර්ධන පවසන්නේ ඉන්ධන මිල ඉහළ දැමීමත් සමඟ බේකරි නිෂ්පාදනවල මිල පිළිබඳව කිසිදු විශේෂ තීරණයක් නොගන්නා බවත් බේකරි නිෂ්පාදන වල මිල තවදුරටත් වැඩි කිරීමේ හැකියාවක් නොමැති බවත් ය.

බේකරි නිෂ්පාදනවල මිල අදාල බේකරි නිෂ්පාදකයා දරනු ඇති බවත් තවදුරටත් මිල වැඩි කිරීමේ හැකියාවක් බේකරි හිමියන්ට නොමැති බවත් ඔහු වැඩිදුරටත් පවසා ඇත .

"තෙල් - ගෑස් අර්බුදයේ ඉදිරි සතිය " මැයෙන් හිටපු ආණ්ඩුකාර රජිත් කීර්ති තෙන්නකෝන් සිය ෆේස්බුක් ගිනුමේ මෙරට ඉදිරිය සම්බන්ධයෙන් බරපතළ මෙන්ම බියකරු පුරෝකථනයක් සිදුකර ඇත .

අදාළ ෆේස්බුක් සටහන පහත දැක්වෙයි .

තෙල් - ගෑස් අර්බුදයේ ඉදිරි සතිය !

වරාය, විදුලිබල මණ්ඩලය, හමුදාව, බස් ඩිපෝ ඇතුළු අත්‍යවශ්‍ය සේවාවන්ට හැර තෙල් සංස්ථාවෙන් තෙල් තොග නිකුත් කිරීම ඇණහිට ඇත.

රටේ අවම දෛනික ඉන්ධන අවශ්‍යතාව ඩීසල් 6000 MT ක් හා පෙට්‍රල් 3500 MT කි.

දැනට කොළොන්නාව, මුතුරාජවෙල ඉතිරිව ඇති තෙල් තොගය ඩීසල් 10,000 MT, 92 පෙට්‍රල් 1000 MT, 95 පෙට්‍රල 4000 MT කි. තෙල් බෙදාහරින මධ්‍යස්ථාන 11 ම වසා දමා ඇති ගානය.

මේ දිනවල ලංකාවේ විදුලි ජනනයෙන් 25% ක් සිදුවන්නේ ඩීසල්/ඉන්ධන මගිනි. දැනටමත් පොදු ප්‍රවාහණ සේවා සැලකිය යුතු ප්‍රමාණයකින් අඩපන වී ඇත.

මඩකලපුව - අම්පාර ගොයම් කැපීම ඇරඹී ඇත. අස්වනු නෙලන්නට ඩීසල් නැත. වියළි කලාපයේ වගාවන්ට වතුර මෝටර සඳහා භුමිතෙල්, ඩීසල් ඇත්තේම නැති ගාන ය. හැදෙන ගෙඩිය, අලය, කරල වෙළෙඳපොලට ගෙනියන්නට ක්‍රමයක් ඇත්තේම නැති ගානය.

කෘෂිකර්ම, අධ්‍යාපන, රාජ්‍ය පරිපාලන අමාත්‍යාංශ, පළාත් සභා හෙට අනිද්දා අලුතෙන් ගැසට්, නිවේදන නිකුත් කරනු ඇත.

රටට එක තැන නැවතීම වැලැක්වීමට ආණ්ඩුවට හෝ කිසිදු වැඩපිළිවෙළක් නැත. විපක්ෂය -- රටේ විකල්ප ආණ්ඩුව කියා දෙයක් නැත. සමාජ බලවේග කැඩි බෙදී වෙන්වී ඇත.

ගෑස් දැනටම නැත. ඉන්ධන තව ටික දවසකින් නැත්තටම නැතිවනු ඇත. විදුලිය කැපෙනු ඇත. ඇමතිවරු තව තව බොරු කියනු ඇත.

රැකියා ලක්ෂ 30 ක් අහිමි වනු ඇත.

පණ බේරාගන්න උත්සහ කරන්න!

රජිත් කීර්ති තෙන්නකෝන්

බස් ගාස්තු ලබන ජූලි මස 1 වැනිදා ඉහළ දැමීමට නියමිත බව ජාතික ගමනා ගමන කොමිසමේ අධ්‍යක්‍ෂ ජනරාල් ආචාර්ය තිලාන් මිරැන්ඩා පැවසීය.

වාර්ෂික අනිවාර්ය බස් ගාස්තු සංශෝධනයක් ලබන ජූලි මස 1 වැනිදාට යෙදී තිබීම නිසා ඉන්ධන මිල සහ අමතර කොටස් මිල ඉහළ යෑම සහ ඩොලරයේ අගය ඉහළ යෑම ආදි රැසක් මේ වන විට ගැලපීම් කරමින් සිටින බවත් අමාත්‍යවරයාා සහ බස් සංගම් නිලධාරීන් අතර අනිද්දා (28) විශේෂ රැස්වීමක් පැවැත්වීමට නියමිත බවත් ඔහු වැඩිදුරටත් කීය.

ඉන්ධන අර්බුදය දිගටම !

මේ අතර අමාත්‍යංශයේ පැවති මාධ්‍ය හමුවකදී අදහස් දක්වමින් විදුලි බල සහ බලශක්ති අමාත්‍ය කාංචන විජේසේකර පවසා ඇත්තේ දැනට පවතින ඉන්ධන අර්බුදය තවත් වසරක් පමණ කාලයක් හෝ ඊට වැඩි කාලයක් පවතිනු ඇති බවය.

එම කාලය අතරතුර ඉඳහිට ඉන්ධන පෝලිමේ නැති වනු ඇති නමුත් යලි ඇති වනු ඇති බවත් අමාත්‍යවරයා පවසා ඇත .

දැනට මෙරටට මාසිකව ඉන්ධන ආනයනය සදහා ඩොලර් මිලියන 600 ක් පමණ ප්‍රමාණයක් වැය වූවත් එය අනිවාර්යෙන්ම මිලියන 300 දක්වා හරි අඩකින් අඩු කිරීමට සිදුවනු ඇති බවත් ඔහු සඳහන් කර තිබේ.

