මේ රටේ මහ පොළොවට ආදරේ කරන දේශපාලන බලවේගයක් ගොනැගිය යුතු බවත්, අවස්ථාවාදී දේශපාලනය තුළ තමන් ගේ රට ජාතිය ආගම පවාදී හෝ තමන්ගේ දේශපාලන බලය රඳා පවත්වාගන්නා දේශපාලනයක් තමන්ට අවශ්ය නැතැයි ශ්රී ලංකා පොදුජන පෙරමුණේ ජාතික සංවිධායක පාර්ලිමේන්තු මන්ත්රී නාමල් රාජපක්ෂ පැවසී ය.
ඔහු මේ අදහස් පළ කළේ ඊයේ (17) තඹුත්තේගම දී පැවති රැස්වීමකට සහභාගී වෙමිනි.
ශ්රී ලංකා පොදුජන පෙරමුණේ අනුරාධපුර දිස්ත්රික්කයේ කොට්ඨාස නායක නායිකාවන්ගේ පත්වීම් ප්රධානයද නාමල් රාජපක්ෂ අතින් සිදුවිය.
එම රැස්වීමේ දී වැඩි දුරටත් අදහස් දැක්වූ නාමල් රාජපක්ෂ...
සියලු සංස්කෘති ආරක්ෂා විය යුතුයි
''වර්තමානයේ අපේ ජනාධිපතිතුමා අපේ ගමට දෙවතාවක් ආවා. මම ටිකක් පරක්කු වුණා. හැබැයි ගරු ජනාධිපතිතුමනි මමත් ඔබේ ගමට ආවා. හැබැයි මම ඔබේ ගමට ඇවිල්ලා වෛරය පතුරවන්නේ නෑ, මම ඔබේ ගමට ඇවිල්ලා ඊර්ෂ්යාව ක්රෝධය පතුරවන්නේ නෑ. හැබැයි අපි විශ්වාස කරන දේශපාලන ප්රතිපත්තියක් තියනවා. අපි විශ්වාස කරනවා මේ රටේ හෙළ සංස්කෘතිය ඇතුළෙ බෞද්ධ සංස්කෘතිය කේන්ද්රකරගත් සමාජයක් තුළ සියලු සංස්කෘතින් ආරක්ෂා වෙන්න ඕන. අපේ හාමුදුරුවනේ අපි විශ්වාස කරනවා මේ රටේ මහ පොළොවට ආදරේ කරන දේශපාලන බලවේගයක් ගොඩ නැගෙන්න ඕන කියලා. අවස්ථාවාදී දේශපාලනය තුළ තමන්ගේ රට ජාතිය ආගම පවාදීලා හරි තමන්ගේ දේශපාලන බලය රදා පවත්වාගන්නා දේශපාලනයක් නොවෙයි අපට ඕන කරන්නෙ.
උතුරේ ජනතාව සංස්කෘතිය විශ්වාස කරනවා
ශ්රී මහා බෝධීන් වහන්සේ පහුකරගෙන තමයි අපේ හාමුදුරුවනේ නාගදීපෙට යන්නේ. දැන් යුද්ධය නෑනේ... දැන් යන්න පුළුවන්. ඒ වගේම තමයි පල්ලි බොහොමයක් පහු කරගෙන තමයි මිත්රවරුණි මඩු මෑණියොත් වන්දනාමාන කරගෙන්නේ. ඒ වගේම තමයි ජනාධිපතිතුමනි නල්ලූර් දේවස්ථානයේ ඉඳලා යාපනයේ කෝවිල් ගණනාවක් පහුකරගෙන තමයි පා ගමනින් කතරගම පුදබිමට ඇවිල්ලා කතරගම දෙයිහාමුදුරුවෝ වැද පුදාගන්නේ. ඒක ජාතිවාදය නෙමෙයි ඒක විශ්වාසය. බෞද්ධයාට නාගදීපය ගැන තියෙන විශ්වාසය ම තමයි කතෝලිකයාට මඩු මෑණියන් ගැන තියෙන්නේ. ඒ හා සමාන වූ විශ්වාසයක් භක්තියක් තමයි හින්දු සංස්කෘතිය විශ්වාස කරන කතරගම දෙවි හාමුදුරුවෝ විශ්වාස කරන අයට කතරගම පුදභූමිය ගැන තියෙන්නේ. ඒ භූමිය කඩාගෙන වෙන් කරගෙන පාලනය කරන්නවත් තියන ආසාව නෙමෙයි. දෙවියන් කෙරෙහි ආගම කෙරෙහි තියෙන විශ්වාසය.