පුවත්

ජාතික පාරිභෝගික මිල දර්ශකය මත පදනම් වූ මෙරට මැයි මාසයේ වාර්ෂික ලක්ෂ්‍යමය උද්ධමනය සියයට 45.3 ක් දක්වා ඉහළ ගොස් ඇති බව ජන හා සංඛ්‍යා ලේඛන දෙපාර්තමේන්තුව පවසයි .

එහි වාර්තාවට අනූව සියයට 45.3 ක් වූ වාර්ෂික ලක්ෂ්‍යමය උද්ධමනයට ආහාරමය කාණ්ඩයෙන් සියයට 27.3 ක දායකත්වයක් සපයා ඇති අතර ආහාර නොවන කාණ්ඩයෙන් සියයට 18.1ක දායකත්වයක් ලබා දී ඇත.

මේ අතර ජාතික පාරිභෝගික මිල දර්ශකයට අනුව ආහාර කාණ්ඩය සඳහා වාර්ෂික ලක්ෂ්‍යමය උද්ධමනය සියයට 58 ක් වන අතර ආහාර නොවන කාණ්ඩය සඳහා වාර්ෂික ලක්ෂ්‍යමය උද්ධමනය සියයට 34.2 ක් වන බව ජන හා සංඛ්‍යා ලේඛන දෙපාර්තමේන්තු වාර්තාව පවසයි.

ශ‍්‍රී ලංකාවට තව දුරටත් ආර්ථික ආධාර ලබා දීමට පෙර ශ‍්‍රී ලංකාවේ තත්ත්වය නිරීක්‍ෂණය සඳහා ප්‍රමුඛ ඉන්දීය රජයේ ඉහළ පෙළේ නියෝජිත පිරිසක් විශේෂ ගුවන් යානයකින් හෙට (23) මෙරටට පැමිනීමට නියමිත බව වාර්තා වෙයි .

දූත පිරිස පැය තුනක කාලයක් පමණක් මෙරට රැඳී සිටින අතර එහිදී ජනාධිපති ගෝඨාභය රාජපක්ෂ සහ අග්‍රාමාත්‍ය රනිල් වික්‍රමසිංහ සමඟ සාකච්ඡා පැවැත්වීමට නියමිත බවත් වාර්තා වෙයි .

වාර්තා වන ආකාරයට මේ පිරිස පැමිණෙන්නේ , ලංකාවේ වත්මන් අර්බුදය හා ඉදිරි ණය වැඩසටහන් පිලිබද සාකච්ඡා කර එකගතාවයකට පැමිණීම සදහා ය.

මේ වන විට ලංකාව කිලෝමීටර් ගණන් දිග ඉන්ධන පෝලිම් සමග ඉතිහාසයේ දරුණුතම ඉන්ධන අර්බුදයට මුහුණදී සිටියි.

අග්‍රාමාත්‍ය රනිල් වික්‍රමසිංහ ඕස්ට්‍රේලියාවේ ස්වදේශ කටයුතු අමාත්‍ය ක්ලෙයාර් ඔනීල් සමඟ ඊයේ (20) අග්‍රාමාත්‍ය කාර්යාලයේදී සාකච්ඡාවක් පැවැත්වීය.

ආර්ථිකය ස්ථාවර කිරීමට ශ්‍රී ලංකා රජය දරන උත්සාහයට ඔස්ට්‍රේලියාව අඛණ්ඩව සහාය ලබා දෙන ඔස්ට්‍රේලියානු අමාත්‍යවරිය එහිදී ප්‍රකාශ කළේය.

විදේශයන්හි ආයෝජන සඳහා විවෘත වන අපනයන කේන්ද්‍රීය ආර්ථිකයක් සංවර්ධනය කිරීම කෙරෙහි ශ්‍රී ලංකාව අවධානය යොමු කර ඇති බව අග්‍රාමාත්‍ය රනිල් වික්‍රමසිංහ පැහැදිලි කළේය.

ඔස්ට්‍රේලියානු සංචාරක ව්‍යාපාරය අඛණ්ඩව ශ්‍රී ලංකාවට ගෙනයාමට හා ශ්‍රී ලංකාව තුළ ඔස්ට්‍රේලියානු ආයෝජන ප්‍රවර්ධනය කිරීමට උනන්දු වන බව ඔස්ට්‍රේලියානු ස්වදේශ කටයුතු අමාත්‍යවරිය ප්‍රකාශ කළේය.

තම රජය ක්‍රියාත්මක කිරීම ට නියමිත නැව් මාර්ග සංවර්ධනය කිරීම පිලිබද පැහැදිළි කළ අමාත්‍යවරිය . සමුද්‍ර ආරක්ෂාව සහ මිනිස් ජාවාරම් සම්බන්ධයෙන් තම පරිපාලනයේ ප්‍රතිපත්තිය පැහැදිලි කළාය.

මිනිස් ජාවාරම් නැවැත්වීමට ශ්‍රී ලංකා රජය සහ එහි ආරක්ෂක අංශ කැපවී සිටින බව අග්‍රාමාත්‍ය රනිල් වික්‍රමසිංහ මහතා ප්‍රකාශ කළේය.

රේගු දෙපාර්තමේන්තුව ප්‍රතිව්‍යුහගත කිරීම සහ තවදුරටත් සංවර්ධනය කිරීම සඳහා ශ්‍රී ලංකාවට සහාය වීමට සුදානම් බව ස්වදේශ කටයුතු අමාත්‍යවරිය ප්‍රකාශ කලේය .

