ලක්විජය විදුලි බලාගාරය, ලංකා කෝල් සමාගම (LCC), ශ්රී ලංකා විදුලි බල මණ්ඩලය (CEB) සහ ශ්රී ලංකා මහජන උපයෝගිතා කොමිසමේ (PUCSL) නියෝජිතයින් ඊයේ (12) එස්. එම්. මරික්කාර් ගේ සභාපතිත්වයෙන් පැවති යටිතල පහසුකම් සහ උපාය මාර්ගික සංවර්ධනය පිළිබඳ ආංශික අධීක්ෂණ කමිටු (SOC) රැස්වීමට සහභාගී වූහ.
ප්රථම නැව්ගත කිරීම් තුනේ ම අඩු අගයක්
CEB විසින් ඉදිරිපත් කරන ලද වාර්තා අතරින් , Load Port වාර්තා, Discharge Port වාර්තා සහ ලක්විජය විදුලි බලාගාරය විසින් සකස් කළ වාර්තා පරීක්ෂා කිරීමේ දී, Load Port හා Discharge Port වාර්තා ලක්විජය විදුලි බලාගාරය ඉදිරිපත් කළ වාර්තා සමඟ නොගැළපෙන බව අනාවරණය විය. ලක්විජය විදුලි බලාගාර වාර්තා අනුව, ප්රථම ගල් අඟුරු නැව්ගත කිරීම් තුනේ Gross Calorific Value (GCV) අගය කිලෝග්රෑමයකට 5,900 kcal ට වඩා අඩු ලෙස වාර්තා වී තිබුණි.
ඉන්දීය පරීක්ෂණාගාර වාර්තාවල විශ්වසනීයත්වය පිළිබඳ සැකයක්
CEB ලේඛන අනුව, ප්රථම නැව්ගත කිරීමෙන් ඇති වූ බලශක්ති අලාභ, දඩ මුදල් පැනවීම මගින් පූරණය කළ හැකි බව සඳහන් වූ අතර, අනෙකුත් නැව්ගත කිරීම්වලින් ඇති වූ අලාභය එසේ පූරණය කළ නොහැකි බව ද දැක්වුණි. එම පසුබිම තුළ, විශේෂයෙන්ම ප්රථම නැව්ගත කිරීමෙන් ඇති වූ අලාභය සම්පූර්ණයෙන්ම පූරණය වී ඇති බව පෙනී යෑම හේතුවෙන්, ඉන්දීය පරීක්ෂණාගාර වාර්තාවල විශ්වසනීයත්වය පිළිබඳ සැක මතු විය.
කමිටු සභාපතිවරයා, රැස්වීමේ දී ඉදිරිපත් කළ වාර්තාවල සත්යතාව තහවුරු කිරීම සඳහා, අදාළ නැව්ගත කිරීම් සම්බන්ධයෙන් ස්වාධීන පරීක්ෂණාගාරයක් මගින් පරීක්ෂණ සිදු කරවා ගැනීමට බලශක්ති අමාත්යාංශය කටයුතු කළ යුතු බව නිර්දේශ කළේ ය.
වගකීම දරන පාර්ශ්වලට එරෙහිව අවශ්ය ක්රියාමාර්ග
තවද, 2023 වසරට පෙර පැවති ආර්ථික අර්බුදයට පෙර පවත්නා වූ රාමුව අනුව, ලංකා කෝල් සමාගම සමග සමාගම් ලියාපදිංචි කිරීමේ අවශ්යතා සංශෝධනය කිරීමට විගණකාධිපතිවරයා විසින් කළ නිර්දේශ ක්රියාත්මක කළ යුතු බව යෝජනා කරන ලදී. විගණකාධිපතිවරයාගේ නිර්දේශ කැබිනට් මණ්ඩලයට දැනුම් නොදුන් වගකීම දරන පාර්ශ්වයන්ට එරෙහිව අවශ්ය ක්රියාමාර්ග ගන්නා ලෙස ද කමිටුව ඉල්ලා සිටියේ ය.
අවසානයේ, අඩු ගුණාත්මක ගල් අඟුරු භාවිතයෙන් විදුලි බලය නිෂ්පාදනය කිරීම හේතුවෙන් සිදු වූ සැබෑ මූල්ය අලාභය ගණනය කර ඉදිරිපත් කරන ලෙස මහජන උපයෝගීතා කොමිසම වෙත උපදෙස් ලබා දෙන ලදී.
