විශේෂාංග

මම පියෙක් විදියට එකඟ නැහැ⠀

චමුදිත සමරවික්‍රම: බයියන්ට අනුව නම් 2029 ජනාධිපති වෙන්න ඉන්න නාමල් රාජපක්ෂ ගේ මාමණ්ඩි තමයි අද මගේ ඉස්සරහා මේ වාඩිවෙලා ඉන්නේ. ලංකාවේ ප්‍රකට LSR ආයතනයේ නිර්මාතෘ සහ සභාපති තිලක් වීරසිංහ මහත්මයා. හැබැයි මේ වෙලාවේ රටේ ලොකු දේශපාලන කතාබහක් නිර්මාණය වෙලා තියෙනවා. නාමල් රාජපක්ෂට එරෙහිව නඩු හබ එනකොට, හිරේ යෑමේ අවදානමක් එනකොට, එයාගේ බිරිඳ ලිමිණි වීරසිංහ සැප්තැම්බර් 12 අනුරාධපුරේ පැවැත්වෙන මහා ජනරැලියේ වේදිකාවට නගින්න යනවා කියලා. රාජපක්ෂ පවුල සාමාන්‍යයෙන් පවුලෙන් පිට කාටවත් මේ තනතුරු න්නේ නෑ. දැන් ලිමිණි තමන්ගේ සැමියා වන නාමල්වත් පස්සට දාලා දේශපාලන වේදිකාවට බහින්නද මේ සූදානම් වෙන්නේ? ඔබ මේ ගැන දන්නේ මොනවාද?⠀

තිලක් වීරසිංහ: චමුදිත, මම මේ කාරණාව ගැන බොහොම පැහැදිලිව සහ කෙළින් ම මගේ ස්ථාවරය කියන්නම්. මගේ දුව ලිමිණි මේ වෙලාවේ වේදිකාවට නගිනවා කියන කතාව සම්පූර්ණ දේශපාලන අඥානකමක්. ලිමිණිට තියෙන්නේ වේදිකාවල නැගලා දේශපාලනය කරන්න නෙවෙයි. මහින්ද මහත්තයයි නාමලුයි දේශපාලන වේදිකාවල යනවා ඇති. ඒක එයාල ගේ වැඩක්. හැබැයි මගේ දුවට මේ වෙලාවේ තියෙන ප්‍රධානම වගකීම සහ රාජකාරිය තමයි තමන්ගේ දරුවෝ දෙන්නා බලාගෙන, සැමියා වන නාමල්වත් බලාගෙන පවුල් ජීවිතය රැකගෙන ඉන්න එක. එහෙම නැතුව වේදිකාවල නැගලා කෑගහන එක නෙවෙයි. තමන්ගේ මහත්තයා පසුකරගෙන එයා දේශපාලනයට එනවා කියන කතාවට මම පියෙක් විදියට කොහෙත්ම එකඟ වෙන්නේ නෑ.

දේශපාලන පළිගැනීම් සහ අසත්‍ය මඩ ප්‍රහාර මගේ පිටින් පටවන එක සම්පූර්ණයෙන් ම අසාධාරණයි ⠀

චමුදිත සමරවික්‍රම: තිලක් මහත්තයා, මට ඔබේ ඇස් දෙක දිහා බලපුවාම පේනවා ඇස්වල ලොකු කඳුළු පිරිලා තියෙනවා. ඔබ ඉන්නේ ලොකු මානසික පීඩනයක සහ වේදනාවක. ඔබ කියන්නේ ලංකාවේ දැවැන්තම ප්‍රවාහන සහ සංචාරක වාහන පද්ධතියක් පවත්වාගෙන යන, වසර හතළිහකට වැඩි කාලයක් තිස්සේ දහඩිය මහන්සියෙන් ව්‍යාපාර ගොඩනගපු ගෞරවනීය ව්‍යාපාරිකයෙක්. ඒත් අද ඔබට සමාජයෙන් දොස් අහන්න වෙලා, හොරා කියන ලේබලය ගහලා තියෙනවා. මේ හැමදේම සිද්ධ වුණේ ඔබේ දියණිය නාමල් රාජපක්ෂට විවාහ කරලා දුන්නට පස්සේ නේද? රාජපක්ෂ පවුලට නෑකම් කියන්න ගිහින් අද ඔබට මේ වගේ අඬන්න වෙච්ච තත්ත්වයක් උදාවීම ගැන ඔබ පසුතැවෙනව ද?⠀