ශ්‍රී ලංකාවට ඩොලර් මිලියන 50 ක සංවර්ධන ආධාර පැකේජයක් ලබා දීම සම්බන්ධයෙන් අග්‍රාමාත්‍යවරයා ඕස්ට්‍රේලියානු රජයට සිය ස්තූතිය පුද කළේය.

ශ්‍රී ලංකා නිදහස් පක්ෂය පාර්ලිමේන්තුව වර්ජනය කිරීමට තීන්දුවක් ගෙන නොමැති බව ශ්‍රීලනිප මහලේකම් දයාසිරි ජයසේකර ‘මව්රට’ වෙබ් අඩවියට විශේෂ ප්‍රකාශයක් කරමින් පවසා ඇත .

පාර්ලිමේන්තුව වර්ජනය කිරීම පිළිබදව සමගි ජන බලවේගය තම පක්ෂයට කිසිදු දැනුම්දීමක් කර නොතිබූ බවත්, එසේ කර තිබුණේ නම් ඊට සම්බන්ධ විය හැකිව තිබූ බවත්, තමන් ඒ බව විපක්ෂනායකවරයාගෙන් විමසා සිටි බවත් එහිදී ශ්‍රීලනිප මහ ලේකම් ,පාර්ලිමේන්තු මන්ත්‍රී දයාසිරි ජයසේකර ප්‍රකාශ කර ඇත .

පසුව ඒ සම්බන්ධයෙන් විපක්ෂනායකවරයා සජබ මහලේකම් රංජිත් මද්දුමබණ්ඩාරගෙන් විමසද්දී තමන්ට එය අතපසු වූ බව ඔහු කියා සිටි බවත් ශ්‍රීලනිප මහ ලේකම් පවසා ඇත .

මහලේකම්වරයාගේ එම අතපසුවීම හේතුවෙන් විපක්ෂනායකවරයා තමන්ට කනගාටුව ප්‍රකාශ කළ බවද දයාසිරි ජයසේකර මන්ත්‍රීවරයා එහිදී පවසා ඇත .

කෙ‌සේවෙතත් අද දිනයේ මන්ත්‍රී කණ්ඩායම් රැස්වීමක් කැදවා මේ පිළිබදව සාකච්ජා කරන බවද ශ්‍රීලනිප මහ ලේකම් මව්රට වෙත පවසා තිබේ.

ජනතා ප්‍රශ්නවලට පාර්ලිමේන්තුවෙන් කිසිම විසඳුමක් නොලැබෙන බැවින් මේ සතියේ විපක්ෂයේ සියලු පක්ෂ පාර්ලිමේන්තුව වර්ජනය කිරීමට තීරණය කර ඇතැයි ජාතික ජන බලවේගයේ නායක පාර්ලිමේන්තු මන්ත්‍රී අනුර දිසානායක පවසයි .

පාර්ලිමේන්තුවේදී අද (21) ප්‍රකාශයක් කරමින් ඔහු මේ බව පැවසීය .

රට ගොඩනගන හැටි ගැන වහාම පාර්ලිමේන්තුවට සැලැස්මක් ඉදිරිපත් කළ යුතුව තිබෙන බවද අනුර දිසානායක මන්ත්‍රීවරයා එහිදී පැවසීය .

මේ වන විට විපක්ෂ නායක සජිත් ප්‍රේමදාස ද තමන්ට බලය දෙන්න කියමින් , සතියක පාර්ලිමේන්තු වර්ජනයක් සහ විරෝධතාවක් ප්‍රකාශයට පත්කර ඇත.

පෙට්‍රල් රැගත් නෞකාවක් ජුනි 24 මෙරටට පැමිණීමට නියමිත බව විදුලි බල සහ බලශක්ති අමාත්‍යංශ ආරංචි මාර්ග පවසයි .

වාර්තා වන ආකාරයට අදාළ නෞකාවෙන් පෙට්‍රල් මෙට්‍රික් ටොන් 35,000ක් රැගත් නෞකාවක් මෙසේ පැමිණෙයි.

මේ අතර, ලබන 28 වැනිදා තවත් බොරතෙල් නෞකාවක් දිවයිනට ළඟා වන බවත් වාර්තා වෙයි .

ජනතා ප්‍රශ්නවලට විසඳුම් නැති නිසා සමගි ජන බලවේගය අද(21) සිට පාර්ලිමේන්තුව වර්ජනය කරන බව විපක්ෂ නායක සජිත් ප්‍රේමදාස පාර්ලිමේන්තුවේ දී අද ප්‍රකාශයක් කළේය.

එසේම තවදුරටත් රටත් ජනතාවත් අපහසුතාවයට පත් නොකර රටේ පාලන වගකීම තමන්ට බාර දෙන්නැයි ඉල්ලා විපක්ෂ නායක සජිත් ප්‍රේමදාස ඉල්ලා සිටී.

‘රට බේරාගැනීමේ සතිය’ ලෙස නම් කර ඇති විරෝධතා සතියක් සම්බන්ධයෙන් මාධ්‍ය දැනුවත් කිරීමේ අවස්ථාවේදී ඔහු මේ බව කියා සිටියේය.

ජනතාවගේ ප්‍රශ්නවලට විසඳුම් තමන් සතුව ඇති බවද පැවසූ ඔහු සමගි ජන බලවේගය ප්‍රමුඛ තාවකාලික සර්ව පාක්ෂික රජයක් පිහිටුවීමට සූදානම් බවද පැවසීය.

