V2025

පුවත්

හිතුමතේ බඩු මිල ඉහළ දැම්මොත් : වැඩ වරදින හැඩ - මංගල අනතුරු හඟවයි !

ඉන්ධන මිල සංශෝධනය පාදක කොට හිතුමතේට අත්‍යවශ්‍ය භාණ්ඩ හා සේවාවල මිල වැඩි කිරීමට කටයුතු කරන කූඨ වෙළෙදුන්ට එරෙහිව නීතිය තදින් ක්‍රියාත්මක කිරීමට රජය තීරණය කොට ඇත.

ඒ අනුව පාරිභෝගික අයිතීන් රැකදීම සඳහා දැනට පවතින පාරිභෝගික සේවා අධිකාරි පනතේ අඩුලුහුඬුකම් මඟහැර ශක්තිමත් ‍නව පනතක් හඳුන්වාදීමට ද රජය කටයුතු කරන බව මුදල් හා ජනමාධ්‍ය ඇමැති මංගල සමරවීර මහතා ප්‍රකාශ කළේය.

රජය ඉකුත් මැයිමස 11 වැනිදා හඳුන්වා දුන් ඉන්ධනමිල සූත්‍රය හරහා සෑම මාසයකම 10 වැනිදා මධ්‍යම රාත්‍රියේ සිට ඉන්ධන මිලෙහි වෙනස්කමක් සිදුවේ. මේ වෙනසත් සමඟ ඉන්ධන මිල හා බැඳුණු අනෙකුත් භාණ්ඩ හා සේවාවල මිල ඉහළ දැමීමට වෙළෙඳුන් කටයුතු කළහොත් ඉන් පාරිභෝගිකයා ආරක්ෂා කරගැනීමට රජයට යම් වැඩපිළිවෙළක් තිබේ දැයි මාධ්‍යවේදියකු මුදල් හා ජනමාධ්‍ය ඇමැතිවරයාගෙන් ප්‍රශ්න කෙළේය.

ඊට පිළිතුරු ලබා දුන් මංගල සමරවීර මහතා, ඇත්ත ඉතා හොඳ ප්‍රශ්නයක් ඇහැව්වේ. අපේ රටේ ඉන්ධනවල පමණක් නෙවෙයි සෑම භාණ්ඩ හා සේවාවකම මිල වැඩි කළොත් ඒ සැණින් වෙළෙඳ පොළේ මිල වැඩි කරනවා. යම් දෙයක මිල අඩුකළොත් එහි වාසිය එසැණින් පාරිභෝගික ජනතාවට ලැබෙන්නේ නැහැ.

මේ නිසා වෙළෙඳුන් තුළ සදාචාරාත්මක ගතිගුණයක් ඇති කළ යුතු වෙනවා. මිල වැඩි කළ වහාම කටයුතු කරන්නේ යම් සේද මිල අඩුකිරීමකදීත් එසේම කටයුතු කිරීමට අප ඔවුන්ව හුරු පුරුදු කළ යුතුයි.

ඊට අවශ්‍ය නීතිරීති, අණපනත් අලුතින් සකස් කිරීමට වාණිජ හා කර්මාන්ත කටයුතු ඇමැති රිෂාඩ් බදුර්දීන් මහතා ප්‍රධාන පිරිස මේ දිනවල පියවර ගනිමින් සිටිනවා යැයිද මංගල සමරවීර මහතා කීය.

භාණ්ඩයක හෝ සේවාවක හෝ මිල වැඩි කිරීමට හේතු ගණනාවක් බලපානවා. ඉන්ධන මිල පමණක් වැඩිවූ විට භාණ්ඩ හා සේවාවක මිල වැඩි කරන්නට බැහැ.

ඒ නිසා අපි ඉතා සැලකිල්ලෙන් භාණ්ඩ හා සේවාවක මිල වැඩි කරන්නට ඕනෑ. ඒ අනුව සමාජ වෙළෙඳපොළ ආර්ථික ක්‍රමය තුළ අප කිසිවකුටත් අගතියක් සිදුනොවන සාධාරණ ආකාරයටයි සියල්ල කළ යුතු වන්නේ. ඒ දේ ඉතා වගකීමෙන් රජය ඉටුකරනවා යැයිද සමරවීර මහතා පැහැදිලි කළේය.

Comment (0) Hits: 467

සෙංකෝලය උස්සන්න ගිය ප්‍රසන්න : අද  වරප්‍රසාද කමිටුව හමුවට

ඒකාබද්ධ විපක්ෂයේ පාර්ලිමේන්තු මන්ත්‍රී ප්‍රසන්න රණවීර අද (15) පාර්ලිමේන්තු වරප්‍රසාද කමිටුව හමුවට කැඳවා ඇත.

ඒ ඒකාබද්ධ විපක්ෂයේ මන්ත්‍රීවරුන් පසුගිය 3 වන අඟහරුවාදා පාර්ලිමේන්තු සභා ගැබ මැදට පැමිණ පැවැත්වූ විරෝධතාවයේදී සෙංකෝලය පැහැර ගැනීමට උත්සාහ කිරීම ඇතුළුව විනය විරෝධී හැසිරීම හේතුවෙන්ය.

මන්ත්‍රීවරයාගේ මෙම විනය විරෝධී හැසිරීම සිදුවූයේ හිටපු රාජ්‍ය ඇමතිනී විජයකලා මහේෂ්වරන් සිදුකළ ප්‍රකාශයට අදාළව පාර්ලිමේන්තුවේදී ඇති වූ උණුසුම් තත්ත්වය හමුවේය.

මේ අතර ස්ථාවර නියෝග 77 තුන වගන්තිය ප්‍රකාරව සෙංකෝලය පාර්ලිමේන්තුවේ සභා ගර්භය ඇතුළත තබා තිබෙන අවස්ථාවක එය ස්පර්ශ කිරීම හෝ එසවීම හෝ මගින් බරපතල විනය විරෝධී ක්‍රියාවක් සිදුකරනු ලබන යම් මන්ත්‍රීවරයෙකු විසින් එම වරද සිදුකරනු ලබනුයේ පළමු වරට යන කාරණය නොසලකා ඔහුගේ පාර්ලිමේන්තු සේවය සති 4 කට අත්හිටුවිය හැකි බව පාර්ලිමේන්තු ආරංචිමාර්ග පෙන්වා දෙයි.

Comment (0) Hits: 453

විශේෂ මහාධිකරණයේ පළමු නඩු විභාගය අද ! 

රාජ්‍ය මුදල් අවභාවිත කිරීම හා අල්ලස් දූෂණ හා අක්‍රමිකතා සොයා බලා නීතිය ක්‍රියාත්මක කිරීමට පිහිට වූ විශේෂ මහාධිකරණයේ පළමු නඩු විභාගය අද(16) ආරම්භවීමට නියමිත බව වාර්තා වෙයි.

ඒ යටතේ පළමු නඩු කටයුත්ත ලෙස හිටපු ජනාධිපති කාර්ය මණ්ඩල ප්‍රධානී ගාමිණි සෙනරත් හා ශ්‍රී ලංකා රක්ෂණ සංස්ථාවේ හිටපු කළමනාකාර අධ්‍යක්ෂ පියදාස කුඩබාලගේ යන අයට විරුද්ධව ගොනු කළ චෝදනා විභාග කිරීමට නියමිතය.

ශ්‍රී ලංකා රක්ෂණ සංස්ථාවේ අරමුදල් ආයෝජන ව්‍යාපෘතියක් ලෙස හයට් හෝටල් ව්‍යාපෘතියට යෙදවීමේදී සිදුවූ බව කියන මූල්‍ය අක්‍රමිකතා සම්බන්ධයෙන් මොවුන් දෙදෙනාට චෝදනා එල්ලවී ඇත.

රාජ්‍ය මුදල් අවභාවිත කිරීම හා අල්ලස් දූෂණ හා අක්‍රමිකතා සොයා බලා නීතිය ක්‍රියාත්මක කිරීමට පිහිටවූ විශේෂ මහාධිකරණයේ ත්‍රිපුද්ගල විනිසුරු මඩුල්ලට , මහාධිකරණ විනිසුරුවරුන් වන සම්පත් අබේකෝන් , සම්පත් විජේරත්න යන මහත්වරුන් හා චම්පා ජානකී රාජරත්න  ඇතුළත් ය.

Comment (0) Hits: 557

මරණ දඬුවම ගැන පාර්ලිමේන්තු විවාදයක් !

මත්ද්‍රව්‍ය ජාවාරම ඇතුළුව බන්ධනාගාරගතව  සිට අපරාධ මෙහෙයවන පුද්ගලයන්ට මරණීය දඬුවම ක්‍රියාත්මක කිරිමට ගෙන ඇති තීරණය සම්බන්ධයෙන් පාර්ලිමේන්තු විවාදයක් පවත්වන්නැයි අගමැතිවරයාගෙන් ඉල්ලීමක් කිරිමට එක්සත් ජාතික පක්ෂයේ පාර්ලිමේන්තු මන්ත්‍රීවරුන් තීරණය කර තිබෙන බව වාර්තා වෙයි.

