පුවත්

ශ්‍රී ලංකාවේ නීති අධ්‍යාපනය සහ පර්යේෂණ ක්ෂේත්‍රයේ ප්‍රගමනය උදෙසා ස්ථාපිත කරන ලද 'මහාචාර්ය ජී.එල්. පීරිස් නීති අධ්‍යාපන හා පර්යේෂණ භාරය' (The Professor G.L. Peiris Trust for Legal Education and Research) නිල වශයෙන් පිහිටුවීම කොළඹ විශ්වවිද්‍යාලයේ සෙනෙට් මන්දිරයේදී පැවැත්විණි. ජ්‍යෙෂ්ඨ විද්වතුන්, නීති වෘත්තියේ ප්‍රධානීන් සහ සිවිල් සමාජයේ සම්භාවනීය පිරිසකගේ සහභාගීත්වයෙන් මෙම උත්සවය පැවැත්විණි.

'පෝල් රත්නායක සහය' (Paul Ratnayeke Associates) ආයතනය විසින් සකස් කරන ලද භාර ප්‍රඥප්තියට (Trust Deed) භාරකරුවන් ලෙස කටයුතු කරන බේරුම්කරු (Settlor) ලෙස මහාචාර්ය ජී. එල්. පීරිස් ද  කොළඹ විශ්වවිද්‍යාලයේ උපකුලපති මහාචාර්ය ඉන්දික කරුණාතිලක, නීති පීඨයේ පීඨාධිපති මහාචාර්ය සම්පත් පුංචිහේවා, ශ්‍රී ලංකා නීති විද්‍යාලයේ විදුහල්පති ජනාධිපති නීතිඥ ප්‍රශාන්ත ලාල් ද අල්විස් සහ වෛද්‍ය ආමන්ති බන්දුසේන යන අය අත්සන් තැබූහ.

භාරයේ අරමුදල් සහ ක්‍රියාකාරකම්

ශ්‍රී ලංකාවේ නීතිය සහ නීති පද්ධති පිළිබඳව මහාචාර්ය පීරිස් මහතා රචනා කරන ලද ග්‍රන්ථ දහයක කර්තෘ භාග (Royalties) මුදල් මෙම භාරයේ ප්‍රධන ආදායම වේ. ඊට අමතරව, ආරම්භක අරමුදල වෙනුවෙන් මහාචාර්ය පීරිස් මහතා සිය පෞද්ගලික ධනයෙන් රුපියල් මිලියනයක මුදලක් කොළඹ විශ්වවිද්‍යාලයේ උපකුලපතිවරයා වෙත ප්‍රදානය කර ඇත.

කාලීන අවශ්‍යතා සහ ප්‍රමුඛතා පදනම් කරගනිමින් කොළඹ විශ්වවිද්‍යාලයේ නීති පීඨයට සහ ශ්‍රී ලංකා නීති විද්‍යාලයට වර්ෂයෙන් වර්ෂය සම්පත් වෙන් කිරීමට භාරකරුවන්ට බලය පවරා ඇත. මෙහි අපේක්ෂිත ප්‍රධාන ක්‍රියාකාරකම් අතර:

• නීතිමය මාතෘකා පිළිබඳ පර්යේෂණ සිදු කිරීම
• කාලීන මාතෘකා සම්බන්ධයෙන් සම්මන්ත්‍රණ සහ අමරණීය දේශන පැවැත්වීම
• අනුකරණ අධිකරණ සැසි (Moot Courts) සහ වාද විවාද තරඟ සංවිධානය කිරීම

රටේ නීති විද්‍යාවට හිටපු උපකුලපතිවරයෙකු සහ නීති පීඨයේ පීඨාධිපතිවරයෙකු ලෙස මහාචාර්ය පීරිස් මහතා ඉටු කළ අනභිභවනීය සේවය ඇගයීම පිණිස අපරාධ නීතිය සඳහා වූ මහාචාර්ය ජී.එල්. පීරිස් රන් පදක්කමේ පිහිටුවීමට නීති පීඨය ගත් තීරණය පීඨාධිපතිවරයා මෙහිදී නිවේදනය කළේය.