එහිදී ජනතාවගේ මූලික අවශ්‍යතා ලබා දීමෙන් අනතුරුව කෙටි කාලයක් තුළ නව ජනවරමක් කට ගොස් අඛණ්ඩව වසර 5ක රාජ්‍ය පාලනයක් ස්ථාපිත කරන බව ඔහු කියා සිටියේය.

වව්නියාවේ ආඬියාපුලියන්කුලම ප්‍රදේශයේ ඉන්ධන පිරවුම් හලක ඇතිවූ ගැටුමකින් පස් දෙනකු තුවාල ලබා සෙට්ටිකුලම රෝහලට ඇතුළත් කර ඇති බව වාර්තා වෙයි .

පොලිස් ආරංචි මාර්ග අනුව එම ඉන්ධන පිරවුම් හලේ ඇති වූ ගැටුමකින් පසුව එක් අයෙකු කඩුවක් ගෙන පෝලිමේ සිටි පිරිසක් කපා දැමීම නිසා මෙම පිරිස තුවාල ලබා ඇත.

තුවාලකරුවන් පස් දෙනාගෙන් එක් අයකු බරපතළ තුවාල ලබා ඇති අතර සිද්ධිය සම්බන්ධයෙන් පොලිසිය විසින් සැකකරුවන් දෙදෙනෙකු අත්අඩංගුවට ගෙන ඇති බවත් සඳහන් වෙයි.

ඉන්ධන පෝලිමේ සිටියදී ඇති වූ බහින් බස් වීමක් මත මෙම ගැටුම ඇති වී ඇතැයි පොලිසිය වැඩිදුරටත් පවසයි .

අරගලකරුවන් ඊයේ (20) ජනාධිපති කාර්‍යාලය අවට දැක්වූ විරෝධය ජනාධිපතිවරයාගේ ජන්ම දින සැමරුමට සංකේතීය විරෝධය පළ කිරීමට බව ගෝල්ෆේස් හී සර්ව පාක්ෂික අරගලකරුවන් පවසයි .

ඒ මිස ජාත්‍යන්තර මූල්‍ය අරමුදලේ සාමාජිකයන්ට හෝ මුදල් අමාත්‍යාංශයේ නිලධාරීන්ට බාධා කිරීමට නොවන බවත් සර්වපාක්ෂික අරගලකරුවන් සඳහන් කරන අතර ඒ සම්බන්ධයෙන් මාධ්‍ය නිවේදනයක් නිකුත් කර ඇත .

ජනතා හිතවාදී කොන්දේසි මත ශ්‍රී ලංකාවට අවංකව සහාය වන්නේ නම්, ජාත්‍යන්තර මූල්‍ය අරමුදල ශ්‍රී ලංකා රජය සමග සිදු කරන කිසිදු සාකච්ඡාවකට බාධා කිරීමට අරගලකරුවන් හෝ පුරවැසියන් වශයෙන් කිසිවෙකුටත් කිසිදු අවශ්‍යතාවක් නොමැති බවද ඔවුන් නිවේදනය හරහා පවසයි.
=
තවද ජාත්‍යන්තර මූල්‍ය අරමුදල වැනි වෙනත් කිසිදු ජාත්‍යන්තර ආයතනයක හෝ රටක නියෝජිත කණ්ඩායමකට කිසිදු අවහිරයක් හෝ බාධාවක් සිදු කිරීමට ක්‍රියා නොකරන බවත් අදාළ නිවේදනයේ වැඩිදුරටත් සඳහන් කර ඇත .

සර්ව පාක්ෂික අරගලකරුවන් නිකුත් කළ නිවේදනය පහත දැක්වේ.=

ක්ෂේත්‍ර තුනක සේවා අත්‍යවශ්‍ය සේවා බවට පත් කරමින්, ජනාධිපති ගෝඨාභය රාජපක්ෂ  විසින් අතිවිශේෂ ගැසට් නිවේදනයක් නිකුත් කර තිබේ.
ඒ ජනාධිපති ලේකම් ගාමිණි සෙනරත්ගේ අත්සනිනි.

ඒ අනුව, විදුලි බල සැපයීම, ඛනිජ තෙල් නිෂ්පාදන හා ඉන්ධන සැපයීම හෝ බෙදාහැරීම, රෝහල් ප්‍රතිකාර සේවා අත්‍යවශ්‍ය සේවාවක් ලෙස ප්‍රකාශයට පත් කරමින්, අතිවිශේෂ ගැසට් නිවේදනයක් නිකුත් කර තිබේ.

සාමාන්‍ය ජන ජීවිතය පවත්වාගෙන යාම සඳහා අත්‍යවශ්‍ය වන බව සහ එම සේවාවට අවහිරයක් හෝ බාධාවක් විය හැකි බවට සැලකිල්ලට ගනිමින් මෙම සේවාවන් අත්‍යවශ්‍ය සේවාවක් බවට ප්‍රකාශයට පත් කරමින් මෙම ගැසට් නිවේදනය නිකුත් කරනු ලැබ තිබේ.

ජනාධිපති ලේකම් කාර්යාලය ඉදිරිපිට පිවිසුම් මාර්ග අවහිර කරමින් විරෝධතාවයේ නිරත වූ පුද්ගලයන් 21 දෙනෙකු පොලිසිය විසින් අද (20) අත්අඩංගුවට ගෙන තිබිණ .