ඒ නිසා ඔබ විශ්වාස කරනවනම් ජනාධිපතිතුමනි බෞද්ධ දර්ශනයට ඇගිල්ල දික් කරලා ඔබේ දේශපාලනය උතුරේ ගොඩනගා ගන්න උතුරේ දමිළ ජනතාව ඒකට සූදානම් නෑ. ඔවුන් සංස්කෘතිය විශ්වාස කරනවා. අපිත් සංස්කෘතිය විශ්වාස කරනවා. ඒ වගේම තමයි අමතක කරන්න එපා අද ලෝකේ බොහෝ රටවල ආගමික අර්බුද තියනවා. මහා බ්රිතාන්ය ගත්තත් එහෙමයි; ඇමරිකාවේ ගත්තත් එහෙමයි. අද අපේ රටේ ආගමික ප්රශ්නයක් නැහැ. ආගම් අතර මරාගෙන ඇනකොටා ගන්නේ නැහැ. ඇයි ඒ...? අපේ හාමුදුරුවනේ බෞද්ධ සංස්කෘතිය ඇතුළෙ ගොඩනැගිච්ච සමාජයේ අනෙක් සියලු ආගම් රැකෙනවා.
අනුර කුමාර ජනාධිපතිතුමා භුක්ති විඳින්නෙ අපි අත් කර දුන් නිදහස
සියලු ආගම් රැකිලා තියෙන්නේ බෞද්ධ සංස්කෘතිය මත මේ මාතෘභූමිය ගොඩනැගිච්ච නිසා. නිර්මල බුදුදහමේ ඉගැන්වීම මත ගොඩනැගිච්ච මේ රටේ ජන සමාජය හැම ආගමකට ම හැම සංස්කෘතියකට ම ගරු කරනවා.ඒ නිසා දකුණේ ජනතාව යාපනේ සිල්ගන්න යන එකටත් උතුරේ ජනතාව කතරගම දෙවිහාමුදුරුවෝ වැදපුදාගන්න එන්න එකටවත් ජාතිවාදියෝ කියලා හංවඩු ගහන්න ලෑස්තිවෙන්න එපා. ඒක අපේ විශ්වාසය සහ බැඳීම. මම එකකට සතුටු වෙනවා; ඒ, මගේ තාත්තා සහ රණවිරුවන් කළ ඒ කැප කිරීම මත ලබපු නිදහස අනුර කුමාර ජනාධිපතිතුමා යාපනයේ උපරිමයෙන් භුක්ති විඳීම පිළිබඳව මම හදවතින්ම සතුටු වෙනවා. ඔබත් සතුටු වෙන්න. මොකද අපේ දේශපාලනය තුළ වෛරය නැහැ. අපිට අවශ්යයි මේ රටට ගැළපෙන දේශපාලන සංස්කෘතියක්. අපිට ඕන මේ රට දියුණු වෙනවා දකින්න ආපස්සට ඇදගෙන යන දේශපාලන සංස්කෘතියක් නෙමෙයි. වෛරය කරන්න එපා කියමින් වෛරය පතුරුවන්න එපා කියමින් ඔබ මේ රටේ ජාතින් අතර අසමගිය ඇති කරන්න උත්සාහ කරනවා. අද එක පැත්තකින් මහා ව්යසනයකට අපි මුහුණ දීලා තියනවා. ඒ මහා ව්යසනය ඇතුළෙ ජීවිත විශාල ප්රමාණයක් නැතිවුණා. ආණ්ඩුවේ මැදිහත් වීමක් තිබුණ ද, මදිද මේ කාරණා පිළිබඳව හොයන්න ඕන. ජීවිත ගණනාවක් බේරගන්න තිබ්බා කියන විශ්වාසය ව්යසනයට ලක්වෙච්ච ජනතාව තුළ තියෙනවා.
