ආපදා අවස්ථාවකදී සදාචාර විරෝධී ලෙස සත්යයෙන් තොර පුවත් සමාජගත කරන පුද්ගලයන්ට එරෙහිව දැඩි නීතිමය පියවර ගන්නා බව පොලිස් මාධ්ය ප්රකාශක සහකාර පොලිස් අධිකාරි එෆ්. යූ. වුට්ලර් පැවසීය.
ඔහු මේ බව සඳහන් කළේ, ත්රිවිධ හමුදා ආරක්ෂක මූලස්ථානයේ අද (දෙසැ. 1) පැවති මාධ්ය හමුවකට එක් වෙමිනි.
මේ වන විට මහජනතාව බියට සහ කැළඹීමට පත්වන ආකාරයේ පුවත් සමාජගත කිරීම සම්බන්ධව අපරාධ පරීක්ෂණ දෙපාර්තමේන්තුවට පැමිණිලි කිහිපයක් ලැබී තිබෙන බව ත් අදාළ පැමිණිලි සම්බන්ධව පරිගණක විමර්ශන අංශය විමර්ශන ආරම්භ කර තිබෙන බව ත් පොලිස් මාධ්ය ප්රකාශකවරයා පෙන්වා දුන්නේ ය.
පශ්චාත් ආපදා සමයේ රටේ මහජනතාවගේ ආරක්ෂාව සහ යහපැවැත්ම වෙනුවෙන් සේවාවන් සහ සැපයීම් අඛණ්ඩව පවත්වාගෙන යෑමට රජය කැපවීමෙන් කටයුතු කරමින් සිටින අවස්ථාවක ඇතැම් පුද්ගලයන් සමාජ මාධ්ය ඔස්සේ සත්යයෙන් තොර, තහවුරු නොකරන ලද පුවත් සමාජගත කිරීමේ ප්රවණතාවක් දක්නට තිබෙන බවත් ඔහු පැවසීය.
පොලිස් මාධ්ය ප්රකාශකවරයා සඳහන් කළේ, මහජනතාව බියට සහ කැළඹීමට පත්වන ආකාරයේ ප්රකාශ නිකුත් කිරීම සහ පළ කිරීම ඉතා වැරදි ක්රියාවක් බව ත් අසත්ය තොරතුරු සමාජගත කිරීම දඬුවම් ලැබිය හැකි වරදක් බව ත් ය.
එම නිසා මේ ආපදා අවස්ථාවේදී රටම එකට එක්ව සිටින අවස්ථාවේදී සදාචාර විරෝධීව සත්යයෙන් තොර පුවත් සමාජගත නොකරන ලෙස පොලිස් දෙපාර්තමේන්තුව වෙනුවෙන් තමන් මහ ජනතාවගෙන් ගෞරවයෙන් ඉල්ලා සිටින බව ඔහු පැවසීය.
රැඳවුම් මධ්යස්ථානවල ඇතුළු ආපදාවට ලක්වූ ප්රදේශවලින් යම් යම් අපරාධ සිදුවීම් වාර්තාවීමක් දක්නට ලැබෙන බව ත් ශ්රී ලංකා දණ්ඩ නීති සංග්රහයට අනුව ස්ත්රී දූෂණ, අයුතු ඇතුළු වීම්, සොරකම් සහ කොල්ලකෑම් සිදුකරන ඕනෑ ම පුද්ගලයෙකුට එරෙහිව නීතිය දැඩි ලෙස ක්රියාත්මක කරන බව ත් පොලිස් මාධ්ය ප්රකාශකවරයා පැවසීය.
තව ද, රජය ප්රමුඛව ආපදාවට ලක්වූවන්ගේ සුබසාධනය වෙනුවෙන් සිදුකරන ඒකාබද්ධ මෙහෙයුමට සියලු ම දෙනාගේ ගෞරවණීය දායකත්වය අපේක්ෂා කරන බව ඔහු සඳහන් කළේය.
එසේ ම, මෙරටට පැමිණ සිටින විදේශිකයන්ගේ ආරක්ෂාව වෙනුවෙන් වැදගත් සහ කඩිනම් පියවර රැසක් පොලිස් දෙපාර්තමේන්තුව විසින් ගෙන තිබෙන බව ත් එහිදී සංචාරකයන් සම්බන්ධව ඕනෑ ම ගැටලුවක් ඇත්නම් සංචාරක පොලිස් කොට්ඨාසයේ අධ්යක්ෂකතුමන්ගේ 0718591894, 0112421070 හෝ 1912 ක්ෂණික දුරකතන අංකයට හෝ ගුවන් තොටුපළ (සංචාරක) ස්ථානාධිපති 0718596057 සහ ගුවන් තොටුපළ භාර ස්ථානාධිපති 0718591640 යන දුරකතන අංකවලට දැනුම් දිය හැකි බවත් පොලිස් මාධ්ය ප්රකාශකවරයා පැවසීය.
මීට අමතරව පොලිස්පතිවරයාගේ මඟ පෙන්වීම මත පොලිස් මූලස්ථානයේ පැය 24 පුරාම ක්රියාත්මක විශේෂිත මෙහෙයුම් මැදිරියක් ස්ථාපිත කර ඇති අතර, 0718595884, 0718595883, 0718595882, 0718595881, 0718595880 යන දුරකතන අංක අමතා ආපදාවට ලක්වූ පුද්ගලයන් සම්බන්ධව හෝ ඕනෑ ම ගැටලුවක් යොමු කිරීමට මහජනතාවට මෙමගින් අවස්ථාව උදා කර දී ඇත.