මේ පිරිස අතර භික්ෂූන් වහන්සේ නමක් සහ කාන්තාවන් හතරදෙනකුද වූ බවත් වාර්තා වෙයි .

අත්අඩංගුවට ගත් පිරිස අධිකරණයට ඉදිරිපත් කිරීමෙන් පසු රුපියල් ලක්‍ෂ 5 බැගින් වූ ශරීර ඇප මත මුදා හැර ඇත.

කලවානේදී සිදුවූ ද්විත්ව ඝාතනයක් සම්බන්ධයෙන් චෝදනා ලැබ සිටි සබරගමුව පළාත් සභාවේ හිටපු මන්ත්‍රී හසිත සමන්ත මුහන්දිරම් නොහොත් සර්පයා නිදොස් කොට නිදහස් කර තිබේ .

දීර්ඝ කාලයක් විභාග වූ නඩුවේ තීන්දුව ප්‍රකාශයට පත් කෙරුණේ අද (20)දිනයේදීය.

අදාළ නඩුවේ තීන්දුව කොළඹ මහාධිකරණ විනිසුරු නවරත්න මාරසිංහ විසින් ලබාදී ඇත .

සබරගමුව පළාත් සභාවේ මන්ත්‍රීවරයෙක්ව සිටි රංජිත් නන්දසේන සහ ඔහුගේ ආරක්ෂකයාට 1999 වසරේදී වෙඩිතබා ඝාතනය කර වාහනයද සමඟ ගිනි තැබීමක් සම්බන්ධයෙන් ඔහුට අධිචෝදනා ගොනුකර තිබුණේ නීතිපති දෙපාර්තමේන්තුව විසිනි.

ආරච්චිකට්ටුවේ පිහිටි ඉන්ධන පිරවුම් හලකදී පුද්ගලයෙකුට පහරදී පොලිස් නිලධාරියෙකුගේ නිල ඇදුම්න් අල්ලා කළහාකාරී ලෙස හැසිරීම සම්බන්ධයෙන් හිටපු රාජ්‍ය අමාත්‍ය සනත් නිශාන්තගේ සහෝදරයා ඇතුළු තිදෙනෙක් ලබන 23 වෙනිදා දක්වා රක්ෂිත බන්ධනාගාර ගත කර තිබේ.

ඒ ඔවුන් පොලීසියට අද(20) උදෑසන භාරවීමෙන් අනතුරුව හලාවත අධිකරණයට ඉදිරිපත් කිරීමෙන් අනතුරුවය.

හිටපු රාජ්‍ය ඇමති සනත් නිශාන්ත ගේ සහෝදරයා වන ආරච්චිකට්ටුව ප්‍රාදේශීය සභාවේ හිටපු සභාපති මෙන්ම වත්මන් මන්ත්‍රීවරයෙක් වන ජගත් සමන්ත , සමීර මධුෂංක සහ ඒ.ඒ.ධම්මික නැමැති සැකකරුවන් මෙසේ බන්ධනාගාර ගත කර ඇත .

ජගත් සමන්ත මෑතකදී ද පහරදීමක් සම්බන්ධයෙන් පොලීස් අත්අඩංගුවට පත්ව බන්ධනාගාරගතව සිටි ඔහු ඇප මත නිදහස ලබා මේ වන විට මාසයක කාලයක් නොමැති බව පොලීසිය කියයි.

එසේම ගෝල්ෆේස් අරගල බිමට එල්ල කල ප්‍රහාරය සම්බන්ධයෙන් හිටපු රාජ්‍ය ඇමති සනත් නිශාන්ත ද බන්ධනාගාර ගතව සිට ඇප ලැබුවේ මීට දින කිහිපයකට පෙරය.

අමාත්‍ය නිමල් සිරිපාල ද සිල්වා ශ්‍රී ලංකා නිදහස් පක්ෂයේ දරන තනතුරුවලින් නෙරපා හැරීම වළක්වාලමින් නිකුත් කර තිබූ නියෝගය අනිද්දා දක්වා දීර්ඝ කර ඇත.
අමාත්‍යවරයා ගොනුකළ පෙත්සම අද යළිත් සලකා බලමින් කොළඹ දිසා අධිකරණය මෙම වාරණ නියෝගය නිකුත් කළේය.

පක්ෂයේ තීරණයට පටහැනිව යමින් ආණ්ඩුවේ ඇමති ධුර ලබා ගැනීමට කටයුතු කළ ශ්‍රීලනිප මන්ත්‍රීවරුන් පක්ෂයේ තනතුරුවලින් නෙරපා හැරීමට තීරණය කළ බව ශ්‍රීලනිප සභාපති මෛත්‍රීපාල සිරිසේන මාධ්‍ය නිවේදනයක් නිකුත් කළ අතර එම තීරණයට එරෙහිව නිමල් සිරිපාල ද සිල්වා කොළඹ දිසා අධිකරණය හමුවේ පෙත්සමක් ගොනුකර තිබිණි.

මෙම පෙත්සම අද කොළඹ දිසා විනිසුරු පූර්ණිමා පරණගම හමුවේ කැඳවා තිබිණි. විනිසුරුවරිය නියෝග කළේ ශ්‍රීලනිප සභාපති මෛත්‍රීපාල සිරිසේන ඇතුළු පක්ෂ මධ්‍යම කාරක සභාව වෙත නිකුත් කළ නියෝගය අනිද්දා දක්වා දීර්ඝ කිරීමටයි.