මේ පිළිබඳ අදහස් දක්වන එජාප පාර්ලිමේන්තු මන්ත්‍රී මුජිබර් රහුමාන් සඳහන්කර සිටින්නේ එල්ලුම්ගහ නැවත  ක්‍රියාත්මක කිරිමට ගෙන ඇති තීරණය සම්බන්ධයෙන් සමාජයේ ලොකු කතාබහක්  ඇතිවී තිබෙන හෙයින් මේ පිළිබඳ පාර්ලිමේන්තු විවාදයක් පැවැත්වීම කාලෝචිත බවය.

එබැවින් එල්ලුම්ගහ ක්‍රියාත්මක කිරිමට ප්‍රථම ඒ ගැන පාර්ලිමේන්තුවේ අදහස‍් ද දැනගැනීම වැදගත් බව පෙන්වා දෙන රහුමාන් මන්ත්‍රීවරයා බන්ධනාගාරගතව සිටින මැදිහත්කාර අපරාධ කරුවන්ට පමණක් නොව ඔවුන්ට සහය දෙන බන්ධනාගාර ජේලර්වරුන් ඇතුළු පිරිස් වෙතද දැඩි දඬුවම් ලබාදිය යුතු බවද සඳහන් කරයි.

Comment (0) Hits: 443

ඩො.මි 7.6ට මහින්ද විකුනුණු හැටි : පාර්ලිමේන්තුවේ ඔප්පු කරනවා - අනුර 

චීන සමාගමක් විසින් හිටපු ජනාධිපති මහින්ද රාජපක්ෂ මහතාට ලබාදුන් ඩොලර් මිලියන 7.6 ක  මුදල පිළිබදව සියළු විස්තර ලබන සතියේ පාර්ලිමේන්තුවේදී  හෙළි කරන බව ජනතා විමුක්ති පෙරමුණ පවසයි.

මහරගම ප්‍රදේශයේ පැවති සම්මත්‍රණයකට එක්වෙමින් අනුර කුමාර දිසානායක මන්ත්‍රීරවරයා මේ බව සඳහන් කළ අතර   හුවමාරු වුණ චෙක්පත් මුදල් මාරු කරපු පුද්ගලයින් ඇතුළු  සියල්ල එහිදී  හෙළිදරව් කරන්න බලාපොරොත්තු වන බවද පැවසීය. 

අද අපේ රටේ නායකයින් වෙනත් රටවල් විසින් මිලට ගන්න තත්වයට පත්වෙලා තිබෙන බවත් ඒ නිසාම  රට අද ආර්ථික අතින් බෙලහීනතාවයට පත්ව ඇති බවද මන්ත්‍රීවරයා පැවසීය.

එහිදී වැඩිදුරටත් අදහස් දැක්වූ මන්ත්‍රීවරයා,

හිටපු ජනාධිපතිවරයා ඩොලර් මිලියන 7.6කට චීන සමාගමක් විසින් මිලදී අරගෙන තිබෙනවා. ඒ බව ඔහු ප්‍රතික්ෂේප කර නොමැති නිසා අද අපේ රට ස්වාධීන රටක් නොවෙයි. චීන සමාගමකට අපේ රටේ නායකයන් මිලට ගන්න පුළුවන් නම් අපේ රට ස්වාධීන රටක්ද? රටේ ජාතික සම්පත් රටේ වුවමනාවට මෙහෙයවනවා වෙනුවට බහුජාතික සමාගම්වලට අනුව හසුරුවන රාජ්‍යයක්. වෙළඳ ගිවිසුම්, බහුජාතික සමාගම්වල වුවමනාවට ගොඩනැගෙනවා. බදු පනත් ජාත්‍යන්තර මූල්‍ය අරමුදලේ වට්ටෝරු අනුව සකස් වෙනවා. ආර්ථික වශයෙන් දේශපාලන වශයෙන් පරාධීන රාජ්‍යයකට නිදසක් කොහෙද? 

ඒ වගේම ව්‍යාජ දේශප්‍රේමය පරාජය කළ යුතුව තිබෙනවා. ඒ නිසා නැවත අපේ රට ආර්ථිකයේ දේශපාලනයේ සංස්කෘතියේ ස්වාධීනත්වය වෙනුවෙන් අරලයක් තිබෙනවා. යැයිද සඳහන් කර ඇත.

Comment (0) Hits: 471

පලිබෝධනාශක රෙජිස්ට්‍රාර්ට : ඇමති කොක්කක් !

කැබිනට් තීන්දුවලට පරිබාහිරව තමන්ගේ හිතූමනාපයට ග්ලයිෆෝසේට් තහනම ඉවත් කිරීමට පලිබෝධනාශක රෙජිස්ට්‍රාර්වරයාට කිසිදු හැකියාවක් නැති බව සෞඛ්‍ය අමාත්‍ය රාජිත සේනාරත්න සඳහන් කරයි.
 
නිවේදනයක් නිකුත් කරමින් අමාත්‍යවරයා මේ බව සඳහන් කරන අතර 2015 වසරේදී සියළුම භෝග සඳහා පනවා තිබූ මෙම තහනම 2017 වසරේදී වැවිලි කර්මාන්ත අමාත්‍යවරයා විසින් තේ සහ රබර් යන භෝග සඳහා පමණක් අමාත්‍ය මණ්ඩල අනුමැතියක් ඇතිව ඉවත් කරන ලද නමුත් පලිබෝධනාශක රෙජිස්ට්‍රාර්වරයා විසින් පසුගිය 11(ජූලි මස) වෙනිදා නිකුත් කර ඇති ගැසට් නිවේදනයක් මගින් සියළුම භෝග සඳහා පනවා තිබූ ග්ලයිෆෝසේට් තහනම ඉවත් කර ඇති බවට මාධ්‍ය විසින් වාර්ථා කර තිබෙන බවද අමාත්‍යවරයා සඳහන් කරයි.
 
කැබිනට් අනුමැතිය හිමිව ඇත්තේ තේ සහ රබර් යන භෝග සඳහා පමණක් ග්ලයිෆෝසේට්  තහනම ඉවත් කිරීමට මිස අනෙක් සියළුම භෝග සඳහා වන තහනම ඉවත් කරන්නට නොවන බව පෙන්වාදෙන  සෞඛ්‍ය අමාත්‍යවරයා  කිසිම නිලධාරියෙකුට කැබිනට් තීරණ වලට පිටින් කටයුතු කල නොහැකි බවට සෞඛ්‍ය අමාත්‍යවරයා අවධාරණය කර සිටියි.

අලුත් ගැසට් පත්‍රයක් අද (16) - අමරවීර 

මේ අතර කෘෂිකර්ම අමාත්‍යවරයා සඳහන් කර සිටින්නේ සියලු බෝග සඳහා ග්ලයිෆෝසේට් භාවිතයට ලබාදුන් අවසරය  සඳුදා(16) දින වන විට යළි තේ සහ රබර් සඳහා පමණක් සීමා කර ගැසට් පත්‍රයක් නිකුත් කරන බවය.

මෙහිදී වැඩිදුරටත් අදහස් දක්වමින් අමාත්‍යවරයා මෙසේ පැවසීය.

 '' ග්ලයිෆෝසේට් තහනම ඉවත්කිරීම සම්බන්ධයෙන් විද්වත් කමිටුවක් පත්කලා ඒ කමිටුවේ තීන්දුවක් අනුව ග්ලයිෆෝසේට් තහනම ඉවත්කරලා ගැසට් පත්‍රයක් පලකරලා තියෙනවා.

නමුත් සඳුදා වන විට නැවත නැවත ගැසට් පත්‍රයක් පල වෙනවා තේ සහ රබර් හැර අනෙකුත් බෝග සඳහා ග්ලයිෆෝසේට් තහනම තවදුරටත් පැවැත්වෙන ආකාරයට.  ඒ තුළින් තේ සහ රබර් වගා කරන අයට පමණක් කෘෂිකර්ම අමාත්‍යංශයේ නිර්දේශ මත අවසර ලබා දෙනවා.

මේ සම්බන්ධයෙන් තේ සහ රබර්  වගා කරන අයගෙන් දැඩි ලෙස ඉල්ලීමක් තිබුනා, මේ තහනම ඉවත් කරන්න කියලා විශේෂයෙන්ම මේ නිසා රබර් කර්මාන්තයටද බලපෑමක් ඇතිවූ බව ඒ අනුව විද්වත් කමිටුවකින් ආපු නිර්දේශ මත එම බෝග දෙකට තහනම ඉවත් කරන්න කටයුතු කල බව ද අමාත්‍යවරයා පෙන්වා දුන්නේය.

එමෙන්ම මේ සඳහා විරුද්ධ වුනු පාර්ශවයන්ද තේ කාර්මාන්තය ග්ලයිෆෝසේට් නැතිව කරගෙන යා නොහැකි බව වටහා ගෙන ඇති බවත්  ඒ නිසා ඒ අයගෙන් මේ සඳහා විරෝධතාවයන් මතු නොවන බවද අමාත්‍යවරයා කියා පවසයි.


Comment (0) Hits: 470

පිළිතුරක් නිසා මාධ්‍යවේදීන්ට පරණ මහින්ද සිහිවෙයි !

