පුවත්
සජබ සන්ධානයේ : මනෝ පාර්ශ්වය රනිල්ට !
සමගි සන්ධානයේ පිරිසක් අග්රාමාත්ය රනිල් වික්රමසිංහ ගේ ආණ්ඩුවට සහය දැක්වීමට තීන්දු කර තිබෙන බව වාර්තා වෙයි .
ඒ බව මේ වන විට ප්‍රසිද්ධියේ පවසා ඇත්තේ , පාර්ලිමේන්තු මන්ත්‍රී මනෝ ගනේෂන් ගේ නායකත්වයෙන් යුතු ද්‍රවිඩ ප්‍රගතිශීලී සන්ධානය විසිනි .
වඩාත් විශේෂ සිදුවීම වන්නේ , එම සන්ධානය ආණ්ඩුවේ තනතුරු නොගන්නා නමුත් , ආණ්ඩුව පෙරළීම සඳහා, ගනුලබන කිසිදු ප්‍රයත්නයකට , සහය නොදෙන ස්ථාවරයක් ගෙන තිබීමයි .
තම ස්ථාවරය වැඩිදුරටත් පැහැදිලි කරමින්, ද්‍රවිඩ ප්‍රගතිශීලී සන්ධානය පවසන්නේ පොදු ජනතාවගේ ජීවනෝපාය ගැටලුවලට අවම විසඳුම් සෙවීමට නව රජයට කාලය අවශ්‍ය බව පිළිගෙන , ඊට අනුව කටයුතු කරන බවයි.
මේ සම්බන්ධයෙන් වැඩිදුරටත් අදහස් දක්වමින් මනෝ ගනේෂන් මන්ත්‍රීවරයා පවසන්නේ , ආණ්ඩුවට සම්බන්ධ වන ලෙස අග්රාමාත්ය රනිල් වික්රමසිංහ තමන්ට ආරාධනා කළ නමුත් , තමන් එය ආචාරශීලීව ප්‍රතිකේෂ්ප කළ බවයි.
එහෙත් පක්ෂ දේශපාලනය ඉදිරියට ගෙන කෑකෝගසා බාධා කිරීමට කිසිම අදහසක් නොමැති බවත් ඔහු සඳහන් කළේය .
මේ හමුවේ තම අපේක්ෂාව වන්නේ , ජීවනෝපාය අර්බුදයේ අතරමංව සිටින ජනතාව මුදා ගැනීමට ඔහුට හැකි සියලුම දේ කිරීමට අග්‍රාමාත්‍යවරයාට අවස්ථාව සැලසීම බවත් ඔහු පවසයි .
ද්‍රවිඩ ප්‍රගතිශීලී සන්ධාන, නායක, පාර්ලිමේන්තු මන්ත්‍රී මනෝ ගනේෂන් තවදුරටත් පැවසුවේ, රනිල් වික්රමසිංහ, යනු තමන්ගේ හිටපු අග්‍රාමාත්‍යවරයා බවත් ඔහුගේ ශක්තිය හා දුර්වලතා සම්බන්ධයෙන් හොඳ අවබෝධයක් තමන් සතු බවයි.
නමුත් අග්‍රාමාත්‍යවරයා ගේ දුර්වලකම ගැන මේ අවස්ථාවේ කතා කර, ගැලරි දේශපාලනය කිරීමට දමිළ ප්‍රගතිශීලී සන්ධානයේ කිසිවකු සූදානම් නොමැති බවත් ඔහු සඳහන් කළේය .
ජාත්‍යන්තර සන්නිවේදන සම්බන්ධයෙන්, රනිල්ගේ ශක්තිය මත රටට සෙතක් වෙනවානම් තමන් එය හදවතින්ම පිළිගන්නා බවත් ඔහු පවසයි .
එහිදී ඔහු වැඩිදුරටත් මෙසේද සඳහන් කරයි.
"අද රටේ කෑම නැහැ. බෙහෙත් නැහැ. ගෑස් නැහැ. ඉන්ධන නැහැ. පොහොර නැහැ. විදුලිය නැහැ. මේවාට අවම විසඳුම් හෝ ඔහු දිය යුතුයි. අගමැතිතුමා ඒක කරපුදෙන්. ඒකට, වගකිව යුතු පක්ෂයක් විදියට අපි ඉඩ දෙමු. එබැවින් අද පවතින සන්දර්භය තුළ, පාර්ලිමේන්තුවෙ ඔහුගේ රජය කකුලෙන් ඇදෙන කිසිදු උත්සාහයකට අපි සහාය දෙන්නේ නැහැ."
"රටේ ආර්ථික ප්‍රශ්න තිබෙනවා. අපේ රට ගත්ත ණය නිසි කලට ගෙවා ගන්න බැරි වෙලා තිබෙනවා. එනිසා ණය දීපු අය සමඟ කතා කරලා ණය ආපසු ගෙවීමේ කාලසටහන් නැවත සකස් කළ යුතුයි "
"අත්‍යවශ්‍ය අවශ්‍යතා ලබා ගැනීමට අමෙරිකානු ඩොලර් නැහැ. මේ සඳහා මිත්‍ර රටවලින් ණය ආධාර සහ මුදල් හුවමාරු ආධාර ලබා ගත යුතුයි. ඉන්දියාව දැනටමත් මේවා ලබා දෙමින් ඉන්නේ. මේවා තව තවත් වැඩි කළ යුතුයි. දැනටමත් සහාය දෙන මිත්‍ර රටවල්වල සම්මුතියක් (Consortium) පිහිටුවීමට අගමැතිවරයා උත්සාහ කරමින් ඉන්නවා. මේක හොඳයි. බදු ප්‍රතිපත්තිය ප්‍රතිසංස්කරණ විය යුතුයි."
එසේම 20 වැනි ව්‍යවස්ථා සංශෝධනය ඉවත්කර 19 බලාත්මක කිරීම , ජනාධිපති ගෝඨාභය ගේ ඉල්ලා අස්වීම සඳහා කාලසටහනක් සැකසීම, මෙන්ම රාජපක්ෂවරුන් ට රටේ ජනතාව අතර ඇති විරෝධය තේරුම් ගෙන අග්‍රාමාත්‍යවරයා කටයුතු කළ යුතු බවත් ද්‍රවිඩ ප්‍රගතිශීලී සන්ධානය අවධාරණය කර සිටියි.