මෛත්‍රීපාල සිරිසේන ඇතුළු විත්තිකාර පාර්ශ්වය වෙනුවෙන් පෙනී සිටි නීතිඥවරුන් අධිකරණය හමුවේ ප්‍රකාශ කළේ නඩුව සමථයකට පත්කර ගැනීම සඳහා පෙත්සම්කාර පාර්ශ්වය සමග සාකච්ඡා කරන බවයි. එසේ සාකච්ඡා කර එකඟතාවයකට පැමිණීමට පෙත්සම්කාර පාර්ශ්වය එකඟ නොවන්නේ නම්, වාරණ නියෝගය දීර්ඝ කිරීමට විරෝධය පළ කරන බවද නීතිඥවරුන් පවසා ඇත.

ටෙන්ඩර් වංචාවක් ගැන පවසමින් නාගානන්ද කොඩිතුවක්කු පසුගියදා සමාජ මාධ්‍ය ඔස්සේ ලිට්‍රෝ සමාගම සම්බන්ධයෙන් දැක්වූ අදහස් සත්‍යයෙන් තොර බව ලිට්‍රෝ සමාගම් අභ්‍යන්තර ආරංචි මාර්ග පවසයි .

එම ආරංචි මාර්ග සඳහන් කරන්නේ නාගානන්ද කොඩිතුවක්කු මෙන්ම මෙකී චෝදනාව එල්ල කරන්නන් කරුණු විකෘති කොට දක්වමින් පටු දේශපාලන වාසි තකා මේ චෝදනා එල්ල කරන බවයි .

ආරංචි මාර්ග සඳහන් කරන ආකාරයට , මේ ලිට්‍රෝ ගෑස් සමාගමේ ටෙන්ඩර් වංචාවක් ගැන කියමින් අග්‍රාමාත්‍යවරයා සහ හිටපු අමාත්‍ය සාගල රත්නායක ඊට ඈඳා ඇත්තේද දේශපාලන තක්කඩිකමක් තුළය.

එබැවින් නාගානන්ද වැනි එක් පුද්ගලයකු අරඹයා ප්‍රතිචාර දක්වා තේරුමක් නැති බවත් , ප්‍රතිචාර දැක්විය යුතුව ඇත්තේ , සිදුවීම විකෘති කර ජනතාව වෙත යවන දේශපාලන තක්කඩි සියල්ලන් අනාවරණය වන ආකාරයට බවත් අදාළ ආරංචි මාර්ග පවසයි .

මේ බව සරලව පැවසුවහොත් siam සමාගම අඩු ලංසුවක් ඉදිරිපත් කර ඇති නමුත් ගෑස් සැපයීම වෙනුවෙන් ඔවුන් දමා ඇති කොන්දේසි පූර්ණය කිරීම මෙරටට මේ මොහොතේ කොහෙත්ම කළ නොහැකිව ඇත . එසේම දෙපාර්ශවයම දක්වන අවශ්‍යතා අනූව සිදුවීමට නියමිතව ඇත්තේ, මෙරටට ගෑස් සපයා ගැනීම දින නියමයක් නොමැතිව කල් යෑමය.

මේ සම්බන්ධයෙන් පැහැදිලි අදහස් දැක්වීමක් ලිට්‍රෝ සමාගම විසින් නිවේදනය කර ඇත . එය පහත දැක්වෙයි .

ලිට්‍රෝ ගෑස් සමාගමේ නිවේදනය !

ලිට්රෝ ගෑස් ලංකා සමාගමේ 2022- 2023 වසර සඳහා 280,000MT ජාත්‍යන්තරයෙන් ගෑස් මිල දී ගැනීමේ නෞකා ගාස්තු ටෙන්ඩරය සම්බන්ධව විද්‍යුත් සහ සමාජ මාධ්‍ය වල පලවන අසත්‍ය තොරතුරු සම්බන්ධව සමාගමේ පැහැදිලි කිරීම.

අදාළ වර්ෂය සඳහා LP Gas ප්‍රවාහන නෞකා ගාස්තු ටෙන්ඩරය, ජාත්‍යන්තර තරඟකාරී මිල ගණන් යටතේ (ICB) 2022 /01/09 කැඳවන ලද අතර 2022/ 03 /16 මිල ගණන් කැඳවීම අවසන් කළ බව ලිට්රෝ ගෑස් ලංකා සමාගම දන්වා සිටි.

එම මිල ගණන් කැඳවීම සඳහා පහත සඳහන් සැපයුම්කරුවන් අදාල මිල ගණන් ඉදිරිපත් කළ බව ලිට්රෝ සමාගම දන්වා සිටි.
1. Siam trading ගෑස් මෙට්‍රික් ටොන් එකක් සඳහා නෞකා ගාස්තුව
ඇමරිකානු ඩොලර් 96 වශයෙන් ද ( $ 96 per Mt )
2. O Q trading ගෑස් මෙට්‍රික් ටොන් එකක් සඳහා නෞකා ගාස්තුව
ඇමරිකානු ඩොලර් 129 වශයෙන් ද ( $ 129 per Mt )
3. BB Energy ( Asia ) ltd ගෑස් මෙට්‍රික් ටොන් එකක් සඳහා නෞකා ගාස්තුව
ඇමරිකානු ඩොලර් 148 වශයෙන් ද ( $ 148 per Mt )

කැබිනෙට්ටුව විසින් පත්කරන ලද ප්‍රසම්පාදන කමිටුව විසින් ( SCAPC) Siam trading අදාළ වර්ෂය සඳහා සැපයුම්කරු ලෙස නම් කරන ලදී.