ජනපතිවරණයට ශිරන්ති රාජපක්ෂ මහත්මිය ඉදිරිපත් කරන බවට පළ වන මාධ්‍ය වාර්තා සම්බන්ධයෙන් මාධ්‍යවේදීන් නැගූ පැනයට හිටපු ජනපති මහින්ද රාජපක්ෂ ලබාදුන් පිළිතුරේ ස්වභාවය අනුව තම පාලන සමය තුළ සිටි මාධ්‍ය බියගන්වා නිහඬ කළ  ජනාධිපති  මහින්ද  සිහිවූ බව මාධ්‍යවේදීන් සඳහන් කරයි.

එහිදී අදාළ ප්‍රශ්නයට පිළිතුරු දෙමින් හිටපු ජනාධිපති සඳහන් කර ඇත්තේ ” පිස්සු පිස්සු කතා කරන්න එපා…”යනුවෙන්ය.

මාධ්‍ය වාර්තා පළවූ සිදුවීමක් සම්බන්ධව මෙවැනි පිළිතුරක් තමන් කොහෙත්ම අපේක්ෂා නොකළ බවත් පිළිතුර ලබාදුන් ආකාරයෙන්   පාලන බලය නොමැති පසුබිමක ඔහුට මෙතරම් කේන්තියක් යනවා නම් නැවත බලය ලැබුණහොත් කෙසේ කටයුතු කරනු ඇතිදැයි සාධාරණ බියක් තමන්ට දැනුණු බවද ඔවුන් සඳහන් කරයි.

මෙම සංවාදය හිටපු ජනාධිපතිවරයා සහ මාධ්‍යවේදීන් අතර ඇතිවූයේ "හෙට දිනයේ පළමු නඩු කටයුත්ත විභාගයට ගැනෙන විශේෂ අධිකරණය පිහිටුවා ඇත්තේ, දේශපාලනික අවශ්‍යතාව මත බව" හිටපු ජනාධිපති මහින්ද රාජපක්ෂ පැවසූ අවස්ථාවේය.

ඒ  අද (15) පිළියන්දලදී ශ්‍රී විද්‍යාශාන්ති මහා පිරිවෙන් විහාරස්ථානයේ ඉදිකිරීම් කටයුතු නිරීක්ෂණය කිරීමෙන් පසු මාධ්‍යවේදියෙකු නැගූ ප්‍රශ්නයකට පිළිතුරු ලෙසය. 

මෙහිදී මාධ්‍යවේදීන් තවදුරටත් හිටපු ජනපතිවරයාගෙන් ඉදිරි ජනාධිපතිවරණ අපේක්ෂකයා සම්බන්ධයෙන් ප්‍රශ්න කර සිටියේ ය.

මාධ්‍යවේදියා : ඔබතුමා හරි වැරදියි

හිටපු ජනපති : මොකක්ද?

මාධ්‍යවේදියා : ලොකු හාමුදුරුවෝ දන්නවා හරියටම ඊළඟ ට ඉදිරිපත් වෙන්නේ කවු ද කියලා.ගෝඨාභය රාජපක්ෂ මහත්තයා ආවාම කරගන්නවා කිව්වා.ඇයි ඔබතුමා හාමුදුරුවන්ට කිව්වේ හොරෙන් අපිට කියන්නේ නැතුව?

හිටපු ජනපති : නෑ මන් කාටවත්ම ඒවා තාම කිව්වේ නෑ හාමුදුරුවන්ට කිව්වේත් නෑ

මාධ්‍යවේදියා : හාමුදුරුවෝ කිව්වානේ ගෝඨාභය මහත්තයා ආවාම අපි මේක කරගන්නවා කියලා?

හිටපු ජනපති : මම ආවාම ගෝඨාභය මහත්තයාට කරන්න පුළුවන්නේ වැඩ.

මාධ්‍යවේදියා :ආ එහෙම එකකුත් තියනවා ?

හිටපු ජනපති : එහෙම එකකුත් තියනවා.

මාධ්‍යවේදියා : නෑ නෑ නෑ මාධ්‍ය වාර්ථා පලකළා මහත්මිය ජනාධිපතිවරයට ඉදිරිපත් වෙනවා කියලා

මෙහිදී ඉදිරි ජනපතිවරණයට ශිරන්ති රාජපක්ෂ මහත්මිය ඉදිරිපත් කරන බවට පළ වන මාධ්‍ය වාර්තා සම්බන්ධයෙන් මාධ්‍ය වේදීන් නැගූ පැනයට හිටපු ජනපති ලබා දුන්නේ මෙවන් පිළිතුරුකි.

” පිස්සු පිස්සු කතා කරන්න එපා…”

Comment (0) Hits: 531

හමුදාපතිගෙන් විශේෂ නිවේදනයක් 

ශ්‍රී ලංකා යුද්ධ හමුදාව කිසිසේත්ම ජාතික ආරක්ෂාවට තර්ජනයක් වන අයුරින් කටයුතු නොකරන බව යුද හමුදාපති ලුතිනන් ජනරාල් මහේෂ් සේනානායක අවධාරණය කරයි.

නිවේදනයක් නිකුත් කරමින් හමුදාපතිවරයා මේ බව අවධාරණය කරන අතර වගකිව යුතු හමුදාවක් ලෙස කිසිදු හමුදා කඳවුරක් වසා දැමීම ක්‍රියා නොකරනු ඇති බවද  එහි සඳහන් කර ඇත.

 යුද හමුදාව විසින් රටේ ඉදිරිගමන සාර්ථක කරගැනීම සඳහා සිදුකරනු ලබන සේවා සැපයුම් පිළිබද ඇතැම් අවස්ථාවාදි දේශපාලනඥයන් සහ මාධ්‍ය නොයෙකුත් අසත්‍ය මෙන්ම ද්වේෂසහගත තොරතුරු ජනතාවට ඉදිරිපත් කරන බවද එම නිවේදනයේ දක්වා ඇත.

පාලනමය රාජකාරි සදහා යොදවා සිටින භට පිරිස් ඉන් මුදවා ඔවුන් වැඩි ප්‍රතිඵලයක් ලැබෙන පරිදි ක්ෂේත්‍ර රාජකාරි සදහා යෙදවීම යුද හමුදාව නිරන්තරයෙන් කළ කාර්යයක් බවත් එමගින් යුද හමුදාවේ කාර්යක්ෂමතාව දෙගුණයකින් පමණ වැඩි බවත් යුද හමුදාපතිවරයා සිය නිවේදනයේ වැඩිදුරටත් දක්වා ඇත.

එය බළඇණි වසා දැමීමත් නොව බලඇණි යටපත් කිරිමක් පමණක් වන අතර එම බල ඇණි වල මානව හා භෞතික සම්පත් අනෙකුත් බල ඇණි අතර සමානුපාතිකව බෙදාහැරෙන බවද එහි දැක්වේ.

Comment (0) Hits: 476

ගම්පෙරළිය හා එන්ටර්ප්‍රයිස් ශ්‍රී ලංකා : ගමේ ආර්ථිකය ශක්තිමත් කරනවා - අගමැති 

ගම්පෙරළිය හා එන්ටර්ප්‍රයිස් ශ්‍රී ලංකා වැඩසටහන මගින් ග්‍රාමීය ජනතාවගේ අතට වැඩිපුර මුදල් ලැබෙන බවත්  ඒ හරහා ග්‍රාමීය ප්‍රදේශවල මුදල් පරිහරණය වැඩිවී යටිතල පහසුකම් මෙන්ම ගමේ ආර්ථිකය ශක්තිමත් කරන බව  අග්‍රාමාත්‍ය රනිල් වික්‍රමසිංහ පවසයි.

අද (15) නිකවැරටියේ පැවති ගම්පෙරළිය වැඩසටහනේ සමාරම්භක උත්සවය අමතමින් අග්‍රාමාත්‍යවරයා මේ බව සඳහන් කර සිටියේය.

නව සංවර්ධනය ක්‍රියාදාමය යටතේ ග්‍රාමීය ප්‍රදේශවල වැව්, අමුණු ප්‍රතිසංස්කරණය හා මංමාවත් ඉදිකිරීම ඇතුළු සෙසු සංවර්ධන කටයුතු ඉටු කරලීමේ වගකීම් ප්‍රදේශයේම ජීවත්වන අයට ලැබෙන බවත් ඒ හරහා ද ගමට විශාල මුදල් ප්‍රමාණයක් ලැබෙන බවත් අග්‍රාමාත්‍යවරයා  සඳහන් කළේය.

ගම්පෙරළිය වැඩසටහනේ සමාරම්භක උත්සවය නිකවැරටිය, මඩත්ත වැව තාවුල්ලේදී අද ආරම්භ කළ අතර, එහිදී මඩත්ත වැව ප්‍රතිසංස්කරණය කිරීමේ කටයුතු ද ආරම්භ කරනු ලැබීය.

එන්ටර්ප්‍රයිස් ශ්‍රී ලංකා වැඩසටහන යටතේ ණය ලබාදීම සඳහා නිකවැරටිය නගරයේ ලංකා බැංකුව හා මහජන බැංකු දෙකෙහි නව කාර්යාල දෙකක් අග්‍රාමාත්‍යවරයාගේ ප්‍රධානත්වයෙන් විවෘත කෙරුණු අතර, ණය ඉල්ලූම්කරුවන්ට සංකේතාත්මකව ණය ලබාදීම ද මෙහිදී සිදු කෙරිණි.