මේ සමග සමගි ජනබලවේගය පක්ෂයේ තවත් මන්ත්‍රී කණ්ඩායමක්, අග්රාමාත්ය රනිල් වික්රමසිංහ ට වත්මන් අර්බුදය විසඳීමට , සහය දක්වන ආකාරය සම්බන්ධයෙන් අභ්‍යන්තර සාකච්ඡා කිහිපයක් සිදුවෙමින් තිබෙන බවත් වාර්තා වෙයි.
පොලිස්පති එපා : ජනාධිපති පොහොට්ටු මන්ත්‍රී හමුවේ ගාලගෝට්ටියක් !
ජනාධිපති ගෝඨාභය රාජපක්ෂ සහ ආණ්ඩුවේ මන්ත්‍රීවරුන් අතර අද (14) පැවති විශේෂ රැස්වීම දැඩි උනුසුම් මුහුණුවරක් ගෙන ඇති බව දේශපාලන ආරංචි මාර්ග පවසයි .
හිටපු අමාත්‍යවරු හා පොදුජන පෙරමුණේ මන්ත්‍රීවරු මෙම රැස්වීමට එක්ව සිටින බවත් වාර්තා වෙයි .
ඊට සහභාගිවී සිටින ඇතැම් මන්ත්‍රීවරුන් ජනාධිපතිවරයා පසුගිය දින කිහිපයේ ගනුලැබූ ක්‍රියාමාර්ග දැඩිලෙස විවේචනය කර ඇති අතර නිසි ආරක්ෂාවක් ලබාදීමට නිසි පරිදි කටයුතු නොකල පොලිස්පතිවරයා ඉවත්කරන ලෙස ඔවුන් ජනාධිපතිවරයාට බලකර තිබෙන බවත් වාර්තා වෙයි .
කෙසේ වුවත් එහිදී නව අග්රාමාත්ය රනිල් වික්රමසිංහ ට නිසි ආර්ථික වැඩපිළිවෙලක් ක්‍රියාත්මක කිරීමට ශක්තිමත් ආණ්ඩුවක් පිහිටුවීමට සහාය දීමට ශ්‍රී ලංකා පොදුජන පෙරමුණ මන්ත්‍රී කණ්ඩායම තීන්දු කර ඇති බවත් වාර්තා වෙයි .
කරළිය රත්වෙයි : රනිල්ගෙන් සජිත්‍ට ලිපියක් !
දේශපාලන කරළියම උනුසුම් කරමින් අග්රාමාත්ය රනිල් වික්රමසිංහ විසින් ආන්දෝලනාත්මක ලිපියක් විපක්ෂ නායක සජිත් ප්‍රේමදාස වෙත යොමුකර ඇත .
ඒ සර්ව පාක්ෂික ආණ්ඩුවක් පිහිටුවීම සඳහා ආරාධනා කරමින් යොමු කර ඇති ලිපියක් හේතුවෙන් ය.
එහිදී අග්රාමාත්ය රනිල් වික්රමසිංහ සෘජුවම විපක්ෂනායකවරයා ආමන්ත්‍රණය කර ඇත.
මේ ආකාරයට අග්‍රාමාත්‍යවරයා ආන්දෝලනාත්මක ලිපියක් විපක්ෂ නායකවරයා වෙත යවන්නේ ඔහුද ජනාධිපති ගෝඨාභය රාජපක්ෂ වෙත ලියුම් ලියමින් අග්රාමාත්ය ධූරය ඉල්ලා සිටින අවස්ථාවකය.
අදාළ ලිපිය පහත දැක්වෙයි .
ලක්ෂ්මන් හුළුගල්ල අභාවප්‍රාප්ත වේ
ඕස්ට්‍රේලියාවේ සිඩ්නි නුවර ශ්‍රී ලංකා කොන්සල් ජනරාල් ලෙස කටයුතු කළ ලක්ෂ්මන් හුළුගල්ල අභාවප්‍රාප්ත වී තිබේ.
මිය යනවිට ඒ මහතා 66 වැනි වියේ පසුවිය.
පසුගිය දින කිහිපයේ හෘදයා බාධයකට ලක්වූ ඔහු මියගොස් ඇත්තේ ඕස්ට්‍රේලියාවේ රෝහලක ප්‍රතිකාර ලබමින් සිටියදීය.
ඔහුගේ දේහය අද දිනයේ මෙරටට ගෙන ඒමට නියමිත අතර අවසන් කටයුතු සිදුකරන දිනය පසුව දැනුම් දෙන බව පවුලේ හිතවතකු පැවසිය.
මම ගන්නනේ හිටියේ - ඇයි නොදුන්නේ ? සජිත්ගෙන් තවත් ලියුමක් !
සමගි ජනබලවේගය පක්ෂයේ මන්ත්‍රීවරුන් කියන ලෙස ආසයි බයයි ප්‍රතිපත්තිය හේතුවෙන් අග්රාමාත්ය ධූරය භාරනොගෙන සිටි විපක්ෂ නායක සජිත් ප්‍රේමදාස අද (13) තවත් ලිපියක් ජනාධිපති ගෝඨාභය රාජපක්ෂ වෙත යොමුකර ඇත .
ඒ ඊයේ (12) ජනාධිපති ගෝඨාභය රාජපක්ෂ විසින් විපක්ෂ නායක වෙත යොමුකළ ලිපියට ප්‍රතිචාර දක්වමින් ය.
එම ලිපියේ විපක්ෂ නායක සජිත් ප්‍රේමදාස පවසන්නේ තමන් කිසිම අවස්ථාවක අගමැති ධූරය ප්‍රතිකේෂ්ප නොකළ බවය.
එහෙත් ඊයේ (12) ජනාධිපති යොමුකළ ලිපියේ සඳහන් විපක්ෂ නායක "මැයි 10 මාධ්‍ය හමුවේදී අන්තර් වාර ආණ්ඩුවේ ජනාධිපති යටතේ කිසිම වගකීමක් නොගන්නා" බවට සිදුකළ ප්‍රකාශය සම්බන්ධයෙන් කිසිදු ප්‍රතිචාරයක් අද විපක්ෂ නායක යොමුකළ ලිපියේ සඳහන් නොවීමත් විශේෂය.
