විපක්ෂ නායකවරයා ගේ ඉන්දීය නිල සංචාරය අතරතුර නවදිල්ලි නුවර සිදු කළ සංචාරයේ දී සජිත් ප්‍රේමදාස ඉන්දීය විදේශ කටයුතු අමාත්‍ය ආචාර්ය එස්. ජයශංකර් සම. සුවිශේෂී සාකච්ඡාවක් පැවැත්විණි. මෙහි දී ඉන්දීය-ශ්‍රී ලංකා හවුල්කාරිත්වය, කලාපීය ස්ථාවරත්වය, සම්බන්ධතාව සහ අන්‍යෝන්‍ය සමෘද්ධිය සඳහා දෙපාර්ශ්වයේ කැපවීම සම්බන්ධයෙන් අදහස් රැසක් හුවමාරු විය.
තිරසාර වර්ධන උපාය මාර්ගයක අවශ්‍යතාව
ඉන්දියාවේ සුවිශේෂී නායකයකු ලෙස අමාත්‍ය ආචාර්ය එස්. ජයශංකර් ශ්‍රී ලංකාවේ මෑත කාලීන ආර්ථික අර්බුදය තුළ ඉන්දියාවේ ඵලදායී මැදිහත්වීම නැවත වරක් තහවුරු කළ අතර මෙහි දී ශ්‍රී ලංකාවේ දිගුකාලීන ආර්ථික පුනර්ජීවනය සැලසුම් කිරීම සඳහා වත්මන් කාල පරිච්ඡේදය භාවිත කිරීමේ වැදගත්කම ද අවධාරණය කළේ ය. එහි දී විපක්ෂ නායකවරයා ශ්‍රී ලංකා ආර්ථිකයේ වර්ධන, අඛණ්ඩ ප්‍රතිසංස්කරණ සහ ණය තිරසාරභාවය සඳහා වන මාර්ග සිතියම පිළිබඳව අමාත්‍ය ආචාර්ය එස්. ජයශංකර් වෙත පැහැදිලි කර සිටියේ ය.
ඒ අනුව 2028 සිට නැවත වරක් ණය ගෙවීම ආරම්භ වන විට IMF වැඩසටහනෙන් පසු කාල පරිච්ඡේදයේ දී අපේක්ෂා කරන අභියෝග ද ඔහු ගෙනහැර දැක්වී ය. මේ සඳහා කලාපීය ආයෝජන සහ ඒකාබද්ධතාවෙන් සහාය වන තිරසාර වර්ධන උපාය මාර්ගයක අවශ්‍යතාව ද අවධාරණය කළේ ය.
ශ්‍රී ලංකාවේ පුනර්ජනනීය බලශක්ති ධාරිතාව සහ ජාල සම්බන්ධතාව පුළුල් කිරීම
වෙළඳාම, බලශක්තිය සහ යටිතල පහසුකම් ක්ෂේත්‍රයේ සහයෝගීතාව ශක්තිමත් කිරීම පිළිබඳව නායකයින් දෙදෙනා තවදුරටත් සාකච්ඡා කළේ ය. ඔරොත්තු දීමේ හැකියාව සහ වර්ධනය සහතික කිරීම සඳහා ශ්‍රී ලංකාවේ පුනර්ජනනීය බලශක්ති ධාරිතාව සහ ජාල සම්බන්ධතාව පුළුල් කිරීමේ අවශ්‍යතාව ද විපක්ෂ නායකවරයා අවධාරණය කළේය.
භූතානය සහ නේපාලය සමඟ ඉන්දියාවේ සාර්ථක හවුල්කාරිත්වය උපයෝගී කර ගනිමින් විදුලිබල හා බලශක්ති අංශවල සහයෝගීතාව ගවේෂණය කිරීම සඳහා සමගි ජන බලවේගයේ (SJB) පාර්ලිමේන්තු මන්ත්‍රීවරුන්ට ඉන්දීය විදේශ කටයුතු අමාත්‍යාංශය පහසුකම් සපයන බවට ද අමාත්‍ය ජයශංකර් මෙහි දී සහතික විය.
එමෙන්ම සමුද්‍රීය හා ගුවන් සම්බන්ධතා සහ යෝජිත විදුලිබල ජාල අන්තර් සම්බන්ධතාව ඇතුළු ප්‍රධාන සම්බන්ධතා මුලපිරීම්වල ප්‍රගතිය දෙපාර්ශ්වයම මෙහි දී සමාලෝචනය කළේ ය. කලාපයේ ස්ථාවරත්වය සහ නාවික නිදහස පවත්වා ගැනීම සඳහා ශ්‍රී ලංකාවේ උපායමාර්ගික වැදගත්කම හඳුනා ගනිමින්, කලාපීය ආරක්ෂාව සහ දියුණු වන ඉන්දියානු සාගර ආරක්ෂක නිර්මාණ ශිල්පයේ ශ්‍රී ලංකාවේ භූමිකාව පිළිබඳව ද ඔවූහු වැඩිදුරටත් අදහස් හුවමාරු කර ගත්හ.
උපායමාර්ගික සමතුලිතතාවය සහ ස්වාධීනත්වය පවත්වා ගනිමින් සියලුම හවුල්කරුවන් සමඟ විවෘතව සම්බන්ධ වෙමින් ප්‍රායෝගික නොබැඳි ප්‍රතිපත්තියක් සඳහා ශ්‍රී ලංකාවේ කැපවීම විපක්ෂ නායකවරයා නැවත වරක් තහවුරු කළේය. එහි දී අමාත්‍ය ආචාර්ය එස්. ජයශංකර් මෙම ප්‍රවේශය පිළිගෙන ශ්‍රී ලංකාවේ ස්ථාවරත්වය ඉන්දියාවේම ආරක්ෂාව සහ සමෘද්ධිය සඳහා අත්‍යවශ්‍ය බව සඳහන් කළේ ය.
