විචාර
‘යුපුන් අබේකෝන්’ ක්රීඩාවෙන් සමුගත් හේතුව
“රට දැයට ණය නැතිව, ලෝකයට ණය වී ක්රීඩාවෙන් සමුගනිමි”
“තවත් ක්රීඩා කරන්න කාලය තිබිය දී ක්රීඩාවෙන් සමුගැනීමේ තීරණය කිසිම විදිහකින් ගැනීමට පහසු තීරණයක් වුණේ නැහැ. ඒත් අවසානයේ ඒ තීරණය නොගෙන බැරි තැනට පත් වුණා.”
ශ්රී ලාංකික කෙටි දුර ධාවන ශූර යුපුන් අබේකෝන් සිය ක්රීඩා දිවියෙන් සමුගන්නා බව මේ වන විට නිවේදනය කර තිබෙනවා.
සිය Facebook ගිණුම හරහා සටහනක් එක් කරමින් ඔහු මේ බව දැනුවත් කර තිබූ අතර, ආරම්භයේ සිට ඔහුගේ ක්රීඩා දිවියට උපකාරී වූ සියලු දෙනාට ස්තූතිවන්ත වීමට එය අවස්ථාවක් කරගෙන තිබුණා. එමෙන්ම මෙතෙක් කලක් ඔහුට ශක්තියක් වූ රසිකයන්ට ඔහු සිය ආදරය පිරිනමා තිබුණා.
කෙසේ වෙතත් මෙම සමුගැනීමේ සටහන තුළින් යුපුන් යම් චෝදනාවක් ද ඉදිරිපත් කර තිබෙන ආකාරය දැකගත හැකි විය. එම සටහනේ මාතෘකාව ලෙස ඔහු යොදා තිබුණේ “රට දැයට ණය නැතිව, ලෝකයට ණය වී ක්රීඩාවෙන් සමුගනිමි” යනුවෙනි.
එමෙන්ම තවදුරටත් ක්රීඩා කිරීමට කාලය තිබිය දී ක්රීඩාවෙන් සමුගැනීමේ තීරණය කිසිදු ආකාරයකින් පහසු දෙයක් නොවූ බව ඔහු සඳහන් කරන අතර, එසේ වුව ද අවසානයේ දී එම තීරණය ගැනීමට සිදුවූ බව පවසා තිබුණා.
එම තීරණය ගැනීමට බලපෑ හේතු ගැන ඉදිරියේදී කතා කරමු යැයි ද ඔහු දක්වා තිබුණා.
දීමනාව ප්රමාණවත් නැහැ
මේ අතර, යුපුන් අබේකෝන් සිය සමුගැනීම පිළිබඳව අදහස් දැක්වූ වීඩියෝවක් ද ‘Hiru News’ හරහා මේ වන විට පළ ඇති අතර, එම අදහස් දැක්වීමේ දී ඔහු පවසන්නේ ක්රීඩා කටයුතු ඉදිරියට කරගෙන යෑමේ දී ලැබෙන දීමනාව කිසිසේත්ම ප්රමාණවත් නොවන බවයි.
විශේෂයෙන්ම විදේශීයව තරග පැවැත්වෙන කාලසීමාවල දී ලංකාවේ මුදලින් රුපියල් ලක්ෂ 25 - 30 කට අධික වියදමක් ඔහුට වැය වන බවත්, දැනට ලැබෙන්නේ දෙලක්ෂ විසිදහසක පමණ මුදලක් බවත් ඔහු සඳහන් කර තිබුණා.
අමාත්යවරයා පොරොන්දු ඉටු කළේ නැහැ
එමෙන්ම මෙම තත්ත්වය පිළිබඳව ඔහුට පසුගිය වසරේදී (2025) ක්රීඩා අමාත්යවරයා සමග දුරකතනයෙන් කතා කිරීමට ලැබුණු අවස්ථාවක දී පෙන්වා දුන් බවත්, එහි දී එය පිළිගත් අමාත්යවරයා ඊට යම් විසඳුමක් ලබාදෙන බව ප්රකාශ කළ ද එය සිදු නොවූ බවත් ඔහු පවසනවා. ඉන් පසුව ලංකාවට පැමිණි අවස්ථාවක දී ඔහු ක්රීඩා අමාත්යවරයා හමුවීමට උත්සාහ කළ ද ඊටද අවස්ථාවක් නොලැබුණු බව එම වීඩියෝව මගින් ඔහු වැඩිදුරටත් සඳහන් කර තිබුණා.
දකුණු ආසියාවේ වේගවත්ම මිනිසා
දකුණු ආසියාවේ වේගවත්ම මිනිසා ලෙස වාර්තා අතරට එක්වූ යුපුන් අබේකෝන් මීටර් 100 ධාවන ඉසව්ව තත්පර 10 කට අඩු කාලයකින් (තත්පර 9.96) නිම කළ ප්රථම සහ එකම ශ්රී ලාංකිකයා මෙන්ම දකුණු ආසියානු ක්රීඩකයායි.