තිලක් වීරසිංහ: චමුදිත, මම කිසිම දෙයක් හංගන්නේ නැතුව ඇත්තම කියන්නම්. මුලින් ම මේ කසාදයට මම සම්පූර්ණයෙන් ම විරුද්ධ වුණා. මම ගෙදරදී මගේ දුව එක්කත් මේ ගැන දිගින් දිගටම සාකච්ඡා කළා. මොකද දේශපාලන පවුලකට සම්බන්ධ වුණාම සමාජයෙන් එන අතුරු විපාක සහ පීඩනය ගැන මට ලොකු අවබෝධයක් තිබුණා. නමුත් ඒ දෙන්නා කාලයක් තිස්සේ ආදරය කරලා, යාළු වෙලා තමයි විවාහ වුණේ. දරුවෝ තීරණයක් ගත්තාම දෙමව්පියෝ විදියට අපිට අන්තිමට ඒකට ආශීර්වාද කරන්න සිද්ධ වුණා. හැබැයි ඒ දෙන්නා යාළු වෙලා බැන්දා කියලා, ඒකේ තියෙන දේශපාලන පළිගැනීම් සහ අසත්‍ය මඩ ප්‍රහාර මගේ පිටින් පටවන එක සම්පූර්ණයෙන් ම අසාධාරණයි.

මට හොරා කියන එක මහා පාපයක්

චමුදිත සමරවික්‍රම: හැබැයි සමාජය එහෙම හිතන්නේ නෑනේ තිලක් මහත්තයා. සමාජ මාධ්‍යවල වගේම විපක්ෂයේ දේශපාලන වේදිකාවලත් කියන්නේ ලිමිණි සහ එයා ගේ තාත්තා වන ඔබ දෙන්න ම එකතු වෙලා ජාතික මැණික් හා ස්වර්ණාභරණ අධිකාරියේ කෝටි ගණන් වංචා කළා කියලා. නාමල් රාජපක්ෂ ගේ දේශපාලන බලය අයුතු ලෙස පාවිච්චි කරලා ඔබලා රාජ්‍ය ආයතන කොල්ලකෑවා කියලා බරපතළ චෝදනා එල්ල වෙනවා. තිලක් වීරසිංහ කියන වැදගත් ව්‍යාපාරිකයාට අද 'මාමණ්ඩි හොරා' කියලා අහගන්න සිද්ධ වෙලා තියෙන්නේ නිකන්ම නෙවෙයි නේ… ඇත්තට ම මොකක්ද මේ මැණික් හා ස්වර්ණාභරණ අධිකාරියේ කතාව? ඔබලා එතනින් අයුතු ප්‍රයෝජන ගත්ත ද?⠀

තිලක් වීරසිංහ: පිස්සුද චමුදිත! ඕවා සම්පූර්ණ අමූලික පට්ටපල් බොරු සහ දේශපාලන මඩ. මමවත් මගේ දුව ලිමිණිවත් ජාතික මැණික් හා ස්වර්ණාභරණ අධිකාරියෙන් සත පහක දෙයක් හොරකම් කරලා නෑ. මට කවදාවත් රජයේ ආයතන කොල්ලකාලා සල්ලි හොයන්න කිසිම වුවමනාවක් තිබිලා නෑ. මම ලංකාවේ ක්‍රීඩා සංචාරක ක්ෂේත්‍රය බිංදුවේ ඉඳන් දහඩිය මහන්සියෙන් ගොඩනගපු මිනිහෙක්. මිනිස්සු ක්ලබ් ගානේ ගිහින් පාටි දානකොට, විනෝද වෙනකොට මම රෑ දවල් නැතුව අවුරුදු ගාණක් දුක් මහන්සි වෙලා තමයි මේ ආයතනය හැදුවේ. මගේ දුව නාමල්ව බැන්ද පමණින් මගේ අවුරුදු හතළිහක ව්‍යාපාරික නම්බුව විනාශ කරලා මට හොරා කියන එක මහා පාපයක්.