තවද, මහාචාර්ය පීරිස් මහතාගේ මුත්තනුවන් වන ගේට් මුදලිදු එඩ්මන්ඩ් පීරිස් මහතා නීති ප්‍රථම විභාගයේදී (First Examination in Laws) දක්ෂතම දස්කම් දක්වමින් දිනාගත් ත්‍යාගය, පසුකාලීනව ඔහුගේ මුණුපුරා වන මහාචාර්ය පීරිස් විසින්ද දිනාගනු ලැබූ බව මහාචාර්ය පුංචිහේවා මතක් කර සිටියේය.

විද්වතුන්ගේ අදහස් දැක්වීම්

උත්සවය ඇමතූ කොළඹ විශ්වවිද්‍යාලයේ උපකුලපති මහාචාර්ය ඉන්දික කරුණාතිලක මහතා, අසීරු කාලපරිච්ඡේදයන්හිදී මහාචාර්ය පීරිස් ලබා දුන් ආදර්ශවත් නායකත්වය කෘතඥපූර්වකව සිහිපත් කළේය. ශ්‍රී ලංකා නීති විද්‍යාලයේ විදුහල්පති ජනාධිපති නීතිඥ ප්‍රශාන්ත ලාල් ද අල්විස් මහතා නීති පීඨය සහ නීති විද්‍යාලය අතර පවතින සහයෝගීතාවයේ වැදගත්කම මෙන්ම අමාත්‍යවරයෙකු ලෙස මහාචාර්ය පීරිස් ඉටුකළ පුරෝගාමී නීති සම්පාදන මෙහෙය අගය කළේය.

උත්සවයේ විශේෂ දේශනය පැවැත්වූ හිටපු උපකුලපති සහ සම්මානිත මහාචාර්ය සාවිත්‍රි ගුණසේකර මෙනවිය, විශ්වවිද්‍යාලයේ සංවර්ධනය වෙනුවෙන් තමා සහ මහාචාර්ය පීරිස් දිගු කාලයක් පුරා එක්ව සිදු කළ සේවය සහ ඔවුන් මුහුණ දුන් අභියෝග රැසක් පිළිබඳව කතා කළාය. දිවංගත ආචාර්ය නීලන් තිරුචෙල්වම් මහතාගේ අගනා දායකත්වයෙන් යුතුව සකස් වූ 2000 වසරේ ආණ්ඩුක්‍රම ව්‍යවස්ථා කෙටුම්පත ඇතුළු ඵළදායී ක්‍රියාමාර්ග බොහෝමයක් කඩා වැටීමට හේතු වූ ප්‍රතිවිරෝධී දේශපාලන සංස්කෘතිය පිළිබඳව ඇය සිය කණගාටුව ප්‍රකාශ කරනු ලැබුවාය.

තම අදහස් දැක්වීමේදී මහාචාර්ය ජී.එල්. පීරිස් මහතා සඳහන් කළේ අධ්‍යයන ප්‍රමිතීන් ඉහළින්ම පවත්වා ගනිමින් ශිෂ්‍ය බඳවා ගැනීම් ප්‍රසාරණය කිරීමට ගත් උත්සාහයන් පිළිබඳවයි. කාන්තා නේවාසිකාගාරයක් ඉදි කිරීමට කැපවූ සුජාතා ජයවර්ධන ඇතුළු පරිත්‍යාගශීලීන් මෙන්ම, තරුණ කොමිෂන් සභාවේදී මහාචාර්ය ලක්ෂ්මන් ජයතිලක, වෛද්‍ය රාධිකා කුමාරස්වාමි සහ රැල්ෆ් අල්ස් වැනි වියතුන් සමඟ කටයුතු කළ ආකාරයද ඔහු සිහිපත් කළේය.

මෙම අවස්ථාවට ජනාධිපති නීතිඥවරුන්, විශ්වවිද්‍යාල ආචාර්ය මණ්ඩලය, නීති විද්‍යාලයේ නිලධාරීන් මෙන්ම 'පෝල් රත්නායක ඇසෝසියේට්' සහ කර්තෘගේ ග්‍රන්ථ ප්‍රකාශකයන් වන 'ලේක් හවුස් ඉන්වෙස්ට්මන්ට්ස්' සමාගමේ නියෝජිතයෝ රැසක් එක්ව සිටියහ.