නමුත් ගිවිසුම් ප්‍රකාරව Siam Gas ආයතනය සඳහා ලිට්රෝ ගෑස් ලංකා සමාගම ලබාදිය යුතු ඇමරිකානු ඩොලර් මිලියන 30ක ණයවර ලිපිය ( $ 30M -SBLC) ලබාදීමට ශ්‍රී ලාංකික රජයට නොහැකි තත්වයක් පැවතුනි.

එම තත්වය විසඳා ගැනීම සඳහා කල් ගැනීමට අවශ්‍ය නිසාත් ඒ වන විට ශ්‍රී ලංකාව තුල ගෑස් තොග දින කිහිපයකට අඩු වී තිබූ නිසාත් කෙටි කාලීන විසඳුමක් වශයෙන් Spot Cargo මිලදී ගැනීමට මිල ගනන් ,මෙම Siam Gas සමාගමෙන් හා පෙර සැපයුමකරු හා දෙවන මිල දැක්වූ Tender කරු වන OQ සමාගමෙන් ද මිල කැඳවන ලදී.

2020/ 05/30 දින ලිපියක් මගින් Siam Gas ආයතනය වර්තමාන ආර්ථික තත්ත්වය හමුවේ ඔවුනට සැපයිය හැක්කේ ගෑස් මෙට්‍රික් ටොන් 6600 ප්‍රමාණයක් බවත් එය සැපයිය හැක්කේ නෞකා ගාස්තු $112 කට බවත් සඳහන් කර ඇති අතර එම ප්‍රමාණය දින 5 දෛනික අවශ්‍යතා සඳහා සෑහෙන නමුත් ,වර්තමාන අධික ඉල්ලුමට කිසිසේත් ප්‍රමාණවත් නොවන බව ලිට්රෝ ගෑස් ලංකා සමාගම දන්වා සිටී.

ඉහත මිල කැඳවීමේදී දෙවෙනි අඩු මිල ගණන් සැපයූ OQ Trading සමාගමට මාස හතරක ශ්‍රී ලාංකීය ගෑස් අවශ්‍යතාවය වන මෙට්‍රික් 100,000 ප්‍රමාණයක් නෞකා ගාස්තු $129 කට සපුරාලිය හැකි බව දැනුම් දී ඇත.

ඉහත කරුණු සලකා බලා, වර්තමාන ගෑස් හිඟය සහ පෝලිං නවතා සාමාන්‍ය ජන ජීවිතය යථා තත්ත්වයකට පත් කිරීමට 2022 /06/ 08 අමාත්‍ය මණ්ඩලයේ මගින් තාවකාලික සැපයුම සඳහා OQ Trading සමාගම සමග ගිවිසුම් ගත වෙන ලෙසටත්, ශ්‍රී ලංකා රජයට වර්තමානයේදී ඇති මුල්‍ය අර්බුදය සැලකිල්ලට ගෙන ක්‍රියා කර හැකි ගිවිසුමකට එළඹීම සඳහා, Siam Gas කොන්ත්‍රාත්තුව අවසන් කොට නව ටෙන්ඩරයක් ක්‍රියාත්මක කරන ලෙස දැනුම් දුන් බව ලිට්රෝ ගෑස් ලංකා සමාගම ප්‍රකාශ කර සිටී.

OQ Trading හා Siam Gas අතර නැව් ගාස්තුවල පරතරය ඩොලර් 17ක් වන අතර එහි බලපෑම 12.5 ගෘහස්ථ ගෑස් සිලින්ඩරයක් සඳහා රු .77.50 වේ. අඛණ්ඩ ගෑස් සැපයුම ලබාදීම මෙම අවස්ථාවේදී ඉතා වැදගත් බව ලිට්රෝ සමාගම පවසයි.

නාගයන් නයි වෙන හැටි මෙන්න !

එසේ නම් ,

2022-2023 සඳහා ලිට්රෝ ගෑස් ලංකා සමාගමට ගෑස් මෙට්‍රික් ටොන් 280000ක් මිලදී ගැනීම වෙනුවෙන් ජාත්‍යන්තර ටෙන්ඩරයක් ක්‍රියාත්මක වූ බව රහසක් නොවේ.

2022/03/16 අවසන් වූ එහි අඩුම ලන්සුව siam ගෑස් සමාගමට ගෑස් මෙට්‍රික් ටොන් එකක් සඳහා නැව් ගාස්තු ඇමරිකානු ඩොලර් 96ක් වශයෙන් දැක්වීම ත් රහසක් නොවේ.

ප්‍රශ්නය වන්නේ මේ ප්‍රසිද්ධ කරුණු මෙන්ම , 2022 මැයි මස 03 ලිට්‍රෝ ගෑස් සමාගම කැබිනට් අනුමැතියෙන් Siam සමාගමට එම සමාගම තෝරා ගත්තා යැයි යොමුකළ ලිපියෙහි දිනය පමණක් දැන සිටීමය. අනිත් කිසිවක් නොදැන සිටීමය.

අවම වශයෙන් ගිවිසුම් ප්‍රකාරව සැපයුම්කරුගේ (Siam) ආරක්ෂාව සම්බන්ධව siam සමාගම ණයවර ලිපි ඉල්ලා ඇතිබ චෝදනා නගන්නන් කියන්නේ නැත.