එක පෑන් පාරින් කන්ටේනර් 323ක් වරායෙන් එළියට
ආණ්ඩුව ක්රියාත්මක වෙච්ච ආකාරය පිලිබඳව මහ දැවැන්ත කලකිරීමක් හා අප්රසාදයක් තියෙනවා. අසීමිත බදු බරක්, ජනතාවට දරාගන්න බැරි බදු බරක්, ගොවි ජනතාවගේ ආර්ථිකය ශක්තිමත් කරනවා වෙනුවට ඉතිහාසයේ කවදාවත් නැති විදියට පිටරටින් එළවළු පලතුරු ගෙනල්ලා කන්න දෙන සංස්කෘතියක් අපේ රටේ හදන්න උත්සාහ කරනවා. අපි හැමදාම අපේ ගමේ අහිංසක: අම්මලා, තාත්තලා, අපේ සීයලා මේ මහපොළවත් එක්ක පොරබැදුවා; රන් අස්වනු නෙළා ගත්තා. එදා තුන් වේලම බත් කාලා සතුටින් ජීවත් වෙච්ච සමාජයක්. පිටරටින් හාල් ගෙනල්ලා, පිටරටින් එළවළු පලතුරු ගෙනල්ලා කන්න දෙන එක ආණ්ඩුවකට ලේසි වෙන්න පුළුවන්; ආණ්ඩුවට වාසි වෙන්නත් පුළුවන්. හැබැයි මේ සමස්ත මාතෘභූමිය තුළ: ගොවි ජනතාව ආරක්ෂා කිරීමේ වගකීම, ධීවර ජනතාව ආරක්ෂා කිරීමේ වගකීම, ව්යවසායකයා ආරක්ෂා කිරීමේ වගකීම පවතින ආණ්ඩුවට මගහරින්න බෑ කියන එකත් අපි මතක් කරන්න ඕන. එක පෑන් පාරින් මාෆියාව නවත්තන එක කෙසේ වෙතත් එක පෑන් පාරින් කන්ටේනර් 323ක් වරායෙන් එළියට දාලා තියෙනවා. එදා අපිට මඩගැහුවා ඒ විදියටම අදටත් මඩ ගහනවා. මත්ද්රව්ය සම්බන්ධයෙන් ආණ්ඩුවේ ස්ථාවරය... ඔවු... මත්ද්රව්ය මේ රටෙන් තුරන් කරන්න ඕන. සංවිධානාත්මක අපරාධකරුවන් මේ රටෙන් තුරන් කරන්න ඕන. හැබැයි ආණ්ඩුවට සම්බන්ධ සංවිධානාත්මක අපරාධකරුවන් පෝෂණය කරන්නත් ඔවුන්ට විරුද්ධ සංවිධානාත්මක අපාරධකරුවන් විපක්ෂයට සම්බන්ධයි කියලා හංවඩු ගහන්නයි කියන ප්රතිපත්තිය ඇතුළෙ කවදාවත්ම ඒක කරන්න බෑ කියන එකත් ආණ්ඩුව මතක තියාගන්න ඕන. කවදාවත් එහෙම කරන්න බෑ. ඒ හින්දා අවංකයෙන් සද්භාවයෙන් ඒ කටයුත්ත කෙරුවොත් මේක මේ රටින් තුරන් කරන්න පුළුවන් කියලා විශ්වාසයක් අපිට තියෙනවා.