එහිදී යම් යම් අසීරුතාවන්ට මුහුණ දීමට සිදුවනු ඇති බවද පැවසූ ඔහු ඉන්ධන බෙදා හැරීම සඳහා ටෝකන් ක්‍රමයක් යුද හමුදාව මැදිහත් වී හෙට දිනයේ සිට ආරම්භ කරන බවද අමාත්‍යවරයා සඳහන් කර ඇත .

මෑතකදී මෙරටට ඉන්ධන ගෙන්වීම සදහා ණයවර ලිපියක් විවෘත කරන ලද නමුත් එය ප‍්‍රතික්‍ෂෙප වූ බවත් ඊට හේතු වූයේ රුසියානු නැවක් වීම නිසා බවත් අමාත්‍ය කාංචන විජේසේකර වැඩිදුරටත් සඳහන් කර ඇත .

වත්මන් මහ බැංකු අධිපතිවරයා වෙනුවට තමන් විසින් වෙනත් අයකු එම ධුරයට පත් කරන බවට පළ වී ඇති ඕපාදුප තරයේ ප්‍රතික්ෂේප කරන බව අග්‍රාමාත්‍ය රනිල් වික්‍රමසිංහ පවසයි.

 ඊයේ (25) වෘත්තිකයින් පිරිසක් හමුවූ අවස්ථාවේදී අග්‍රාමාත්‍යවරයා මේ බව අවධාරණය කළ බව අග්‍රාමාත්‍ය කාර්යාලයේ ප්‍රකාශකයකු පැවසිය.

මහ බැංකු අධිපති ආචාර්ය නන්දලාල් වීරසිංහගේ වත්මන් ධූර කාලය ජුනි 30 වැනිදායින් අවසන් වීමට නියමිත නමුත් ඒ අනුව එම ධුරයට වෙනත් අයකුගේ නමක් යෝජනා කරන්නේද යන්න පිළිබඳව මෙතෙක් සාකච්ඡාවක් පවත්වා නොමැති බවත් අග්‍රාමාත්‍යවරයා පවසා ඇත.

අගමැතිවරයාගේ අවධානය මුළුමනින්ම යොමු වී ඇත්තේ ආර්ථිකය ස්ථාවර කිරීම කෙරෙහි බවත් එම ප්‍රකාශකයා වැඩිදුරටත් කියා සිටියේය.

මේ අතර බැසිල්වාදියකු ලෙස ප්‍රසිද්ධ පාර්ලිමේන්තු මන්ත්‍රී ජගත් කුමාර අග්‍රාමාත්‍යවරයා වෙත ලිපියක් යොමුකර වත්මන් මහ බැංකු අධිපති ඉවත් නොකරන ලෙස ඉල්ලා ඇත.

ප්‍රතික්ෂේපිත චීන කාබනික පොහොර නැව වෙනුවට අලුත් පොහොර නැවක් මෙරටට ලබා දීමට නොහැකි බව චීනයේ චින්ඩාඕ සීවින් බයෝටෙක් සමාගම දැනුම් දී ඇතැයි කෘෂිකර්ම අමාත්‍යංශයේ ජ්‍යෙෂ්ඨ නිලධාරියෙක් උපුටා දක්වමින් ඉරිදා ‘මව්බිම’ වාර්තා කර ඇත .

අදාළ පුවත අනුව එම සමාගමේ මෙරට නියෝජිත සමාගම හරහා ඒ බව දැනුම්දී ඇත .

මව්බිම පුවත වැඩිදුරටත් මෙසේද සඳහන් කර ඇත .

පසුගිය දා කෘෂිකර්ම අමාත්‍යංශයේ පැවැති සාකච්ජාවකදී එම සමාගමේ ශ්‍රී ලංකා නියෝජිත සමාගම මේ පිළිබඳව දැනුම්දී ඇති අතර යම් හෙයකින් එම පොහොර තොග භාර නොගන්නේ නම්, ඒ වෙනුවෙන් වන්දියක් පවා ගෙවීමට සිදුවනු ඇතැයි අනතුරු අඟවා තිබෙන බව ද පැවසේ.

ප්‍රතික්ෂේප වූ පොහොර තොග වෙනුවට නව පොහොරක් ලබාදිය නොහැකි බව එම හමුවේදී චීන සමාගමේ මෙරට නියෝජිතයා දැනුම් දී ඇති අතර චීන සමාගම ලබා දෙන පොහොර තොගය භාර නොගෙන ප්‍රතික්ෂේප කරන්නේ නම් එම සමාගම අපකීර්තියට පත් කළා සේ සලකන බව ත් ඔවුහු පෙන්වාදී ඇතැයි කෘෂිකර්ම අමාත්‍යංශයේ ජ්‍යෙෂ්ඨ නිලධාරියා පැවැසීය.

ඒ අයුරින් චීන සමාගම අපකීර්තියට පත් කිරීමට වන්දි ලෙස අමෙරිකානු ඩොලර් මිලියන 1.5ක් ගෙවීමට සිදුවනු ඇතැයි ද මෙරට නියෝජිත සමාගම දන්වා තිබෙන බව එම ජේ‍යෂ්ඨ නිලධාරියා සඳහන් කළේ ය.

එම වන්දි මුදල නොගෙවන්නේ නම්, එය දෙරට අතර පවතින මිත්‍රශීලී ගනුදෙනු සඳහා බලපෑමක් ඇති කරනු ඇතැයි ද චීන පොහොර සමාගමේ දේශීය නියෝජිත සමාගම අනතුරු අඟවා ඇතැයි ඔහු තවදුරට ත් පැවැසීය.

ප්‍රතික්ෂේපිත චීන පොහොර නැවට ගෙවිය යුතු අමෙරිකානු ඩොලර් මිලියන 6.7ක මුදල ගෙවා අවසන් අතර මේ වන තුරුත් ගෙවූ මුදලට සරිලන අයුරින් කිසිදු පොහොර තොගයක් මෙරටට ලැබී නැතැයි කෘෂි ක්ෂේත්‍රයේ විශේෂඥයෝ චෝදනා කරති.