නාමල් දේශපාලනයට එන්නත් කලින් මම මේ රටේ ස්ථාපිත ව්‍යාපාරිකයෙක් ⠀

චමුදිත සමරවික්‍රම: එතකොට අර කියන කළු සල්ලි කතාව මොකක්ද? නාමල් රාජපක්ෂගේ කළු සල්ලි සුදු කරන්නේ තිලක් වීරසිංහගේ LSR ආයතනය හරහා කියලා දිගින් දිගට ම චෝදනා එල්ල වෙනවා. ඩොලර් ලක්ෂ අටක් ගෙනත් මේස උඩ තියලා ගියා කියන කතාව, කටුනායක එයාර්පෝට් එකේ සිද්ධි, රූස් ආයතනය, CSN නාලිකාවේ මුදල් මේ හැමදේම ඔබේ සමාගම් එක්ක ගැටගැහිලා තියෙනවා නේද? ඔබ නාමල්ගේ දූෂිත මුදල් ආයෝජනය කරලා හෝටල් හැදුවා, අලුතෙන් වාහන ගත්තා කියලා එල්ල වෙන ප්‍රබල චෝදනාවට ඔබ දෙන සෘජු පිළිතුර මොකක්ද?⠀

තිලක් වීරසිංහ: මම නාමල්ගෙන් හෝ රාජපක්ෂ පවුලේ කිසිම කෙනෙක්ගෙන් සත පහක්වත් අරගෙන මගේ ව්‍යාපාර දියුණු කරලා නෑ. ඩොලර් ලක්ෂ අටක් මේසේ උඩ තියලා ගියා කියන්නේ සම්පූර්ණයෙන් ම ගොතපු ප්‍රබන්ධ කතා. මගේ LSR ආයතනයේ සියලු ම ගිණුම් වාර්තා විගණනය වෙලා තියෙන්නේ. ඕනෑම රජයක රහස් පොලිසියට හරි මූල්‍ය අපරාධ කොට්ඨාසයට හරි ඇවිත් ඕනෑම වෙලාවක මේවා පරීක්ෂා කරන්න පුළුවන්. මම රාජ්‍ය බැංකු ණය අරගෙන, ලීසිං පහසුකම් දාලා, විදේශීය සංචාරකයෝ ගෙනල්ලා තමයි මේ වත්කම් හැදුවේ. නාමල් දේශපාලනයට එන්නත් කලින් මම මේ රටේ ස්ථාපිත ව්‍යාපාරිකයෙක්. මට කාගෙවත් කළු සල්ලි සුදු කරන්න කිසිම වුවමනාවක් නෑ.

බෑනා ඇමති වුණාට මට සිද්ධ වුණේ පාඩුවක්

චමුදිත සමරවික්‍රම: හොඳයි, එතකොට ශ්‍රී ලංකා පාපන්දු සම්මේලනය සහ ක්‍රිකට් පාලක මණ්ඩලය ගැන මොකද කියන්නේ? නාමල් රාජපක්ෂ ක්‍රීඩා ඇමති වුණාට පස්සේ තමයි මේ සියලු ම ක්‍රීඩා සංගම්වලට ප්‍රවාහන පහසුකම් සහ වාහන සපයන කොන්ත්‍රාත් ඔබේ LSR ආයතනයට දුන්නේ කියලා විශාල හඬක් නැගුණා. බෑනා ක්‍රීඩා ඇමති ධුරයේ බලය අල්ලගෙන මාමණ්ඩිට ටෙන්ඩර් පටිපාටියෙන් පිට පැනලා මේ බිස්නස් ඔක්කොම ලියලා දුන්නා කියන එකට ඔබට දෙන්න තියෙන සාක්ෂිය මොකක්ද? මේක පැහැදිලිවම පවුල් පාලනයේ දූෂිත ගනුදෙනුවක් නෙවෙයිද?⠀