අපි නූතන පරම්පරාවේ දේශපාලන බලවේගයක්
අපි මේ මහපොළවේ ජනතාව ගෙන් ගොඩනැගිච්ච දේශපාලන බලවේගයක්. අපි හැමදාමත් මේරටේ ගොවිජනතාව වෙනුවෙන් පෙනී හිටියා. අපි ඉදිරියටත් අනාගතේදිත් මේ මාතෘභූමියේ වවන්න පුළුවන් හැම භෝගයක්ම වවනවා වගේම ගොවියා ගේ දරුවට තාක්ෂණයත් එක්ක නූතන පරම්පරාවේ ගොවි පරම්පරාවක් බිහිකරන්න අපි මැදිහත් වෙනවා කියන එකත් අපි මතක් කරන්න ඕන. ඒ වගකීම අපි බාරගන්නවා. අපි නූතන පරම්පරාවේ දේශපාලන බලවේගයක්. අපි තාක්ෂණයත් එක්ක බද්ධ වෙච්ච කණ්ඩායමක් ඒ වගේම අවංක චේතනාවකින් මේ රටේ තරුණ පරම්පරාව ගොඩනගන්න ඕනේ ලෝකේ රැකියා වෙළෙඳ පොළට තරුණයන් සූදානම් කරන්න ඕනේ; වෙළෙඳ පොළට වගේම නූතන රැකියා වෙළඳ පොළට ගැළපෙන වගේම අපේ සංස්කෘතියට ආගම දහමට ගැළපෙන දේශපාලන පරිවර්තනයක් කරන්න ඕනේ කියලා දැඩි අධිෂ්ඨානයකින් ඉන්න දේශපාලන කණ්ඩායමක්.
දේශපාලන පරිවර්තනයකට අපේ පක්ෂය සූදානම්
අනුරාධපුර දිස්ත්රීක්කයේ ඔබ තමුන්නාසේලාට මම ස්තූතිවන්ත වෙනවා. අපි දීර්ඝ ගමනක් ආවා. අභියෝග ගණනාවක් අපි පහු කළා. පහුගිය කාලේ අපි පසුබැස්සා. ඔව් අපේ අඩුපාඩුකම් තියෙනවා. අපි ඒවා හදාගත්තා, අපි ඒවා හදාගනිමින් ඉන්නවා. මා විශ්වාස කරනවා උද්ධච්චකමෙන් රටේ ජනතාවට පක්ෂයට පාක්ෂිකයන්ට ඇහුම්කන් නොදී පාලනය කරනවා වෙනුවට අවංකව පාක්ෂිකයා එක්ක ගැටිලා පාක්ෂිකයා එක්ක කතා කරලා මාතෲ භූමියේ මහපොළොවේ බලාපොරොත්තු පිළිබඳව අවබෝධයක් ඇතුව අපි ඉස්සරහට යන්න ඕනේ. අන්න එවැනි දේශපාලන පරිවර්තනයකට අපේ පක්ෂය අද සූදානම්. මම ආරධනා කරනවා අපෙන් ඈත් වෙච්ච තව බොහෝ පිරිසක් ඉන්නවා; අද විශාල පිරිසක් අපිත් එක්ක එකතු වෙනවා. ඒ එකතුවීම තුළ අපිත් එක්ක රැඳිච්ච, අපි එක්ක පෙනීහිටපු ජනතාව ශක්තිමත්ව ගොඩනැගෙනවා. ඒ වගේම මම ආරාධනා කරනවා අපෙන් ඈත් වෙලා වෙන් වෙලා හිත් අමනාප වෙලා හිත් බිඳිච්ච පිරිස් තව ඉන්නවනම් අපි ඒ අයට කතා කරනවා. අපි එක්ක කතා කරලා අපි කවුරුද කියලා පැහැදිලි කරමු, බොරුවට වෛරයට ආණ්ඩුවේ ඊර්ෂ්යාවට ආණ්ඩුව මේ රටට ගැළපෙන්නේ නැති දේශපාලන ප්රතිපත්තිවලට අද ආණ්ඩුව ඇතුළෙන් ම විරුද්ධව ගොඩනැගෙන බලවේගය ඇතුළෙ ම අපේ ජනතාව විශාල ප්රමාණයක් ඉන්නවා. අපි ඒ අයටත් ආරාධනා කරනවා. අපි සාකච්ඡා කරමු. යම් වෙනස්කමක් තියනවනම් ප්රතිපත්ති මාලාවක් ඇතුළේ අපි එකඟ වෙමු. අපෙන් ඈත්වෙච්ච දුරස්වෙච්ච සියලු දෙනාට ම අපි ගෞරවයෙන් ආරාධනා කරනවා; එන්න ශ්රී ලංකා පොදුජන පෙරමුණ එක්ක අත්වැල් බැඳගමු. එන්න මීළඟට ගැළපෙන දේශපාලන සංස්කෘතියක් මේ මාතෲ භූමිය තුළ පැළ කරන්න එක්කාසුවෙන්න කියලා අපි ආරාධනා කරනවා.