විපක්ෂ නායක සජිත් ප්‍රේමදාස විසින් ජනාධිපති ගෝඨාභය රාජපක්ෂ වෙත යොමුකළ ලිපිය පහත දැක්වෙයි .
බූට්කෑවා වගේ ලියුම් නොලියා සජිත්‍ට තියෙන්නේ බහුතරය පෙන්වන්න !
කෙසේ වෙතත් විපක්ෂ නායක සජිත් ප්‍රේමදාස ගේ මේ ලියුම් හරඹය සම්බන්ධයෙන් අදහස් දක්වමින් දේශපාලන විචාරකයන් පවසන්නේ මේ වන විට රනිල් වික්රමසිංහ අගමැති ධූරයේ දිවුරුම් දී ඇති නිසා තවදුරටත් ලියුම් හරහා විසඳීමට ප්‍රශ්නයක් නොමැති බවය.
එබැවින් දැන් සජිත් ප්‍රේමදාස විපක්ෂ නනායකවරයා කළ යුතුව ඇත්තේ , සජිත් ප්‍රේමදාස ට විශ්වාසය පළකෙරෙන යෝජනාවක් බහුතර ජන්දයෙන් සම්මත කිරීම බවත් ඔවුන් පවසයි .
මේ පහත දැක්වෙන්නේ ජනාධිපති ගෝඨාභය රාජපක්ෂ විසින් ඊයේ විපක්ෂ නායක සජිත් ප්‍රේමදාස වෙත යොමුකළ ලිපියයි.
රනිල්ට එරෙහි විරෝධතාව : ඇඳිරිනීතියට ගරුකර ගෙදර යයි !
අද (13) අග්රාමාත්ය රනිල් වික්රමසිංහ ගේ පෞද්ගලික නිවස ඉදිරි පිටට රැස්වූ 10 දෙනෙකුගේ පමණ කණ්ඩායමක්, ධුරයෙන් ඉවත්ව යන ලෙස උද්ඝෝෂණය කළහ.
චීවරධාරීන් දෙදෙනෙකු ඇතුලු මේ පිරිස විරෝධතා පුවරු කිහිපයක් ද ප්‍රදර්ශනය කළ අතර අනතුරුව පස්වරු 2.00 ට ඇඳිරි නීතිය ක්‍රියාත්මක වීම ඇරඹුණු බැවින් ඉවත්ව ගියහ.
එහිදී ඔවුන් පවසා සිටියේ ඇඳිරි නීතිය නිසා තමන් නීතියට ගරු කර විරෝධය අවසන් කරන බවය.
කෙසේ වුවත් මේ සම්බන්ධයෙන් අදහස් දක්වමින් සිවිල් සමාජ ක්‍රියාකාරිකයකු පවසා සිටියේ , මෙවැනි ළදරු වල්ලිපුකාරයන් හේතුවෙන් අරගලයට ඇති සමාජ පිළිගැනීම සහ ඊට ඇති සමාජ බලය මොටවන බවය.
"මේ රටේ මොන හොඳ දෙයක් ගෙනාවත්, කවුරු අලුත් දෙයක් හඳුන්වා දුන්නත් ඒක පිස්සුවක් වෙලා ඉවර වෙන්නේ . මේ එහෙ මෙහෙ යන කොන්ත්‍රාත්කරුවන් නිසා අරගලයත් පිස්සුවක් වෙයිද කියන සැකය තියෙනවා " යනුවෙන් ද ඔහු පැවසීය .
අත්‍යවශ්‍ය භාණ්ඩ හා සේවා හිඟය පියවීමට : අගමැතිගෙන් විශේෂ කමිටුවක්
අත්‍යවශ්‍ය භාණ්ඩ හා සේවා හිඟය කඩිනමින් පියවා ජනතාවට සහන සැලසීම සඳහා යෝජනා ලබා ගැනීමට අග්රාමාත්ය රනිල් වික්රමසිංහ විශේෂ කමිටුවක් පත් කර ඇත.
එහි, අත්‍යවශ්‍ය ආහාර ද්‍රව්‍ය හිඟයකින් තොරව ජනතාවට ලබා දීම සඳහා ඊට අදාළ අංශ සමග සාකච්ඡා කොට යෝජනා ලබා ගැනීමට එක්සත් ජාතික පක්ෂ සභාපති වජිර අබේවර්ධන සහ මහලේකම් පාලිත රංගේ බණ්ඩාර පත් කර ඇත.
ඖෂධ හිඟය මඟහරවා ගැනීම සම්බන්ධයෙන් අදාල තොරතුරු ලබාගැනීම එජාප නියෝජ්‍ය නායක රුවන් විජයවර්ධනට පවරා ඇත.
එජාප උප නායක අකිල විරාජ් කාරියවසම්ට පවරා ඇත්තේ , පොහොර අර්බුදය සම්බන්ධයෙන් සොයා බලා වාර්තා කිරීමටය.
එක්සත් ජාතික පක්ෂ ජාතික සංවිධායක සාගල සාගල රත්නායකට පවරා ඇත්තේ ඛනිජ තෙල් සම්බන්ධව වගකීමය.
මෙම කමිටුව විසින් අදාළ ක්ෂේත්‍රවල සියලුම පාර්ශවකරුවන් හමුවී පවතින සැබෑ ගැටලු හඳුනාගෙන ඔවුන්ගේ යෝජනා ද ලබා ගෙන සමාජයේ පවතින සැබෑ තත්ත්වය අග්රාමාත්ය රනිල් වික්‍රමසිංහට සෘජුවම වාර්තා කිරීමට නියමිතව ඇති බව අග්රාමාත්ය කාර්‍යාල ආරංචි මාර්ග පවසයි.
මෙය රනිල් වික්රමසිංහ අග්‍රාමාත්‍යවරයා වූ පසුව පත්කළ පළමු කමිටුව වෙයි.
රනිල්ගේ ආණ්ඩුවට යන්නෙත් නෑ : කඩාකප්පල් කරන්නෙත් නෑ - විමල්
මොහොතේ රටට අග්‍රාමාත්‍යවරයෙකු අවශ්‍ය නමුත්, ජනතාව බලාපොරොත්තු වූවේ රනිල් වික්රමසිංහ පන්නයේ අග්‍රාමාත්‍යවරයෙකු නොවන බව පාර්ලිමේන්තු මන්ත්‍රී විමල් වීරවංශ පවසයි .