එකී ලියවිලි සාමාන්‍ය තත්ත්වයක මෙන් නිකුත් කළහැකි තැනක ආර්ථික ය නැත. ඒ බවත් චෝදනාකරුවන් දන්නේ නැද්ද ?

Saim ඉල්ලා සිටි ලියවිලි සූදානම් කිරීමට (SBLC) යම් කාලයක් ගතවෙන බැවින් ටෙන්ඩර ලන්සු ගත මුදල වන ගෑස් මෙට්‍රික් ටොන් එකක් සඳහා ඩොලර් 96 කට හදිසි තත්ත්වයක් සේ සලකා ජූනි මාසය සඳහා ගෑස් මෙට්‍රික් ටොන් 15000ක් ලබා දෙන ලෙස ලිට්‍රෝ ගෑස් සමාගම siam සමාගමෙන් ඉල්ලීමක් කළ බව චෝදකයන් දන්නේ නැද්ද ?

එම ඉල්ලීම siam සමාගම ප්‍රතිකේෂ්ප කළ බව චෝදකයන් දන්නේ නැද්ද ?

2022 මැයි මස 09 ලිට්රෝ ගෑස් ලංකා සමාගමෙන් ඩොලර් මිලියන 30 ක ණයවර ලියවිල්ලක් ( SBLC) ජාත්‍යන්තර බැංකුවක් හරහා නිකුත් කරන ලෙසත් එය නිකුත් කරනා තෙක් ගෑස් ලබා දිය නොහැකි බව siam සඳහන් කර ඇති බව චෝදකයන් දන්නේ නැද්ද ?

එසේම ණයවර ලිපිය නිකුත් කළත් ගෑස් මෙට්‍රික් ටොන් 15000 ලබා දිය නොහැකි බවත් ලබාදීමට හැකියාව ඇත්තේ ගෑස් මෙට්‍රික් ටොන් 6600 ක් පමණක් බවත් දන්වා ඇති බව චෝදකයන් දන්නේ නැද්ද ?

එම ප්‍රමාණය දෙන්නේද මෙට්‍රික් ටොන් එක ඩොලර් 96 බැගින් නොව ඩොලර් 112 බැගින් බව චෝදකයන් දන්නේ නැද්ද ?

හදිසි මිලදී ගැනීම සඳහා දෙවෙනි අඩුම ලන්සුව හිමි ඕමාන් ට්‍රේඩින් ආයතනයෙන් ( OQ Trading) ගෑස් මෙට්‍රික් ටොන් 15000ක් හදිසි මිලදී ගැනීමට විමසූ විට අවම වශයෙන් ගෑස් මෙට්‍රික් ටොන් 100,000 ක්වත් මිලදී ගත යුතු බව දැන්වූ බව චෝදකයන් දන්නේ නැද්ද ?

එහිදී එම සමාගම දැන්වූ මිල පළමු ටෙන්ඩරය සඳහා සහය නිකුත්කළ මිලට සමාන බවත් චෝදකයන් දන්නේ නැද්ද ?

2020 මැයි මස 31 දින හෝ ඊට ආසන්න දිනක එවකට ලිට්‍රෝ සභාපති විජිත හේරත් විසින් හදිසි අවස්ථාවේදී ඕමාන් ට්‍රේඩින් ආයතනයෙන් ගෑස් ලබාගැනීමට මූල්‍යමය පහසුකම් සම්පාදනය කර දෙන ලෙස මුදල් අමාත්‍යාංශයට ලිපියක් යොමුකළ බව චෝදකයන් දන්නේ නැද්ද ?

2022 /06/08 කැබිනට් මණ්ඩල සාකච්ඡාවේදී ගනුලැබූ තීන්දු තීරණ ගැන චෝදකයන් දන්නේ නැද්ද ?

ඒ බව සොයා බැලීමක් කළා නම් මේ හදිසි අවශ්‍යතා මිලදී ගැනීමක් මිස මූලික ටෙන්ඩරය ලබා දීමක් නොවන බව දැනගන්නට තිබිණ .

එසේම , Siam ගෑස් සමාගම ඉවත් වූයේ කොමිස් හුටපටයක් නිසා නොවන බවත් ඊට හේතුව මෙරට රජයට එම සමාගම වෙනුවෙන් ණයවර ලිපි නිකුත් කිරීමේ හැකියාවක් නොතිබුණු නිසා බවත් දැනගන්නට තිබිණ .

වැඩේ කියන්නේ මේ කිසිවක් නොසොය, අහස කඩා වැටුණෝ දේශපාලනය ඉදිරියට පැමිණ තිබීමය . එවැනි උදවිය සහ රාජපක්ෂවරුන් අතර වෙනසක් නැත. දෙගොල්ලොම කරන්නේ අවස්ථාව බලා ජනතාව රවටා ගැනීමය.

ශ්‍රී ලංකාවේ වත්මන් තත්ත්වය පිළිබඳ ඉන්දීය පාර්ලිමේන්තු උපදේශක කාරක සභාවේ සාමාජිකයින්ගේ ප්‍රධානත්වයෙන් විශේෂ සාකච්ඡාවක් පවත්වා තිබෙන බව වාර්තා වෙයි .