ගමට නායකත්වය දෙන්න
ඔබට මම වගකීමෙන් කියනවා මේ මාතෘ භූමිය ඇතුළේ ඊළඟට ගොඩනැගෙන ආණ්ඩුවක් ඇතුළෙ වගේම ඊළඟට ගොඩනැගෙන දේශපාලන බලවේගය ඇතුළෙ අපේකම, අපේ ජාතිය, අපේ ආගම වගේම මේ මහ පොළොව ඇතුලේ පය ගහලා ඉන්න සියලු දෙනාට ගෞරවාන්විතව ජීවත් වෙලා ඉන්න පරිසරයක් හදනවා කියන එකත් අපි ඔබ තමුන්නාන්සේලාට පොරොන්දු වෙනවා. එහෙමනම් අලුත් අවුරුද්දේ පළවෙනිම වැඩසටහන මං ස්තූතිවන්ත වෙනවා තිස්සකුට්ටිආරච්චි මන්ත්රීතුමා ඇතුළු මේ දිස්ත්රික්කයට නායකත්වය දෙන අපේ ආසනේ කැඳවුම්කරුවන් ඒ වගේම කොට්ඨාස සංවිධායකවරු ඔබට විශාල වගකීමක් තියෙනවා. ඔබ යන්න ගෙයින් ගෙට. ඡන්දයක් තියෙන්න ඕන නෑ ගෙන් ගෙට යන්න. අද අපි යමු ගෙයින් ගෙට. අපිත් එක්ක හිත්තමනාප වෙලා ඉන්න අය දුරස් වෙලා ඉන්න අය එක්ක අපි සාකච්ඡා කරමු. ඒ අය එකතු කරගමු. ඒ අය එකතුකරගෙන ශක්තිමත්ව ඉදිරි කාල සීමාව තුළ ගොඩනැගෙන්න ඔබ ගමට නායකත්වය දෙන්න. ඔබ ගමට නායකත්වය දෙනකොට දිස්ත්රික්කයට වගේම පක්ෂයට නායකත්වය දෙන අපේ නායක නායිකාවන් ශක්තිමත් බලවේගයක් විදියට මේ පක්ෂය ගොඩ නගනවා.
ආණ්ඩුවේ මර්ධනයට නම් අපිව නවත්තන්න බෑ
එහෙමනම් අම්මේ තාත්තේ සහෝදරයා සහෝදරිය මිත්රවරුනි අපි අභියෝගාත්මක කාලයක් පහු කරගෙන ආවේ. ඒ වගේම තමයි අභියෝග ගණනාවක් ඉස්සරහට මුහුණ දෙන්න වෙනවා. මේ හැම අභියෝගයකටම ශක්තිමත්ව අපි මුහුණ දෙමු. ආණ්ඩුවේ මර්ධනයට නම් අපිව නවත්තන්න බෑ. හිර ගෙවල් පෙන්නලා අපිව නවත්තන්න බෑ.කොඩි කණුවක් ගලවලත් අපිව නවත්වන්න බෑ.ඒ නිසා ඔබේ මර්ධනය ඔබ තියාගන්න ඒ 88/89 සෙල්ලම් දැන් දාන්න ලෑස්ති වෙන්න එපා. එදා මහින්ද රාජපක්ෂ හිටියා දැන් ඉන්නව නාමල් රාජපක්ෂ ආයි 88/89 සෙල්ලම් දාන්න ලෑස්ති වෙන්න එපා ඒවා ඒ කාලේ. මේ අද අලුත් පරම්පරාවක් වෙනස් දේශපාලන සංස්කෘතියක්. ඒ හින්දා ඔය 88/89 සෙල්ලම් මතක් කරලා අපේ තාත්තා කියලා එව්ව ඒ වචනේ කියන්න එපා කියලා ඒ හින්දා මම කියන්නේ නෑ. ඒ හින්ද ඒවා තියාගන්න ලෑස්ති වෙන්න එපා. හැබැයි ඔබ හොරු අල්ලන්න ඒ හොරු අල්ලන ගමන් කන්ටේනර් 323 පන්නපු එකාවත් අල්ලගන්න. අර කුඩු කන්ටේනර් වරායෙන් පන්නපු එකාවත් අල්ලන්න. ගල් අඟුරු ගෙනාපු ගෙනාවත් අල්ලන්න. කැබ් 1700 ගෙනාවත් අල්ලන්න. පිටරටින් හාල් ගේන කෙනාවත් අල්ලන්න.