‘ආසියාවේ කළු වෙළඹ’ ලෙස විරුදාවලිය ලැබූ ඔලිම්පික් රිදී පදක්කම් ලාභී සුසන්තිකා ජයසිංහගෙන් පසු ජාත්යන්තර කෙටි දුර ධාවන ඉසව්වෙන් වැඩිපුරම ජාත්යන්තරයේ අවධානයට ලක්වූ ක්රීඩකයා වන්නේ ද යුපුන් අබේකෝන් ය.
ඔහු ලබාගත් විශිෂ්ට ජයග්රහණ අතර 2022 වර්ෂයේ පොදු රාජ්ය මණ්ඩලීය ක්රීඩා උළෙලේදී ශ්රී ලංකාව නියෝජනය කරමින් දිනාගත් ලෝකඩ පදක්කම ඉහළින්ම සනිටුහන් වන්නේ ය.
ඔහු මේ වන විට 31 වන වියේ පසුවෙයි.
මතු පළවන්නේ යුපුන් අබේකෝන් සිය සමු ගැනීම නිවේදනය කරමින් සිය Facebook ගිණුම හරහා එක් කර තිබූ සටහනයි.
(උපුටා ගැනීම)
රට දැයට ණය නැතිව, ලෝකයට ණය වී ක්රීඩාවෙන් සමුගනිමි!
දකුණු ආසියාවේ වේගවත්ම ධාවකයා කියන්නෙ මගේ ජයග්රහණයක් නෙවෙයි, අපේ ජයග්රහණයක් කියලා මං තේරුම්ගත්තෙ Sub 10 එක දුවපු දවසෙන් පස්සෙ. ඒ වෙනකල් මං හිතාගෙන හිටියේ ඒක මගේ කරගන්න ඕනෙ දිනුමක් කියලා. කොල්ලෙක් තමන්ගේ ගෙදරට/පවුලට අයිති වෙලා ඉඳලා මුළු රටකටම අයිති වෙනවා කියන්නෙ මහා පුදුමාකාර විරල අත්දැකීමක්. තිබූ තැනකින් සොර සතුන්ට ගන්නට බැරි දිනුමක්. මුලින්ම ඒ අත්දැකීම මට දුන්නට, මං මේ ජීවිතයට සහ මගේ රට දැයට මං මගේ කෘතඥතාවය දක්වනවා.
ඔබ හැම දෙනාම කවදාවත් සාමාන්ය රසිකයෝ හෝ සහයෝගය දක්වන්නන් විතරක් වුනේ නෑ , ඔබ සියලුදෙනා මගේ පවුල වුණා. මේ ගමන පුරාවටම මම ඇත්තටම ලබාගත්තෙත් ඒ ආදරයි ශක්තියයි විතරයි. මගේ තරග නරඹන්න නිදිමරාගෙන උන්න , පහන් පත්තු කරපු , යාච්ඤා කරපු හැමදෙනාටම ගොඩක් ආදරෙයි. ඒ හැමදේම මට විශාල ශක්තියක් වුන බව මං මතක් කරන්න කැමතියි. මං මට පුළුවන් උපරිමයෙන් ක්රීඩා කරන්නත්, ඔයාලාගේ විශ්වාසය මිල මුදල් ඉදිරියේ පාවා නොදී රකින්නත්, ඔයාලගේ ගෞරවයට කැළැලක් නොකර විනයවත්ව හැසිරෙන්නත් වගබලාගැනීම මං ඔයාලට ඉටුකළ යුතුකමයි.
ඉතින් මගේ ක්රීඩා ජීවිතය අවසන් කරන අද දවසේ මට ස්තූති කරන්න පිරිසක් ඉන්නවා. මුලින්ම මාව මේ ලෝකෙට ගෙනැවිත් මට ජීවිතය දුන්න දෙමව්පියන්ට ස්තූතිවන්ත වෙනවා, මං ගැන මෙච්චර ආඩම්බර වෙනකොට මට හරිම සතුටක් දැනෙනවා. මගේ පවුලේ අයට සහ මගේ යාළුවන්ට ස්තූතිවන්ත වෙනවා මට ලොකු හයියක් උනාට , ඒ වගේම මගේ පාසල් දෙකටම මට ක්රීඩාව හඳුන්වලා දුන්නාට. මාව ක්රීඩාවට හඳුන්වලා දුන්නාට මගේ සියලුම පුහුණුකරුවන් සහ ඉතාලියේ මගේ කණ්ඩායමට ස්තූතියි. ඒ අය නොහිටින්න මගේ ගමන මේ තරම් දුරක් නොපැමිණෙන්න තිබුණා.
