පුවත්

නීති අධ්‍යක්ෂවරයෙකු නොමැතිව කොළඹ වරාය නගර ආර්ථික කොමිෂන් සභාව පසුගිය වසර දෙකක කාලය තුළ ක්‍රියාත්මක වී ඇති ආකාරය පිළිබඳව පාර්ලිමේන්තු මන්ත්‍රී ශානක්‍යන් රාසමාණික්කම් ප්‍රශ්න කරමින්, කොමිෂන් සභාවේ නීතිමය අධීක්ෂණය, තීරණ ගැනීමේ ක්‍රියාවලිය සහ පාරදෘශ්‍යභාවය සම්බන්ධයෙන් බරපතළ ප්‍රශ්න මතු කළේ ය.

ඊයේ (11) පාර්ලිමේන්තුවේ දී මුදල් හා සැලසුම් අමාත්‍යවරයා ගෙන් ප්‍රශ්න කරමින් රාසමාණික්කම් පැවසුවේ, පුළුල් නීතිමය හා නියාමන වගකීම් සහිත වරාය නගර කොමිෂන් සභාවක් වැනි ආයතනයක් මෙතරම් දීර්ඝ කාලයක් නීති අධ්‍යක්ෂවරයෙකු නොමැතිව ක්‍රියාත්මක වීම පිළිබඳව පැහැදිලි කිරීමක් අවශ්‍ය බවයි.

කොමිෂන් සභාවේ සමස්ත පාරදෘශ්‍යභාවය සැක සහිතයි

“මෙවැනි කොමිෂන් සභාවක් නීති අධ්‍යක්ෂවරයෙකු නොමැතිව වසර දෙකක් ක්‍රියාත්මක වන්නේ කෙසේද? කොමිෂන් සභාව තීරණ ගනිමින් සහ සිය කාර්යයන් ඉටු කරන්නේ නම්, එම තීරණ නීත්‍යානුකූල බව සහතික කිරීම සඳහා නීතිමය උපදෙස් හා අධීක්ෂණය ලබා දෙන්නේ කවුරුන්ද?” යනුවෙන් ඔහු ප්‍රශ්න කළේ ය.

වරාය නගර කොමිෂන් සභාවේ නිලධාරීන්ගේ වැටුප් සම්බන්ධයෙන් ද රාසමාණික්කම් ප්‍රශ්න කළේ ය.

තමන් මීට පෙර එක් එක් නිලධාරියා ගේ වැටුප් විස්තර ඉල්ලා තිබුණ ද, බලධාරීන් විසින් ලබාදී ඇත්තේ එක් එක් නිලධාරියාගේ වැටුප් වෙනුවට කොමිෂන් සභාවේ සමස්ත වැටුප් වියදම පමණක් බව ඔහු පෙන්වා දුන්නේ ය.

“මම එක් එක් නිලධාරියාගේ වැටුප් විස්තර විශේෂයෙන් ඉල්ලා සිටියා. නමුත් ලබාදී තිබෙන්නේ සමස්ත වැටුප් වියදම පමණයි. එය මා ඉදිරිපත් කළ ප්‍රශ්නයට සෘජු පිළිතුරක් නොවේ,” යනුවෙන් ඔහු පැවසී ය.

එක් එක් නිලධාරීන්ගේ වැටුප් විස්තර සම්පූර්ණයෙන් හෙළි නොකිරීම සහ වසර දෙකක කාලයක් නීති අධ්‍යක්ෂවරයෙකු නොමැතිව කොමිෂන් සභාව ක්‍රියාත්මක වීම අතර සම්බන්ධයක් තිබිය හැකි බව පෙන්වා දුන් ඔහු, කොමිෂන් සභාවේ සමස්ත පාරදෘශ්‍යභාවය පිළිබඳවද ප්‍රශ්න මතුවන බව සඳහන් කළේ ය.