ඒ සඳහා අධිකරණයේ පැවරුණු නඩු කටයුත්තේදී එළැඹුණු සමථකරණයට අනුව ප්‍රසිද්ධ කළ යුතු ඒකාබද්ධ නිවේදනය පවා මේ වනතෙක් නිකුත් නොකිරීම සැක සහිත බව ද ඔවුහු පෙන්වා දෙති.

ඇමරිකා එක්සත් ජනපද භාණ්ඩාගාර දෙපාර්තමේන්තුව සහ රාජ්‍ය දෙපාර්තමේන්තුව නියෝජනය කරමින් නිලධාරීන් පිරිසක් හෙට (26) සිට ලබන 29 දක්වා මෙරට සංචාරය කිරීමට නියමිත බව වාර්තා වෙයි .

ඇමරිකානු තානාපති කාර්යාලය සඳහන් කරන ආකාරයට මෙම දූත පිරිසට ආසියාව සඳහා වන නියෝජ්‍ය සහකාර භාණ්ඩාගාර ලේකම් රොබර්ට් කැප්‍රොත්, දකුණු හා මධ්‍යම ආසියාව සඳහා වන නියෝජ්‍ය සහකාර රාජ්‍ය ලේකම් කෙලී කීඩර්ලින් ද ඇතුළත් වෙයි.

ඔවුන්ගේ සංචාරය අතරතුර මෙරට දේශපාලන නියෝජිතයින්, ආර්ථික විශේෂඥයින්, ජාත්‍යන්තර සංවිධාන ද හමු වී සාකච්ඡා කිරීමට සැළසුම් කර ඇති බව වැඩිදුරටත් වාර්තා වෙයි .

මේ සම්බන්ධයෙන් පසුගියදා අග්‍රාමාත්‍ය රනිල් වික්‍රමසිංහ ද පාර්ශ්වය පැවසීය.

මෙරට සිටින හෝ නේවාසික පුද්ගලයෙකුට සිය සන්තකයේ තබා ගත හැකි විදේශ ව්‍යාහාර මුදල් ප්‍රමාණය සීමා කර තිබෙන බව ශ්‍රී ලංකා මහ බැංකුව පවසයි .

ඊට අනුව ඇමරිකානු ඩොලර් 15000 සිට 10000 දක්වා එම විදේශ ව්‍යාහාර මුදල් ප්‍රමාණය අඩු කර ඇත.

ඊට වැඩි විදෙස් මුදල් විදේශ ව්‍යාපාර මුදල් ගිණුමක තැන්පත් කිරීමට හෝ බලපත්‍ර ලාභී වාණිජ බැංකුවකට විකිණීම සිදු කළ යුතු බවත් ශ්‍රී ලංකා මහ බැංකුව පවසයි .

ඒ සඳහා ඉකුත් 16වන දින සිට වැඩ කරන දින 14ක පොදු සමා කාලයක් ලබා දෙන බවත් ,පොදු සමා කාලය අවසානයේදී මෙම නියමය උල්ලංඝණය කරමින් තමා සංතකයේ විදේශ ව්‍යවහාර මුදල් තබා ගන්නා පුද්ගලයන්ට එරෙහිව විදේශ විනිමය පනතේ විධිවිධාන අනුව පියවර ගත හැකි බවද ශ්‍රී ලංකා මහ බැංකු වැඩිදුරටත් සඳහන් කර ඇත .

ඉන්දීය අදානි සමාගමේ දේශීය නියෝජිතයා හිටපු අමාත්‍ය නාමල් රාජපක්ෂදැයි බරපතළ සැකයක් මතුව ඇති බව කෝප් කමිටු සාමාජික පාර්ලිමේන්තු මන්ත්‍රී එස්.එම්. මරික්කාර් පවසයි.

විදුලිබල මණ්ඩලයේ හිටපු සභාපති එම්.එම්.සී. ෆර්ඩිනැන්ඩුගේ රහස් ලිපියකින් එවැනි සැකයක් මතුවන බවත් ඔහු පැවසූ අතර ඒ මාධ්‍ය හමුවකදී අදහස් දක්වමින් ය.

”ඇයි මේ ලියුම නාමල් රාජපක්ෂ ට කොපි කරන්නේ.? එතකොට කවුද අදානිගේ local agent ලංකාවෙ? එතුමා මේ සාකච්ඡාවට සම්බන්ධ වෙන්නේ මොකටද? ” යනුවෙන් ද එහිදී මන්ත්‍රීවරයා ප්‍රශ්න කර සිටියේ ය.

කෝප් කමිටුව ඇතුළේ හිටපු විදුලිබල සභාපති හෙලිදරව් කළ සියලු කරුණු ඇතුළත් වීඩියෝව සගවා තබා ගත නොහැකි බවත්, එය ජනතාවගේ දැනගැනීම පිණිස මාධ්‍යයට ලබා දිය යුතු බවත් සජබ පාර්ලිමේන්තු මන්ත්‍රී එස්.එම්. මරික්කාර් එහිදී වැඩිදුරටත් පැවසීය .

ජාත්‍යන්තර මූල්‍ය අරමුදල මගින් ශ්‍රී ලංකාව සඳහා පත්කර ඇති නියෝජිතයන් ජනාධිපති ගෝඨාභය රාජපක්ෂ හමුව ඇති අතර ඊයේ (24) කොළඹ, කොටුව ජනාධිපති මන්දිරයේ දී එය සිදුව ඇත .

සතියක කාලයක් මෙරට රැඳී සිටින නියෝජිත පිරිස මාණ්ඩලික මට්ටමේ ගිවිසුමකට එළැඹීමට අදාළ සහ ප්‍රතිපත්තිමය කරුණු පිළිබඳ දීර්ඝව අධ්‍යයනයට ලක් කරන බව ඒ සම්බන්ධයෙන් ජනාධිපති මාධ්‍ය අංශය නිකුත්කළ නිවේදනයක සඳහන් වෙයි .