ඒ වගේම මේ ගමනේ පටන්ගැන්මේදී යුද හමුදාව ලබාදුන්න ඒ සහයෝගය මට ලොකු පිටුවහලක් උනා. විශේෂයෙන්ම විදුලි හා යාන්ත්රික ඉන්ජිනේරු බළකායේ එවක සිටි සහ අදත් සේවයේ සිටින සියලුම නිලධාරීන් සහ සෙසු නිල සියලුදෙනාටම ඒ ලබාදුන්න සහයෝගවලට මං මේ අවස්ථාවේ ස්තූතිවන්ත වෙනවා.
ඒ එක්කම ශ්රී ලංකා මලල ක්රීඩා සංගමයේ හිටපු සභාපති විශ්රාමික මේජර් ජෙනරල් පාලිත ප්රනාන්දු ඇතුළු නිලධාරීන්ට මම ස්තූතිය පුද කරනවා.
මගේ ජයග්රහණ (ලංකාවේ ජයග්රහණ) වෙනුවෙන් ශ්රමය, බලාපොරොත්තු, කාලය, මුදල් වියදම් කරපු සෑම ඉතාලි ජාතික වෘත්තීමය හැමදෙනාටම මම මේ අවස්ථාවේ ආචාර කරනවා.
රටේ ජයග්රහණය වෙනුවෙන් (අවංකව) කටයුතු කළ රජයේ අමාත්යාංශ වල සහ කමිටු වල සේවය කල සහ දැනට සේවය කරන පිරිසට ස්තූතියි. මා සමග එකට වැඩ කටයුතු කළ සහයෝගය ලබා දුන්න පෞද්ගලික අංශයේ සියලුම දෙනාටත් මම ස්තූතිය පුද කරන්න කැමතියි.
ලෝකයේ පුහුණුවීම් කරන්නට මට අනුග්රහය දැක්වූ 'TV දෙරණ' මාධ්ය නාලිකාවේ ප්රධානී දිලිත් ජයවීර මහතා, ලක්සිරි වික්රමගේ මහතා ඇතුළු සියලුම දෙනාටත් , ශ්රී ලංකා ක්රිකට් ආයතනයේ හිටපු සභාපති ශම්මි සිල්වා මහතා ඇතුළු නිලධාරීන් සියලු දෙනාටමත් විශේෂයෙන් ස්තූති වන්ත වෙනවා.
අපේ රට වෙනුවෙන් ක්රීඩා කරන, නැගී එන සහොදර සහෝදරියන් හැමෝටම අපේ රටේ නම ලෝකයේ දිනවන්නටත්, අපේ රටේ මිනිසුන්ට ජයග්රහණයේ අභිමානයෙන් ඔසවා තබන්නටත් ජයග්රහණ ලැබෙන්නට කියා මං හදවතින්ම ප්රර්ථනා කරනවා.
ශ්රී ලංකාවේ පුරවැසියෙකු ලෙස, රට දැයට ගෙන දුන් ජයග්රහණයන් සහ අභිමානයෙන්, මාව ඇති දැඩි කළ මගේ රටට ණය ගෙවන්නට ලැබීම මා තෘප්තිමත් කරයි. එය මගේ අවසන් හුස්ම දාක්වා මා සමග එනු ඇත. එහෙත් මාව පුහුණු කළ මට තාක්ෂණය දුන්, අපේ රටට ආදරය කළ රටවල් සහ මිනිසුන්ට ණයකාරයෙක් වෙන්නට සිදුවීම ගැන මා කණගාටු වෙමි.
තවත් ක්රීඩා කරන්න කාලය තිබියදී ක්රීඩාවෙන් සමුගැනීමේ තීරණය කිසිම විදිහකින් ගැනීමට පහසු තීරණයක් උනේ නෑ.ඒත් අවසානයේ ඒ තීරණය නොගෙන බැරි තැනට පත් වුණා. ඒ ඇයි කියලා මොකක්ද සිද්ධ උනේ කියලා අපි කතා කරමු. ලංකාවේ වර්තමාන ක්රීඩාව ගැන කතා කරමු. බෙදා ගන්නට ඇති අත්දැකීම් බොහෝමයි. ඊළඟ පරිච්ඡේදයේදී හමුවෙමු.
ඔයාලා හැමෝටම ස්තූතියි , ආදරෙයි!
ශ්රී ලංකා මාතාවට ජය වේවා!
(උපුටා ගැනීම අවසන්)
yumal
newstube.lk වෙබ් අඩවියේ පළවන සියළු ප්රවෘත්ති සහ විශේෂාංග ආශ්රිතව කිසිවකුට හානිකර යමක් පළ වී ඇත්නම් ඒ අගතියට පත් පාර්ශවයට ඊට ප්රතිචාර දැක්වීමට ඇති අයිතියට අපි ගරු කරමු.
ඔබගේ ප්රතිචාර
