පුවත්

දකුණු සහ මධ්‍යම ආසියානු කටයුතු පිළිබඳ සහකාර රාජ්‍ය ලේකම් එස්. පෝල් කපූර් ජුනි 21 සිට ජුනි 24 දක්වා දින තුනක සංචාරයක් සඳහා අද (22)  කොළඹට පැමිණෙනු ඇත.

ශ්‍රී ලංකාවේ සංචාරය අතරතුර, සහකාර රාජ්‍ය ලේකම් කපූර් ජ්‍යෙෂ්ඨ රජයේ නායකයින්, පෞද්ගලික අංශයේ විධායක නිලධාරීන් සහ එක්සත් ජනපද සමාගම්වල නියෝජිතයන් හමුවී, ද්විපාර්ශ්වික වෙළඳාම සහ ආයෝජන පුළුල් කිරීම, ආරක්ෂක සහයෝගීතාව ශක්තිමත් කිරීම සහ කලාපයේ හවුල් ප්‍රමුඛතා ඉදිරියට ගෙන යාම පිළිබඳව සාකච්ඡා කරනු ඇත.

 මෙම සංචාරය, ඉන්දියානු සාගරයේ ප්‍රධාන හවුල්කරුවකු වන ශ්‍රී ලංකාව සමග සහයෝගීතාව තවදුරටත් ශක්තිමත් කරමින්, ඇමරිකාවේ සමෘද්ධිය සහ ආරක්ෂාව ඉදිරියට ගෙන යන හවුල්කාරිත්ව ශක්තිමත් කිරීම සඳහා ට්‍රම්ප් ජනාධිපතිතුමා ගේ කැපවීම පිළිබිඹු කරයි.

හැඳින්වීම: එස්. පෝල් කපූර්, දකුණු සහ මධ්‍යම ආසියානු කටයුතු පිළිබඳ කාර්යාංශයේ සහකාර ලේකම්: 

එස්. පෝල් කපූර් 2025 ඔක්තෝබර් 22 වන දින දකුණු සහ මධ්‍යම ආසියානු කටයුතු පිළිබඳ සහකාර රාජ්‍ය ලේකම්වරයා ලෙස දිවුරුම් දී ධුරයේ වැඩ භාර ගත්තේ ය. ඔහු එක්සත් ජනපද නාවික පශ්චාත් උපාධි පාසලෙන් නිවාඩු ලබා සිටින අතර, එහි ජාතික ආරක්ෂක කටයුතු දෙපාර්තමේන්තුවේ මහාචාර්යවරයෙකු ලෙස සේවය කර ඇත. මීට පෙර, කපූර්  හූවර් ආයතනයේ ආරාධිත පර්යේෂණ සාමාජිකයෙකු ලෙසත්, රාජ්‍ය දෙපාර්තමේන්තුවේ ප්‍රතිපත්ති සැලසුම් කාර්ය මණ්ඩලයේත්  සේවය කර ඇති අතර, ක්ලෙයාර්මොන්ට් මැකේනා විද්‍යාලයේ ඉගැන්වීය. කපූර් "Jihad as Grand Strategy: Islamist Militancy, National Security, and the Pakistani State" (ඔක්ස්ෆර්ඩ් විශ්වවිද්‍යාල මුද්‍රණාලය) සහ "Dangerous Deterrent: Nuclear Weapons Proliferation and Conflict in South Asia" (ස්ටැන්ෆර්ඩ් විශ්වවිද්‍යාල මුද්‍රණාලය) යන ග්‍රන්ථවල කර්තෘවරයා වේ. එමෙන්ම, "India, Pakistan, and the Bomb: Debating Nuclear Stability in South Asia" (කොලොම්බියා විශ්වවිද්‍යාල මුද්‍රණාලය) ග්‍රන්ථයේ සම කර්තෘවරයා වන අතර, "The Challenges of Nuclear Security: U.S. and Indian Perspectives" (පැල්ග්‍රේව් මැක්මිලන්) ග්‍රන්ථයේ සම සංස්කාරකවරයා ද වේ. ඔහුගේ කෘති ප්‍රමුඛ පෙළේ ශාස්ත්‍රීය සඟරාවල, ජනප්‍රිය ප්‍රවෘත්ති මාධ්‍යවල මෙන්ම විවිධ සංස්කරණ ග්‍රන්ථවල ද පළ වී තිබේ. කපූර් ආරක්ෂක දෙපාර්තමේන්තුව වෙනුවෙන් වාර්ෂික එක්සත් ජනපද–ඉන්දියා Track 1.5 උපායමාර්ගික සංවාදය මෙන්ම අනෙකුත් එක්සත් ජනපද–ඉන්දියා සම්බන්ධතා පිළිබඳ වැඩසටහන් ද මෙහෙයවා ඇත. ඔහු චිකාගෝ විශ්වවිද්‍යාලයෙන් ආචාර්ය උපාධිය සහ ඇමර්ස්ට්  විද්‍යාලයෙන් බී.ඒ. උපාධිය ලබා ගත්තේ ය.