පුවත්

බන්ධනාගාර දෙපාර්තමේන්තුවේ ප්‍රථම කාන්තා සහකාර අධිකාරිවරිය ලෙස දිස්නා කාරියවසම් පත්කර ඇත.

ඇයට මෙම පත්වීම හිමිව ඇත්තේ දශක තුනකට ආසන්න කාලයක් පුරා: කැපවීම, අධිෂ්ඨානය, වෘත්තීය නිපුණතාව සහ රාජ්‍ය සේවයට දැක්වූ කැපවීමේ ප්‍රතිඵලයක් ලෙස ය.

තිස් වසරකට පෙර ඇරඹි ගමන

දකුණු පළාතේ ගාල්ල දිස්ත්‍රික්කයේ උපත ලබා ඇති දිස්නා කාරියවසම්, කාන්තා බන්ධනාගාර නියාමකවරියක ලෙස බන්ධනාගාර දෙපාර්තමේන්තුවට එක්වී ඇත්තේ මීට වසර 30කට පෙර ය. ඉක්බිති පැවැති තරග විභාගය සාර්ථකව සමත්වී දෙවන පන්තියේ ජේලර්වරියක බවට පත්වූ ඇය 2014 වසරේදී බන්ධනාගාර දෙපාර්තමේන්තුවේ හදිසි සහ බුද්ධි අංශයේ දෙවන පන්තියේ ජේලර්වරියක ලෙස රාජකාරි ආරම්භ කළා ය.

පසුව දෙපාර්තමේන්තුවේ උසස්වීම සඳහා අවශ්‍ය දෙමළ භාෂාව, පරිපාලනය සහ ගිණුම්කරණය යන විෂයන්ට අදාළ විභාග සාර්ථකව සමත් වී පළමු පන්තියේ ජේලර්වරිය බවටත් අනතුරුව ප්‍රධාන ජේලර්වරිය ලෙසත් උසස්වීම් ලැබුවා ය.

ගාල්ල බන්ධනාගාරයේ සිට මූලස්ථානය දක්වා...

සිය සේවා කාලය තුළ ඇය: ගාල්ල බන්ධනාගාරය, මාතර බන්ධනාගාරය, වැලිකඩ කාන්තා අංශය, බදුල්ල බන්ධනාගාරය, වැලිකඩ බන්ධනාගාරය මහර බන්ධනාගාරය සහ බන්ධනාගාර මූලස්ථානය ඇතුළු ආයතන රැසක සේවය කර ඇත.

මේ ආදි වූ විවිධ සේවා අත්දැකීම් තුළින් ඇය සිය නායකත්ව හැකියා, පරිපාලන කුසලතා, පුනරුත්ථාපන කටයුතු පිළිබඳ දැනුම සහ රාජ්‍ය සේවයට ඇති කැපවීම තවදුරටත් වර්ධනය කර ගැනීමට සමත් වූවාය.

අඛණ්ඩ ඉගෙනුමට කැපවූ නිලධාරිනියක වන ඇය ශ්‍රී ලංකා පදනම් ආයතනයෙන් මනෝවිද්‍යාත්මක උපදේශනය පිළිබඳව ඩිප්ලෝමාව සහ උසස් ඩිප්ලෝමාව සම්පූර්ණ කර ඇති අතර කැලණිය විශ්වවිද්‍යාලයෙන් Correction, Prison Reforms and Rehabilitation පිළිබඳ ඩිප්ලෝමාව සහ උසස් ඩිප්ලෝමාව ද, ශ්‍රී ජයවර්ධනපුර විශ්වවිද්‍යාලයෙන් අපරාධ විද්‍යාව (Criminology) පිළිබඳ ඩිප්ලෝමාව ද සම්පූර්ණ කර ඇත.

බන්ධනාගාර දෙපාර්තමේන්තුවේ ඉතිහාසයේ නව පරිච්ඡේදයක්

මෙම අධ්‍යාපනික සුදුසුකම් ඇයගේ බන්ධනාගාර පරිපාලනය, පුනරුත්ථාපනය, උපදේශනය සහ වැරදිකරුවන්ගේ කළමනාකරණය පිළිබඳ වෘත්තීය දැනුම තවදුරටත් ශක්තිමත් කර කරන අතර, පසුගිය 20වන දා පැවති තරගකාරී සම්මුඛ පරීක්ෂණය සාර්ථකව සමත් වීමෙන් අනතුරුව ඇය ශ්‍රී ලංකා බන්ධනාගාර දෙපාර්තමේන්තුවේ ප්‍රථම කාන්තා සහකාර අධිකාරිවරිය ලෙස පත් කිරීමටද පියවර ගෙන ඇත. 

මෙම පත්වීම බන්ධනාගාර දෙපාර්තමේන්තුවේ ඉතිහාසයේ නව පරිච්ඡේදයක් සනිටුහන් කරන ඓතිහාසික ජයග්‍රහණයක් වන අතර, එය ඇයගේ වසර ගණනාවක කැපවීම, වෘත්තීයභාවය සහ නායකත්වයේ ඉහළම ඇගයීමකි.

වෘත්තීය ජීවිතයට අමතරව ඇය දක්ෂ ක්‍රීඩිකාවක ලෙස ද ප්‍රසිද්ධියට පත්ව ඇත. මාස්ටර්ස් මලල ක්‍රීඩා තරග, අන්තර් බන්ධනාගාර මලල ක්‍රීඩා තරග සහ රාජ්‍ය සේවා මලල ක්‍රීඩා තරගාවලි සඳහා ශ්‍රී ලංකා බන්ධනාගාර දෙපාර්තමේන්තුව නියෝජනය කරමින් පදක්කම් සහ ජයග්‍රහණ රැසක් හිමිකරගෙන දෙපාර්තමේන්තුවට කීර්තියක් අත්කර දී ඇත.

මූලාශ්‍ර - sinhala.adaderana.lk