Language Switcher

V2025

ඇලෝට සහ පලිසේනට ඇප දෙනවාට නීතිපති දෙපාර්තමේන්තුවේ දැඩි විරෝධය

  පර්පෙචුවල් සමාගමේ හිමිකරු අර්ජුන් ඇලෝෂියස්  සහ එම සමාගමේ ප්‍රධාන විධායක නිලධාරී කසුන් පලිසේන  වෙනුවෙන් කර ඇති ඇප ඉල්ලීම සම්බන්ධයෙන් දැඩි විරුද්ධත්වයක්  දක්වන බව නීතිපති දෙපාර්තමේන්තුව අද (09) කොළඹ කොටුව මහේස්ත්‍රාත් ලංකා ජයරත්න මෙනවියට ලිඛිතව දැනුම්දී ඇත.

ඒ  පර්පෙචුවල් සමාගමේ හිමිකරු අර්ජුන් ඇලෝෂියස්  සහ එම සමාගමේ ප්‍රධාන විධායක නිලධාරී කසුන් පලිසේන  වෙත ඇප ලබාදෙන ලෙස කරන ලද ඉල්ලීමට අදාළව දෙපාර්ශවයට ලිඛිතව කරුණු දක්වන ලෙස කොටුව මහේස්ත්‍රාත්වරිය  පසුගියදා ලබාදුන් නියෝගයට අනුවය.

කෙසේ වුවත් දෙපාර්ශවයේ විසින් කර ඇති සියලු කරුණු සළකා බලා එම ඇප ඉල්ලීම සම්බන්ධයෙන් නියෝගය ලබන පෙබරවාරී 16 වන දා පස්වරු 2කට නිකුත් කරන බවට මහේස්ත්‍රාත්වරිය දන්වා ඇත.

වාර්තා වන ආකාරයට පර්පෙචුවල් සමාගමේ හිමිකරු අර්ජුන් ඇලෝෂියස්  සහ එම සමාගමේ ප්‍රධාන විධායක නිලධාරී කසුන් පලිසේන  වෙත මෙම නඩුවේ දී එල්ලාව ඇති චෝදනා වන්නේ  ශ්‍රී ලංකා මහ බැංකුවෙන් ලබා ගත් රහස්‍ය තොරතුරු උපයෝගී කර ගනිමින්  නීතියානුකූල නොවන ආකාරයෙන් රුපියල් කෝටී 9147 ක මුදලක් උපයා ගැනීම රජයට අලාභ කිරීම හා අනුබල දීමය.