‘සැරයටියෙන් අපි යනෙන තුරා සංසාරේ අපි එකට ඉමූ. සංසාරෙන් අපි සමුගන්නා දා ඒ ගමනත් අපි එකට යමු’
පෙර සංසාරේ සිට පතාගෙන ආ හැටියටම මේ භවයේ ආදරයෙන් බැඳුණු දෙදෙනෙක් ප්‍රාර්ථනා කරන්නේ ජීවිතයේ නියත දහමක් වූ මේ භවයෙන් නික්ම යනදාටත් දෙදෙනාම මේ භව ගමන ද එකටම අවසන් කරන්නටය.
එසේ අවසන් ගමන් ගිය යුවළක් පිළිබඳව කළුතර, ඉංගිරිය ප්‍රදේශයෙන් අහන්නට ලැබුණේය. ඒ දහවල් 11-30ට බිරිය මියගිය පසු රාත්‍රි 11-30ට සැමියා මිය යාමේ ශෝකාන්තයක්ය.
මෙසේ මිය ගොස් ඇත්තේ ශ්‍රී ලංකා ජාතික රූපවාහිනි සංස්ථාවේ ප්‍රවෘත්ති නිවේදකයකු ලෙස සහ වැඩසටහන් නිෂ්පාදකවරයකු ලෙස කටයුතු කරන මාධ්‍යවේදී දුෂාන්ත දර්ශනගේ මව සහ පියාය.
එම්.එස්.ජේ.ඒ.පී. දයාංගනී (68) සහ කේ.ටී. යසවර්ධන (78) යුවළ මෙසේ මිය ගොස් ඇත.
මීට දින කිහිපයකට දුෂාන්තගේ පියාට තිබූ රෝගී තත්ත්වය එකවරම උත්සන්න වී හොරණ දිස්ත්‍රික් රෝහලට ඇතුළු කළේය. පියාව හොරණ දිස්ත්‍රික් රෝහලට ඇතුළත් කර දිනකට පසුව දුෂාන්තගේ මවද ඉතාමත්ම අසනීප තත්ත්වයෙන් හොරණ දිස්ත්‍රික් රෝහලට ඇතුළත් කරන ලදි.
පළමුව අම්මාට මූලික ප්‍රතිකාර කර අනතුරුව අටේ වාට්ටුවට මාරු කෙරිණි. තාත්තා ඒ වන විට ප්‍රතිකාර ලබමින් සිටියේ නවය වාට්ටුවේය. දුෂාන්ත මේ දින දෙක තුන පුරාවටම රෝහලේ රැඳී සිටියේ රාජකාරි කටයුතු ද නතර කරමිනි.
ඒ අතර වෛද්‍යවරුන්ගේ තීරණය වූයේ තාත්තාට තවදුරටත් ප්‍රතිකාර කිරීමෙන් ඵලක් නොවන බවත් ගෙදර රැගෙන යන ලෙසය. එය අනුව දුෂාන්ත ස්වාමීන් වහන්සේ නමක් වාට්ටුවට වැඩම කර තාත්තා සහ අම්මා අතින් අටපිරිකර පූජා කරන්න පින්කම් සිදු කිරීමට අවස්ථාව සලසා දෙන ලදි.
වෛද්‍යවරුන්ගේ දැනුම්වත් කිරීම මත තාත්තාගේ අභාවය බලාපොරොත්තුවෙන් සිටි දුෂාන්තට සිදුවූයේ එකවරම අදහගත නොහැකි සිදුවීමකි. ඒ තරමක් හොඳින් සිටි ආදරණීය අම්මා එකවරම වාට්ටුවේදී හැම දෙනාටම කලින් සදහටම ජීවිතෙන් සමු ගැනීමයි.
ඒ අනුව ජීවිතයේ එක් පැත්තක් කඩා වැටුණු දුෂාන්ත මවගේ දේහය බාරගෙන එය ඉංගිරිය මල්ශාලාවට රැගෙන අවශ්‍ය කටයුතු සිදු කරන ලද අතර එදින රාත්‍රියේ ඔහුගේ ලෝකයේ ඉතිරි කොටස ද කඩා වැටෙමින් තාත්තා ද මෙලොවින් සමුගත් බව යන ඛේදනීය පුවත අසන්නට ලැබුණි.
ඔහුගේ මව වන එම්.එස්.ජේ.ඒ.ජී. දයාංගනී මහත්මිය මිය යන විට 68 වැනි වියේ පසුවූ අතර ඇය මීට කලකට පෙර බරපතළ රිය අනතුරකට ලක්ව පාදයක් ඉවත්කර සිටියාය. පවුලේ එකම දරුවා වූ දුෂාන්තය. 2022 අවුරුද්දේ දී සිය මවත් සමඟ යතුරු පැදියෙන් ගමන් කරන විට ඉංගිරිය නගරයේ දී රිය අනතුරකට මුහුණ පාන ලදි. එහිදී සිය මව බරපතළ ලෙස තුවාල ලැබූ අතර මාස ගණනාවක් ප්‍රතිකාර කළත් ඇයට දෙපයින් ඇවිදගත නොහැකි විය. පියා ද වරින් වර රෝගී තත්ත්වයට පත් වෙන්නට විය. කෙසේ නමුත් මවගේ ජීවිතය බේරා ගැනීම සඳහා ඔහු සිය ජීවිතයේ අපහසුම තීන්දුවක් ගත්තේ වෛද්‍ය උපදේශය මත මවගේ කකුල දණහිස අසලින් කපා ඉවත් කිරීමට කැමැත්ත පළ කිරීමෙන්ය. නමුත් අද ඔහුගේ මවත් පියාත් ඔහු අතැර අවසන් ගමන් ගොස්ය.
මෙම දේහයන් ඉංගිරිය රෝහල ඉදිරිපිට මලින්ද මල් ශාලාවේ තැම්පත් කර ඇති අතර අවසන් කටයුතු අද දින ( 05) ප.ව. 2.00ට ඉංගිරිය ආදාහනාගාරයේ දී සිදු කිරීමට නියමිතය.
උපුටාගැනීම - දිනමිණ