මීට අමතරව එන්ටර්ප්‍රයිස් ශ්‍රී ලංකා වැඩසටහන පිළිබඳව ජනතාව දැනුවත් කිරීමේ රැස්වීමක් ද අග්‍රාමාත්‍ය රනිල් වික්‍රමසිංහගේ ප්‍රධානත්වයෙන් නිකවැරටිය බස් නැවතුම්පොළේදී අද පැවැත්විණි.

ගම්පෙරළිය වැඩසටහන ආරම්භ කිරීමේ උත්සව සභාව අමතා තවදුරටත් අදහස් දැක්වූ අග්‍රාමාත්‍ය රනිල් වික්‍රමසිංහ මහතා මෙසේ ද කීය.

අද අප ආරම්භ කරන ගම්පෙරළිය හා එන්ටර්ප්‍රයිස් ශ්‍රී ලංකා වැඩසටහන් නිකවැරටියට පමණක් සීමා වන්නේ නැහැ. මේ වැඩසටහන් ලංකාවේ සෑම ගමකටම ගෙන යෑමට අප සැලසුම් කර තිබෙනවා. මෙය අප ආර්ථික වැඩපිළිවෙලේ දෙවන අදියර බව කිව යුතුයි.

මේ වැඩසටහන් තුලින් අප උත්සාහ ගන්නේ ග්‍රාමීය ප්‍රදේශ නඟාසිටුවීමටයි. මෙලෙස ග්‍රාමීය ප්‍රදේශ සංවර්ධනය කිරීමේ වැඩපිළිවෙළ ගමේ ජනතාව විසින්ම දියත් කළ යුතුයි. මේ ප්‍රදේශවල මංමාවත්, වැව්, අමුණු හා අනෙකුත් සංවර්ධන කටයුතු පිටස්තර කොන්ත්‍රාත්කරුවන්ට ලබාදෙන්නේ නැහැ. ඒවා ගමේ අය විසින්ම සිදු කළ යුතුයි. ඒ හරහා විශාල මුදල් ප්‍රමාණයක් ගමට ලැබෙනවා.

ව්‍යාපාරයක් ආරම්භ කරන්න -  ව්‍යාපාරය වැඩි දියුණු කරගන්න : එන්ටර්ප්‍රයිස් ශ්‍රී ලංකා විවෘතයි විවෘතයි !

එන්ටර්ප්‍රයිස් ශ්‍රී ලංකා වැඩසටහන යටතේ ග්‍රාමීය ව්‍යාපාරිකයන්ට තම ව්‍යාපාර කටයුතු දියුණු කර ගැනීම සඳහා රාජ්‍ය බැංකු මගින් ණය යෝජනා ක්‍රම සකස් කර තිබෙනවා. ඕනෑම අයෙකුට ව්‍යාපාරයක් ආරම්භ කිරීමට හෝ පවත්නා ව්‍යාපාරය වැඩිදියුණු කර ගැනීම සඳහා ණය ලබාගත හැකියි.

ගම්පෙරළිය හා එන්ටර්ප්‍රයිස් ශ්‍රී ලංකා වැඩසටහන මගින් ග්‍රාමීය ජනතාව අතට වැඩිපුර මුදල් ලැබෙනවා. එමගින් ගමේ මුදල් පරිහරණය ද වැඩි වෙනවා. එමෙන්ම ගමේ ආර්ථිකය ශක්තිමත් වෙනවා. ඒ හරහා ගමේ යටිතල පහසුකම් දියුණු වෙන බව කිව යුතුයි.

ගම්පෙරළියේ ජාවාරම්කාරයන්ට කිසිවක් නෑ 

මීට පෙර ග්‍රාමීය ප්‍රදේශවල වැව් අමුණු ප්‍රතිසංස්කරණය කිරීමේදී එම වැව්වල තිබුණ වැලි හා රොන් මඩ ව්‍යාපාරිකයින් විසින් ඩැහැගත්තත් ගම්පෙරළිය වැඩසටහන යටතේ එම සම්පත් සියල්ල ගමේ ගොවි සංවිධානයට ලබාදීමට අප තීරණය කර තිබෙනවා. එමගින් ගොවි සංවිධානයේ අරමුදල ශක්තිමත් කර ගත හැකියි. එම කටයුතුවලට අදාළ නව නීතියක් ද ගෙන ඒමට අප බලාපොරොත්තු වෙනවා.

මෙම අවස්ථාවට එක්සත් ජාතික පක්‍ෂයේ මහලේකම් සහ අධ්‍යාපාන අමාත්‍ය අකිල විරාජ් කාරියවසම්, ජනමාධ්‍ය හා මුදල් අමාත්‍ය මංගල සමරවීර, මුදල් රාජ්‍ය අමාත්‍ය ඉරාන් වික්‍රමරත්න, ස්වදේශ කටයුතු නියෝජ්‍ය අමාත්‍ය ජේ.සී. අලවතුවල, වයඹ සංවර්ධන අමාත්‍ය එස්.බී. නාවින්න, ප්‍රවාහන හා සිවිල් ගුවන් සේවා නියෝජ්‍ය අමාත්‍ය අශෝක අබේසිංහ, රාජ්‍ය පරිපාලන හා කළමනාකරණ සහ නීතිය හා සාමය පිළිබඳ අමාත්‍ය නලින් බණ්ඩාර, මුදල් අමාත්‍යංශයේ ලේකම් ආචාර්ය අයි.එන්. සමරතුංග යන මහත්වරුන් ප්‍රමුඛ දේශපාලනඥයින් හා රාජ්‍ය නිලධාරීන් රැසක් මේ අවස්ථාවට සහභාගීව සිටියහ.

Comment (0) Hits: 865

ග්ලයිෆෝසේට් තහනම ඉවතට !

ග්ලයිෆෝසේට් තහනම මුළුමනින්ම ඉවත් කිරීමට රජය කටයුතු කර ඇති බව වාර්තා වෙයි.

පළිබෝධනාශක රෙජිස්ටාර්වරයා විසින්  ජූලි 11 වන දින  නිකුත් කරන ලද ගැසට් පත්‍රයකින් සියළුම බෝග සදහා රට පුරාම බලපවත්වන පරිදි මෙම තහනම ඉවත් කර ඇත.

මීට පෙර නවීන් දිසානායක වැවිලි කර්මාන්ත ඇමතිවරයා 2017 වසරේදී ගැසට් පත‍්‍රයකින් ග්ලයිපොසේට් තහනම ඉවත් කරන ලද්දේ තේ සහ රබර් සඳහා පමණකි.

ඒ අනුව පසුගිය 11 වනදා නිකුත් කළ ගැසට් පත්‍රය පහත දැක්වේ.

Comment (0) Hits: 449

ඉහළම කුඩු බිස්නස්කාරයන් ඉන්න තැන් ගැන මංගලගෙන් ඔත්තුවක් (වීඩියෝ)

"මම මරණ දඬුවමට එදත් විරුද්ධයි අදත් විරුද්ධයි. මොකද මරන දඬුවම තියෙන කිසිම රටක අපරාධ අඩුවෙලා නැහැ. ඒක ඔප්පු කරන්න පුළුවන්. උදාහරණයක් හැටියට ඇමරිකා එක්සත් ජනපදයේ සමහර ප්‍රාන්තවල මරණ දඬුවම තවමත් ක්‍රියාත්මක වෙනවා. ඒ ප්‍රාන්තවල තමයි ගොඩක් වෙලාවට වැඩි අපරාධ වැඩි මිනීමැරුම් තියෙන්නේ" මුදල් හා ජනමාධ්‍ය අමාත්‍ය මංගල සමරවීර සඳහන් කරයි.

අමාත්‍යවරයා මේ අදහස් දක්වා සිටින්නේ  මත්ද්‍රව්‍ය ජාවාරම් මර්දනය කිරීමට අදාළව මරණ දඬුවම ලබාදිය යුතු බවට අමාත්‍ය මණ්ඩලය සහ සමාජයේ ඇතැම් පිරිස් දක්වන අදහසට ප්‍රතිචාර දක්වමින්ය. 

ඒ පිළිබඳ වැඩිදුරටත් අදහස් දක්වන අමාත්‍යවරයා,

"මම කියන්නේ මේ කුඩු තර්ජනය සැහැල්ලුවට ගන්න පුළුවන් එකක් නෙවෙයි. මේක සම්පූර්ණ තරුණ පරම්පරාවට බලපානවා. නමුත් මෙතනදි අපි කුඩුවලට ඇබ්බැහිවන තරුණයනුත් මේ රටට කුඩු ගෙන්වන මහා මුදලාලිවරුනුත් එක ගොඩට දාලා බලන්න බැහැ. 

ඇත්ත වශයෙන්ම කුඩුවලට ඇබ්බැහිවන තරුණයන්ගෙන් හිරගෙවල් පිරෙව්වයි කියලා මේ ප්‍රශ්නයට විසඳුම් ලැබෙන්නේ නැහැ. ඒ අයව පුනරුත්ථාපනය (Rehabilitation) කරන්න ඕනේ. රටේ තව තවත් (Rehabilitation Centers) ඇති කරන්න ඕනේ තව තවත් අර අහිංසක තරුණයන් විවිධ ප්‍රශ්න නිසා ඇබ්බැහිවෙන ඒ අහින්සකයන්ට. නමුත් අර ඉන්න මහ මහ උන් ටික අල්ලන්න පුළුවන්ද මම මේ අවන්කවම අහන්නේ? ඔය ඉන්න මහ උන් ටික මරණ දඬුවම ගෙනාවත් අල්ලන්න පුළුවන්ද? 