තිලක් වීරසිංහ: චමුදිත, මිනිස්සු ඇත්ත හොයන්නේ නැතුව තමයි මේ වගේ කතා පතුරවන්නේ. නාමල් රාජපක්ෂ ක්‍රීඩා ඇමති වෙන්න අවුරුදු ගණනාවකට කලින් ඉඳන්ම ශ්‍රී ලංකා ක්‍රිකට් ආයතනයටයි පාපන්දු සම්මේලනයටයි වාහන සැපයුවේ අපේ LSR ආයතනයෙන්. ඒක නාමල් ඇවිත් අලුතෙන් මට දීපු දෙයක් නෙමෙයි. අනිත් කාරණය තමයි, පාපන්දු සම්මේලනය අදටත් අපේ ආයතනයට ලක්ෂ ගණනාවක මුදල් ගෙවන්න තියෙනවා අවුරුදු ගාණක් තිස්සේ. ඒගොල්ලෝ ඒ ණය මුදල් තාමත් ගෙවලා නෑ. බෑනා ඇමති වුණා කියලා මට අමතර ලාභයක් ලැබුණේ නෑ, මට පාඩුයි වුණේ! ඇයි ඒ පාඩු ගැන කවුරුත් කතා කරන්නේ නැත්තේ?

මගේ වේදනාව දන්නේ මම විතරයි ⠀

චමුදිත සමරවික්‍රම: එතකොට කොවිඩ් වසංගත සමයේ සිදුවූ නිරෝධායන බස් රථ ගනුදෙනුව? මුළු රට ම ලොක්ඩවුන් කරලා මිනිස්සු අන්ත අසරණ වෙලා ගෙවල්වලට කොටුවෙලා ඉන්න වෙලාවේ, නිරෝධායන මධ්‍යස්ථානවලට මිනිස්සු අරන් යන්න නාමල්ගේ මාමණ්ඩියගේ වාහන දැම්මා කියලා විශාල චෝදනාවක් ආවා. ඒ වෙනුවෙන් රජයෙන් කෝටි ගණන් මහජන මුදල් ඔබට ගෙව්වා කියලා ප්‍රචාරය වුණා. අර්බුදය වෙලාවේ දේශපාලන හිතවත්කම් පාවිච්චි කරලා ලොකු හම්බකිරීමක් කළා නේද කියලා මිනිස්සු අහනවා. ඒකට ඔබේ පැහැදිලි කිරීම මොකක්ද?⠀

තිලක් වීරසිංහ: ඇත්තටම චමුදිත, ඒක මගේ ජීවිතේ මම ගත්ත ලොකුම අවාසනාවන්ත තීරණයක්. කොවිඩ් වෙලාවේ හමුදාවෙන් සහ සෞඛ්‍ය අංශවලින් ඉල්ලීමක් කරාම රට වෙනුවෙන් මම මගේ බස් රථ සහ වෑන් රථ ටික ඒ සේවයට දුන්නා. හැබැයි අද වෙනකම් ඒ දීපු වාහනවලට රජයෙන් සත පහක් මට ගෙවලා නෑ! අපේ රියදුරන්ට පඩි ගෙව්වේ මම. ඉන්ධන ගැහුවේ මගේ අතින් සල්ලි දාලා. අන්තිමට වාහන ටිකත් ගෙවිලා විනාශ වුණා, සල්ලිත් නෑ, මඩ ප්‍රහාරත් මගේ පිටින්. මට මේ කිසිම දේකින් ලාභයක් ලැබුණේ නෑ. ඒත් හැමෝම කියන්නේ මාමණ්ඩි කෝටි ගණන් හම්බකළා කියලා. මගේ වේදනාව දන්නේ මම විතරයි.

දුව වේදිකාවට නගිනවා කියන එක මම සම්පූර්ණයෙන් ම ප්‍රතික්ෂේප කරනවා ⠀

චමුදිත සමරවික්‍රම: දැන් ලංකාවේ දේශපාලන ඉතිහාසය දිහා බැලුවාම, එස්.ඩබ්ලිව්.ආර්.ඩී. බණ්ඩාරනායක මහත්මයා ඝාතනය වුණාම සිරිමාවෝ බණ්ඩාරනායක මැතිනිය දේශපාලන වේදිකාවට ඇවිත් අගමැති වුණා. විජය කුමාරතුංග මහත්මයා ඝාතනය වුණාම චන්ද්‍රිකා කුමාරතුංග මැතිනිය දේශපාලනයට ඇවිත් රටේ ජනාධිපති වුණා. දැන් නාමල් රාජපක්ෂට එරෙහිව නීතිය ක්‍රියාත්මක වෙලා හිරේ යන්න වුණොත්, ඒ අනුකම්පාවත් එක්ක ලිමිණි රාජපක්ෂ දේශපාලන නායිකාවක් විදියට වේදිකාවට එන එකේ මොකක්ද තියෙන වැරැද්ද? පවුල වෙනුවෙන්, සැමියා වෙනුවෙන් එයාට ඒක කරන්න බැරිද?⠀

