දිවයින පුරා පුනර්ජනනීය බලශක්ති ව්‍යාප්ති සැලැස්ම යටතේ ඉහළ විභවයක් සහිත කලාපයක් ලෙස නම් කර තිබූ මන්නාරම් දූපතේ, ප්‍රදේශවාසීන්ගේ කැමැත්තෙන් තොරව තවදුරටත් සුළං විදුලි ව්‍යාපෘති ක්‍රියාත්මක කිරීම ජනාධිපතිවරයා විසින් තහනම් කර තිබේ.
බලශක්ති අමාත්‍යවරයා විසින් අමාත්‍ය මණ්ඩලය වෙත මෙම තීරණය දැනුම් දුන් අතර, ඒ අනුව කටයුතු කිරීමට අමාත්‍ය මණ්ඩලයේ එකඟතාව ද ලැබී ඇත.
මෙම තීරණය ගෙන ඇත්තේ ප්‍රදේශයේ මහජනතාව විසින් ඉදිරිපත් කර ඇති පාරිසරික හා සාමාජීය ගැටලු සැලකිල්ලට ගනිමින් බව රජය පැවසුවද, ආණ්ඩුවට හිතවත් බවට සැලකෙන ප්‍රකට ව්‍යාපාරික ධම්මික පෙරේරා මහතාට අයත් Hayleys Fentons සතු මෙගාවොට් 50 සුළං විදුලි බලාගාර ව්‍යාපෘතිය ඉදිරියට කරගෙන යාමට ඉඩ දීම ප්‍රශ්නකාරී බවයි විචාරකයන් පෙන්වා දෙන්නේ.
ඉහළ සුළං විභවය හේතුවෙන් මන්නාරම සඳහා මුලින් සුළං විදුලි ව්‍යාපෘති තුනක් සැලසුම් කර තිබුණි. ඉන් එක් ව්‍යාපෘතියක් වන තම්බපවනි සුළං විදුලි බලාගාරයේ මෙහෙයුම් කටයුතු 2021 වසරේදී සාර්ථකව ආරම්භ විය.
කෙසේ වෙතත්, ඉදිරියේදී මෙහෙයුම් කටයුතු ඇරඹීමට නියමිත අනෙක් ව්‍යාපෘති දෙක වන Windscape Mannar (Pvt) Ltd සතු මෙගාවොට් 20ක සුළං විදුලි ව්‍යාපෘතිය සහ Hayleys Fentons සතු මෙගාවොට් 50 සුළං විදුලි බලාගාර ව්‍යාපෘතිය පිළිවෙලින් 2025 දෙසැම්බර් සහ 2026 දෙසැම්බර් මාසවලදී ආරම්භ කිරීමට සැලසුම් කර තිබුණි.
නව ජනාධිපති තීරණයත් සමඟ, මන්නාරම් දූපත තුළ ඉදිරියේදී ක්‍රියාත්මක වන ඕනෑම බලශක්ති ව්‍යාපෘතියක් සඳහා ප්‍රාදේශීය ජනතාවගේ පූර්ණ සහභාගීත්වය සහ කැමැත්ත අනිවාර්ය වනු ඇත.
බලශක්ති අමාත්‍යවරයා විසින් කැබිනට් මණ්ඩලය දැනුවත් කළ පරිදි, සංවේදී දූපත් කලාපවල පරිසරය හා සමාජය කෙරෙහි බලපාන සංවර්ධන ව්‍යාපෘති ක්‍රියාත්මක කිරීමේදී පාරිසරික හා සමාජීය සාධකවලට ප්‍රමුඛත්වය දීමේ ප්‍රතිපත්තිමය වෙනසක් මෙම පියවරෙන් සනිටුහන් වන බව රජය පෙන්වා දෙයි.
කෙසේ වෙතත්, මෙම තීරණය මඟින් මන්නාරම් දූපතේ සියුම් පරිසර පද්ධති සහ දේශීය ප්‍රජාවන්ගේ යහපැවැත්ම පිළිබඳව රජය දක්වන සැලකිල්ල ඉස්මතු කරනවා වෙනුවට, ඇතැම් ව්‍යාපෘතිවලට ලැබෙන විශේෂ වරප්‍රසාද පිළිබඳව බරපතළ ප්‍රශ්න මතු කර ඇතැයි විචාරකයෝ පෙන්වා දෙති.
(infosrilanka)
මෙම පුවතට අදාල තවදුරටත් විස්තර :
මන්නාරම දූපත ආශ්‍රිත සුළං බලාගාර ගැන කැබිනට් මණ්ඩලය ගත් තීරණය සම්බන්ධයෙන් මන්නාරම් ජනතාවගේ ප්‍රතිචාරය
