ෆේස්බුක් සමාගමේ ප්‍රධාන විධායක නිලධාරී මාර්ක් සකර්බර්ග් වෙතින් 12 වනදා පැය 10කට ආසන්න කාලයක් අමෙරිකානු සෙනෙට් සභාව ප්‍රශ්නකර තිබෙන බව විදෙස් මාධ්‍ය වාර්තා කරයි.
එහිදී සෙනට් සාමාජිකයන් වැඩි අවධානයක් යොමුකර ඇත්තේ ෆේස්බුක් භාවිත කරන්නන්ගේ දත්ත කොතෙක් දුරට ෆේස්බුක් සමාගම විසින් ලබාගෙන ඇත් ද යන්න සම්බන්ධවය.
දත්තවල ආරක්ෂාව සම්බන්ධ සිය වගකීම ගැන පුළුල් අදහසක් නොතිබීම පිළිබඳ එහිදී ෆේස්බුක් ප්‍රධානියා කණගාටුව පළකර තිබෙන අතර ඊට සමාව අයදින බවද එම ගැටළු විසඳීමට පියවර ගන්නා බවටද ප්‍රතිඥාවක් දීමටද සකර්බර්ග් කටයුතු කර ඇත.
එසේම ෆේස්බුක් සමාජ මාධ්‍ය ජාලය අනිසි ලෙස යොදා ගැනීමට උත්සාහ දරන රුසියාවේ හැකර්ලා සමග නිරන්තර අරගලයක නිරත වෙමින් සිටින බවත් එම ප්‍රශ්න කිරීම් හමුවේ සකර්බර්ග් සඳහන් කර ඇති අතර එය ආයුධ තරඟයකට සමාන බවත් ඔවුන් නිරන්තරයෙන් අලුත් ක්‍රමයක් සොයාගන්නා බවත් ඔහු පවසා ඇත.
දෙවන වරටත් ඇමරිකානු සෙනට් සභාව මේ ආකාරයට ෆේස්බුක් සමාගමේ ප්‍රධානියා කැඳවා ප්‍රශ්න කර සිටියේ ලන්ඩනයේ පිහිටි කෙම්බ්‍රිජ් ඇනලිටිකා නමැති දේශපාලන උපදේශන සමාගම ෆේස්බුක් ගිනුම් හිමිකරුවන්ගෙන් මිලියන 50කගේ පමණ පෞද්ගලික දත්ත අවසරයකින් තොරව භාවිත කිරීම ගැන විමර්ශනය පදනම් කරගෙනය.
එසේම 2016 ඇමෙරිකානු ජනාධිපතිවරණයට රුසියාව බලපෑම් කළේ ද යන්න පිළිබඳ පරීක්ෂා කරන විශේෂ පරීක්ෂක රොබට් මලර් (Robert Mueller) ෆේස්බුක් ආයතනයේ සේවකයන්ගෙන් ද කරුණු විමසූ බවත් එහිදී සකර්බර්ග් අනාවරණය කර ඇත.