ලබන වසරේ සිට නීතිඥවරුන්ට මාර්ගගත ක්‍රමය ඔස්සේ අධිකරණ වෙත නඩු ගොනු කිරීමට හැකි වන පරිදි අධිකරණ පද්ධතිය නවීකරණය කිරීමට රජය තීරණය කර තිබේ.
2026 වසරේ සිට ශ්‍රේෂ්ඨාධිකරණය විසින් ඊ -නඩු ගොනු කිරීමේ පද්ධතිය ( e- filing system) අදියරෙන් අදියර ක්‍රියාත්මක කිරීමට නියමිත අතර එමගින් නීතිඥවරුන්ට මාර්ගගත ආකාරයට නඩු ගොනු කිරීමට හැකියාව ඇති වන බව අධිකරණ හා ජාතික ඒකාබද්ධතා අමාත්‍යාංශය පවසයි.
කළමනාකරණ පද්ධතියක් ක්‍රියාත්මක වන බවත් එමගින් වඩාත් කාර්යක්ෂම හා තාක්ෂණය මත පදනම් වූ අධිකරණ ක්‍රියාවලියක් සඳහා ශක්තිමත් ඩිජිටල් පදනමක් ස්ථාපිත කර තිබෙන බවත් එම අමාත්‍යාංශය සඳහන් කරයි.
නීති වෘත්තිකයන්ගේ සහ මහජනතාවගේ පහසුව වැඩි දියුණු කරමින් දිවයින පුරා විහිදී තිබෙන අධිකරණ වෙත මෙම ඊ නඩු ගොනු කිරීමේ පද්ධතිය ක්‍රමයෙන් ව්‍යාප්ත කරන බව ද අමාත්‍යාංශය වැඩිදුරටත් පවසයි.
ශ්‍රී ලංකා ශ්‍රේෂ්ඨාධිකරණය නව යුගයකට පිවිසෙයි
ඩිජිටල්කරණය කිරීමේ සුවිශේෂී පියවරක් ලෙස, ශ්‍රී ලංකා අධිකරණ ඉතිහාසයේ පළමු වරට පසුගියදා (20) ජනාධිපති නීතිඥ දිවුරුම් දීමේ උත්සවයේදී ඩිජිටල් අත්සන ශ්‍රී ලංකා ශ්‍රේෂ්ඨාධිකරණය විසින් හඳුන්වා දෙන ලදී.
සාම්ප්‍රදායිකව, මෙම ක්‍රියාවලිය භෞතිකව සිදු කරන ලබන්නක් වන අතර 20 දින අත්කරගත් මෙම ජයග්‍රහණය ඓතිහාසික සන්ධිස්ථානයකි.
මෙම සාධනීය අත්කරගැනීම අධිකරණ මෙහෙයුම් නවීකරණය කිරීම සඳහා ශ්‍රේෂ්ඨාධිකරණයේ දැඩි කැපවීම පිළිබිඹු කරයි. මෙම අධිකරණය දැනටමත් වෙබ් පාදක නඩු කළමනාකරණ පද්ධතියක් (CMS) දියත් කර ඇති අතර, එමඟින් වඩාත් කාර්යක්ෂම හා තාක්ෂණය මත පදනම් වූ අධිකරණ ක්‍රියාවලියක් සඳහා ශක්තිමත් ඩිජිටල් පදනමක් ස්ථාපිත කෙරේ.
2026 වසරේ සිට, ශ්‍රේෂ්ඨාධිකරණය විසින් ඊ-නඩු ගොනු කිරීමේ පද්ධතිය (e-Filing system ) අදියරෙන් අදියර ක්‍රියාත්මක කරනු ඇති අතර, එමඟින් නීතිඥවරුන්ට මාර්ගගත ආකාරයට නඩු ගොනු කිරීමට හැකිවනු ඇත.
නීති වෘත්තිකයන්ගේ සහ මහජනතාවගේ පහසුව, ප්‍රවේශ්‍යතාවය සහ වේගය වැඩි දියුණු කරමින් දිවයින පුරා විහිදි අධිකරණ වෙත මෙම ඊ-නඩු ගොනු කිරීමේ පද්ධතිය ක්‍රමයෙන් ව්‍යාප්ත කිරීමට අපේක්ෂා කෙරේ.
ඩිජිටල් අත්සන ක්‍රියාත්මක කිරීමේ ක්‍රියාවලිය සාර්ථකව ක්‍රියාවට නැංවීම තුළින්, නවෝත්පාදනයන් වැලඳ ගැනීමේ සහ අධිකරණ අංශයේ ඩිජිටල් පරිවර්තනයට නායකත්වය දීමෙහිලා ශ්‍රේෂ්ඨාධිකරණයේ කැපවීම අවධාරණය වේ.
2025 නොවැම්බර් 21 වන දින සිට, අලුතින් ලියාපදිංචි වූ නීතිඥවරුන් 532 දෙනෙකු ඩිජිටල් අත්සන් තැබීමේ ක්‍රියාවලිය භාවිතා කරමින් දිවුරුම්දීමේ උත්සවයන්හිදී දිවුරුම් දී නීතිඥ මණ්ඩලයට ඇතුළත් කර ගනු ඇත.
අගවිනිසුරු ප්‍රීති පද්මන් සූරසේන, අධිකරණය නවීන ඩිජිටල් යුගයක ඔසවා තැබීමේ තීරණාත්මක පියවරක් සනිටුහන් කරමින් 2025 නොවැම්බර් 21 වන දින බඳවා ගැනීම් 90 ක් සම්පූර්ණ කිරීමෙන් මෙම ඓතිහාසික මුලපිරීම ආරම්භ කළේය.
අධිකරණ පද්ධතියේ සියලුම කොටස්කරුවන් සඳහා ඉහළ පාරදෘශ්‍යභාවයක්, ප්‍රවේශ්‍යතාවයක් සහ කාර්යක්ෂමතාවයක් සහතික කරමින්, මෙම ඩිජිටල්කරණ මාවතෙහි ඉදිරියටම යාමට ශ්‍රේෂ්ඨාධිකරණය කැපවී සිටින බව අධිකරණ හා ජාතික ඒකාබද්ධතා අමාත්‍යාංශය පවසයි.