"සාමාන්‍යයෙන් පොලිස් නිලධාරියා, ජූරියයි, විනිශ්චයකාරතුමයි, මිනී මරණ කෙනයි ඔය ඔක්කොම එකක් වෙන අවස්ථා තියෙන රටක මරණ දඬුවමෙන් ඔය කියන මහා පරිමානයේ කුඩු කාරයෝ අල්ලන්න පුළුවන් නම් හොඳයි. නමුත් මම නම් කියන්නේ කිසිම මිනීමැරුමකට වුණත් මරණ දඬුමට එකඟ නැහැ. නමුත් අනිත් පැත්තෙන් මම කියනවා මරණ දඬුවමට වඩා ශක්තිමත් අපරාධකාරයෙක්ම නොමරා මරන්න ඕනේ. ජීවත් වෙමින් සිටියදී මරන්න ඕනේ දිනපතාම. ඒක කරන්න වෙන්නේ එකම විදිහයි. ජීවිතාන්තය දක්වා සිර දඬුවම් දුන්නොත්, ජීවිතාන්තය දක්වාම සිර දඬුවම් විඳින්න ඕනේ. එහම නැත්නම් සල්ලි තියෙනවා නම් හිරගෙදර ඉස්පිරිතාලෙ ඉඳලා අවුරුදු පහක් දහයක් ඉඳලා එන එක නෙවෙයි. මිනීමරණවට වඩා හොඳයි මේ රටේ නීතිය ක්‍රියාත්මක කරන්න ඕනේ. මේ රටේ නීතිය තිතට ක්‍රියාත්මක කරන්න ඒක තමයි මේ ප්‍රශ්නෙට තියෙන නියම විසඳුම. හැබැයි එසේ කියලා මුළු කැබිනට් මණ්ඩලයම මේකට එකඟ වුණා. මම විරුද්ධ වුණත් පොදු තීන්දුවක් තියෙනවා.

ඔවුන් අල්ලගන්න හැම මත්ද්‍රව්‍ය ජාවාරම් කරන ප්‍රධාන කට්ටිය බන්ධනාගාරය තුළ ඉඳගෙනම තමයි මේවා මෙහෙයවන්නේ!

වෙන්න ඇති. හැබැයි මෙහෙම දෙයක් තියෙනවා. බන්ධනාගාරය තුළ ඉඳන් මෙහෙයවනවානම් ඔක්කොටම ඉස්සෙල්ලා අල්ලගන්න ඕනේ ජේලර්ල ටික. එගොල්ලන්ට දෙන්නේ කවුද? කොහෙන්ද එහෙම තත්වයක් ඇති වෙන්නේ. ඒක නිසා දඬුවම් කරන්න ඕනෙ තැනට දඬුවම් කරල ඉන්න ඕනේ.

එතකොට ඇයි මේක වෙන්නේ නැත්තේ?

හරි වෙන්නේ නැත්තේ ඇයි කියලා මම තව ඇත්තක් කියන්නම්. ඔය බන්ධනාගාරය ඇතුලේ ඉන්නේ දෙවෙනි පෙළේ කුඩු බිස්නස් කාරයෝ. මේ රටේ පළවෙනි පෙළේ ඉන්න කුඩු බිස්නස් කාරයෝ ටික කොහෙවත් නෙවෙයි ඉන්නේ හොඳ හොඳ ලයන්ස් ක්ලබ්වල, රෝට්රි ක්ලබ්වල, බෞද්ධ සංවිධානවල සභාපතිවරු හැටියට ප්‍රධාන උපාසක උපාසිකාවන් හැටියටයි ඒ අය ඉන්නේ. මම මේ දන්න නිසා කියන්නේ.

Comment (0) Hits: 458

නව ව්‍යවස්ථාවේ දළ කෙටුම්පත : දින තුනකින් මෙහෙයුම් කමිටුවට 

නව ආණ්ඩුක්‍රම ව්‍යාවස්ථාව පිළිබඳ දළ කෙටුම්පතක් ලබන බදාදා (18) රැස්වන ආණ්ඩුක්‍රම ව්‍යවස්ථා මෙහෙයුම් කමිටුවට භාරදීමට නියමිත බව වාර්තාවේ.

මෙහෙයුම් කමිටුවේ අවසාන ව්‍යාවස්ථා කෙටුම්පත සම්බන්ධයෙන් වන මෙහෙයුම් කමිටු සාමාජිකයන්ගේ සාකච්ඡාවලට පාදක කර ගත හැකිවන පරිදි මෙම ‘දළ ව්‍යාවස්ථා කෙටුම්පත’ සකස් කරනු ලබන්නේ නව ව්‍යාවස්ථාව පිළිබඳව විශේෂඥ මණ්ඩලය විසිනි.

පාර්ලිමේන්තුවට ඉදිරිපත් කළ මෙහෙයුම් කමිටු අතුරු වාර්තාව හා අනු කමිටු වාර්තා පදනම් කරගෙන මෙම දළ කෙටුම්පත සකසන බව වාර්තා වේ.

විවිධ පක්ෂ ඊට දැක්වූ වෙනස් අදහස් පිළිබඳ සටහනක්ද මෙම කෙටුම්පතට ඇතුළත්වේ.

මෙහෙයුම් කමිටුවේ අතුරු වාර්තාව සහ අනුකමිටු හයේ වාර්තා මත පදනම් වූ දළ කෙටුම්පතක් ඉදිරි සතියේ භාරදීමට කටයුතු කරන බව ආණ්ඩුක්‍රම ව්‍යවස්ථා මෙහෙයුම් කමිටුවේ සාමාජික පාර්ලිමේන්තු මන්ත්‍රී ආචාර්ය ජයම්පති වික්‍රමරත්න මහතා පවසයි.

මෙම දළ කෙටුම්පත නව ආණ්ඩුක්‍රම ව්‍යවස්ථාව පිළිබද ඉදිරි සාකච්ඡා සදහා පාදක කර ගන්නා ලියවිල්ලක් පමණක් වන බව පාර්ලිමේන්තු මන්ත්‍රී ආචාර්ය ජයම්පති වික්‍රමරත්න  වැඩිදුරටත් පවසයි.

Comment (0) Hits: 494

ශ්‍රීලනිප මහ ලේකම් වෙන්න : දයාසිරි අලුත් සූට් මහයි !

තමන්ට ශ‍්‍රීලනිප මහ ලේකම් ධූරය ලැබුණහොත්  නැවතත් පක්‍ෂය ශක්තිමත් කරන බව පාර්ලිමේන්තු මන්ත‍්‍රී දයාසිරි ජයසේකර පවසයි.

කෑගල්ල ප්‍රදේශයේ පැවති උත්සවයකින් අනතුරුව මාධ්‍යවෙත අදහස් දක්වමින් මන්ත්‍රීවරයා මේ බව සඳහන් කර ඇති අතර තමනට ජනපති මෛත‍්‍රි සමගින් එක්ව පක්‍ෂය ශක්තිමත් කිරීමේ හැකියාවක් ඇතැයිද සඳහන් කර ඇත.

කෙසේ වෙතත් එවන් තනතුරක් තමනට ලැබෙන්නේදැයි නොදන්නා බවද  මන්ත්‍රීවරයා සඳහන් කර ඇත.

මේ අතර දේශපාලන ආරංචිමාර්ග සඳහන් කර සිටින්නේ ශ‍්‍රීලනිපයේ තාවකාලික මහ ලේකම් රෝහණ ලක්‍ෂමන් පියදාස මහතාගේ ධුර කාලය ජුලි 18 වනදායින් අවසන් වන අතර එතැන් සිට ශ්‍රීලනිප මහ ලේකම්ධුරය ලබා ගැනීමට දයාසිරි ජයසේකර මන්ත්‍රීවරයා අපේක්ෂාවෙන් සිටින බවය.

ශ්‍රීලනිප ප්‍රතිසංවිධානය කටයුත්ත යටතේ පසුගිය ජුනි 03 වනදා රෝහණ ලක්ෂමන් තාවකාලිකව මහ ලේකම් ධුරයට පත්කර ඇත්තේ දින 45ක කාලයක් සඳහා පමණය.  එසේම මීට පෙර ශ්‍රීලනිප 16 කණ්ඩායම සමඟ කටයුතු කල දයාසිරි මන්ත්‍රීවරයා එම පාර්ශවයෙන් ඈත්ව නැවත ජනාධිපතිවරයා සමඟ සමීපවී ඇත්තේ ශ්‍රීලනිප මහ ලේකම්ධුරය ගැන ලැබී ඇති පොරොන්දුවක් මත බවද වාර්තා වෙයි.

