ගංවතුරට ගොදුරු විය හැකි ප්රදේශ කෙරෙහි විශේෂ අවධානයක් යොමු කරමින්, ආපදා තත්ත්වයෙන් පසු රට යථා තත්ත්වයට පත් කිරීම සහ නිවැදි දත්ත ලබා ගැනීම පිළිබඳව එක්සත් ජාතීන්ගේ සංවර්ධන වැඩසටහන (UNDP), ලෝක බැංකුව සහ එක්සත් ජාතීන්ගේ ව්යාපෘති සේවා කාර්යාලයේ (UNOPS) නියෝජිතයින් සමග සාකච්ඡාවක් දෙසැම්බර් 8 වනදා අග්රාමාත්ය හරිනි අමරසූරිය ගේ ප්රධානත්වයෙන් අග්රාමාත්ය කාර්යාලයේ දී පැවැත්විණි.
ආපදා තත්ත්වයෙන් පසු ඵලදායී ලෙස ඉදිරි තීරණ ගැනීමේ දී කාලෝචිත මෙන් ම නිරවද්ය තොරතුරු සහ දත්ත රැස් කිරීමේ වැදගත්කම පිළිබඳව අග්රාමාත්යවරිය මෙහි දී අවධාරණය කළ අතර කෙටි කාලීන සහ දිගු කාලීන පියවර මගින් රට යළි යථා තත්ත්වයට පත් කිරීමට කටයුතු කිරීමේ දී නිවැරදි දත්ත අත්යවශ්ය වන බව අග්රාමාත්යවරිය තවදුරටත් සඳහන් කළා ය.
මෙහි දී UNDP නියෝජිතයින්, GIS තාක්ෂණය, චන්ද්රිකා ඡායාරූප සහ භූ දත්ත යොදා ගනිමින් පශ්චාත් ආපදා තත්ත්වය තක්සේරුව සඳහා වන කෘතිම බුද්ධිමය වැඩසටහනක් වන RAPIDA සහ GRADE භාවිත කරමින් අවශ්යතා තක්සේරු කිරීමේ ක්රියාවලිය පිළිබඳ තොරතුරු අග්රාමාත්යවරියට ඉදිරිපත් කළ අතර ඒ හරහා ආපදා තත්ත්වයේ බලපෑමට ලක් වූ ස්ථාන, ප්රජාව, සහ යටිතල පහසුකම්වලට සිදු වූ හානි ඇස්තමේන්තු කරමින් අවශ්ය තීරණ ගැනීම සඳහා උපකාරී වන බව තවදුරටත් පැහැදිලි කළහ.
රජයට සිය සහාය ලබා දීමට සූදානම් බවත් ආපදා තත්වයෙන් පසු ඊට ප්රතිචාර දැක්වීම සහ හානි වූ යටිතල පහසුකම් නැවත ගොඩනැගීම කාර්යක්ෂමව සිදු කිරීමට රජය සමග සහයෝගයෙන් කටයුතු කරන බවත් UNDP නියෝජිතයින් තවදුරටත් ප්රකාශ කළහ.
මෙම අවස්ථාවට ලෝක බැංකුවේ දේශීය කළමනාකරු ආචාර්ය Gevorg Sargsyan, එක්සත් ජාතීන්ගේ සංවර්ධන වැඩසටහනේ (UNDP) නේවාසික නියෝජිතවරිය,Azusa Kubota, එක්සත් ජාතීන්ගේ ව්යාපෘති සේවා කාර්යාලයේ (UNOPS) දකුණු ආසියානු අධ්යක්ෂතුමන්, අග්රාමාත්ය ලේකම් ප්රදීප් සපුතන්ත්රි, අතිරේක ලේකම් (සංවර්ධන) සාගරිකා බෝගහවත්ත සහ ජාතික සැලසුම් දෙපාර්තමේන්තුවේ නිලධාරීහු ද සහභාගී වූහ.
