පුවත්

බාල වයස්කාර දැරියකට අතවරයක් කර ඇති බවට චෝදනා ලැබ රක්ෂිත බන්ධනාගාර ගත කිරීමට අධිකරණයෙන් නියෝග කර තිබුණ ද, කොළඹ පුද්ගලික රෝහලක ප්‍රතිකාර ලබන පල්ලේගම හේමරතන හිමියන් ලබන 22 දක්වා යළි රක්ෂිත බන්ධනාගාර ගත ලෙස කොටුව මහේස්ත්‍රාත් පසන් අමරසේන නියෝග කළේ ය.

සැකකාර හිමිනම නිරීක්ෂණය කිරීමෙන් අනතුරුව මහේස්ත්‍රාත්වරයා මෙම නියෝගය කළේ ය.

එසේම දැනට පුද්ගලික රෝහලේ ප්‍රතිකාර ලබන සැකකාර හිමිනම ජාතික රෝහලට මාරු කරන ලෙසත් අවශ්‍ය ප්‍රතිකාර සිදු කරන ලෙසත් නියෝග කළ මහේස්ත්‍රාත්වරයා අදාළ වෛද්‍ය පරීක්ෂණ සඳහා යොමු කරන ලෙස බන්ධනාගාරයට නියෝග කළේ ය.

සැකකාර හිමිනම නිරීක්ෂණය කර සුදුසු නියෝගයක් ලබා දෙන ලෙස බන්ධනාගාර දෙපාර්තමේන්තුව කොටුව මහේස්ත්‍රාත් පසන් අමරසේන මහතා හමුවේ මෝසමක් ගොනු කරමින් ඉල්ලීම කළ අතර නිට්ටඹුව පොලීසියේ ස්ථානාධිපතිවරයා ද අධිකරණයට කැඳවන ලදී.