පුවත්

අටමස්ථාණාධිපති පල්ලේගම හේමරතන හිමි විසින් බරපතල ලෙස අපයෝජනයට ලක් කර ඇතැයි වින්දිතත්වයට පත්ව සිටින දැරියට අපහාස කරමින් සහ බලහත්කාරය යොදවමින් නින්දිත සහ තුච්ච ප්‍රකාශයක් කල හිටපු පාර්ලිමේන්තු මන්ත්‍රී, සර්වජන බලය පක්ෂයේ ජාතික සංවිධායක වන දිලුම් අමුනුගමට එරෙහිව ජාතික ළමාආරක්ෂක අධිකාරිය වෙත සහ ළමා පොලිස් කාර්‍යංශයට පැමිණිල්ලක් කළේ යැයි 'ළමා හිංසනයට තිත' (Stop Child Cruelty) පදනමේ වත්මන් සභාපතිනි වෛද්‍ය තුෂ් වික්‍රමනායක (Dr. Tush Wickramanayaka) පැවසුවා ය.

දිලුම් අමුනුගම ගේ ප්‍රකාශය බරපතල අපරාධමය වරදක් බැවින් වහාම ක්‍රියාත්මක වන පරිදි ඔහුට ඒරෙහිව නීතිය ක්‍රියාත්මක කරන ලෙස ද ඇය අදාළ වගකිව යුතු අංශවලින් ඉල්ලා සිටියා ය.

ඇය මෙලෙස පැවසුවේ සිය face book ගිණුම තුළ ප්‍රකාශයක් කරමිනි.

මෙම පැමිණිල්ලට අදාළව: National Child Protection Authority පැමිණිලි අංකය. Reference Number: CC/26/05/546 වන අතර 109 හරහා පැමිණිලි අංකය PCD/H/782/2026 වන බව ද ඇය සිය face book ගිණුමෙහි සදහන් කර ඇත.

එම ප්‍රකාශයේ ''අපි පෙනී සිටින්නේ දරුවා වෙනුවෙන්. මේ අපරාධය කවුරු කළත් අපරාධයක්. අහිංසක දරුවකු වෙනුවෙන් පෙනී සිටීම මානුෂික ගුණයක්. ළතෙත් හදවත් ඇති රටක මිනිසුන් කළ යුත්තේ එය යි.'' යනුවෙන් ඇය පවසන්නී ය.

මතු පළ වන්නේ දිලුම් අමුනුගම කල නින්දිත, තුච්ච ප්‍රකාශය සහ 'ළමා හිංසනයට තිත'  පදනමේ වත්මන් සභාපතිනි වෛද්‍ය තුෂ් වික්‍රමනායක කළ ප්‍රකාශ අන්තර්ගත වීඩියෝ පට දෙකයි.