මාසික වැටුප් ගෙවීම ප්‍රමාදවීම සම්බන්ධයෙන් අද (25) රූපවාහිනී සංස්ථාව පරිශ්‍ර අභ්‍යන්තරයේ සේවක විරෝධතාවක් පවත්වා ඇති බව වාර්තා වෙයි.
දැනගන්නට ඇති ආකාරයට රූපවාහිනී සංස්ථාවේ සභාපති රෙජිනෝල්ඩ් කුරේ ගේ කාර්‍යාලය ඉදිරිපිටට රැස්වූ පිරිස් මෙසේ මාසික වැටුප ඉල්ලා උද්ඝෝෂණය කර ඇත.
කෙසේ වුවත් සභාපති රෙජිනෝල්ඩ් කුරේ සේවක ඉල්ලීම සම්බන්ධයෙන් නිල දැනුම්දීමක් සිදුකර නොමැති අතර මෙම කාරණයේදී තමන්ට සිදුකළ හැකි කිසිවක් නොමැති බව පමණක් පවසා ඇත.
මේ අතර සේවක පිරිස් චෝදනා කරන්නේ, ආයතනය මේ වන විට දැනුවත්ව කඩාවැටෙන්නට ඉඩදී ඇති තත්ත්වයක් මතුව ඇති බවයි.
ආයතනයේ ආදායම් ඉපයීමට අත්‍යාවශ්‍ය අලෙවි කළමනාකරු ධූරය පුරප්පාඩුවී ඇති අතර මෙතෙක් ආයතනයට ආදායම් ලැබුණු මූලාශ්‍ර දැනුවත්ව සංස්ථාවෙන් ඉවත්කර ඇති බවත් ඔවුන් පවසයි.
තවද හෙට (26) දිනයේදී මාසික වැටුප ගෙවීම නිසිලෙස සිදුනොවුණහොත් වැඩිදුරටත් වෘත්තීය ක්‍රියාමාර්ග ගැනීමට සේවක පිරිස සූදානම් වන බවත් වාර්තා වෙයි.