තිලක් වීරසිංහ: ගරු සිරිමාවෝ බණ්ඩාරනායක මැතිනිය හිටපු තත්ත්වය යි, චන්ද්‍රිකා කුමාරතුංග මැතිනිය මුහුණ දුන්න ඛේදවාචකය යි මේ සිදුවීමට කොහෙත්ම සමාන කරන්න බෑ. ඒ කාලවකවානුව සහ එදා රටේ තිබිච්ච දේශපාලන වටපිටාව හාත්පසින් ම වෙනස්. නාමල් කියන්නේ පරම්පරාගත දේශපාලන පවුලකින් පැවතගෙන එන දේශපාලනඥයෙක්. එයාට එල්ල වෙන දේශපාලන ප්‍රහාර එයා තනියම මුහුණ දීලා බේරගන්න ඕනේ. ඒක එයාලගේ දේශපාලන ගනුදෙනුවක්. හැබැයි මගේ දුව ලිමිණි කියන්නේ දේශපාලනය දන්න කෙනෙක් නෙවෙයි. එයා දේශපාලන නායිකාවක් විදියට එනවා කියන එක මම කොහෙත්ම දකින්නේ නෑ, එහෙම එන්න කිසිම අවශ්‍යතාවකුත් නෑ.⠀

තිලක් වීරසිංහ (තවදුරටත් අදහස් දක්වමින්): චමුදිත, නාමල්ට දීර්ඝ කාලීන සිරදඬුවමක් ලැබුණොත් ඒක වෙනම කතාවක්. එතකොට පවුලක් විදියට මොකක්ද කරන්නේ කියලා බලන්න වෙනවා. හැබැයි නිකන් රිමාන්ඩ් වුණා කියලා දුව වේදිකාවට නගිනවා කියන එක මම සම්පූර්ණයෙන්ම ප්‍රතික්ෂේප කරනවා. දුවගේ එකම කාර්යය වෙන්න ඕනේ තමන්ගේ දරුවෝ දෙන්නාව හොඳින් හදා වඩා ගන්න එක සහ පවුල බලාගන්න එක. දේශපාලනය කියන්නේ ඉතාම කැත, කෲර සහ මඩ පිරුණු තැනක්. මගේ දරුවාව ඒ මඩ ගොහොරුවට තල්ලු කරන්න මම කවදාවත් කැමති නෑ. දුව නාමල්ව කසාද බැන්ද එකට මටයි මගේ ව්‍යාපාරවලටයි මඩ ගහන එක දැන්වත් නතර කරන්න කියලයි මම හැමෝගෙන්ම ඉල්ලන්නේ.⠀

චමුදිත සමරවික්‍රම: මෙන්න මේකයි ඇත්ත කතාව. නාමල් රාජපක්ෂගේ බිරිඳ වන ලිමිණි රාජපක්ෂගේ පියා, ප්‍රකට එල්.එස්.ආර් සමූහයේ සභාපති තිලක් වීරසිංහ මහතා අද අපේ වැඩසටහනට ඇවිත් කිසිම පැකිලීමකින් තොරව මේ සියලු චෝදනාවලට විවෘතව මුහුණ දුන්නා. තමන්ගේ දියණිය දේශපාලන වේදිකාවට පැමිණීමට එරෙහි තම දැඩි ස්ථාවරයත්, රාජපක්ෂ පවුලේ නෑදෑයෙකු වීම නිසා තමන්ගේ පෞද්ගලික ව්‍යාපාරික ජීවිතයට එල්ල වූ දරුණු මඩ ප්‍රහාර සහ සිදුවූ අලාභහානි පිළිබඳවත් ඔහු ඉතාමත් සංවේදීව හෙළිදරව් කළා. අප හා එක්වීම පිළිබඳව තිලක් වීරසිංහ මහතාට බොහොමත්ම ස්තූතියි.

මූලාශ්‍ර - Covid-19 Sri Lanka