අද (13) කොළඹ පැවති මාධ්‍ය හමුවකදී අදහස් දක්වමින් ඔහු මේ බව සඳහන් කළ අතර එහිදී වැඩිදුරටත් මෙසේද පැවසීය .
“රට මේ මොහොතේ මුහුන දී තිබෙන අර්බුදයට රනිල් වික්‍රමසිංහද වගකිව යුතුයි. ඔහු විසින් හදන කැබිනට් මණ්ඩලයේ කිසිදු තනතුරක් භාර නොගැනීමට ස්වාධීන වූ පක්ෂ එකොළහේ නියෝජිතයන් තීරණය කර තිබෙනවා. නමුත් පිහිටුවා ගන්නා පාලනය කඩාකප්පල් කිරීමේ අරමුණින් කටයුතු කරන්නේ නැහැ.රනිල් කියන්නේ ටයි කෝට් අදින බැසිල් රාජපක්ෂයි. බැසිල් රාජපක්ෂ යනු සාටකය දමා ගත් රනිල්.”
රනිල් යටතේ අමාත්‍ය ධූර ගන්නේ නෑ : ශ්‍රීලනිප
මේ අතර අග්රාමාත්ය රනිල් වික්රමසිංහ යටතේ කිසිදු අමාත්‍ය ධූරයක් භාර නොගැනීමට සහ ආණ්ඩුවක කොටස්කරුවෙකු නොවීමට සිය පක්ෂය තීරණය කළ බව ශ්‍රී ලංකා නිදහස් පක්ෂය පවසයි .
අද (13) කොළඹ පැවති මාධ්‍ය හමුවකදී අදහස් දක්වමින් ශ්‍රී ලංකා නිදහස් පක්ෂයේ සභාපති , හිටපු ජනාධිපති මෛත්‍රීපාල සිරිසේන මේ බව සඳහන් කර සිටියේ ය.
රන්ජන් නිදහස් කරගන්න : එජාපය සාකච්ඡා මගට !
හිටපු පාර්ලිමේන්තු මන්ත්‍රී රන්ජන් රාමනායක නිදහස් කර ගැනීම සඳහා සාකච්ඡා කරන බව එක්සත් ජාතික පක්ෂ උපනායක අකිල විරාජ් කාරියවසම් පැවසීය.
ඔහු මේ බව සඳහන් කර සිටියේ පිටකෝට්ටේ සිරිකොත එක්සත් ජාතික පක්ෂ මූලස්ථානයේ පැවැති මාධ්‍ය හමුවකදී ය.
රන්ජන් රාමනායකට වඩා වැඩි වැරදි කළ අය නිදහස් කර තිබෙන හෙයින් රන්ජන් රාමනායක නිදහස් කරන්නැයි යන ඉල්ලීම ඉතා සාධාරණ එකක් වනු ඇතැයි ද එජාප උපනායක පැවසීය .
රනිල් වැඩ අරඹයි : නෝඩීල්ගම ඉදිවෙයි !
අගමැති රනිල් වික්‍රමසිංහට විරෝධය දක්වමින් අරලිගහ මන්දිරය ඉදිරිපිට පිරිසක් පෙරවරුවේ විරෝධතාවක් ආරම්භ කර තිබේ.
අට්ටාල ගසා අඛණ්ඩ විරෝධයක් ආරම්භ කිරීමට එම පිරිස සූදානම් වෙමින් සිටින බවත් දැනගන්නට ඇත .
මෙම විරෝධතා ගම්මානය ‘No Deal Gama’ ලෙස නම් කර ඇත.
මේ අතර අගමැති රනිල් වික්රමසිංහ අග්රාමාත්ය කාර්යාලයේදී සිය ධුරයේ කටයුතු ආරම්භ කර තිබේ.
ජාත්‍යන්තරයේ සහය රනිල්ට : මුලින්ම ඇමරිකාව !
නව අග්‍රාමාත්‍යවරයා ලෙස පත්වූ රනිල් වික්රමසිංහ වෙත පළමු රාජතාන්ත්‍රික සුබ පැතුම මෙරට ඇමරිකානු තානාපතිනි ජුලි චන්ග් විසින් එක්කර තිබේ.
රනිල් වික්රමසිංහ නව අග්‍රාමාත්‍යවරයා ලෙස පත්කිරීම සහ ඉක්මනින් නව රජයක් පත් කිරීම ශ්‍රී ලංකාවේ ආර්ථික අර්බුදයට විසඳුමක් ලබාගැනීමටත් ආර්ථික ස්ථාවරත්වය ඇති කිරීමටත් පළමු පියවර බව එහිදී ඇය සඳහන් කර ඇත .
එසේම ජාත්‍යන්තර මුල්‍ය අරමුදල සමග සාර්ථක ප්‍රගතියක් ලබාගැනීමට සහ ශ්‍රී ලාංකිකයන්ගේ අවශ්‍යතා සපුරාලීමට දීර්ඝකාලීන විසඳුමක් ලබාදීමට රජය දිරිමත් කරන අපේක්ෂාවද එහිදී තානාපතිවරිය සඳහන් කර තිබේ.
පහත දැක්වෙන්නේ ඇමරිකානු තානාපතිනිය නිකුත්කළ ට්වීටර් සටහන යි.
ඇමති ධූර කිහිපයක් ලෑස්තියි - පමා නොවී එන්න : ගෝඨා සජිත්‍ට දන්වයි !
පවතින ආර්ථික සහ දේශපාලන අර්බුදයට විසඳුම් සෙවීම ජාතික අවශ්‍යතාවක් ලෙස සලකා සමගි ජනබලවේගය පක්ෂයේ යම් පිරිසක් ඉදිරියේදී පත්කිරීමට නියමිත නව අමාත්‍ය මණ්ඩලයට ඇතුළත් කිරීමට එකඟ වන්නේ නම් , ඒ සම්බන්ධයෙන් නොපමාව දැනුවත් කරන ලෙස ජනාධිපති ගෝඨාභය රාජපක්ෂ විසින් විපක්ෂ නායක සජිත් ප්‍රේමදාසට දැනුම්දි ඇත.
