පාර්ලිමේන්තු විශ්රාම වැටුප අහෝසි කිරීම සඳහා වූ පනත් කෙටුම්පත දෙවෙනි වර සහ තුන්වන වර කියවීමෙන් පසු එය නීතියක් බවට සම්මත කරන බවත්, එය නීතියක් බවට සම්මත වූ පසු එතැන් සිට කිසිම මන්ත්රිවරයකුට එම විශ්රාම වැටුප හිමි නොවන්නේ යැයි අධිකරණ සහ ජාතික ඒකාබද්ධතා අමාත්ය නීතිඥ හර්ෂණ නානායක්කාර පැවසී ය.
ඔහු මෙම අදහස් පළ කළේ අද (07) පාර්ලිමේන්තුවේ දී, පාර්ලිමේන්තු මන්ත්රීවරුන් ගේ විශ්රාම වැටුප් අහෝසි කිරීමේ පනත් කෙටුම්පතෙහි පළමුවර කියවීමෙන් අනතුරුව විශේෂ ප්රකාශයක් කරමිනි.
මතු පළ වන්නේ අමාත්යවරයා කළ සම්පූර්ණ ප්රකාශය යි.
විශ්රාම වැටුප අහෝසි කරන්නෙ මහජන විරෝධතාව නිසා
''පාර්ලිමේන්තු විශ්රාම වැටුප අහෝසි කිරීම සඳහා වූ පනත් කෙටුම්පතෙහි පළමුවර කියවීම අද සිදුවුණා. ඉදිරියේ දී එය දෙවැනිවර සහ තුන්වන වර කියවීමෙන් පසු එය නීතිය බවට සම්මත කරනවා. එය නීතියක් බවට සම්මත වුනාට පසුව එතැන් සිට කිසිම අයෙකුට එම විශ්රාම වැටුප හිමි වෙන්නේ නැහැ. ඒ වගේම ඔවුන් මේ පනත සම්මත වීමට පෙර ලබා ගත්ත විශ්රාම වැටුප්වලට අගතියක් වෙන්නේ නෑ. ඒවා නැවත ගෙවන්න ඕනි කියලා එකක් මේ පනතේ නෑ. මේ පනත සම්මත වන දිනයේ සිට වෙන දේ තමයි විශ්රාම වැටුප් ගෙවන එක නවත්වන එක. අපි මේක ගේන්න හේතුව තමයි දූෂිත දේශපාලන සංස්කෘතිය විසින් හැමවිට ම තමන්ට වරදාන වරප්රසාද බෙදා ගන්නා ක්රමවේදයක් තිබුණා. ඒ නිසා විශේෂයෙන් මහජන විරෝධතාවයක් තියනවා මේ අවුරුදු පහක් රැකියාව කරලා ඒකට විශ්රාම වැටුප ගන්නේ. මක් නිසාද සාමාන්ය රජයේ සේවකයෙක් උනොත් වසර ගණනාවක් සේවය කරලා කොන්දේසි ගණනාවකට මුහුණ දීලා තමයි ඔවුන්ට විශ්රාම වැටුප හම්බවෙන්නෙ.
ආර්ථික සහන අවශ්ය නම් දෙන්නත් පුළුවන්
මේ විශ්රාම වැටුප ගැනීමේ දී ඔවුන් කිසිම ආකාරයක කන්ට්රිබියුෂන් එකක් කරන්නෙත් නැහැ. අපි ප්රතිපත්ති ප්රකාශයට ඇතුළත් කළේ අපි මේ පාර්ලිමේන්තු මන්ත්රීවරුන්ගේ විශ්රාම වැටුප් අහෝසි කරනවා කියන කාරණාව. ඒ වගේම විශ්රාමික ජනාධිපතිවරුන් ගේ වැටුප හැර වරප්රසාද යම් ප්රමාණයකටත් ඉවත් කළා. ඉතිං මේකෙන් පෙන්නුම් කරන්නේ ජාතික ජන බලවේගය ආණ්ඩුව ජනතාවට දුන් පොරොන්දු එකෙන් එක ඉටු කරමින් අපේ ගමන යනවා කියන කාරණාව. ඉදිරියටත් අපි ප්රතිපත්ති ප්රකාශයේ තියෙන තව දේවල් කරනවා. මේකට අධිකරණයට යන්න පුළුවන් මේක ව්යවස්ථා විරෝධී නම්. නමුත් අපි රජයක් වශයෙන් ඉන්න ස්ථාවරය තමයි මේ අපි දීපු පොරොන්දුව මත මෙම විශ්රාම වැටුප අහෝසි කිරීම. යම් හෙයකින් යම් මන්ත්රීවරයකුට මේ විශ්රාම වැටුප නැතිව අපහසුතා තියනවානම් ඒ්ක රජයෙන් වෙනම ඉල්ලීමක් කරන්න පුළුවන් ඉන් පසුව ඒ් මන්ත්රීවරයා දිහා බලලා ආර්ථීක සහන අවශ්ය නම් ඒ්ක කෙරෙන්නෙ කොහොමද කියලා විසඳන්න පුළුවන්.
මාධ්ය අංශය - අධිකරණ සහ ජාතික ඒකාබද්ධතා අමාත්යාංශය