අග්‍රාමාත්‍යවරයා, මුදල් අමාත්‍යාංශය, මහ බැංකුව ඇතුළු ආර්ථික බලධාරීන් හා විශේෂඥයන් සමග සිදු කළ සාකච්ඡා සහ වත්මන් තත්ත්වය පිළිබඳ ඔවුහු ජනාධිපතිතුමා දැනුම්වත් කළ බවත් එහි සඳහන් ය.

එසේම ජාත්‍යන්තර මූල්‍ය අරමුදලේ ප්‍රතිපත්තිවලට අනුකූලව මේ දුෂ්කර අවස්ථාවේ ශ්‍රී ලංකාවට සහාය වීමට අපේක්ෂා කරන බව නියෝජිත පිරිස කියා සිටි බවත් අදාළ නිවේදනය පවසයි .

ජාත්‍යන්තර මූල්‍ය අරමුදලේ ජ්‍යෙෂ්ඨ මෙහෙයුම් ප්‍රධානි පීටර් බෲවර් (Peter Breuer), මෙහෙයුම් ප්‍රධානි මසහිරෝ නොසාකි (Masahiro Nozaki), නේවාසික නියෝජිත ආචාර්ය ටුබාගස් ෆෙරිදානු සෙට්යාවන් (Tubagus Feridhanu setyawan), ආසියා පැසිෆික් දෙපාර්තමේන්තුවේ නියෝජ්‍ය අධ්‍යක්ෂ ඈන් මාරි ගුල්ඩේ (Anne Marie Gulde), ජාත්‍යන්තර මූල්‍ය අරමුදලේ විකල්ප විධායක අධ්‍යක්ෂ ආචාර්ය සී. අමරසේකර හා ජනාධිපති ලේකම් ගාමිණී සෙනරත්, ජනාධිපති කාර්ය මණ්ඩල ප්‍රධානි අනුර දිසානායක, මහ බැංකුවේ අධිපති ආචාර්ය නන්දලාල් වීරසිංහ, මුදල් ලේකම් කේ.එම්.එම්. සිරිවර්ධන, නියෝජ්‍ය මුදල් ලේකම් එම්.එස්.එස්. සමන් ප්‍රනාන්දු, නියෝජ්‍ය අධිපති ටී.එම්.ජේ.වයි.පී. ප්‍රනාන්දු සහ ආර්ථික පර්යේෂණ දෙපාර්තමේන්තුවේ අධ්‍යක්ෂ ආචාර්ය පී.කේ.ජී. හරිස්චන්ද්‍ර මේ අවස්ථාවට එක්ව සිටි බවත් නිවේදනයේ වැඩිදුරටත් සඳහන් කර ඇත .

ඉදිරි සතියේ පාසල් පැවැත්වෙන ආකාරය සම්බන්ධයෙන් අධ්‍යාපන අමාත්‍යංශය නිවේදනයක් නිකුත් කර ඇත.

ප්‍රවාහන කටයුතු සඳහා ඉන්ධන අපහසුතා නොපවතින ග්‍රාමීය පාසල්වල ජුනි 20 සිට 24 දක්වා සතියේ අධ්‍යන කටයුතු සිදු කළ ආකාරයට ම ඉදිරි සතිය තුලද කටයුතු කරන ලෙසත් එහි සඳහන් ය.

පසුගිය සතියේ පාසල් නොපැවැත් වූ නාගරික පාසල් සතියේ දින තුනක් පමණක් පවත්වන ලෙසද උපදෙස් නිකුත්කර තිබේ.

සිසුන් නොපැමිණෙන දිනවල දී මාර්ගගත ක්‍රමවේදය ඔස්සේ අධ්‍යන කටයුතු සිදු කරන ලෙසද අදාළ නිවේදනය වැඩිදුරටත් සඳහන් කර ඇති අතර සම්පූර්ණ නිවේදනය පහත දැක්වෙයි .

"අප සියලුදෙනාගේම පොදු සතුරා තමයි මේ ආර්ථික අර්බුදය. අපි කවුරුත් වැඩ කරන්න ඕනේ ඒක පිළිඅරගෙන. ‘ආණ්ඩුව’ නැමැති සතුරා ඉන්නේ ඊට යටින්. ‘දේශපාලන ප්‍රතිවාදීන්’ සියල්ල ඉන්නේ ඊට යටින්. කේන්ද්‍රීය සතුරා තමයි ආර්ථික අර්බුදය. මේ ආර්ථික අර්බුදයට අපි වගකීම් සහගතව මුහුණ දීලා ජයග්‍රහණය කිරීම අත්‍යවශ්‍යයි." යැයි පාර්ලිමේන්තු මන්ත්‍රී විමල් වීරවංශ පවසයි.

පාර්ලිමේන්තුව අමතා විශේෂ ප්‍රකාශයක් සිදුකරමින් මන්ත්‍රීවරයා මෙසේ සඳහන් කළේය.

එහිදී වැඩිදුරටත් අදහස් දැක් වූ විමල් වීරවංශ මන්ත්‍රීවරයා මෙසේද සඳහන් කළේය.

මම කවදාවත් අග්‍රාමාත්‍යවරයා සහ බැසිල් සංසන්සදනය කරලා නෑ !

“ගරු කතානායකතුමනි, ගරු අග්‍රාමාත්‍යතුමාගේ අදහස් දැක්වීම පිළිබඳව මට පැහැදිලි කිරීමක් සිදු කිරීමට ඉඩ දෙන්න. හිටපු මුදල් ඇමති බැසිල් රාජපක්ෂ මැතිතුමාට වඩා ඔබතුමා නරකයි, කියා මා පැවසූ බව අගමැතිතුමන් පැවසුවා. මම කොතැනකවත් ඔබතුමා හෝ ඔහු සංසන්දනය කරමින් හොඳ නරක කියන්න ගිහින් නැහැ. මම කිව්වේ බැසිල් රාජපක්ෂ මහත්තයාගෙ ‘ටයිකෝට් වර්ෂන් එක’ ඔබතුමා කියලයි.

