මෙවර ජනාධිපතිවරණය සදහා ඇප මුදල් තැම්පත් කරනු ලැබූ අපේක්ෂකයන් 41 අතුරින් 35 දෙනෙකු අද (07) නාමයෝජනා භාරදී ඇති බව මැතිවරණ කොමිසම සඳහන් කරයි.
නාම යෝජනා ලබාදීමට දී තිබූ කාලය අද පෙරවරු 11.00 ට අවසන් විය.
මෙහිදී කාගේත් අවධානය යොමුවූ කරුණක් වූයේ බලයේ සිටින ජනාධිපති සිරිසේන , අග්‍රාමාත්‍ය රනිල් වික්‍රමසිංහ සහ විපක්ෂ නායක මහින්ද රාජපක්ෂ යන කිසිවෙකු මෙවර ජනාධිපතිවරණය සඳහා අපේක්ෂකත්වය නොදැරීමය.
එසේම ශ්‍රී ලංකා නිදහස් පක්ෂය සුරැකීමේ සංවිධානය නියෝජනය කරමින් ඇප මුදල් තැම්පත්කර සිටි පාර්ලිමේන්තු මන්ත්‍රී කුමාර වෙල්ගම අද නාමයෝජනා ලබාදීමට කටයුතු කර තිබුණේ නැත. ඒ බව ශ්‍රී ලංකා නිදහස් පක්ෂය සුරැකීමේ සංවිධානයේ ලේකම් නීතිඥ රජිත කොඩිතුවක්කු ද තහවුරු කර සිටියේය.
තවද මේ වන විට ජනාධිපතිවරණය සදහා නාමයෝජනා ලබාදී ඇති අපේක්ෂකයන්ට අදාළව විරෝධතා 2ක් ඉදිරිපත් කර ඇති බවත් මැතිවරණ කොමිසමේ ආරංචි මාර්ග සදහන් කරයි.