පුවත්

මුලතිව් දිස්ත්‍රික් මහ රෝහලේ නව සිව්මහල් වෛද්‍ය වාට්ටු සංකීර්ණයේ ඉදිකිරීම් ඊයේ (16) ජනාධිපති අනුර කුමාර දිසානායක ගේ ප්‍රධානත්වයෙන් ආරම්භ ආරම්භ කළේ ය.

මුලතිව් දිස්ත්‍රික් මහ රෝහලේ දැනට පවතින රෝගී තදබදය අවම කිරීම වෙනුවෙන් ඉන්දීය රජයේ ආධාර යටතේ ඉදිකෙරෙන මෙම ගොඩනැගිල්ල සඳහා වැය කෙරෙන මුළු මුදල රුපියල් මිලියන 600කි. බෝ නොවන රෝග (NCD) හේතුවෙන් මුලතිව් දිස්ත්‍රික්කයේ සිදුවන මරණ අවම කිරීමට සහ වයස අවුරුදු 35ට වැඩි පුද්ගලයින් බෝ නොවන රෝග පිළිබඳ පරීක්ෂාවට ලක් කිරීමේ වේගය සැලකිය යුතු ලෙස වැඩි කිරීමට ද මෙම නව වාට්ටු සංකීර්ණය උපයෝගී වනු ඇත.

මෙම ව්‍යාපෘතිය මුලතිව් දිස්ත්‍රික්කයේ සෞඛ්‍ය සේවා සැපයීමේ ක්‍රියාවලිය බෙහෙවින් ශක්තිමත් කරන පියවරක් ලෙස අගයමින්, ඒ වෙනුවෙන් දායකත්වය ලබා දුන් ඉන්දීය අග්‍රාමාත්‍යවරයා ප්‍රමුඛ එම රජයටත්, ඉන්දීය ජනතාවටත් ජනාධිපතිවරයා සිය හෘදයාංගම ස්තූතිය පළ කළේ ය; එසේම, මෙම ව්‍යාපෘතිය සාර්ථක කර ගැනීමට කැප වූ සෞඛ්‍ය අමාත්‍යාංශය ඇතුළු සියලු පාර්ශ්ව වෙත ද ජනාධිපතිවරයා සිය කෘතවේදීත්වය පළ කළේ ය.

(ජනාධිපති මාධ්‍ය අංශය)