16 කණ්ඩායම ඒකාබද්ධ විපක්ෂය සමඟ එක්වීම සඳහා පැවති සාකච්ඡා වලදී බැසිල් රාජපක්ෂ සමඟ පැවති සාකච්ඡාවට දයාසිරි මන්ත්‍රීවරයා සහභාගී නොවූ අතර ඒකාබද්ධ විපක්ෂයේ මන්ත්‍රී කණ්ඩායම් රැස්වීමට ද ඔහු සහභාගීව සිටියේ නැත.

එසේම මේ වන විටත් දයාසිරි මන්ත්‍රීවරයා පඬුවස්නුවර ආසනයේ ශ්‍රීලනිප ආසන බලමණ්ඩල , ශාඛා සමිති පිහිටුවමින් සිටින බවත් පක්ෂයේ මහ ලේකම් තනතුර ලැබුණහොත් පක්ෂ සංවිධාන කටයුතු සිදුකිරීමට සැළැස්මක් මෙන්ම විශේෂ ඇඳුමක් ද  සකසමින් සිටින බවත් දැනගන්න ඇත.

Comment (0) Hits: 417

වැරදි 33 කට අදාළ  නව ස්ථානීය දඩ : අද සිට වැඩ 

නව ස්ථානීය දඩ පත්‍රිකාව අද (15) දිනයේ සිට ක්‍රියාත්මක කරන බව පොලීසිය සඳහන් කරයි.

මාධ්‍ය ප්‍රකාශක පොලිස් අධිකාරී රුවන් ගුණසේකර  සදහන් කරන ආකාරයට නව ස්ථානීය දඩ පත්‍රිකාවට වැරදි 33ක් ඇතුළත් වන අතර මීට පෙර පැවති දඩ පත්‍රිකාවේ පැවතියේ  වැරදි 23ක් පමණි.

එසේම එම පැරණි පත්‍රිකාවේ  ඇතුළත්ව තිබූ වැරදි තුනක් නව දඩ පත්‍රිකාවෙන් ඉවත් කර ඇති බවද  පොලිස් මාධ්‍ය ප්‍රකාශක සඳහන් කර සිටියි.
එසේම  නව ස්ථානීය දඩ පත්‍රිකාවට අනුව අවම දඩය රුපියල් 500 දක්වා ඉහළ දැමීමට ද පියවර ගෙන ඇති බවද ඔහු අන්දහන් කරන අතර  වේග සීමා උල්ලංඝණය වන පරිදි රිය ධාවනයට මෙතෙක් රුපියල් 1000 ක්ව පැවති දඩ මුදල රුපියල් 3000 දක්වා ඉහළ දමා ඇති අතර දින 14 ක් ඇතුළත ගෙවීමට අසමත් වුවහොත් එම මුදල දෙගුණයක් වන බවද දැනගන්නට ඇත.

නව ස්ථානීය දඩ පත්‍රිකාව ඇතුළත් 2018 ජනවාරි 15 වනදා  නිකුත් කල ගැසට් නිවේදනය පහත දැක්වේ.

Comment (0) Hits: 435

ඒකාධිපති පාලනයක් නම් කීයටවත් එපා - වාසු යළිත් කියයි !

ඒකාධිපති පාලනයක් බලයට පැමිණියහොත් සමස්ථ රටම දැඩි අවධානමකට පත්වන බව පාර්ලිමේන්තු මන්ත්‍රී වාසුදේව නානායක්කාර සඳහන් කරයි.

ඊයේ (14) පැවති මාධ්‍ය හමුවකදී අදහස් දක්වමින් මන්ත්‍රීවරයා මේ බව අවධාරණය කළ අතර ප්‍රජාතන්ත්‍රවාදී ප්‍රවාහය තුළ සිටින කිසිඳු පක්ෂයක්  එවැනි පාලනයක් අනුමත නොකරන බවද පැවසීය.

වමේ පක්ෂ මෙන්ම ජනතා විමුක්ති පෙරමුණ, පෙරටුගාමී පක්ෂය, ද්‍රවිඩ සන්ධානය, එජාපය හෝ ශ්‍රීලනිප යන මේ කිසිඳු පක්ෂයක් ඒකාධිපති පාලනයක් ඉල්ලා සිටින්නේ නැති බව සඳහන් කළ මන්ත්‍රීවරයා ඒකාධිපති පාලනයක් ඉල්ලා සිටින්නේ වියත්මග සංවිධානයේ සිටින විශ්‍රාමික හමුදා නිලධාරීන් කිහිපදෙකෙකු, වෘත්තීයවේදීන් කිහිපදෙනෙකු ඇතුළු ධනපතියන් කිහිපදෙනෙකු බවද පැවසීය.

ඔවුන් ඒකාධිපති පාලනයක් ඉල්ලා සිටින්නේ උද්ඝෝෂණ, වැඩවර්ජන සහ අයිතිවාසිකම් සඳහා ගරු නොකරන පාලනයක් වෙනුවෙන් බවත් එවන් මර්දනකාරී පාලනයක් අනුමත කළ නොහැකි බවද ඔහු සඳහන් කර සිටියේය.

Comment (0) Hits: 477

අජිත් ප්‍රසන්න රටම දන්න පිස්සෙක් - වෙල්ගම (වීඩියෝ)

විශ්‍රාමික මේජර් අජිත් ප්‍රසන්නට පිළිතුරුදීමට තමන්ට කිසිඳු අවශ්‍යතාවක් නොමැති බව පාර්ලිමේන්තු මන්ත්‍රී කුමාර වෙල්ගම සඳහන් කරයි.

පසුගියදා පැවති ශ්‍රී ලංකා පොදුජන පෙරමුණේ ජන හමුවකින් පසුව මාධ්‍යවෙත අදහස් දක්වමින් මන්ත්‍රීවරයා මේ බව සඳහන් කර ඇත.

අජිත් ප්‍රසන්න යනු ගමත් අත්හැර ගොස් වෙනත් ප්‍රදේශයක පදිංචිවී මැතිවරණයට ඉදිරිපත්ව ජන්ද 5000ක් වත් ගන්න නොහැකිවූ රටම දන්නා පිස්සෙක් බවත් එවැනි පිස්සෙක් සමඟ තමන්ට කිසිම කතාවක් නැති බවද මන්ත්‍රීවරයා එහිදී සඳහන් කළේය.

වෙල්ගම මන්ත්‍රීවරයාගේ  මේ අදහස් දැක්වීමට හේතුවුයේ   එක්බද්ධ විපක්‍ෂය නියෝජනය කරන පාර්ලිමේන්තු මන්ත‍්‍රී කුමාර වෙල්ගම මහතා ආණ්ඩුව විසින් බ්ලැක්මේල් කර ඇති බවත් ඔහු ඒකාබද්ධ විපක්ෂයේ තොරතුරු ආණ්ඩුවට දෙන බවටත් පසුගියදා අජිත් ප්‍රසන්න මාධ්‍ය හමුවක් පවත්වමින් එල්ල කළ චෝදනාවට ප්‍රතිචාර දක්වමින්ය.


වෙල්ගම දිගටම ගෝඨා විරෝධයේ !

කෙසේ වුවත් වෙල්ගම මන්ත්‍රීවරයා එදින පොදුජන පෙරමුණේ ජන හමුව අමතමින්ද හිට්ලර් පන්නයේ ඒකාධිපති ආණ්ඩුවකට තමන් විරුද්ධ බව දැඩිව අවධාරණය කර සිටියේය.

උතුරෙන් ඇතැමුන් යළිත් ප්‍රභාකරන් කෙනෙකු ඉල්ලන විට දකුණේ ඇතැමුන් හිට්ලර් පාලනයක් ඉල්ලා සිටින බවත් තමන්ට අනුව නම් එම පාලකයින් දෙදෙනාම දරුණු ඒකාධිපතියන් බැවින් එවැනි පාලනයක් යටතේ රාත්‍රියට ගෙදර නිදාගෙනත් හමාර  සමයක් උදාවනු ඇති බවද මන්ත්‍රීවරයා සඳහන් කර සිටියේය.

Comment (0) Hits: 447

මංගල මරණ දඬුවමට එරෙහිවුයේ දේශපාලන වාසි ගන්න ද ?

මත්ද්‍රව්‍ය ජාවාරම් කරන පුද්ගලයන්ට පෝරකයට යැවීමට තීන්දුව ගත් කැබිනට් මණ්ඩලයේදී ඊට විරුද්ධත්වය පෑ එකම පුද්ගලයා වන මංගල සමරවීර අමාත්‍යවරයාට  එවැනි ස්ථාවරයකට ඒමට බලපෑ ඉතිහාසයද තිබේ.

1956 බණ්ඩාරනායක ආණ්ඩුව එක්තරා විශේෂ පණත් කෙටුම්පතක් ගෙනාවේය. එනම්, `මරණීය දණ්ඩනයට එරෙහි පණත් කෙටුම්පතය. එය පාර්ලිමේන්තුවට (එවකට නි‌යෝජිත මන්ත්‍රී මණ්ඩලයට) ඉදිරිපත් කළේ මංගල සමරවීර මහතාගේ පියා වූ කීර්තිමත් නිතඥයකු වූ මාතර පාර්ලිමේන්තු මන්ත්‍රී මහානාම සමරවීරය. ඒ, වැඩබලන අධිකරණ ඇමතිවරයා ලෙසිනි.