‘පොදු සතුරා ආර්ථික අර්බුදයයි !

ගරු කතානායකතුමනි, අප සියලුදෙනාගේම පොදු සතුරා තමයි මේ ආර්ථික අර්බුදය. අපි කවුරුත් වැඩ කරන්න ඕනේ ඒක පිළිඅරගෙන. ‘ආණ්ඩුව’ නැමැති සතුරා ඉන්නේ ඊට යටින්. ‘දේශපාලන ප්‍රතිවාදීන්’ සියල්ල ඉන්නේ ඊට යටින්. කේන්ද්‍රීය සතුරා තමයි ආර්ථික අර්බුදය. මේ ආර්ථික අර්බුදයට අපි වගකීම් සහගතව මුහුණ දීලා ජයග්‍රහණය කිරීම අත්‍යවශ්‍යයි. ඒක ජය ගන්න බැරි වෙනවා කියන්නේ ජාතියක් හැටියට අපේ අභාවය තීරණය වන බවයි. මේ ආර්ථික අර්බුදය මානව ආපදාවක් බවට වැඩෙනවා. මානව ආපදාවක් දක්වා වැඩෙනවා කියන්නේ එතැනින් එහාට මේ ග්‍රිප් එක කාටවත් ලැබෙන්නේ නැහැ, ගිලිහෙනවා කියන එකයි.

‘මහජනතාවට දාපු වෙට්ටුවක් !

ඔබතුමා පැවසූ පක්ෂ දෙක පාර්ලිමේන්තුව වර්ජනය කිරීම පිළිබඳව බැරෑරුම්ව ප්‍රශ්න කළ යුතු නැහැ. අදට විතරයි වර්ජනය තිබෙන්නේ. මේ පාර්ලිමේන්තු සතිය අදින් අවසන් වෙනවා. ඒ වර්ජනය මහජනතාවට වෙන අදහසක් දෙන්න දාපු වෙට්ටුවක්. අපි පිළිගන්නවා, මේ ‘ආර්ථික අර්බුදය’ නැමැති කේන්ද්‍රීය සතුරා සමග කරන සටනේදී අනෙකුත් සටන් දෙවැනි තැනට දාන්න ඕනේ, කියා. ඊයේ අපි රුසියන් තානාපතිතුමන් හමුවීමට ගියේ තෙල් ටිකක් අරන් දීලා ඒකෙන් ගාණක් කපන අරමුණෙන් නොවෙයිනේ. අපටත් ඕනේ අර පීඩාවෙන් තෙල් පෝලිමේ ඉන්න මිනිහව ගෙදරට යවන දිනයක් දැකගන්නයි. ඒකට රුසියන් තානාපතිතුමන් හමුවෙලා උත්සාහයක් දැරිය යුතුයි, කියා අපට හිතෙනවා. ඒකට අපි ආණ්ඩුවේ ද ඉන්නේ, විපක්ෂයේ ද ඉන්නේ, කියන එක මම නම් අදාළ කර ගන්නේ නැහැ. ඒ නිසා අපි හැමවිටම කියන්නේ ‘විධිමත් උපායමාර්ගික සැලැස්මක්, ක්‍රියාකාරී සැලැස්මක් අපට පෙන්වනවා නම් ඒකෙ අපට ඉටු කරන්න පුළුවන් භූමිකාව ඉටු කරන්න අපි විපක්ෂයේ ඉඳගෙන හෝ ලැහැස්තියි’ කියලයි. ඒ අරමුණින් තමයි අපි ඒ දෙස බලන්නේ.

සම්ප්‍රදායික දේශපාලනය ගැන ජනතාව කළකිරීමෙන් !

මෙතැනදී අපි එකිනෙකා පිළිබඳව කල් තබා ඇති කර ගත්තු ආකල්ප මත ඉඳගෙන හැසිරෙන්න බැහැ. අපි ඒක ඉතාම තදින් විශ්වාස කරන දෙයක්. මේ අර්බුදය විසින් අපේ සාම්ප්‍රදායික දේශපාලනය අභියෝගයට ලක් කරලා තිබෙනවා. ‘පාරේ පෙළපාලි’ කියන ඒවා අද ‘සත පහකට’ ගණන් ගන්නේ නැති දේවල් බවට පත් වී තිබෙනවා. පෝලිම්වල ඉන්න මිනිස්සුන්ට ඒ පෙළපාලිවලින් ලැබෙන උත්තරය ගැන අදහසක් නැහැ. අද මිනිස්සු ඉන්නෙ සාම්ප්‍රදායික දේශපාලනය පිළිබඳ තදබල කලකිරීමකින්. ඒ නිසා අපට වගකීමක් තිබෙනවා, ඒ කලකිරීම අඩුවන ආකාරයට මේ රටේ දේශපාලනයේ සිදුවිය යුතු තර්කානුකූල ඓතිහාසික වෙනස්කම් සඳහා මේ මොහොත සද්භාවයෙන් යොදාගන්න. එහෙම නැතිව එකිනෙකාගේ අරමුණු ඉටුකර ගැනීමට නොවෙයි මේ මොහොත යොදාගත යුත්තේ.

විශ්වාසය හදන්න සජිත් අනුර ඩලස් ඇතුළු පාර්ශ්ව ඇතුළත් භාරකාර මණ්ඩලයක් හදන්න : ඕන නම් මමත් එන්නම් !