අද (12) මෙම ලිඛිත දැනුම්දීම සිදුකර ඇත්තේ කොන්දේසි 4ක් යටතේ තමන් අන්තර්කාලීන ආණ්ඩුව භාරගැනීමට සූදානම් බව සඳහන් කරමින් විපක්ෂ නායක සජිත් ප්‍රේමදාස විසින් ජනාධිපති වෙත යොමුකළ ලිපියට නිල ප්‍රතිචාරයක් වශයෙනි.
රට බරපතළ දේශපාලන සහ ආර්ථික අර්බුදයකට මුහුණ දෙමින් පවතින අවස්ථාවක නව අමාත්‍ය මණ්ඩලය පත්කිරීමට බොහෝ කල් දැමීමට නොහැකි බවත් එබැවින් කඩිනම් ප්‍රතිචාරයක් අපේක්ෂා කරන බවත් ජනාධිපතිවරයා යොමුකළ ලිපියේ අවධාරණය කර ඇත.
අභියෝගය මඟ හැරියේ ඔබයි : දැන් ඔබ ප්‍රමාදයි !
එසේම මැයි 06 වනදා අගමැති මහින්ද ප්‍රමුඛ ආණ්ඩුවට ඉල්ලා අස්වීම දැනුම්දීම ,
පසුව අගමැති ධූරය භාරගෙන ආණ්ඩුවක් පිහිටුවීමට විපක්ෂ නායක සජිත් ප්‍රේමදාස වෙත ජනාධිපති ගෝඨාභය සිදුකළ දැනුම්දීම ,
ජනාධිපති යටතේ අන්තර්වාර පාලනයක වගකීමක් නොගන්නා බවට විපක්ෂ නායක මැයි 10, ප්‍රසිද්ධ මාධ්‍ය හමුවකදී පැවසීම,
ඇතුළු පසුගිය සමයේ සිදුවීම් පැහැදිලි ලෙස දක්වා ඇති ජනාධිපති ගෝඨාභය රාජපක්ෂ , අන්තර්වාර ආණ්ඩුවක් සඳහා එකඟ අනෙකුත් පක්ෂ නායකයන්ගේ එකඟතාව මත හිටපු අග්රාමාත්ය රනිල් වික්රමසිංහ ට අග්රාමාත්ය ධූරය සඳහා ආරාධනා කළ බවත් විපක්ෂ නායක වෙත යොමුකළ ලිපියේ සිහිපත් කර ඇත .
එවැනි පසුබිමක නව අග්‍රාමාත්‍යවරයා ලෙස අද (12) දිවුරුම්දීමට මොහොතක් තිබියදී අනෙක් පක්ෂ සමග සාකච්ඡා නොකළ කොන්දේසි 4 ක් ගෙන අගමැති ධූරය ලබාගන්නට එකඟතාව දැක්වූවද තමන්ට වචනය වෙනස් කිරීමට නොහැකි බවත් ජනාධිපති ගෝඨාභය රාජපක්ෂ විසින් විපක්ෂ නායක සජිත් ප්‍රේමදාස වෙත යොමුකළ ලිපියේ දක්වා ඇත.
ජනාධිපතිවරයා විසින් විපක්ෂ නායක සජිත් ප්‍රේමදාස වෙත යොමුකළ ලිපිය පහත දැක්වෙයි .
සජිත් බලාගෙන ඉන්න : කැප්ටන් වැඩේ බාරගෙන !
කෙසේ වුවත් මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ සජිත් ප්‍රේමදාස විපක්ෂ නායක ධූරය දැරීමටවත් තරම් පරිණතද යන ප්‍රශ්නය මේ හරහා මතුවෙන බවයි.
රට බරපතළ අර්බුදයකට මුහුණදී රටේ සෑම අංශයක්ම කඩා වැටෙමින් ඇති පසුබිමක රනිල් අගමැති ධූරය භාරන්නා තුරු ඒ සම්බන්ධයෙන් වූ අභියෝගයට මුහුණදීමට නොහැකි නායකයකු ලෙස තමන් විසින්ම අද නැටූ නාඩගම හරහා තහවුරු කළ බවත් විචාරක මතය වී තිබේ.
හොඳම කප්පිත්තා යනු මුහුද නිසොල්මනේ ඇති අවස්ථාවේ එය නියමිත වරායට ගෙන යන්නා නොව , මහා කුණාටු සුළි ඇති පසුබිමක පවා නිරුපද්‍රිතව නැව වරායට පදවන්නා බව සජිත් විපක්ෂ නායක මෙන්ම ඔහුගේ ගෝලයන් රැළත් තේරුම් ගතයුතු බව එක් දේශපාලන විචාරකයකු අවධාරණය කර සිටියේ ය.
ඔහු වැඩිදුරටත් කියා සිටියේ අසාර්ථක වුවත් මෙවන් මොහොතක රටේ අභියෝගය භාරගැනීමට සමත් වෙනත් දේශපාලනඥයකු නොමැති තරම් බවත් ය.
නව අගමැති ලේකම් : සමන් ඒකනායක !
නව අග්රාමාත්ය ලේකම්වරයකු අද (12) පත්කර ඇති අතර ඒ ශ්‍රී ලංකා පරිපාලන සේවයේ විශේෂ ශ්‍රේණියේ නිලධාරියෙකු ලෙස විශ්‍රාමලත් සමන් ඒකනායක ය.
ඔහු අද ජනාධිපති මන්දිරයේදී ජනාධිපති ලේකම් ගාමිණී සෙනරත් අතින් අදාළ පත්වීම් ලිපිය ලබා ඇත.
එසේම අග්රාමාත්ය රනිල් වික්රමසිංහ ධුරයට පත්වීම ලෝක වාර්තාවක් බව දේශපාලන විචාරකයන් පවසයි .
ඒ රටක 6 වතාවක් අග්‍රාමාත්‍යවරයා වීම නිසාය.
ඇඳිරි නීතිය තවදුරටත් !
දැනට ක්‍රියාත්මක ඇඳිරි නීතිය හෙට (13) උදෑසන 06.00ට ඉවත් කිරීමෙන් පසු නැවත හෙට දිනයේ ම පස්වරු 02.00 යළි පැනවීමට තීරණය කර තිබේ.
එසේ පනවන ඇදරි නීතිය පසුදා එනම් (14) උදෑසන 6.00 ට ඉවත් කරන බව ජනාධිපති මාධ්‍ය ඒකකය සඳහන් කරයි.
