දේශීය වෙළෙඳපොළේ පවතින කීරි සම්බා සහල් හිඟයට පිළියමක් වශයෙන් GR 11/ පොන්නි සම්බා සහල් ආනයනය කිරීමට කැබිනට් අනුමැතිය ලැබී තිබේ.
ඒ අනුව, එක් ආනයනකරුවෙකුට මෙට්‍රික්ටොන් 520ක උපරිමයකට යටත්ව හෙට (ඔක්. 15) සිට නොවැම්බර් 15 වන දා දක්වා GR 11/ පොන්නි සම්බා සහල් ආනයනය කිරීම සඳහා ආනයන පාලන බලපත්‍ර ලබාගැනීමේ අවශ්‍යතාවයෙන් නිදහස් කිරීමට රජය තීරණය කර තිබේ.
මේ වන විට දේශීය වෙළෙඳපොළේ කීරි සම්බා සහල් හිඟයක් පැවතීම සහ පාලන මිලට වඩා වැඩි මිලට කිරි සම්බා අලෙවි කිරීම පිළිබඳව අවධානය යොමු කර ඇති බව රජය සඳහන් කළේ ය.
ජනලේඛන හා සංඛ්‍යාලේඛන දෙපාර්තමේන්තුවේ ගෘහ ආදායම් හා වියදම් සමීක්ෂණ වාර්තාව අනුව, ශ්‍රී ලංකාවේ ඇස්තමේන්තුගත වාර්ෂික සහල් පරිභෝජනය මෙට්‍රික්ටොන් 2,460,000ක් වේ.
එයින් වාර්ෂික කිරි සම්බා පරිභෝජනය 10%ක්, එනම් මෙට්‍රික්ටොන් 246,000 ක් පමණ බව එම වාර්තාවේ වැඩිදුරටත් සඳහන් වේ.
කෘෂිකර්ම, පශු සම්පත්, ඉඩම් සහ වාරි මාර්ග අමාත්‍යතුමා සහ වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්‍ය ඉදිරිපත් කළ ඒකාබද්ධ යෝජනාව අමාත්‍ය මණ්ඩලය විසින් අනුමතකරන ලදී.
( Anjali Withanage - mawbima)