ගරු කථානායකතුමනි, ඔබතුමා කීවා ‘යෝජනා තිබෙනවා නම් ඉදිරිපත් කරන්න’ කියා. මං පළමුව ඔබතුමාට යෝජනාවක් කරන්නම්. අපි දන්නවා විදෙස්ගතව සිටිනවා මිලියන තුනකට අධික ශ්‍රී ලාංකිකයන් ප්‍රමාණයක්. ඒ අතර ඇතැමුන් ව්‍යාපාරිකයන් ලෙසත් තවත් පිරිසක් රැකියාවල නියුතුවූවන් ලෙසත් ඉන්නවා. ඒ අය තුළ තදබල ආකල්පයක් ගොඩනැගී තිබෙනවා, ඔවුන් නීත්‍යනුකූල මාර්ගයෙන් එවන මුදල් මෙහෙ ‘හොරා කනවා’ යනුවෙන්. ජනතා විමුක්ති පෙරමුණේ පිරිස් එම ආකල්පය වර්ධනය කිරීමට කටයුතු කරනවා. මේ රට තුළත් ඩොලර් තිබෙන පිරිස් ඉන්නවා. ඔවුන් පවා ඉන්නේ ඉහත ආකල්පය තුළයි. එහෙමනම් අපි පළමුව කළ යුත්තේ ඒ අය තුළ විශ්වාසය ජනිත කිරීමයි. විශ්වාසය ජනිත කිරීමට අපි කළ යුත්තේ කුමක්ද? අපි හිතමු, අපි අරමුදලක් හදනවා, කියා. මහ බැංකුව ඒ එවන ඩොලර් ටික තියා ගත්තාට කමක් නැහැ. ඒ ඩොලර් ටික වියදම් වන ආකාරය පිළිබඳව සොයා බලන්න, ආවේක්ෂණය කිරීමටයි අරමුදලක් හදන්නේ. එම අරමුදලට භාරකාර මණ්ඩලයක් පත් කරනවා. මම කියන්නේ ඒ භාරකාර මණ්ඩලයට සජිත් ප්‍රේමදාස මහත්තයා වගේම අනුර කුමාර දිසානායක මහත්තයාත් එන්න ඕනේ කියලයි. මටත් එන්න කිව්වොත් මමත් එන්නම්. ඩලස් අලහප්පෙරුම මහත්තයා වගේ කෙනෙකුත් එන්න ඕනේ. ඒ වගේ සියලු පාර්ශවල නියෝජනයක් සහිත භාරකාර මණ්ඩලයක් හදන්න.

භාරකාර මණ්ඩලේ වාසිය !

සාම්ප්‍රදායික දේශපාලන කෝණයෙන් බලන කොට සජිත් ප්‍රේමදාස සහ අනුර කුමාර දිසානායක යන මහත්වරුන්ට ආණ්ඩුවේ අභ්‍යන්තර පාර්ශ්වකරුවන් වීමට බැරි වෙන්න පුළුවන්. නමුත් මෙවැනි අරමුදලක් හදලා, භාරකාර මණ්ඩලය ඉහත කී අයගෙන් සමන්විත වුවහොත් ඒ භාරකාර මණ්ඩලයේ අනුදැනුමෙන් තොරව එම අරමුදලේ මුදල් කිසිවකට යෙදවිය නොහැකි බවට වගන්ති ඇතුළත් කළාම ඉහත කී අවිශ්වාසය නැති වෙනවා. විශ්වාසය ජනිත වෙනවා. අපට පුළුවන් එම අරමුදලට වැටුප විදිහට, ආධාර විදිහට මුදල් එවන අය වෙබ් අඩවියක් මගින් ප්‍රසිද්ධියට පත් කරන්න. එමගින් ඒ විශ්වාසය තවදුරටත් තහවුරු කරන්න පුළුවන්. ඒ අරමුදලට දායක වන අයගේ ඥාතීන්ට ලැබෙන වාසිදායක අවස්ථා ප්‍රකාශයට පත්කරන්නත් පුළුවන්. කවර ආකාරයකින් හෝ ඔවුන් දිරි ගන්වන්න ඕන.

ඩොලර් මිලියන 800ක් හොයන්නේ කොහොමද ?

කල්පනා කර බලන්න ගරු කතානායකතුමනි, විදෙස්ගත ශ්‍රී ලාංකිකයන් අතරින් ස්ථිර පදිංචි මිලියන 1.5 සහ ශ්‍රම බලකාය මිලියන 1.8 යන දෙකම සැලකූවිට මිලියන 3.3ක්, ලක්ෂ 33ක්. එම විදෙස්ගත ශ්‍රීලාංකිකයන් ලක්ෂ තිස්තුනෙන් අඩුම තරමින් ලක්ෂ 25ක්වත් මේ ක්‍රියාදාමයට හවුල් කරගැනීමට ලැබුණොත්, ඒ විතරක් නොවෙයි මේ රට තුළත් සංචාරක ව්‍යාපාරය වැනි ව්‍යාපාර මගින් ඩොලර් උපයන පිරිස ද මේ ක්‍රියාදාමයට දායක කරගැනීමට ලැබුණොත් අපට මේ මසකට අවශ්‍ය ඩොලර් මිලියන 750 – 800ක මුදල සොයාගැනීම මහා දුෂ්කර අභියෝගයක් වේවි, කියලා මම නම් හිතන්නේ නැහැ. බලන්න මෙතැනදී කරන්න තිබෙන්නේ පළමුව විශ්වාසය ජනිත කිරීම. දෙවනුව එම අරමුදලට දායකවන්නන් දිරිගන්වනසුලු පැකේජයක් යෝජනා කිරීම. එච්චරයි කරන්න තිබෙන්නේ. මේක කරන්න බැරි දෙයක් නෙවෙයි.