මේ සම්බන්ධයෙන් ජනාධිපති මාධ්‍ය ඒකකය නිකුත්කළ නිවේදනය පහත දැක්වෙයි .
නව අගමැති රනිල් : ප්‍රමාදය ගැන සජිත් තැවෙයි !
හිටපු අග්රාමාත්ය රනිල් වික්රමසිංහ , මෙරට නව අග්‍රාමාත්‍යවරයා ලෙස අද (12) සවස දිවුරුම්දී ඇත.
ඒ කොටුව ජනාධිපති මන්දිරයේ දී ජනාධිපති ගෝඨාභය රාජපක්ෂ හමුවේය.
ඒ අනුව අග්‍රාමාත්‍යවරයකු ලෙස රනිල් වික්රමසිංහ මෙසේ පත්වන්නේ හය වෙනි වතාවටය .
නව අග්‍රාමාත්‍යවරයා වන රනිල් වික්රමසිංහ ට පාර්ලිමේන්තුවේ බහුතරය ලබාදීමට ස්වාධීන මන්ත්‍රී කණ්ඩායම සමග සමගි ජනබලවේගය පක්ෂයේ මන්ත්‍රී කණ්ඩායමක් ඉදිරිපත් ව ඇති බවත් වාර්තා වෙයි .
එසේම ඉදිරියේදී සුළු පක්ෂ ද රනිල් වික්රමසිංහ අග්‍රාමාත්‍යවරයා සමග සාකච්ඡා කිරීමට නියමිත බවත් දේශපාලන ආරංචි මාර්ග පවසයි .
සජිත් තැවෙයි !
කෙසේ වුවත් මෙම දිවුරුම්දීමත් සමග මෙතෙක් රට අරාජික වන්නට ඉඩහැර බලාසිටි බලවේග කලබල වූ තත්ත්වයක් පෙන්නුම් කරයි.
විශේෂයෙන් විපක්ෂ නායක සජිත් ප්‍රේමදාස ඉමහත් ශෝකයෙන් මුසපත්ව සිටින බවත්, එසේම තමන්ගේ ප්‍රමාදය සියල්ලට මුල බව හිතවතුන් කිහිපදෙනෙකු වෙත පවසා ඇති බවත් වාර්තා වෙයි
එසේම විපක්ෂ නායක අද හිටිහැටියේ ලිපියකට අත්සන් තබා තමන් කොන්දේසි කිහිපයක් සමග අගමැති ධූරය භාරගන්නට සූදානම් බව සඳහන් කර ඇත .
එහිදී ඔහුගේ නියෝජිතයන් හට ජනාධිපති දන්වා ඇත්තේ , පාර්ලිමේන්තුව තුළ 113 ක බහුතරය පෙන්වා අගමැති ධූරය ලබාගන්නට කටයුතු කරන ලෙසත් , ඒ හැර හිටපු අග්රාමාත්ය රනිල් වික්රමසිංහ ට ලබාදුන් වචනය වෙනස් කිරීමට නොහැකි බවත් ය.
එසේම අගමැති ධූරය භාරගෙන ආණ්ඩුවක් පිහිටුවීමට තමන් පළමුව ආරාධනා කර සිටියේ ද විපක්ෂ නායක සජිත් ප්‍රේමදාස වෙත බවත් , ඔහු විවිධ කොන්දේසි දමමින් අවස්ථාව ප්‍රතිකේෂ්ප කිරීම සම්බන්ධයෙන් ද ජනාධිපති ගෝඨාභය රාජපක්ෂ එහිදී සිහිපත් කර ඇති බවත් වාර්තා වෙයි .
සෝභිත කාදිනල් විරෝධය !
මේ අතර ඕමල්පේ සෝභිත හිමි සහ අගරදගුරු මැල්කම් රංජිත් කාදිනල් හිමි අග්‍රාමාත්‍යවරයා ලෙස රනිල් වික්රමසිංහ ගේ පත්වීමට විරෝධය පලකර ඇත .
රනිල් එන ආරංචියට කොටස් වෙළඳපොල ගොඩ යයි !
රනිල් වික්රමසිංහ අගමැති වීමට යන ආරංචියට ශ්‍රී ලංකා කොටස් වෙළඳපොල යළිත් හිස ඔසවන්නට ආරම්භ වී ඇති බව කොටස් වෙළඳපොල විශ්ලේෂකයින් පෙන්වා දෙයි.
අද(12) දිනය අවසන් වනවිට 3.17%ක වර්ධනයක් අත්කර ගැනීමට කොටස්වෙළඳපොල සමත් වී ඇත.
ආර්ථික අර්බුධය සහ දේශපාලන අස්ථාවරභාවය හේතුවෙන් අඩියටම කඩා වැටුණු ශ්‍රී ලංකා කොටස් වෙළඳපොලේ ආයෝජනයෙන් දෙස් විදෙස් ව්‍යාපාරික ප්‍රජාව ඉවත් විය.
හිටපු අගමැති රනිල් වික්රමසිංහ කඩා වැටුණු ආර්ථිකය යළ පණ ගසා සිටුවන්නට සමත් එකම පුදගලයා ලෙස රනිල් හිතවාදීන් දිගින් දිගටම කියා සිටි රනිල් හිතවාදීන් පවසන්නේ, අද කොටස් වෙළඳපොල වර්ධනය ඊට කදිම සාක්ෂියක් සපයන බවයි.
රනිල් වික්රමසිංහ හිටපු අග්‍රාමාත්‍යවරයා ජාත්‍යන්තර විශ්වාසය දිනාගෙන සිටින එකම දේශපාලකයා නිසා ඔහුව විශෟවාස කොට විදේස් ආයෝජන සහ ආධාර රැසක්ද දිගින් දිගටම රට තුළට ගලාගෙන ඒමට නියමිත බව වැඩි දුරටත් ඔවුන් සඳහන් කර සිටියි.
කෙසේ වුවද මේ වන විට රට තුළ පැන නැගී ඇති ඉන්ධන හිඟය, බල ශක්ති අර්බුධය සහ බඩු භාණ්ඩ හිඟයට ඉක්මන් විසඳුම් නොගෙනාවොත් මහජනතාව තවත් ප්‍රකෝපකාරී වෙමින්, මුලු රටම මහා ව්‍යසනයකට ඇදගෙන යනු ඇති බව දේශපාලන සහ ආර්ථික විශ්ලේෂකයින් දිගින් දිගටම අදහස් දැක්වීය.
