මේ මහා දැවැන්ත ව්‍යසනය තුළින් අසහනයට පත් ජනතාව සමග විපක්ෂය එකට සිටින බව විපක්ෂ නායක සජිත් ප්‍රේමදාස පැවසී ය.
ඔහු මෙම අදහස් පළ කර තිබුණේ අද (29) විශේෂ ප්‍රකාශයක් නිකුත් කරමිනි.
එහි දී වැඩි දුරටත් අදහස් පළ කළ විපක්ෂ නායකවරයා...
IMF කොන්දේසි ලිහිල් කරන්න
''දිත්වා සුළි කුණාටුව තුළින් ජිවිත, දේපල අහිමි වී අවතැන් වූ උන්හිටිතැන් අහිමි වී කඳවුරුවලට සීමා වී අනාථ වූ සියලු දෙනාට බලවත් කණගාටුව පුද කරනවා. මේ මහා දැවැන්ත ව්‍යසනය තුළින් අසහනයට පත් ජනතාව සමඟ විපක්ෂය එකට සිටිනවා. ඊට අමතරව මේ ව්‍යවසයනය තුළින් නිර්මාණය වූ අසහනය, පීඩනය, දුක, කඳුළ සහ වේදනාව තුනී කරන්නට විපක්ෂයට හා සමගි ජන බලවේගයට කළ හැකි උපරිම දේ කරනවා. සමගි ජන බලවේගය හා සමගි ජන සන්ධානය මෙන්ම සමස්ත විපක්ෂය මේ ව්‍යවසයනය තුළින් විපතට පත් ජනතාවට ශක්තියක් වන්නට කළ හැකි උපරිම දේ සිදු කරන්න සූදානම්. දේශීය දානපතියන්, පරිත්‍යාගශීලීන් විවිධ සංවිධාන සහ විදේශීය වශයෙන් ලබා ගත හැකි ආධාර උපකාර උපරිමයෙන් අප රටේ ජනතාවට ලබා ගැනිමට කළ හැකි යුතුකම සහ කාර්යභාරය ඉටු කරනවා.
මෙවන් මොහොතක IMF එක අප රටට පනවා ඇති කොන්දේසි ලිහිල් කරන ලෙසත් දැවැන්ත ඛෙදවාචකයකට රටම ලක්ව ඇති මොහොතක රටේ ජනතාවට සහනය සුබසාධය සහ සංවර්ධනය හරහා ජීවනෝපාය හා ජන ජිවිත නැවත ශක්තිමත් කර ගැනීමට අවශ්‍ය නිසා IMF එක වහාම ක්‍රියාත්මක වන පරිදි රටට පනවා ඇති දැඩි කොන්දේසි ලිහිල් කරන ලෙස ඉල්ලා සිටිනවා.
ජාත්‍යන්තර ආධාරක සමුළුවක් කැඳවන්න
ලෝක බැංකුව, ආසියානු සංවර්ධන බැංකුව වැනි ජාත්‍යන්තර මූල්‍ය ආයතනවලින් මේ ඛෙදවාචකය නිසා විනාශ වූ ජන ජිවිත යළි ගොඩගන්න සහ මේ බල ප්‍රදේශ නැවත සංවර්ධනය කරන්න සහයා දෙන්න. මේ අවස්ථාවේ තවත් ණය ලබා ගෙන රට හිරකරනවා වෙනුවට නැවත වරක් රට ගොඩනගන්න ආධාර ලබා දීම අත්‍යාවශ්‍ය යි. විපක්ෂ නායකවරයා ලෙස විපක්ෂයේ සියලු දෙනා එකට එකතු වී මේ මහා ව්‍යවසයයෙන් රට ගොඩනගන්න ජාත්‍යන්තර ආධාරක සමුළුවක් කැඳවන ලෙස රජයෙන් ඉල්ලා සිටිනවා. මේ ව්‍යවසනකාරී තත්ත්වය නිසා රටට සිදු වූ ඉමහත් හානිය නිසා සිදු වූ ඛෙදවාචකයෙන් නැවත රට ගොඩ ආ යුතු නිසා මේ සම්බන්ධයෙන් ලෝකයේ අවධානය ලබා ගෙන අප රටට ලබා ගත හැකි ධනාත්මක ප්‍රගතිශීලී ආධාර ලබා ගැනීමේ ජාතික ව්‍යායාමයකට මුල පිරිමට විපක්ෂ නායකවරයා ලෙස සූදානම්. මේ සදහා විපක්ෂයේ දායකත්වය ද ලබා දෙනවා.
ජාති ආගම් කුලමල පන්ති පක්ෂ භේදයෙන් තොරව රට ගොඩනගන වැඩසටහනට විපතට පත් ජනතාව ශක්තිමත් කරන්න කටයුතු කරන්න. පටු වාද භේද පසෙකලා රටක් ලෙස එකට එක්ව කටයුතු කරන්න. දේශපාලනය පසෙකලා ලබා දිය යුතු උපරිම ශක්තිය විපක්ෂය ලබා දෙනවා. ජනතාව වෙනුවෙන් කළ හැකි උපරිම යුතුකම් ඉටු කරන්න සූදානම්.
