Language Switcher

V2025

9 වැනි පාර්ලිමේන්තුවට බන්ධනාගාරයේ සිට දෙන්නෙක් !

පැවති මහ මැතිවරණයෙන් මඩකලපුව දිස්ත්‍රික්කයට තේරි පත් වූ පිල්ලෙයාන් හෙවත් සිවනේසතුරෙයි චන්ද්‍රකාන්තන් සහ රත්නපුර දිස්ත්‍රික්කයට තේරී පත්වූ චොකා මල්ලි හෙවත් එච්.එල්.ප්‍රේමලාල් ජයසේකර යන මන්ත්‍රීවරුන්ට අද (20)  පැවැත්වෙන නවැනි පාර්ලිමේන්තුවේ පළමු රැස්වීම සඳහා සහභාගී වීමට අවසර ලැබී ඇති බව පාර්ලිමේන්තුවේ වේත්‍රධාරී නරේන්ද්‍ර ප්‍රනාන්දු පවසයි.

දැනට රක්ෂිත බන්ධනාගාරගතව සිටින තමිල් මක්කල් විඩුදලෛප් පුළිකල් පක්ෂයේ නායක සිවනේසතුරෙයි චන්ද්‍රකාන්තන් හට මඩකලපුව මහාධිකරණයෙන් එම අවසරය ලබා දී තිබේ.

එමෙන්ම දැනට මරණ දඬුවමට නියමව සිටින රත්නපුර දිස්ත්‍රික් පාර්ලිමේන්තු මන්ත්‍රී එච්.එල්.ප්‍රේමලාල් ජයසේකර ද පාර්ලිමේන්තු රැස්වීමට සහභාගී වීමට අවසර ලැබී තිබේ. ප්‍රේමලාල් ජයසේකර විසින් සිය මරණ දඬුවවමට එරෙහිව අභියාචනාධිකරණය වෙත කරන ලද අභියාචනය පාර්ලිමේන්තුවට එවා ඇති අතර එය පාර්ලිමේන්තුවේ වේත්‍රධාරී විසින් බන්ධනාගාර දෙපාර්තමේන්තුව වෙත යොමු කරන ලදුව පාර්ලිමේන්තු රැස්වීම‍ට ඉඩකඩ සලසා දෙන මෙන් දන්වා ඇති බවත් වාර්තා වෙයි.