චීන ජනාධිපති ෂී ජින් පිං ජර්මන් චාන්සලර් Friedrich Merz හමු වී ඇත. ඒ, ඊයේ(25) සවස බෙයිජිං හිදී ය.
ලොව දෙවන විශාලතම ආර්ථිකය හිමි චීනය සහ ලොව තුන්වන විශාලතම ආර්ථිකය හිමි ජර්මනිය අතර සම්බන්ධතා දෙරට යහපතට පමණක් නොව යුරෝපයට හා සමස්ත ලෝකයට ම වැදගත් බව චීන ජනාධිපතිවරයා එහි දී කියාසිටියා.
චීන ජනාධිපතිවරයා ගෙන් යෝජනා තුනක්
ද්විපාර්ශ්වික සබඳතා වඩාත් වර්ධනය කිරීමේ වැදගත්කම අවධාරණය කළ චීන ජනාධිපතිවරයා එහි දී යෝජනා තුනක් ඉදිරිපත් කර තිබෙනවා. එම යෝජනා අනුව චීනය හා ජර්මනිය අන්යෝන්ය සහාය ලබාදෙන විශ්වසනීය හවුල්කරුවන් මෙන්ම අන්යෝන්ය විවෘතභාවය හා ප්රතිලාභ මත පදනම් වන නවෝත්පාදන හවුල්කරුවන් විය යුතුයි. එසේම, චීනය හා ජර්මනිය සංස්කෘතික වශයෙන් මනා අවබෝධයක් හා සමීපතාවක් තිබෙන හවුල්කරුවන් විය යුතුයි. ජාත්යන්තර කටයුතුවලදී බහුපාර්ශ්වවාදයේ ආරක්ෂාව, ජාත්යන්තර නීතියේ පාලනය, නිදහස් වෙළඳාම මෙන්ම ආරක්ෂාව සහ සහයෝගිතාව සඳහා ප්රමුඛත්වයක් ලබා දිය යුතු බවත්, දෙරට එක්සත් ජාතීන් කේන්ද්ර කර ගෙන කටයුතු කළ යුතු බවත්, ෂී ජින් පිං ජනාධිපතිවරයා එහි දී පෙන්වා දී තිබෙනවා
යුක්රේන අර්බුදය සම්බන්ධයෙන් ද සාකච්ඡා
චීන ජනතාවට සුබ නව වසරක් පතමින් ජර්මන් චාන්සලර්වරයා එහි දී කියාසිටියේ චීන ජනතාව සාම්ප්රදායික නව වසර සමරමින් සිටින කාලයේ චීනයට පැමිණීමට ලැබීම පිළිබඳ තමන් සතුටු වන බවයි. චීනය සමග පවතින සම්බන්ධතා ජර්මනිය ඉතා වැදගත් කොට සලකන බවත්, චීනය සමග එක්ව දෙරට මිත්රත්වය හා ද්විපාර්ශ්වික උපායමාර්ගික හවුල්කාරීත්වය අඛණ්ඩව පවත්වාගෙන යෑමට කැමති බවත්, Friedrich Merz පවසා තිබෙනවා. ජාත්යන්තර තත්ත්වය බැරෑරුම් වෙනසකට භාජනය වෙමින් පවතින වත්මන් කාලයේ ජර්මනිය හා චීනය ගෝලීය අභියෝගවලට මුහුණ දීමේ පොදු වගකීමක් දරමින් සිටිනවා. නිදහස් වෙළඳාම ආරක්ෂා කිරීම සහ ආරක්ෂණවාදය පිටුදැකීම වෙනුවෙන් චීනය සමග සම්බන්ධීකරණය ශක්තිමත් කිරීමට බලාපොරොත්තු වන බව ද එහිදී ජර්මන් චාන්සලර්වරයා සඳහන් කළා.
යුක්රේන අර්බුදය සම්බන්ධයෙන් ද එහිදී නායක දෙපළ අදහස් හුවමාරු කර ගෙන ඇති අතර එම හමුවීමෙන් පසු දෙපාර්ශ්වය ඒකාබද්ධ ප්රවෘත්ති නිවේදනයක් ද නිකුත් කළා.
දිනූෂි ධීරසිංහ - චීන මාධ්ය සමූහය
