පුවත්

පාස්කු ඉරුදින ත්‍රස්ත ප්‍රහාර මාලාවේ සැකකරුවකු ලෙස රඳවාගෙන ප්‍රශ්න කෙරෙන, දැනට කොළඹ ජාතික රෝහලේ ප්‍රතිකාර ලබන හිටපු යුධ හමුදා බුද්ධි ප්‍රධානී තුවාන් සුරේෂ් සලේ රෝහලෙන් මුදා නොහැරීමට අදාළව වෛද්‍ය වාර්තා නිකුත් කළ වෛද්‍යවරුන් දසදෙනාට ලබන ඔක්තෝම්බර් 06 වනදා අධිකරණයේ පෙනී සිටින ලෙස කොටුව මහේස්ත්‍රාත් ප්‍රසන්න අමරසේන අද (02) නොතීසි නිකුත් කළේය.

අපරාධ පරීක්ෂණ දෙපාර්තමේන්තුව (CID) මෝසමක් ගොනු කරමින් අධිකරණය හමුවේ දැක්වූ කරුණු සලකා බැලීමෙන් අනතුරුව මහේස්ත්‍රාත්වරයා මෙම නියෝගය සිදු කර ඇත.

අදාළ නියෝගයට හේතු වූ කරුණු පහත පරිදි වේ:

රෝහල් අධ්‍යක්ෂවරයාගේ ප්‍රකාශය: පසුගිය 28 වනදා කොළඹ ජාතික රෝහලේ අධ්‍යක්ෂවරයා විවෘත අධිකරණය හමුවේ පෙනී සිටිමින්, දැනට නේවාසිකව ප්‍රතිකාර ලබන සැකකාර සුරේෂ් සලේ මහතා රෝහලෙන් මුදා හැරීමට හැකි බව ප්‍රකාශ කර තිබුණි.

වෛද්‍ය මණ්ඩලයේ වාර්තාව: අධ්‍යක්ෂවරයාගේ ප්‍රකාශය එසේ වුවද, ජාතික රෝහලේ පෝෂණවේදීන් සහ මානසික වෛද්‍යවරුන් ඇතුළු 10 දෙනෙකුගෙන් යුත් වෛද්‍ය මණ්ඩලයක් අත්සනින් යුතුව වාර්තාවක් නිකුත් කරමින් සුරේෂ් සලේ මුදා හැරීමට නොහැකි බව දැනුම් දී ඇති අතර, ඒ හේතුවෙන් ඔහු මෙතෙක් මුදා හැර නොමැති බව අපරාධ පරීක්ෂණ දෙපාර්තමේන්තුව අධිකරණයට පෙන්වා දුන්නේය.

ඒ අනුව, අදාළ වෛද්‍ය වාර්තාව නිකුත් කිරීමට හේතු වූ කරුණු සම්බන්ධයෙන් අධිකරණය හමුවේ කරුණු දක්වන ලෙස දන්වමින් එම වෛද්‍ය වාර්තාවට අත්සන් තැබූ වෛද්‍යවරුන් දසදෙනාට මෙලෙස ඔක්තෝම්බර් 06 වනදා කොටුව මහේස්ත්‍රාත් අධිකරණයේ පෙනී සිටින ලෙස නොතිසි නිකුත් කෙරිණි.