මෙරට තාරුණ්‍ය වෙනුවෙන් වැඩිම මුදල වෙන් කළ අයවැය ලෙස මෙම අයවැය හැඳින්විය හැකි බවත්, වත්මන් ආණ්ඩුවේ 2026 අයවැය ජනතාවාදී අයවැයක් බවත්, සමාජවාදී තරුණ සංගමයේ අධ්‍යාපන ලේකම් මහේෂ් අඹේපිටිය පැවසී ය.
#lkඔහු මේ බව පැවසුවේ අද (11) පැළවත්ත ජනතා විමුක්ති පෙරමුණ ප්‍රධාන කාර්යාලයේ දී සමාජවාදී තරුණ සංගමය කැඳවා තිබූ මාධ්‍ය හමුවේ දී ය.
එම මාධ්‍ය හමුවේ දී වැඩි දුරටත් අදහස් දැක්වූ මහේෂ් අඹේපිටිය...
මේක සංවර්ධන අය වැයක්
වත්මන් ආණ්ඩුව මේ වන විට රැකියා විරහිත උපාධිධාරීන්ගේ ගැටලු සදහා ද විසඳුම් ලබාදෙමින් සිටිනවාඒ අනුව මේ වන විට ගැසට් කර ඇති රජයේ රැකියා පුරප්පාඩු 68,000ක් සම්පූර්ණ කිරීම වෙනුවෙන් මේ වන විට අනුමැතිය හිමි වී තිබෙනවා. ලංකාවේ අයවැය 80ක් ක්‍රියාත්මක වෙලා තිබුණා. ඒ අයවැයවලින් වෙන් වෙලා තිබුණේ ඇති හැකි අය වෙනුවෙන්. මේ රටේ දුප්පත්, පීඩිත ශ්‍රමය වැය කරන ජනතාව වෙනුවෙන් නිර්මාණය කරපු අයවැයක් තමයි මෙවර ඉදිරිපත් කරලා තියෙන්නේ.
ජාතික ජනවලවේගයේ දෙවන අයවැය තමයි මේ ඉදිරිපත් කරලා තියෙන්නේ. 2025 දී තිබුණා ජාතික ජනබලවේගය මොන දිශානතියට ද යන්නේ කියන එක සම්බන්ධයෙන් මූලික ඉඟියක්. ඒක අපිට සෞඛ්‍ය හා ආරක්ෂක වියදම් සසඳලා බැලුවම හොඳින් පෙනුණා. අධ්‍යාපනය ගත්තම 2023 රුපියල් 2023 රුපියල් මිලියන 232, 2024 රුපියල් මිලියන 234 ක් 2025 අයවැය තුළ අධ්‍යාපනයට රුපියල් මිලියන 301ක් වෙන් කරලා තියෙනවා. මෙය සංවර්ධන අයවැයක්. මේ අයවැය පොහොසත් රටක් ලස්සන ජීවිතයක් යන ප්‍රතිපත්තිය මත පිහිටපු අයවැයක්.
මේ අයවැය තරුණයන්ට වැදගත් වෙන ආකාරය
ගියවර අයවැයෙන් තරුණයන් වෙනුවෙන් වෙන් වුණේ රුපියල් මිලියන 12,100යි. මෙවර අයවැයෙන් තරුණයන් වෙනුවෙන් රුපියල් මිලියන 13,500ක් වෙන් වෙලා තියෙනවා. ජාතික තරුණ සේවා සභාව ගත්තම ගියවර රුපියල් මිලියන 600යි වෙන් වෙලා තිබුණේ. මෙවර රුපියල් මිලියන 970ක් වෙන් කරලා තියෙනවා. තරුණයන් වෙනුවෙන් පවතින මූලික ආයතනය වෙනුවෙන් එවැනි මුදලක් වෙන් වෙලා තියෙනවා. මේ අයවැය සෙසු ක්ෂේත්‍ර අරන් බැලුවමත් තරුණයින් වෙනුවෙන් විශාල මුදලක් වෙන් කරලා තියෙන බව පේනවා. කෘෂි ව්‍යවසායකයින් ගොඩනැගීම වෙනුවෙන් මුදල් වෙන් වෙලා තියෙනවා.
විශේෂයෙන්ම නිපුණතා සංවර්ධනය හා වෘත්තිය අධ්‍යාපනය වෙනුවෙන් රුපියල් මිලියන 20,200ට වැඩි මුදලක් වෙන් වෙලා තියෙනවා. සමස්තයක් ලෙස අරන් බැලුවම තරුණයින් වෙනුවෙන් නිශ්චිතව අරන් බැලුවම රුපියල් මිලියන 15,000කට වැඩි මුදලක් වෙන් වෙලා තියෙන බව පේනවා. තරුණයන්ගේ ජීවිත පැත්තෙන් බැලුවම මේ අයවැය සුවිශේෂියි. වසර කිහිපයක් සංසන්දනය කරලා බැලුවම තරුණයන් වෙනුවෙන් වැඩිම මුදලක් වෙන් කරපු අවුරුද්ද තමයි ගිය වසර. එය ඉක්මවා ගොස් තවත් මුදල් වෙන් කරලා තියෙනවා මේ වසරේ.