'මරණ දණ්ඩනයට' එරෙහි එම පනත බණ්ඩාරනායක රජය ඉදිරිපත්කල පළමු පනත් කෙටුම්පත් අතර වූවකි.

කෙසේවුවද බණ්ඩාරනායක මහතා සහසිකයකු අතින් ඝාතනය වීමත් සමග බලයට පත් සිරිමාවෝ බණ්ඩාරනායක මහත්මිය යලි මරණ දඬුවම ස්ථාපිත කරනු ලැබිය.

ජාත්‍යන්තරයට දුන් ප්‍රතිඥාව :

2016 දී ඔස්ලෝ නුවර  පැවති මරණීය දණ්ඩනයට එරෙහි හයවැනි ලෝක සමුළුවේ සමාරම්භක දේශනය පවත්වමින් එවක විදේශ අමාත්‍යවරයා වශයෙන් මංගල සමරවීර විසින් ප්‍රගතිශීලි මහජන මතයක් ගොඩනගා අනාගතයේ ආසියානු කලාපය තුළ මරණීය දණ්ඩනයේ අවසානයක් දැකීමේ අභිලාෂය මහත් අපේක්ෂා සහගතව පල කොට තිබුනි.
අදාල දේශනය ;

මිනීමරා අපරාධ මැඩලමු :

‘නීත්‍යානුකූල’ මරණ දණ්ඩනය ගැන උද්‍යෝගීමත් කතාබහක් ඇවිල යන මෙවැනි මොහොතක ඒ සම්බන්ධයෙන් සටහනක් තබන JDS සංවිධානයේ රෝහිත භාෂණ අබේවර්ධන මහතා, ඇල්බයා කැමූගේ ප්‍රකට ලියවිල්ලක් වන ‘ගිලටිනය පිළිබඳ අවලෝකනයන්’ (Reflections on the Guillotine) පාදකකර ගනිමින් වත්මන් තත්වය මෙසේ විග්‍රයක් කරයි. 

ඇල්බයා කැමූගේ ‘ගිලටිනය පිළිබඳ අවලෝකනයන්’ (Reflections on the Guillotine) පටන් ගන්නේ සිය පියා මුල්කොටගත් කතාවකිනි. ඒ කතාව සැකෙවින් මෙසේ ය:

1914 පළමු ලෝක යුද්ධය පුපුරා යන්නට කලින්, ඇල්ජීරියාවේ ගොවි පවුලක, දරුවන් ද ඇතුළු, සියලු දෙනා ඝාතනය කළ ගොවිපොළ කම්කරුවකු ඇල්ජියර්ස් නගරයේ දී මරණ දණ්ඩනයට කැපකරනු ලැබිණ. ඔහු වැනි ලේ පිපාසිතයකු හිස ගසා දැමීමෙන් මරණයට පත්කිරීම මෘදු දඬුවමකැයි බොහෝ දෙනා සිතූහ. 

දරුවන් ඝාතන පුවතින් කැළඹුණු කැමූගේ පියා ද කල්පනා කළේ එසේය. ඒ නිසාම, අපරාධකරුවාට මරණ දඬුවම පමණුවනු බලන්නට නගරයේ එක් කෙළවරක රැස් කෑ ජනයා හා එක්වනු පිණිස ඔහු අළුයම නැඟිට සිය කැමැත්තෙන්ම ගියේය. 

නමුත් පෙරළා ගෙදර ආ ඔහු තමන් දුටු දේ ගැන කිසිවකු හා කතා නොකළේය. විකෘති වූ මුහුණින්, කඩිමුඩියේ ආ ඔහු මුනිවතින් මොහොතක් ඇඳේ වැතිර හිඳ නැගිට වමනය කරන්නට පටන් ගත්තේය.

උදාර වදන්වලින් වසා සඟවන ලද යථාර්ථය:

‘උදාර වදන්වලින් වසා සඟවන ලද යථාර්ථය ඔහු හරියටම වටහාගෙන තිබිණැයි’ කැමූ පසුව ලීවේය. හිස සිඳලනු පිණිස පෝරකය මතට ඇද දැමූ වෙවුලන සිරුර ගැන හැරෙන්නට අන් කිසි දෙයක් ගැන ඉන්පසු සිතන්නට තම පියා අසමත් වූ බව ඔහු ආවර්ජනය කළේය.

ඉක්බිතිව, හේ මෙසේ ලියයි: “හුදු ප්‍රචණ්ඩත්වය මත පදනම් වූ අපරාධයකට වඩා පූර්ව සැළසුම් මත සිදුකළ අපරාධයක් බරපතල බව බොහෝ නීති රෙගුලාසි විසින් සළකනු ලබයි. නමුත් ඒ අනුව බලතොත්, මරණ දණ්ඩනය යනු, කවර ලෙස ගණන් බැලුවද, කිසිදු අපරාධකරුවකුගේ අපරාධ ක්‍රියාවක් සමග සැසඳිය නොහැකි තරම් ඉතාමත් සැලසුම් සහගත ඝාතනයක් හැර අන් කුමක්ද?”

කැමූගේ තර්කය මෙයයි: අපරාධකරුවකු විසින් කළ ඝාතනයක්, නීත්‍යානුකූලව මරණ දණ්ඩනය පැනවීමක් හා සමාන විය හැකි එකම එක ආකාරයක් තිබේ. එනම්, එම අපරාධකරුවා, තමන් විසින් ඝාතනය කිරීමට නියමිත පුද්ගලයාට, ඇය හෝ ඔහු මරා දමන දිනය කල් තියා දැනුම් දී, ඒ දිනය එන තෙක් තමන්ගේ අනුකම්පාව යටතේ ජීවත්වීමට සැළැස්වීමයි.

භාෂානගේ සම්පුර්ණ ලිපිය මෙතනින් ජනාධිපති හා දඩ කෙළියේ යන ආගමික හා ‘වාමාංශික ෂෙරීෆ්’ලා

Comment (0) Hits: 395

ජනාධිපති හා දඩ කෙළියේ යන ආගමික හා ‘වාමාංශික ෂෙරීෆ්’ලා 

ඇල්බයා කැමූගේ ‘ගිලටිනය පිළිබඳ අවලෝකනයන්’ (Reflections on the Guillotine) පටන් ගන්නේ සිය පියා මුල්කොටගත් කතාවකිනි. ඒ කතාව සැකෙවින් මෙසේ ය:

1914 පළමු ලෝක යුද්ධය පුපුරා යන්නට කලින්, ඇල්ජීරියාවේ ගොවි පවුලක, දරුවන් ද ඇතුළු, සියලු දෙනා ඝාතනය කළ ගොවිපොළ කම්කරුවකු ඇල්ජියර්ස් නගරයේ දී මරණ දණ්ඩනයට කැපකරනු ලැබිණ. ඔහු වැනි ලේ පිපාසිතයකු හිස ගසා දැමීමෙන් මරණයට පත්කිරීම මෘදු දඬුවමකැයි බොහෝ දෙනා සිතූහ. 

දරුවන් ඝාතන පුවතින් කැළඹුණු කැමූගේ පියා ද කල්පනා කළේ එසේය. ඒ නිසාම, අපරාධකරුවාට මරණ දඬුවම පමණුවනු බලන්නට නගරයේ එක් කෙළවරක රැස් කෑ ජනයා හා එක්වනු පිණිස ඔහු අළුයම නැඟිට සිය කැමැත්තෙන්ම ගියේය. 

නමුත් පෙරළා ගෙදර ආ ඔහු තමන් දුටු දේ ගැන කිසිවකු හා කතා නොකළේය. විකෘති වූ මුහුණින්, කඩිමුඩියේ ආ ඔහු මුනිවතින් මොහොතක් ඇඳේ වැතිර හිඳ නැගිට වමනය කරන්නට පටන් ගත්තේය.

උදාර වදන්වලින් වසා සඟවන ලද යථාර්ථය:

‘උදාර වදන්වලින් වසා සඟවන ලද යථාර්ථය ඔහු හරියටම වටහාගෙන තිබිණැයි’ කැමූ පසුව ලීවේය. හිස සිඳලනු පිණිස පෝරකය මතට ඇද දැමූ වෙවුලන සිරුර ගැන හැරෙන්නට අන් කිසි දෙයක් ගැන ඉන්පසු සිතන්නට තම පියා අසමත් වූ බව ඔහු ආවර්ජනය කළේය.

ඉක්බිතිව, හේ මෙසේ ලියයි: “හුදු ප්‍රචණ්ඩත්වය මත පදනම් වූ අපරාධයකට වඩා පූර්ව සැළසුම් මත සිදුකළ අපරාධයක් බරපතල බව බොහෝ නීති රෙගුලාසි විසින් සළකනු ලබයි. නමුත් ඒ අනුව බලතොත්, මරණ දණ්ඩනය යනු, කවර ලෙස ගණන් බැලුවද, කිසිදු අපරාධකරුවකුගේ අපරාධ ක්‍රියාවක් සමග සැසඳිය නොහැකි තරම් ඉතාමත් සැලසුම් සහගත ඝාතනයක් හැර අන් කුමක්ද?”