‘තෙල් පෝලිම්වල උතුරන මනුෂ්‍යත්වය’

ගරු කතානායකතුමනි, මේ රටේ මාධ්‍ය මඟින් තෙල් පෝලිම්වල උතුරන මනුෂ්‍යත්වය පෙන්වන්නේ නැහැ. අර හෙල්මට් බලකායෙන් ඇවිත් අල්ලන ගෝරිය විතරයි පෙන්වන්නේ. දැන් හෙල්මට් බලකායක් ඉන්නවානේ තෙල් පෝලිම වෛරයෙන් ඉන්නවා වගේ පෙනෙනවා නම් මොකක්හරි ‘පොයින්ට් එකක්’ දාලා ගෝරි අල්ලන. නමුත් තෙල් පෝලිමේ තිබෙනවා උතුරන මනුෂ්‍යත්වයක්. කෑම එකක් ගෙනැවිත් හතරදෙනෙක් බෙදාගෙන කනවා, තැඹිලි ගෙඩිය බෙදාගෙන බොනවා. එතැනදී අලුත් මානව සබඳතාවන් ගොඩනැගෙනවා. මම මේ කියන්නේ තෙල් පෝලිම හොඳයි කියලා නොවෙයි. අපේ මිනිස්සු මේ විපතටත් මුහුණදෙන්නෙ ධනාත්මකව. එහෙම මිනිස්සු ඉන්න රටක අපට ඇයි මේ ආර්ථික අර්බුදය, පුනරුදයේ මොහොත බවට පත් කරගන්න බැරි? අර්බුදය, පුනරුදය බවට පෙරළාගන්න පුළුවන්. අපට ලකුණු දාගන්න ඕනෙ නැහැ. කවුරු ලකුණු දාගත්තත් අපට කමක් නැහැ. නමුත් අපට තිබෙන වේදනාව මේ අර්බුදය පුනරුදයේ මොහොත බවට පෙරළාගන්නා බවක් පෙනෙන්නට නැති වීමයි. එහෙම දැක්මක්, නායකත්ව මගපෙන්වීමක්, උපායමාර්ගික සැලැස්මක් ඇති බවක් අපට පෙනෙන්නේ නැහැ.

‘පළමු කොන්දේසිය : විශ්වාසය තහවුරු කිරීම !

අද අගමැතිතුමාගේ කතාවේදී මොනවාද කීවේ? අයි.එම්.එෆ්. සමග සාකච්ඡාව, චීනය, ජපානය හා ඉන්දියාවෙන් ණය ගැනීම හැරුණාම ‘ගෙවතු වගා’ වැනි දේවල් ටිකකුත් කීවා. නමුත් ගරු අගමැතිතුමනි, මෙතැන තිබෙන පළමු කොන්දේසිය තමයි විශ්වාසය තහවුරුකර ගැනීම. අද අපේ ජන සමාජය සහ දේශපාලනතන්ත්‍රය අතර තිබෙනවා මහා විශාල විශ්වාසය පළුදුවීමක්, බිඳවැටීමක්. ඒ පළුදු වූ විශ්වාසය යළි තහවුරු කරන්න ගන්න ඕනේ පියවර මොනවාද? ඒකට නිර්මාණශීලීව හිතන්න වෙනවා. මම ඉහතදී විදෙස්ගත ශ්‍රී ලාංකිකයන්ගේ ප්‍රේෂණ ගෙන්වා ගැනීම පිළිබඳව පෙන්වා දුන්නේ එවැනි නිදසුනක්. මම විශ්වාස කරනවා අපේ විදෙස්ගත ලක්ෂ 33 අවදි කරලා ගත්තොත් ඔවුන් තුළ විශ්වාසය ජනිත කළොත් අපට මාසිකව අවශ්‍ය ඩොලර් මිලියන 800 හොයන්න වෙන කිසිවක් කිරීමට අවශ්‍ය නැහැ, කියා. එහෙම වුණොත් ඉස්පිරිතාලේ බෙහෙත් නැතිව අර සර්පයා ගහපු දරුවා වගේ දරුවන් මිය යන්නේ නැහැ.

මම මේ රටට ණයයි !

අපි හිතමු විදෙස්ගත ශ්‍රී ලාංකිකයන් ලක්ෂ 33න් ලක්ෂ 25ක් මේ වැඩේට දායක කරගත්තා කියලා. ඔවුන් එක් අයෙක් මාසයකට රුපියල් ලක්ෂය බැගින් එව්වොත් රටට ඩොලර් මිලියන 750ක් ලැබෙනවා රුපියල් ලක්ෂ දෙක බැගින් එව්වොත් රටට මාසිකව ඩොලර් මිලියන 1500ක් ලැබෙනවා. අපේ රටේ විදේශගත වෙලා ඉන්නේ නිදහස් අධ්‍යාපනයෙන් හැදුණු වැඩුණු මිනිස්සු. ඒ මිනිස්සුන්ගේ හිතේ තිබෙනවා ‘මම මේ රටට ණයයි’ කියන හැඟීම. ඒ නිසා එවැනි මිනිස්සු කවදාවත් කැමති වෙන්නේ නැහැ, තමන්ගේ අම්මා, තාත්තා, ඥාතියා, හිතවතා පෝලිමේ ඉන්න කොට තමන්ගේ ඩොලර් ටික පෙට්ටගමක දාලා තියාගෙන ඉන්න. ඒ හදවත් බොහොම විවෘත, දයාබරිත හදවත්. මුලින්ම ඒ හදවත්වලට ආමන්ත්‍රණය කරන්න.

‘මිනිස් පවුරට ආමන්ත්‍රණය කරන්න’!

ඔබතුමා ඉදිරිපත් කළ විදිහටත්, මින් පෙර කියැවුණු විදිහටත් ඉන්ධන සඳහා ඩොලර් මිලියන 550ක් පමණ, ගෑස් සඳහා ඩොලර් මිලියන 50ක් හෝ ඊට අඩු ගණනක්, ඖෂධවලට ඩොලර් මිලියන 50ක් හෝ ඊට අඩු ගණනක්, පොහොරවලට ඩොලර් මිලියන 50ක් හෝ ඊට අඩු ගණනක්, ධාන්‍යවලට මිලියන 10ක් ආදී වශයෙන් මසකට ඩොලර් මිලියන 800ක් අවශ්‍යයි. මේ ඩොලර් මිලියන 800 දෙන්න මොන තරම් විශාල මිනිස් පවුරක් ඉන්නවාද? ඇයි අපි ඒ මිනිස් පවුරට ආමන්ත්‍රණය නොකරන්නේ?

IMF , IMF කියමින් හිටියාම ගොඩ යයිද ?