දැන් පැරණි ක්‍රමයට රැකියා ලබාදෙන්නේ නෑ
ඒ වගේම උපාධිධාරීන්ට රැකියා ලබාදීම පිළිබදවත් මේ ආණ්ඩුව ක්‍රියාමාර්ග අරන් තියෙනවා. 68,000කට වැඩි රජයේ රැකියා ප්‍රමාණයක් ලබාදීමට අනුමැතිය හිමිවෙලා තියෙනවා. ඒ වගේම දැන් පැරණි ක්‍රමයට රැකියා ලබාදෙන්නේ නෑ. පුරප්පාඩු අනුව තමයි රැකියා ලබාදෙන්නේ. එය විධිමත් ක්‍රමවේදයකට අනුව තමයි කරන්නේ. ගුරු වෘත්තියට බඳවා ගැනීමේ ගැටලුවලටත් විසදුම් ලබාදෙන්න කටයුතු කරමින් ඉන්නවා. ඒ වගේම දැනට ගැසට් කරලා තියෙන රජයේ රැකියා 62,000ක ප්‍රමාණයෙන් 10,000කට වැඩි ප්‍රමාණයක් උපාධිධාරීන් සඳහා වන තනතුරුවලට අදාළ රැකියා. එහෙම බැලුවම මෙය ජනතාවාදී අයවැයක් ලෙස හඳුන්වන්න පුළුවන්.''
විපක්ෂයට සාධාරණ විවේචනයක් පවා නොමැති අයවැයක්
සමාජවාදී තරුණ සංගමයේ ජාත්‍යන්තර ලේකම් අංජන සම්පත් අමරසිංහ පැවසුවේ, මෙම අයවැය සියලු සීමා යටතේ සංවර්ධන ඉලක්ක කරා ගමන් ගන්නා ආකාරය පෙන්වා ඇති අයවැයක් බවයි. පසුගිය වසරට සාපේක්ෂව අයවැය හිඟය අවම කර ඇති බව ද ඔහු ප්‍රකාශ කළේ ය. බංකොලොත් රටක් භාරගෙන, විපක්ෂයට සාධාරණ විවේචනයක් පවා නොමැති අයවැයක් ඉදිරිපත් කිරීමට හැකියාව ලැබී ඇති බව ද ඔහු සඳහන් කළේ ය. මෙම අයවැයෙන් අධ්‍යාපනයට වෙන් කර ඇති මුදල පිළිබදව සතුටට පත් වන බවත්, උසස් අධ්‍යාපන ක්ෂේත්‍රය තුළ ද වැදගත් තීන්දු ගෙන ඇති බව ද ඔහු සදහන් කළේ ය.
වැඩිදුරටත් අදහස් දැක්වූ අංජන සම්පත් අමරසිංහ...
පුද්ගලික විශ්වවිද්‍යාලවලට පිවිසෙන දරුවන්ට රුපියල් බිලියන 3ක ණයක්
''මෙවර අයවැයේ ප්‍රධාන විශේෂය තමයි අයවැයි හිගය තවදුරටත් අඩු කර ගැනීමට හැකියාව ලැබී තිබීම. මේ ආණ්ඩුව පත්වෙද්දි විපක්ෂය විවිධ දේවල් කිව්වා. නමුත් අද වෙද්දි ඒ සියල්ල බොරු බවට පත්වෙලා තියෙනවා. වත්මන් ආණ්ඩුව ඉතාම හොඳින්, සැලසුම් සහගතව කටයුතු කරමින් ඉන්නවා. විපක්ෂයට කට උත්තර නැතිවෙන්න පුරවැසියා ගැන හිතපු අයවැයක් ඉදිරිපත් කරලා තියෙනවා.
මේ අයවැය තරුණයන් ගැන හිතපු අයවැයක්. විශේෂ ම දේ මෙවර අයවැයෙන් අයවැය හිඟය තව දුරචටත් අවම කරගන්න හැකියාව ලැබිලා තියෙනවා. අධ්‍යාපන ප්‍රතිසංස්කරණ හදුන්වා දීලා තියෙනවා. ඊට අදාළව මුදල් වෙන් කරලා තියෙනවා. උසස් අධ්‍යාපනය හදාරන්න පුද්ගලික විශ්වවිද්‍යාලවලට පිවිසෙන දරුවන්ට ණය යෝජනා ක්‍රමයක් වෙනුවෙන් රුපියල් බිලියන 3ක් වෙන් කරලා තියෙනවා. ඒ වගේම වෘත්තිය අධ්‍යාපනයට විශාල මුදලක් වෙන් කරලා තියෙනවා. ඒ වගේම අධ්‍යාපන ප්‍රතිසංස්කරණ තුළත් වෘත්තිය අධ්‍යාපනය වෙනුවෙන් ඉඩ වෙන් කරලා තියෙනවා.
මෙම මාධ්‍ය හමුවට සමාජවාදී තරුණ සංගමයේ ජාතික කමිටු සාමාජිකා ශානි රත්නායක ද සහභාගී වූවා ය.
