පුවත්

අන්තර්ජාලය හරහා නීති විරෝධී ක්‍රියා සිදු කරන බවට සැක පිට කොල්ලුපිටිය පොලිසිය විසින් අත්අඩංගුවට ගෙන අධිකරණයට ඉදිරිපත් කළ විදේශ ජාතිකයන් 49 දෙනා හෙට (15)තෙක් රක්ෂිත බන්ධනාගාර ගත කරන ලෙස කොටුව මහේස්ත්‍රාත් පසන් අමරසේන ඊයේ (13) නියෝග කළේ ය.

කොල්ලුපිටිය පොලිසිය විසින් සිදු කරන ලද පරීක්ෂාවක දි වලංගු වීසා බලපත්‍ර නොමැතිව මහල් ගොඩනැගිල්ලක  සිටිය දී මෙම පිරිස අත්අඩංගුවට ගත් බව පොලීසිය වැඩිදුර වාර්තාවක් ඉදිරිපත් කරමින් දැනුම් දුන්නේ ය.මෙම පිරිස කාම්බෝජය සිට මෙරටට පැමිණ ඇති බවත්, සංචාරක වීසා මත පැමිණ විවිධ මූල්‍ය ජාවාරම්වලට සම්බන්ධ බවට සැක මත විමර්ශන ආරම්භ කළ බවත්, පොලිසිය අධිකරණයට දන්වා සිටියේ ය.

චීන සහ මැලේසියානු ජාතිකයින් වන ඔවුන් වෙනුවෙන් පෙනී සිටි නීතිඥ මඩුල්ල සිදු කළ ඇප ඉල්ලීම මහේස්ත්‍රාත්වරයා ප්‍රතික්ෂේප කළේ ය.

සැකකරුවන් සන්තකයේ තිබූ මුදල් සහ අත්අඩංගුවට ගත් ලැප් ටොප් ඇතුළු භාණ්ඩ අධිකරණයට ඉදිරිපත් කළ පසු විමර්ශන සිදු කර අධිකරණයට දැනුම් දෙන ලෙස මහේස්ත්‍රාත්වරයා කොල්ලුපිටිය පොලිසියට නියම කළේය.