සමහරු හිතනවා ‘අයි.එම්.එෆ්. – අයි.එම්.එෆ්’ කියමින් සිටියාම ‘මේක ගොඩ යයි’ කියලා. මොකක් හරි වෙයි. මම ඒ දිහා සෘණාත්මකව බලන්නේ නැහැ. මට එහෙම අවශ්‍යත් නැහැ. හැබැයි ඒ උපායමාර්ගයෙන් පමණක් මෙතැනින් එළියට එන්න බැහැ. මහා බලවේගය තමයි අපේ මිනිස්සු. ඒ මහා බලවේගය අවදි කිරීම අත්‍යවශ්‍යයි. ඒ මහා බලවේගය අවදි කිරීමෙන් පමණයි මේ අර්බුදය පුනරුදයේ මොහොත බවට පෙරළාගත හැක්කේ.

අන්තරේ දරුවන් එනවා , පෙරළනවා යනවා : මේක මාටියා ගැසීමේ වෙලාව වෙන්න දෙන්න එපා !

මීට ඉහතදී සංචාරක ව්‍යාපාරයෙන් අපි වාර්ෂිකව ඩොලර් බිලියන 05ක් පමණ හෙව්වා. විදෙස්ගත ශ්‍රමිකයන්ගෙන් ඩොලර් බිලියන 07ක් පමණ ලැබුණා. අපට හරියට මැදිහත් වුණොත් එය ඩොලර් බිලියන 12ක් කරගන්න පුළුවන්. ඔය විරෝධතාවලින් සිදුවන්නේ එය අඩු කිරීම මිස වැඩි කිරීම නොවෙයි. මෙතැනදී අපි සමාජ සම්මුතියක් ඇති කරගත යුතුයි. අර ‘අන්තරේ’ දරුවො ටික එක්කන් එනවා, පෙරළනවා, යනවා. ඒ දරුවන්ගේ කාලයත් අපතේ යනවා. මේ වෙලාව කියන්නේ සබුද්ධික වෙන්න ඕනේ වෙලාවක්. මනූෂ නානායක්කාර මැතිතුමා හෝ හරීන් ප්‍රනාන්දු මැතිතුමා ඇමතිකමක් අරගෙන සිටීම ගැන මට නම් කිසිම ප්‍රශ්නයක් නැහැ. තමන්ට පුළුවන් කියා හිතෙන දෙයක් කරන්න. නමුත් මේ වෙලාව ‘මාටියා ගැසීමේ වෙලාව’ බවට පත්කර ගැනීමට ඉඩ නොදිය යුතුයි. ගරු අග්‍රාමාත්‍යතුමනි, මම කැමති නැහැ අනවශ්‍ය අවිශ්වාසයක් නිර්මාණය කරන්න. නමුත් මේ වෙලාවෙත් සමහර පුද්ගලයෝ උත්සාහ කරන්නේ ‘මොකක් හරි ඩීල් එකක් දාලා’ කීයක් හරි හොයාගන්න. මම මේ කියන්නෙ දේශපාලනතන්ත්‍රයත් සමග ගෑවුණු පිරිසක් ගැනයි. දෙවන පෙළක් ගැනයි එහෙම වුණොත් මහජනයා තුළ විශ්වාසය යළි ජනිත කිරීමට කිසිවකුටත් හැකි වන්නේ නැහැ.

‘ලී ක්වාන් යූ මුලින්ම කිව්වේ මොකක්ද ?

අපි සිංගප්පූරුව ගැන කතා කරනවා. එහි තිබෙන්නේ වර්ග කිලෝමීටර් 728ක පමණ භූමි ප්‍රමාණයක්. ලී ක්වාන් යූ මුලින් කීවේ, ‘සිංගප්පූරුව ලංකාව වගේ කරනවා’ කියලයි. දැන් අපි සෑහෙන කාලයක් තිස්සේ කියනවා, ‘ලංකාව සිංගප්පූරුවක් කරනවා’ කියලා. හැබැයි සිංගප්පූරුවේ කෘෂිකර්මාන්තය දළ ජාතික නිෂ්පාදිතයට දායක වන්නේ 0.5%කින්. ආහාර ද්‍රව්‍යවලින් 90%ක්ම ආනයනය කරනවා. නමුත් අද ආහාර සුරක්ෂිතතාව අතින් කරනවා අපේ විදෙස්ගත ලක්ෂ 33 අවදි කරලා ගත්තොත් ඔවුන් තුළ විශ්වාසය ජනිත කළොත් අපට මාසිකව අවශ්‍ය ඩොලර් මිලියන 800 හොයන්න වෙන කිසිවක් කිරීමට අවශ්‍ය නැහැ, කියා. එහෙම වුණොත් ඉස්පිරිතාලේ බෙහෙත් නැතිව අර සර්පයා ගහපු දරුවා වගේ දරුවන් මිය යන්නේ නැහැ.

හිටපු මුදල් ඇමති රවී කියපු කතාව !

අපේ රටේ සිටි එක් මුදල් ඇමතිවරයකු වූ රවී කරුණානායක මහතා වරක් කීවා, ‘මේ රටේ වී වගා කරලා වැඩක් නැහැ. ඊට වඩා අඩුවෙන් පිටරටින් සහල් ගෙන එන්න පුළුවන්’ කියා. ඒක නොවෙයි ආහාර සුරක්ෂිතතාව කියන්නේ. මේක රටේ ආහාර සුරක්ෂිතතාව වෙනුවෙන් මහජනයා අවදි කළ යුතු වෙලාව. ඒ නිසා අපි මේ අර්බුදය දෙස බලන්නේ ධනාත්මකව. එහෙම නැතිව ඒකෙන් අපට පොටක් පාදා ගන්නේ කොහොමද, කියලා නොවෙයි. හැබැයි කවුරුත් ඒ මනසින් මේ අර්බුදයේ දෙස බලලා ඉන් ගොඩයෑමට උත්සාහ දරන බවක් අපට නම් පෙනෙන්නේ නැහැ ඒක තමයි කනගාටුවට කරුණ”