කිසිම බලාපොරොත්තුවක සේයාවක්වත් නැති එවන් තත්ත්වයක් තුළ අද කොටස් වෙළඳපොලේ නැගිටීම මහජනාතාව සහ ව්‍යාපාරික ප්‍රජාව තුළ අපේක්ෂාවන් ජනිත කරවමින් ඇත.
සජිත් අගමැති ධූරය ඉල්ලයි : වෙලාව ඉවරයි පුතා : කාලෙකට පස්සේ ජනාධිපතිට හිනා !
අභිනව අගමැති ධූරය පිළිගැනීමට තමන් සූදානම් බව විපක්ෂ නායක සජිත් ප්‍රේමදාස පවසයි.
ඔහු මේ බව සඳහන් කර සිටියේ අද (12) පැවති මාධ්‍ය හමුවකදී අදහස් දක්වමින්ය.
මේ වන විට අගමැති ධූරය ඉල්ලා ජනාධිපති ගෝඨාභය රාජපක්ෂ වෙත ලිපියක් ද විපක්ෂ නායකවරයා විසින් ඉදිරිපත් කර තිබෙන බවත් එහිදී සඳහන් කෙරිණ .
එම ලිපියේ ඔහු සඳහන් කර ඇත්තේ අග්රාමාත්ය ධූරය බාරගන්නැයි මහානායක හිමිවරු ඇතුළු පිරිස කළ ඉල්ලීම අනුව නිශ්චිත අවම කාලයක් තුල ජනාධිපති ධූරයෙන් ඉවත්වීම ඇතුළු කොන්දේසි කීපයක් මත අග්රාමාත්ය ධූරය බාර ගැනීමට එකඟ බවයි.
රනිල්ට බය වෙලා !
වඩාත් සිත්ගන්නා සුළු කරුණ වන්නේ විපක්ෂ නායක සජිත් ප්‍රේමදාස මේ හදිසි ලිපිය ජනාධිපති ගෝඨාභය රාජපක්ෂ වෙත යොමු කරන්නේ , හිටපු අග්රාමාත්ය රනිල් වික්රමසිංහ අගමැති ධූරය භාර ගැනීමට සූදානම් බව දැනුම්දි පැය 24 ක් ඉක්මයාමට පෙර වීමයි.
එසේම හිටපු අග්රාමාත්ය රනිල් වික්රමසිංහ අද පස්වරු 6.30 ට හය වෙනි වතාවටත් අග්රාමාත්ය ධූරයෙ දිවුරුම් දීමට සූදානම් කර තිබූ පසුබිමක වීමයි.
කෙසේ වුවත් මීට පෙර ජනාධිපති ගෝඨාභය රාජපක්ෂ විසින් අගමැති ධූරය ලබාගෙන ආණ්ඩුවක් පිහිටුවීමට , විපක්ෂ නායක සජිත් ප්‍රේමදාස වෙත කළ ආරාධනය ඔහු විවිධ කොන්දේසි දමමින් ප්‍රතිකේෂ්ප කර තිබිණ.
ජනාධිපතිට හිනා !
මේ වන විටත් අගමැති ධූරය භාර ගැනීමට සූදානම් බව සඳහන් කරමින් විපක්ෂ නායක සජිත් ප්‍රේමදාස විසින් යොමුකළ ලිපිය ජනාධිපති අතට පත්ව ඇති බවත් වාර්තා වෙයි .
එහිදී අගමැති ධුරය බාර ගන්නා ලෙස තමා විසින් රනිල් වික්‍රමසිංහට දුන් වචනය මේ අවස්ථාවේදී වෙනස් කළ නොහැකි බව ජනාධිපතිවරයා, විපක්ෂ නායකවරයාගේ නියෝජිතයින්ට දැනුම් දුන් බව ජනාධිපති කාර්යාලයේ ජ්‍යෙෂ්ඨ නිලධාරියකු පැවසිය.
වත්මන් අර්බුදය තුළ අගමැතිධුරය බාරගනිමින් ආණ්ඩුවක් පිහිටුවන ලෙස තමන් පළමුව අරාධනා කලේ විපක්ෂ නායකවරයාට බව සඳහන් කර ඇති ජනාධිපතිවරයා, විපක්ෂ නායකවරයා දිගින් දිගටම එම ඉල්ලීම ප්‍රතික්ෂේප කළ බවද ප්‍රකාශ කර තිබේ.
ඒ තත්වය තුළ අගමැතිධුරය බාර ගන්නා ලෙස තමා කල ඉල්ලීමට හිටපු අගමැති රනිල් වික්රමසිංහ ගෙන් යහපත් ප්‍රතිචාරයක් ලැබුන හෙයින්, ඔහුට අද දිනයේ දිව්රුම් දීමට පැමිණෙන ලෙස ආරාධනා කළ බවත් ජනාධිපතිවරයා සඳහන් කර තිබේ.
කෙසේ වුවත් පාර්ලිමේන්තුව තුළ 113 ක බහුතරයක් පෙන්වීමට සජිත් ප්‍රේමදාස විපක්ෂ නායක සූදානම් නම් ඊට අනුව කටයුතු කිරීමට තමන් සූදානම් බව ජනාධිපති පැවසුඉ බවත් වාර්තා වෙයි .
රටේ පවතින බරපතළ ආර්ථික සහ දේශපාලන අර්බුද හේතුවෙන් ඉඳහිට හෝ සිනහා වීමත් අමතක කර සිටි ජනාධිපතවරයාට විපක්ෂ නායක සජිත් ප්‍රේමදාස විසින් යොමුකළ ලිපිය දැක සිනහා ගොස් ඇති බවත් වාර්තා වෙයි .
විචාරකයන් සජිත්‍ට සලකයි !
ඒ අනුව මේ හදිසි තීන්දුව මහ නායක හිමිවරුන්ගෙ ඉල්ලීම පිළිගැනීමක් නොව රනිල් වික්රමසිංහ අගමැති වීමේ භීතිකාව හේතුවෙන් සහ බල තන්හාව නිසා ගනු ලැබූවක් බව විචාරක මතය වී තිබේ .
