සිය බිරිඳ ඉතා කෲර ලෙස පිහියෙන් ඇන ඝාතනය කළ බවට වරදකරු වූ 38 හැවිරිදි ශ්රී ලාංකිකයෙකුට එක්සත් රාජධානියේ කාඩිෆ් ක්රවුන් උසාවිය (Cardiff Crown Court) විසින් ජීවිතාන්තය දක්වා සිරදඬුවම් නියම කර තිබේ.
ඊයේ (20) ප්රකාශයට පත් කරන ලද තීන්දුවට අනුව, විත්තිකාර තිසර වේරගලගේ හට ජීවිතාන්තය දක්වා සිරදඬුවම් නියම වූ අතර, ඔහුට නිදහස සඳහා ඉල්ලුම් කිරීමට පෙර අවම වශයෙන් වසර 23 කුත් මාස නවයක කාලයක් අනිවාර්යයෙන්ම සිරගතව සිටිය යුතු බව විනිසුරු ඩැනියෙල් විලියම්ස් නියෝග කළේය.
මෙම යුවළ 2017 වසරේදී ශ්රී ලංකාවේදී විවාහ වී පසුව 2022 දී උසස් අධ්යාපනය සහ රැකියා සඳහා එක්සත් රාජධානියට සංක්රමණය වී ඇත.
කෙසේ වෙතත්, විවාහයේ ඇතිවූ ආරවුල් හේතුවෙන් ඔවුන් 2025 වසරේ මුල සිට වෙන්ව ජීවත් වී තිබේ.
නඩු විභාගයේදී අනාවරණය වූයේ විත්තිකරු ඉතා සැලසුම් සහගතව මෙම අපරාධය සිදු කර ඇති බවයි. ඝාතනය සිදු කිරීමට පෙර දින ඔහු පිහියක් මිලදී ගෙන ඇති අතර, එදින උදෑසන නිරෝධා සිය පෙම්වතාගේ නිවස අසල රථය ගාල් කරන තෙක් රැක සිට ප්රහාරය එල්ල කර ඇත.
නිරෝධාගේ සිරුරේ ස්ථාන 17 කට වඩා වැඩි ප්රමාණයක තියුණු ආයුධ පහරවල් තිබූ බවත්, ප්රහාරයේ දරුණුකම නිසා ඔහු භාවිතා කළ පිහියේ මිට පවා කැඩී ගොස් තිබූ බවත් අධිකරණ වෛද්ය වාර්තා පෙන්වා දෙයි.
නඩු විභාගය අතරතුර නිරෝධාගේ පියා ප්රකාශ කළේ, "ඇය අපගේ එකම දියණියයි. ඇය ඉතාමත් කරුණාවන්ත, සතුන්ට ආදරය කළ දියණියක්. ඇයගේ අහිමි වීම අපට කිසිදා දරාගත නොහැකි මානසික බරක්," යනුවෙනි.
මුලදී වරද පිළිගැනීම ප්රතික්ෂේප කළත්, පසුව 2025 ජනවාරි මාසයේදී ඔහු වරද පිළිගැනීමට කටයුතු කළේය.
විනිසුරුවරයා ප්රකාශ කළේ මෙය විත්තිකරුගේ දැඩි ආත්මාර්ථකාමීත්වය සහ පාලනය කරගත නොහැකි ඊර්ෂ්යාව නිසා සිදුකළ "බියගුලු ක්රියාවක්" බවයි.
