විශේෂාංග

කොළඹ ආනන්ද කුමාරස්වාමි මාවතේ ගමන් කරන ඕනෑම අයෙකුට ජාතික කලාභවනේ සහ ජෝන් ද සිල්වා රඟහලේ ඉදිරිපස දර්ශනය අද ඉතා අලංකාරව පෙනෙන්නට තිබේ. නමුත් ඒ මනරම් පෙනුම පිටුපස සැඟවී ඇති සැබෑ ඛේදවාචකය නම්, දශකයකට අධික කාලයක් තිස්සේ නිම නොවුණු ප්‍රතිසංස්කරණ කටයුතු සහ එම ජාතික උරුමවලට සිදු කර ඇති අසීමිත විනාශය යි.

"මිනිසුන්ට යහපත් සංස්කෘතික ජීවිතයක් ලබා දෙනවා" යැයි පොරොන්දු දෙමින් බලයට පත් වූ වත්මන් පාලනය යටතේ ද, පද්ධති වෙනස් කිරීමේ වේගය මෙම අඩපණ වූ ගොඩනැගිලි අසල නතර වී තිබීම දෛවයේ සරදමකි.

වසර 13ක ශාපය: ජෝන් ද සිල්වා සමරු රඟහල

ජාතික කලාභවනේ දොරගුළු වසා තිබීම පමණක් නොව, ලාංකීය නාට්‍ය කලාවේ මහගෙදර ලෙස සැලකෙන ජෝන් ද සිල්වා සමරු රඟහල විනාශ මුඛයට ඇද දමා තිබීම ජාතික අපරාධයකි. රූපයේ පෙනෙන අලුත් පෙනුම හුදෙක් බාහිර ආලේපයක් පමණක් බවත්, අභ්‍යන්තරය තවමත් අවුල් ජාලාවක් බවත් කලාකරුවෝ චෝදනා කරති.

කාලය කා දැමීම: 2011 වසරේ දී අලුත්වැඩියාව සඳහා වසා දැමූ මෙම රඟහල, වසර 13ක් ගතවීත් තවමත් අවසන් අදියරට පැමිණ නැත. මෙය නඩත්තුවක් නොව, සංස්කෘතික මිනී වළක් කැපීමක් බඳු ය.

නිලධාරිවාදයේ මන්දගාමී බව: මෙහි ඉදිකිරීම් සහ උපදේශන කටයුතු සම්බන්ධයෙන් කලා මණ්ඩලයේ මැදිහත්වීම සහ මොරටුව විශ්ව විද්‍යාලයේ වාස්තු විද්‍යා අධ්‍යයනාංශයේ ඇතැම් නිලධාරීන්ගේ "අති-පණ්ඩිත" සහ වගකීම් විරහිත ක්‍රියාකලාප හේතුවෙන් මෙම ජාතික උරුමය අද "ෆයිල්" මිටියකට සීමා වී ඇත.

පිරිවැය සහ විනාශය: කාලය ඇදී යෑමත් සමඟ රුපියල් කෝටි ගණනක මහජන මුදල් නාස්ති වී ඇති අතර, නිසි නඩත්තුවක් හෝ සැලසුමක් නොමැතිව සිදුකළ "අලුත්වැඩියා" නිසා එම ස්ථානයේ පැවති ඓතිහාසික හා සංස්කෘතික වටිනාකමට ද දැඩි හානි සිදු වී තිබේ.

විද්වත් අකාර්යක්ෂමතාවේ සහ නොසැලකිලිමත් බවේ ප්‍රතිඵලය

රටේ ඉහළම තාක්ෂණික සහ කලාත්මක දැනුම ඇතැයි කියන ආයතන දෙකක් (මොරටුව විශ්ව විද්‍යාලය සහ කලා මණ්ඩලය) එක්වී වසර දහයකට වැඩි කාලයක් තිස්සේ එක් ගොඩනැගිල්ලක් නිම කරගත නොහැකි වීම ලැජ්ජාවට කරුණකි. රූපයේ පෙනෙන පරිදි බාහිරින් ගොඩනැගිල්ල "මෙක්අප්" කර තිබුණ ද, අභ්‍යන්තර තාක්ෂණික දෝෂ පෙන්වමින් වගකීම් එකිනෙකා මත පටවන නින්දිත ක්‍රීඩාවක බලධාරීන් නිරතව සිටිති.

"විද්වත් උපදෙස් යනු ජාතික උරුමයන් විනාශ කිරීමට සහ වැඩ ප්‍රමාද කිරීමට ලබාදෙන බලපත්‍රයක්ද" ? යන්න අද ජනතාව නගන ප්‍රබල ප්‍රශ්නයකි.

මේකද ඔබ පොරොන්දු වූ "වෙනස"?

"අපි ආවම සංස්කෘතික විප්ලවයක් කරනවා" යැයි කියූ පාලකයින්ට, තිබුණු තැන් ටික පවා නිසි පරිදි විවෘත කරගත නොහැකි වී ඇත්තේ ඇයි?

1. අලුත්වැඩියාව මුවාවෙන් සිදුවන විනාශය: වසර ගණනාවක් තිස්සේ ඇදී යන අලුත්වැඩියා කටයුතු අවසන් කිරීමට නිශ්චිත දිනවකවානු ඉදිරිපත් කිරීමට ආණ්ඩුව තවමත් අපොහොසත් ය.

2. කලාකරුවා පාරට වැටීම: බලය ලබාගැනීමට සංස්කෘතික මිනිසකු ගැන කතා කළ පාලකයින්ට, අද කලාකරුවා තමන් ගේ නිර්මාණයක් ප්‍රදර්ශනය කරගන්නට හෝ වේදිකාගත කරගන්නට තැනක් නැතිව පාරට වැටී සිටීම පෙනෙන්නේ නැත.

3. නිද්‍රාශීලී රාජ්‍ය කෙරුවාව: පරණ ආණ්ඩුවල මෙන්ම වත්මන් පාලනයේත් බලධාරීන් කරන්නේ "සංස්කෘතිය" යන්න මුවින් පිට කරන වචන සමුදායකට පමණක් සීමා කිරීමයි.

අපි බලධාරීන්ගෙන් ප්‍රශ්න කරමු !

* ජාතික කලාභවන සහ ජෝන් ද සිල්වා රඟහල විවෘත කරන නිශ්චිත දිනය වහාම රටට හෙළි කරනු!

* වසර 13ක් තිස්සේ මෙම ව්‍යාපෘතිය ප්‍රමාද කළ සහ ජාතික උරුමයට හානි කළ නිලධාරීන්ට එරෙහිව වහාම පියවර ගනු!

* රූපයට පමණක් සීමා වූ අලංකාරයෙන් ඔබ්බට ගොස්, කලාකරුවන් ගේ අයිතිය වහාම ලබා දෙනු !

වචනවලින් මාලිගා හැදීම සහ බාහිරින් පෙනෙන අලංකාරයෙන් ජනතාව රැවටීම නතර කර, වසා ඇති කලාභවනේ සහ ජෝන් ද සිල්වා රඟහලේ දොරවල් සැබෑ ලෙසම විවෘත කරනු.

ක්‍රිශාන්ත සුබසිංහ