ට්විටර් පණිවිඩයක් නිකුත් කරමින් ඉන්දීය විදේශ අමාත්‍ය ආචාර්ය එස් ජයශංකර් සඳහන් කරන්නේ ශ්‍රී ලංකාව මුහුණ පා සිටින අර්බුදකාරී තත්ත්වය සම්බන්ධයෙන් සහ ඒ හමුවේ ඉන්දියාව සතු කාර්යභාරය පිළිබඳව ධනාත්මක වාතාවරණයක් තුළ සාර්ථක සාකච්ඡාවක් පැවැති බවයි.

මෙම දුෂ්කර අවස්ථාවේදී අසල්වැසි ශ්‍රී ලංකාව සමඟ නැගී සිටීම සඳහා සහයෝගයෙන් කටයුතු කිරීමට පාර්ලිමේන්තු උපදේශක කාරක සභාව ඒකමතිකව එකග වූ බවත් ඉන්දීය විදේශ කටයුතු අමාත්‍යවරයා නිකුත් කළ ට්විටර් පණිවිඩයේ වැඩිදුරටත් දැක්වෙයි.

රජයේ පාලන මිලට ජුනි 19 සිට සහල් නිකුත් කරන බව සහල් නිෂ්පාදක ඩඩ්ලි සිරසේන පවසයි .

මෙරට අංක එකේ සහල් මෝල් හිමියා ලෙස සැලකෙන ඩඩ්ලි සිරිසේන මේ බව සඳහන් කර සිටියේ ඊයේ (18) පැවති මාධ්‍ය හමුවකදී අදහස් දක්වමින් ය.

රජය විසින් පනවා ඇති මිල ගනන් යටතේ තමන් සහල් නිකුත් කරන බවත් අනෙකුත් සහල් මෝල් හිමියන් වෙතින් ද එම මිලට සහල් නිකුත් කරන්නැයි ඉල්ලා සිටින බවත් එහිදී ඔහු පැවසීය .

ඒ අනුව නාඩු සහල් කිලෝව රුපියල් 220 ද,සම්බා කිලෝව රුපියල් 230 සහ කීරි සම්බා කිලෝව රුපියල් 260 වෙළෙඳ පොලට නිකුත් කරන බවත් ඩඩ්ලි සිරිසෙන කියා සිටියේය.

එහිදී වැඩිදුරටත් අදහස් දක්වමින් ඩඩ්ලි සිරිසේන පවසා සිටියේ මාස තුනකට සහල් පාලනය කිරීමේ බලය ජනතාවට බාර දෙන බවත් කෙසේ වුවත් මාස තුනක් යන තෙක් කෑම වේල් අඩු කිරීම නොව කන ප්‍රමාණය අඩුකරමු කියාය.

ප්‍රධාන පෙළේ හාල් මෝල් හිමියන් ඉහගෙන කයි !

මේ අතර දේශය පුවත්පත වාර්තා කර ඇත්තේ ,ඇසුරුම් කළ සහල් බෑගයේ රජයේ පාලන මිල සඳහන් කර එම මිලට වඩා වැඩි ගණනකට සහල් අලෙවි කිරීමට පොළොන්නරුවේ ප්‍රධාන සහල් මෝල් හිමියන් කටයුතු කරන බැවින් වහා ඔවුන් වැටලීමට ලක් කළ යුතු බව නම් සඳහන් නොකළ සහල් තොග වෙළෙඳුන් ගණනාවක්ම පැවසූ බවය.

කිලෝවක් රු. 260/- ට පාලන මිල නියම කර ඇති විවිධ සම්බා වර්ග කිලෝ 5ක බෑගයක් තම සමාගම් විසින් සපයන්නේ කිලෝව රු. 300/- මිලට බව පවසන එම සහල් මෝල් හිමියන් සිල්ලර වෙළෙඳුන්ට එම සහල් කිලෝව රු. 310/- බැගින් අලෙවි කළ හැකි බව පවසන්නේ යැයිද සඳහන් කළ බවත් අදාළ පුවතේ සඳහන් වෙයි.

දේශය පුවත්පත වැඩිදුරටත් මෙසේද සඳහන් කර ඇත .

මෙම ජාවාරමේ නියුතු මහා පරිමාණ මෝල් හිමියන් තොග වෙළෙඳුන්ට සහල් අලෙවි කරන විට සපයන බිල්පතේ සඳහන් කරන්නේ පාලන මිල පමණි. ඉතිරි මුදල් අතයට ගෙවීම සිදු කළ යුතු යැයිද අප වෙත කරුණු දැක්වූ තොග වෙළෙන්ඳෝ සඳහන් කළෝය.

එබැවින් රජයේ පාලන මිල ව්‍යාජ ලෙස බෑගයේ සඳහන් කර ඊට වඩා වැඩි මිලකට සහල් අලෙවි කරන පොළොන්නරුවේ ජාවාරම්කාර සහල් මෝල් හිමියන්ට එරෙහිව වහා නීතිය ක්‍රියාත්මක කරන මෙන්ද එම තොග වෙළෙන්ඳෝ ඉල්ලා සිටිති. එසේම සහල් තොග රුස්කොට අලෙවි නොකර සගවාගෙන සිටින්නන්ද එලෙසම වැටලිය යුතු බවද තොග වෙළෙන්දෝ, පාරි‌භෝගිකයෝ සහ සිල්ලර වෙළෙඳුන් ඉල්ලා සිටිති.

පාරිභෝගික අධිකාරිය මෙකී මහා ජාවාරම්කරුවන් වටලන්නේ නැතිව සිල්ලර වෙළෙඳුන් පසුපස යාමෙන් පමණක් සහල් මාