පුවත්

2015 වසරේ සිදු වූ මහ බැංකු බැඳුම්කර නිකුතුවකින් රජයට රුපියල් බිලියන දහයකට අධික පාඩුවක් සිදු කළැයි කියන සිද්ධියක් සම්බන්ධයෙන් හිටපු මහ බැංකු අධිපතිවරයෙකු වූ අර්ජුන මහේන්ද්‍රන්ට පනවා තිබෙන නඩුව ඔක්තෝබර් 30 වන දින යළි කැඳවීමට කොළඹ ප්‍රධාන මහේස්ත්‍රාත් අසංග එස් බෝදරගම  අද (21) නියෝග කළේ ය.

තවද මෙම සැකකරු සම්බන්ධයෙන් නිසි පියවර අනුව සිතාසි ක්‍රියාකළ අධිකරණයට වාර්තා කරන ලෙස ද මහේස්ත්‍රාත්වරයා අල්ලස් කොමිසමට නියෝග කළේ ය.

සැකකරුට අධිකරණයේ හමුවේ පෙනී සිටින ලෙස කොළඹ ප්‍රධාන මහේස්ත්‍රාත් අධිකරණය විසින් පෙර නඩු දිනයේ දී නොතීසි නිකුත් කර තිබෙන බව එහි දී මහේස්ත්‍රාත්වරයා අධිකරණයට දැනුම් දුන්නේ ය.

අල්ලස් හෝ දුෂණ කොමිෂන් සභාව සිද්ධිය සම්බන්ධයෙන් අධිකරණයට කරුණු දැක්වූයේ ය.

එම පැමිණිල්ල සම්බන්ධයෙන් මෙතෙක් කර ඇති විමර්ශනවලට අනුව හිටපු මහා බැංකු අධිපති අර්ජුන් මහේන්ද්‍රන්ට අල්ලස් පනතේ දුෂණය නැමති චෝදනාව යටතේ නඩු පැවරීමට හැකියාව පවතින බව පෙන්වා දෙමින් අල්ලස් හෝ දුෂණ කොමිෂන් සභාව වෙනුවෙන් පෙනී සිටි නිලධාරීන් පෙර නඩු දිනයේ දී අධිකරණයට කරුණු ඉදිරිපත් කළේ ය.

මහේස්ත්‍රාත්වරයා විසින් මෙලෙස නියෝග කරන ලද්දේ 2015 වසරේ සිදු වූ මහ බැංකු බැඳුම්කර නිකුතුවකින් රජයට රුපියල් බිලියන දහයකට අධික පාඩුවක් සිදුකළේ යැයි සඳහන් කරමින් අල්ලස් කොමිසම විසින් ගොනුකර ඇති පැමිණිල්ලක් සලකා බැලීමෙන් පසුව ය.

අල්ලස් කොමිසම සඳහන් කරන්නේ අර්ජුන් මහේන්ද්‍ර එම සිද්ධියට අදාළව සැකකරුවකු වශයෙන් නම්කර සිටින බවයි.

2015 වසරේ පෙබරවාරි 27වන දා පැවති බැඳුම්කර වෙන්දේසියක දී රජයට රුපියල් මිලියන 688 ක පාඩුවක් කිරීම ඇතුලු අධිචෝදනා 23 ක් යටතේ නඩුව පවරා තිබෙන බව අල්ලස් කොමිසම අධිකරණයට දැනුම් දුන්නේ ය.

එම බැඳුම්කර වෙන්දේසිය සම්බන්ධයෙන් විමර්ශන සිදු කළ අපරාධ පරික්ෂණ දෙපාර්තමේන්තුව ඉදිරිපත් කළ විමර්ශන උධෘත අධ්‍යනය කළ නීතිපතිවරයා විසින් හිටපු මහා බැංකු අධිපති අර්ජුන් මහේන්ද්‍රන්, හිටපු මහා බැංකු නියෝජ්‍ය අධිපති පී.සමරවීර , පර්පෙල්චුවර් ටෙශරිස් සමාගමේ අර්ජුන් ඇලොසියස් ඇතුළු විත්තිකරුවන් දස දෙනෙකුට එරෙහිව බස්නාහිර පළාත්බද ස්ථිර ත්‍රිපුද්ගල මහාධිකරණය හමුවේ අධි චෝදනා 23 ක් යටතේ නඩු ගොනු කර ඇත.