“තනි තනි නිලධාරීන්ගේ වැටුප් තොරතුරු හෙළි නොකරන අතරම, වසර දෙකක් තිස්සේ නීති අධ්‍යක්ෂවරයෙකුද නොමැති නම්, කොමිෂන් සභාවේ පාරදෘශ්‍යභාවය පිළිබඳ සාධාරණ ප්‍රශ්න මතුවෙනවා. මේ කාලය තුළ කොමිෂන් සභාව ක්‍රියාත්මක වූ ආකාරය සහ අවශ්‍ය නීතිමය අධීක්ෂණය ලබාදීම සඳහා ගෙන ඇති විධිවිධාන මොනවා ද යන්න රජය පැහැදිලි කළ යුතුයි,” යනුවෙන් රාසමාණික්කම් මහතා පැවසී ය.

රාජ්‍ය බැංකු ණය සම්බන්ධ ප්‍රධාන ලේඛන පාර්ලිමේන්තුවට ඉදිරිපත් කළ යුතුයි

මේ අතර, රාජ්‍ය බැංකුවල ණය ලබාදීමේ ක්‍රියාවලිය සම්බන්ධයෙන් ද රාසමාණික්කම් ප්‍රශ්න කළ අතර, බැංකු ක්ෂේත්‍රයේ ප්‍රතිව්‍යුහගත කිරීමේ සහ වෙනත් ක්‍රියාමාර්ගවලින් අනතුරුව අයකර නොගත් හෝ කපා හැර ඇති ණය සම්බන්ධයෙන් විශේෂ අවධානයක් යොමු කළේ ය.

තනි පුද්ගල ගනුදෙනුකරුවන් සහ ගනුදෙනු සම්බන්ධ ඇතැම් තොරතුරු හෙළි කිරීමේ දී බැංකු රහස්‍යභාවය ආරක්ෂා කළ යුතු බවට රජය ඉදිරිපත් කරන කරුණ තමන් පිළිගන්නා බව ඔහු පැවසී ය.

කෙසේ වෙතත්, රහස්‍යභාවය යන කරුණ පාර්ලිමේන්තුවේ මූල්‍ය අධීක්ෂණ කාර්යභාරය සීමා කිරීම සඳහා පොදු හේතුවක් ලෙස භාවිත කළ නොහැකි බව ඔහු අවධාරණය කළේ ය.

“රහස්‍යභාවය ආරක්ෂා කළ යුතු අවස්ථා තිබෙන බව මම පිළිගන්නවා. නමුත් රටේ මූල්‍ය බලය පාර්ලිමේන්තුව සතුයි. ඒ නිසා අවම වශයෙන් මෙම ගනුදෙනු සම්බන්ධ ප්‍රධාන ලේඛන සහ තොරතුරු අදාළ පාර්ලිමේන්තු කමිටුවලට ලබාදිය යුතුයි. එවිට ඒවාට අදාළ අධීක්ෂණ කාර්යය නිසි ලෙස සිදුකළ හැකියි,” යනුවෙන් ඔහු පැවසීය.

රාජ්‍ය ආයතන නිසි ලෙස කටයුතු කර තිබේ ද සහ මහජන සම්පත් ආරක්ෂා කර තිබේ ද?

බැංකු ක්ෂේත්‍රයේ ප්‍රතිව්‍යුහගත කිරීමේ ක්‍රියාමාර්ගවලින් අනතුරුව රුපියල් බිලියන ගණනක ණය අයකර ගැනීමකින් තොරව කපා හැර ඇති බවත්, තවත් රුපියල් බිලියන ගණනක ණය තවමත් අයකරගෙන නොමැති බවත් රාසමාණික්කම් පෙන්වා දුන්නේ ය.

“මෙම අයකර නොගත් ණය ජනතාවගේ බදු මුදල් සමඟ සෘජුව සම්බන්ධයි. ඒ නිසා රාජ්‍ය බැංකු ණය ලබාදෙන ආකාරය, විශාල ණය අයකර ගැනීම, ප්‍රතිව්‍යුහගත කිරීම හෝ කපා හැරීම සිදුවන්නේ කෙසේද යන්න පිළිබඳව ජනතාවට දැනගැනීමේ අයිතියක් තිබෙනවා,” යනුවෙන් ඔහු පැවසී ය.

විශාල ණය ප්‍රතිව්‍යුහගත කිරීමේදී, කපා හැරීමේදී හෝ අයකර ගැනීමේ ක්‍රියාමාර්ග ගැනීමේදී නිසි ක්‍රියා පටිපාටි අනුගමනය කර තිබේද යන්න තීරණය කිරීමට ප්‍රමාණවත් තොරතුරු පාර්ලිමේන්තුවට ලබාදිය යුතු බවද ඔහු අවධාරණය කළේ ය.