බොරුව, රැවටිල්ල සහ මර්දනය නවත්වන්න
ජනාධිපතිතුමා චොපර් එකේ යන්න ඕන. මම ඒකට බනින්නෙ නෑ. එයා යන්නෙ නෑ කියලා ආපු එකට අපි මොනවා කරන්නද. දැන් එතුමා පාරේ ගියා නම් ශ්රී මහා බෝධීන් වහන්සේටත් වැඳගෙන තමයි යන්න වෙන්නේ. චොපර් එකේ ගිය නිසා ශේප් එකේ ගියා. ආ උගන්ඩාවේ සල්ලි... ඒක ගේන්න. ඒක ගේන්න ඕනේ. අර ඩුබායි මැරියට් හෝටලේ ඒක ගේන්නත් ඕනේ. ඒ හින්දා අපි ගෞරවයෙන් ආණ්ඩුවෙන් ඉල්ලන්නේ බොරුව නවත්තන්න; රැවටිල්ල නවත්වන්න; මර්ධනය නවත්වන්න. ඔබ මේ රටේ ජනතාවට පොරොන්දුවක් වුණා ඒ පොරොන්දු ඉටු කරන්න. ඔබ මැදිහත් වෙන්න. අපේ හාමුදුරුවනේ ඒ වගේම අපි ගෞරවයෙන් ඉල්ලනවා මේ මාතෘ භූමිය තුළ දිනාගත් නිදහස, මේ මාතෘ භූමිය තුළ රණවිරුවන් දහස් ගණනක් ජීවිත කැප කරලා දිනාගත් නිදහස, මේ රටේ දමිළ සිංහල මුස්ලිම් බර්ගර් මැලේ සියලු ජාතීන් නිදහසේ ජීවත් උණ පරිසරය ඒ වගේම තමයි හෙළ සංස්කෘතියත් එක්ක ගොඩනැගිච්ච සමාජය ඇතුළෙ බිහිවන නූතන පරම්පරාවේ දරුවා ගොඩනගන්න වර්තමානයේ මේ ආණ්ඩුව අරගෙන යන ඒ මර්ධනය සංස්කෘතික විනාශය, ආගමික විනාශය, දේශපාලනික විනාශය, ආර්ථික විනාශයට එරෙහිව අපේ හාමුදුරුවනේ ඔබ නායකත්වය ගන්න. ඔබ වහන්සේලා ගේ ආරක්ෂාවට අපි ඉන්නවා කියන එකත් ඔබ වහන්සේලාට මතක් කරමින් ඔබ සියලු දෙනාට සුභ අනාගතයක් පතමින් ගරු ජනාධිපතිතුමනි මම ආවා හැබැයි මම ආයෙත් ඔබතුමා ගේ ගමට එනවා කියලා මතක් කරමින් මම සමුගන්නවා.''
මෙම අවස්ථාව සඳහා ශ්රී ලංකා පොදුජන පෙරමුණේ අනුරාධපුර දිස්ත්රික් නායක හිටපු පාර්ලිමේන්තු මන්ත්රී තිස්ස කුට්ටිආරච්චි ඇතුළු හිටපු අමාත්යවරුන් සහ පාර්ලිමේන්තු මන්ත්රීවරුන් ද පළාත් සභා මන්ත්රීවරුන් සහ කොට්ඨාස සංවිධායකවරුන් ද සහභාගී වූහ.
