රට තුළ මේ වන විට පවතින දැඩි අයහපත් කාලගුණ තත්ත්වය හේතුවෙන් සාමාන්‍ය ජනජීවිතය පවත්වාගෙන යාම සඳහා අත්‍යවශ්‍ය වන සේවාවන් ගණනාවක් වහාම ක්‍රියාත්මක වන පරිදි අත්‍යවශ්‍ය සේවා බවට ප්‍රකාශයට පත් කර අති විශේෂ ගැසට් නිවේදනයක් නිකුත් කර ඇත.
මෙම ගැසට් නිවේදනය ජනාධිපති අනුර කුමාර දිසානායක විසින් 1979 අංක 61 දරන අත්‍යාවශ්‍ය මහජන සේවා පනතේ ප්‍රතිපාදන අනුව නිකුත් කර ඇති අතර, මෙම නිවේදනය 2025 නොවැම්බර් මස 28 වැනි සිකුරාදා දින අංක 2464/29 දරන අති විශේෂ ගැසට් පත්‍රය මඟින් ප්‍රකාශයට පත් කර තිබේ.
ගැසට් නිවේදනයේ උපලේඛනයට අනුව අත්‍යවශ්‍ය සේවා ලෙස ප්‍රකාශයට පත් කර ඇති ප්‍රධාන සේවාවන් පහත පරිදි වේ.
* විදුලි බලය සැපයීම සම්බන්ධ සියලු සේවාවන්.
* ඉන්ධන (ඛනිජ තෙල් නිෂ්පාදන, ගෑස් ඇතුළුව) සැපයීම හෝ බෙදාහැරීම.
* රෝහල්, සාත්තු නිවාස, බෙහෙත් ශාලා සහ වෙනත් සමාන ආයතනවල රෝගීන් නඩත්තු කිරීම, පිළිගැනීම, රැකවරණය, පෝෂණය කිරීම සහ ප්‍රතිකාර කිරීම සම්බන්ධ සියලු සේවා.
* ගිලන් රථ සේවාවන්.
* මගීන් හෝ බඩු ප්‍රවාහනය සඳහා වූ පොදු ගමනාගමන සේවා.
* ජලය සැපයීම සහ ජලාපවහනය සම්බන්ධ සියලු සේවාවන්.
* ආහාර හා අත්‍යවශ්‍ය ද්‍රව්‍ය සැපයීම, ආරක්ෂා කිරීම සහ බෙදාහැරීම සම්බන්ධ සියලු සේවාවන්.
* සියලුම දිස්ත්‍රික් ලේකම් කාර්යාල, ප්‍රාදේශීය ලේකම් කාර්යාල සහ අදාළ ක්ෂේත්‍ර මට්ටමේ නිලධාරීන් විසින් ඉටු කළ යුතු සියලුම සේවාවන්.
* ශ්‍රී ලංකා මහ බැංකුව ඇතුළුව සියලුම රාජ්‍ය බැංකු හා රක්ෂණ සේවා කටයුතු.
* පළාත් පාලන ආයතන මඟින් කරගෙන යනු ලබන ජලය සැපයීම, විදුලි බලය, කසළ කාණු ක්‍රමය, ගිනි නිවීමේ හා ගිලන් රථ සේවය, කසළ ශෝධනය සහ කුණු ඉවත් කිරීම ඇතුළු සියලුම සේවාවන්.