“මෙහි ප්‍රශ්නය වන්නේ කිසියම් ණයගැතියෙකුගේ රහස්‍ය තොරතුරු මහජනතාවට හෙළි කළ යුතුද යන්න පමණක් නොවේ. ප්‍රශ්නය වන්නේ රාජ්‍ය ආයතන නිසි ලෙස කටයුතු කර තිබේ ද සහ මහජන සම්පත් ආරක්ෂා කර තිබේ ද යන්න තීරණය කිරීමට පාර්ලිමේන්තුවට ප්‍රමාණවත් තොරතුරු තිබේද යන්නයි,” ඔහු පැවසීය.

පාර්ලිමේන්තු මන්ත්‍රීවරයෙකු ලෙස මගේ වගකීම ඉටු කරනවා

2021 සහ 2022 වසරවල දී තමන් මෙම කරුණු සම්බන්ධයෙන් රාජ්‍ය ව්‍යවසාය පිළිබඳ කාරක සභාව (COPE) හමුවේ ප්‍රශ්න කළ බව ද රාසමාණික්කම් සිහිපත් කළේය. එම අවස්ථාවල දී ඇතැම් රාජ්‍ය බැංකු විසින් අයකර නොගත් ණය සම්බන්ධයෙන් සුදුසු නීතිමය ක්‍රියාමාර්ග ගෙන ඇති බව ප්‍රකාශ කළ බව ද ඔහු සඳහන් කළේ ය. කෙසේ වෙතත්, පාර්ලිමේන්තු මන්ත්‍රීවරයෙකු ලෙස තම වගකීම ඉටු කරමින් මෙම කරුණු හෙළිදරව් කිරීම සම්බන්ධයෙන් ඇතැම් බැංකු තමන්ට එරෙහිව නීතිමය ක්‍රියාමාර්ග ගන්නා බවට අනතුරු අඟවමින් ලිපි එවා තිබූ බව ද ඔහු පැවසී ය.

“මෙම කරුණු මම මතු කළේ රාජ්‍ය ආයතන සහ මහජන මුදල් සම්බන්ධයෙන් ඒවා වැදගත් වන නිසයි. රුපියල් බිලියන ගණනක ණය අයකරගෙන නොමැති නම්, එම මුදලට සිදුවූයේ කුමක්ද, වගකිවයුත්තන් කවුරුන්ද, ණය අයකර ගැනීමට ගත් ක්‍රියාමාර්ග මොනවාද සහ අවශ්‍ය නීතිමය ක්‍රියාමාර්ග ගෙන තිබේද යන්න පාර්ලිමේන්තුවට ප්‍රශ්න කිරීමට හැකි විය යුතුයි,” යනුවෙන් ඔහු පැවසී ය.

රහස්‍යභාවය පිළිබඳ කරුණ අධික ලෙස භාවිත කිරීමෙන් පාර්ලිමේන්තු අධීක්ෂණය දුර්වල නොකළ යුතු බවත්, විශේෂයෙන්ම මෙහිදී අවධානය යොමු වී ඇත්තේ මහජන සම්පත් කළමනාකරණය පිළිබඳව බවත් රාසමාණික්කම් අවධාරණය කළේ ය.

“මහජන මුදල් භාවිත කරන්නේ කෙසේද සහ රාජ්‍ය ආයතන එම සම්පත් කළමනාකරණය කරන්නේ කෙසේද යන්න දැනගැනීමට ජනතාවට අයිතියක් තිබෙනවා. ජනතා නියෝජිතයෙකු ලෙස රජයෙන් ප්‍රශ්න කිරීම, රාජ්‍ය ආයතනවලින් ප්‍රශ්න කිරීම සහ ඒවා වගවීමට ලක් කිරීමට අවශ්‍ය තොරතුරු ඉල්ලා සිටීම මගේ වගකීමක්,” යනුවෙන් ශානකියන් රාසමාණික්කම් මහතා වැඩිදුරටත් පැවසී ය.