කැමූගේ තර්කය මෙයයි: අපරාධකරුවකු විසින් කළ ඝාතනයක්, නීත්‍යානුකූලව මරණ දණ්ඩනය පැනවීමක් හා සමාන විය හැකි එකම එක ආකාරයක් තිබේ. එනම්, එම අපරාධකරුවා, තමන් විසින් ඝාතනය කිරීමට නියමිත පුද්ගලයාට, ඇය හෝ ඔහු මරා දමන දිනය කල් තියා දැනුම් දී, ඒ දිනය එන තෙක් තමන්ගේ අනුකම්පාව යටතේ ජීවත්වීමට සැළැස්වීමයි.

ජනාධිපතිවරයා හා දඩ කෙළියේ යන ‘වාමාංශික ෂෙරීෆ්’ලා:

කැමූගේ ප්‍රකට ලියැවිල්ල හදිසි නිමිත්තක් වන්නේ ‘නීත්‍යානුකූල’ මරණ දණ්ඩනය ගැන උද්‍යෝගීමත් කතාබහක් දැන් ඇවිල යන බැවිනි. අවශ්‍ය වෙතොත් මරණ දණ්ඩනය පැමිණවීමේ ලියැවිලිවලට අත්සන් කරන්නට තමන් නොපැකිලෙන්නේ යැයි ජනාධිපති සිරිසේන මහනුවර, ගැටඹේ දී කියා තිබේ. 

ජනාධිපතිවරයා හා දඩ කෙළියේ යන්නට ආගමික හා ‘වාමාංශික ෂෙරීෆ්’ලාද අසුන් පිට නැග ඇත්තේ ඒ අනුව ය. 'බන්ධනාගාරයේ සිට දාමරිකකම් කරන්නේ නම් එල්ලීම හොඳ බව' ස්වර්ගය හා නරකාදිය අතර සම්බන්ධීකරණ කටයුතු භාර කාදිනල් මැල්කම් රංජිත් කියා ඇත්තේ එයින් දිනකට හෝ දෙකකට පසු ය. 

‘එක්කෙනෙක්, දෙන්නෙක් එල්ලුවාට ප්‍රශ්න විසඳෙන්නේ නැතැයි’ කියා ඇති ජනතා විමුක්ති පෙරමුණේ ලේකම්වරයා ද, ‘දඬුවම් දීමේ ක්‍රමයක්‌ ලෙස මරණ දඬුවම ක්‍රියාත්මක කළ යුතු නම් එය ක්‍රියාත්මක කිරීම පිළිබඳව ගැටලුවක්‌ නැති’ බව ඉකුත් බදාදා කියා තිබිණ. ‘ක්‍රමය වෙනස් කිරීම’ ගැන උද්යෝග පාඨය ද ඒ යටින් එල්ලන්නට ඔහු අමතක නොකළේය.

රාජ්‍ය අනුග්‍රහයෙන් මිනී මැරීම:

නීත්‍යානූකූලව මිනිසුන් මැරීම ගැන දැන් නැග එන අසීමාන්තික උද්යෝගය වනාහී යුක්ති ගරුක හා ධාර්මික ජීවිතයක් කෙරෙහි අපේ ඇති නිර්මල ලැදියාව විදහා දක්වන කැඩපතකැයි මේ බොහෝදෙනා කල්පනා කරති.

රාජ්‍ය අනුග්‍රහයෙන් මිනී මැරීමේ පිළිවෙතට අනුබල දීම වනාහී මිනිස් ඝාතනය සඳහා ඇති ලෝක සම්මත පාරිශුද්ධ ක්‍රමයකැයි ඔවුන් සිතන්නේ ඒ නිසා ය. 

ඒ අනුව, යුක්තිය හරියට පසිඳලීම ගැන ලංකාව තුළ කලින් කල බුර - බුරා ඇවිළෙන ‘පොදුජන අනුරාගයේ’ ඝෝෂාව, දෙදහස් පන්සීයක් වයස බැව් කියන ශිෂ්ටාචාරයේ පුනර්ජීවනයකැයි සිතන්නෝ බහුලව වෙසෙති.
 නමුත් අපේ අපරාධ ලෝලීත්වයේ බුබුළු දමන විපරීත ප්‍රබෝධය සැඟව ඇත්තේ ඒ කල්පනාවන් යට ය. ඒ ගැන දැනගන්නට රිසි අයට විවේකීව විමසා බලනු පිණිස, සමාජ යුක්තිය හෝ මනුෂ්‍ය ගරුත්වය ධූවිලි තරම් හෝ නොතකා ගතකළ අඩුම වශයෙන් සාපරාධී දශක හතරක කාලය අප පසුපසින් තිබේ.

මැද සාලයේ සිට අපරාධ රස විඳීන ජාතික පුරුද්ද:

හුදකලා පුද්ගල අපරාධයන් මැඩලිය හැක්කේ සංවිධානාත්මක රාජ්‍ය අපරාධ දිරි ගැන්වීමෙන් යැයි කල්පනා කිරීම විසින් පෙන්නුම් කරන්නේ යුක්තිය පිළිබඳ පැසවන බහුජන උද්යෝගය නොවේ. මැද සාලයේ සිට අපරාධ රස විඳීම ජාතික පුරුද්දක් බවට පත් වූ රටක ශිෂ්ටාචාරයේ පරාභවයයි. 

කපා කොටා, වධ බන්ධන පමුණුවා ඝාතනය කොට වැළලූ බැව් සැළකෙන 154 දෙනකුගේ සිරුරු ගොඩගත් මාතලේ සමූහ මිනීවළ පිළිබඳ යුක්තිය ඉල්ලා බහුජන ව්‍යාපාර පැන නොනගින්නේ ඒ නිසා ය. මළ සිරුරු 82 ක සුන්බුන් හමු වූ මන්නාරමේ තිරුකේතීස්වරම් සමූහ මිනීවළ තුන් දිනක් තරම්වත් කල් පවත්නා සාමූහික කෝපයක් ජනිත නොක‍ළේත් ඒ නිසා ය.

ළමුන් ද ඇතුළු මිනිස් ඇට සැකිළි 30කට වඩා දැනටත් සොයාගෙන ඇති මන්නාරමේ සතොස පරිශ්‍රයෙන් හමු වූ සමූහ මිනීවළ රාජ්‍ය ප්‍රතිපාදන නැතිකමින් වසා දැමීමට සැරසීම ගැන ජනපති සංවේගය හෝ වාම විරෝධය හෝ ආගමික කණස්සල්ල පළ නොවන්නේ ද ඒ නිසා ය. 
කොටින්ම, ඇඹිලිපිටියේ සෙවණගල යුද හමුදා කඳවුරේදී ඝාතනය කළ පාසැල් සිසුන් 31 දෙනකු පිළිබඳ මතකයට කැපකොට අගනුවර ප්‍රත්‍යන්තයේ ඉදිකළ දිළිඳු ස්මාරකය ඩෝසර් මගින් සමතලා කොට, සන්ධ්‍යා කාලවල නාගරික මැද පංතික මිතුරු සාමිචි සඳහා වෙන් වූ නගර උද්‍යාන හා ව්‍යායාම මං තීරු ඉදිකිරීම පිළිකුල නොදනවන්නේ මක් නිසාද?

දොරින් දොර පැතිරෙන වසංගත අවිචාරයේම උත්සන්න වීමක් :

පුද්ගල අපරාධ මැඩලනු පිණිස රාජ්‍ය මගින් මිනිසුන් මරණයට කැපකිරීම, මිනිස් ගරුත්වය හා ධාර්මිකභාවය ප්‍රතිස්ථාපනය නොකරයි. එය විසින් සිදු කරන්නේ එක් අපරාධයකට හිලව් වශයෙන් ගණන් බලා වඩා සැලසුම් සහගත අපරාධ කිරීමට රාජ්‍යයට අනුල්ලංඝණීය අයිතියක් ඇතැයි යන සාපරාධී විශ්වාසය අලුත් වටයකින් තහවුරු කිරීමයි. 

මරණ දණ්ඩන නියෝගයන්ට අභිමානයෙන් අත්සන් තැබීමට තමන් සූදානම් යැයි තැන තැන වහරන වහසි බසින් ජන ආවේගයන් මොළවන රාජ්‍ය පාලකයන්, අඩ සියවසක් තිස්සේ රාජ්‍ය විසින් කරන ලද අනන්ත අපරාධ නොතකා හරින්නේ ඒ විශ්වාසයේ පිටුබලයෙනි.
වඩා සාහසික සමූහ අපරාධකරුවන් රාජ්‍ය පාලනය සඳහා පේවී කැන්දාගෙන එන වීදි පෙරහැරකරුවන් පෙරහුරු පවත්වන සමයක, අපරාධ යුක්තිය ‘නීත්‍යානුකූල මරණ දණ්ඩනයෙන්’ ලබාගත හැකියැයි කල්පනා කිරීම වනාහී ප්‍රතිකාරයක් නොවේ;  දොරින් දොර පැතිරෙන වසංගත අවිචාරයේම උත්සන්න වීමකි.

( jdslanka.org - රෝහිත භාෂණ අබේවර්ධන)
(මෙම ලිපිය 2018 ජූලි 15 වැනිදා 'අනිද්දා' පත්‍රයේ මුල්වරට පළවිය.)

Comment (0) Hits: 432

Page 371 of 484