දේශපාලන විචාරකයන් පවසන්නේ මේ ආකාරයට අවස්ථාවාදී ලෙස භික්ෂූ සංස්ථාව හෝ මහ නායක හිමිවරුන් විකිණීම සටකපටි දේශපාලන උපක්‍රමයක් බවයි.
මෑත ඉතිහාසයේ එය හොඳින්ම අත්හදා බලා වාසි අත්කර ගත්තේ හිටපු අගමැති මහින්ද රාජපක්ෂ බවත් දේශපාලන විචාරකයන් සිහිපත් කරයි.
පැය 48 ක් රටේ අගමැති ප්‍රමුඛ කැබිනට් මණ්ඩලයක් නොමැතිව පැවතියදී, කොන්දේසි දමමින් රටේ බරපතළ ආර්ථික අර්බුදය අමතක කර, සිය බලය ගැන පමණක් සිතූ සජිත් ප්‍රේමදාස වැන්නෙකු, එක් වරම මහනායක හිමිවරුන් විකුණා, අගමැති ධූරය ඉල්ලීම හරහා , ඔහු විපක්ෂ නායක ධූරයටත් නොසුදුසු බව ඔප්පුකර ඇති බවත්, විචාරකයන් පවසයි .
ඔවුන් එහිදී පෙන්වා දෙන්නේ , මහින්ද රාජපක්ෂ අදටත් ජනතාවගෙන් වසංවී බංකර් ජීවිතයක් ගෙන යන්නේ දේශපාලන බලය වෙනුවන්, ආගම ජාතිය ගැන බොරු කියා ජනතාව රැවටූ නිසා බවයි.
සජිත් ප්‍රේමදාස විපක්ෂ නායකවරයා ද ආරම්භයේම ඒ මග යන්නට සූදානම් වන බවත් එනිසා එවැනි දේශපාලන නායකයන් පළමු මොහොතේ ම වේදිකාවෙන් ඉවත් කිරීමට අනාගතය වෙනුවෙන් කරන හොඳ ආයෝජකයක් බවත් දේශපාලන විචාරකයන් පවසයි .
මේ අතර වාර්තා වන්නේ , සමගි ජනබලවේගය පක්ෂය නියෝජනය කළ ජ්‍යෙෂ්ඨයන් රැසක් මේ වන විට රනිල් වික්රමසිංහ අගමැති වීමට සහය පළකර ඇති බවයි.
ගෝල්ෆේස් අනුරංගට යුක්තිය ඉටුකරනු : අරාබි වසන්ත අත්අඩංගුවට ගනු !
මැයි 09 වනදා හිටපු අගමැති මහින්ද රාජපක්ෂ ප්‍රමුඛ පොදුජන පෙරමුණේ මැර කල්ලි එල්ල කළ ප්‍රහාරයෙන් බරපතළ තුවාල ලැබූ ශාලික අනුරංග මේ වන විට කොළඹ ජාතික රෝහලේ ප්‍රතිකාර ලබයි.
ගෝඨා ගෝ ගමේ the trust නම් කූඩාරමේ සිටි ක්‍රියාකාරීම සාසාමාජිකයකු වූ ඔහු ප්‍රහාරයට ලක්ව ඇත්තේ ද තවත් සහෝදර අරගලකරුවකු පොදුජන පෙරමුණේ මැර පිරිසේ ප්‍රහාරයෙන් මුදවා ගැනීමට යාමේදී ය.
ඒ අවස්ථාවේ අනුරංග වෙත යකඩ පොළු ප්‍රහාරයක් එල්ල කර ඇත්තේ , පසුගිය සමයේ පොදුජන පෙරමුණ ආණ්ඩුවට එරෙහි විරෝධතාකරුවන් වෙත අදිසි පෙනීසිටීම් හරහා විරෝධය දක්වන කුප්‍රකට "අරාබි වසන්ත " බව සඳහන් වෙයි. එසේම මේ ප්‍රහාරය එල්ල කරන්නේ පොලිස් නිලධාරීන් ද ඉදිරි පිටය.
ගෝල්ෆේස් අරගල බිමේ ආරංචි මාර්ග සඳහන් කරන ආකාරයට ඊට අදාළ වීඩියෝ සාක්ෂි පවා ඔවුන් සතුව ඇත.
මෙම අරාබි වසන්ත ව විරෝධතාකරුවන් විශේෂ කොට දක්වන්නේ , ජනාධිපති ගෝඨාභය රාජපක්ෂ ගේ මිරිහාන නිවස ඉදිරිපිට විරෝධය අවස්ථාවේ ඉතා සැක සහිත ලෙස ගින්නට ලක්ව රටේම ආන්දෝලනයකක් ඇති කළ බස් රථය එතැනට ගෙනා පුද්ගලයා ද මොහු බව විශ්වාස කරන නිසාය.
කෙසේ වුවත් කුප්‍රකට අරාබි වසන්ත ගේ යකඩ පොලු ප්‍රහාරය හේතුවෙන් අනුරංග ගේ හිසේ දකුණු පැත්තට බරපතළ හානි සිදුව ඇති බවත් වාර්තා වෙයි .
මේ වන විට හිස් කබලේ දකුණු පැත්තෙන් කොටසක් ඉවත් කර ඇති බවත් නල්ස් යොදා එහි එක්වන රුධිරය ඉවත් කරන බවත් වෛද්‍යවරුන් පැවසූ බව ඔවුන් පවසයි .
මේ වන විට අනුරංග ක්‍රමයෙන් සුවය ලබමින් සිටින නමුත් ඔහු සාමාන්‍ය තත්ත්වයට පත්වීමට කාලයක් ගතවනු ඇති බවත් අරගල බිමේ සගයන් පවසයි.
මේ හමුවේ ඔවුන් ඉල්ලා සිටින්නේ , නිරායුද ශාලික අනුරංග වෙත මරනීය ප්‍රහාරයක් එල්ල කළ මේ කුප්‍රකට අරාබි වසන්ත වහාම අත්අඩංගුවට ගෙන අධිකරණයට ඉදිරිපත් කරන ලෙසය.
පහත දැක්වෙන්නේ ඒ කුප්‍රකට අරාබි වසන්ත ගේ තිරිසන් හැසිරීම ය.
Page 253 of 386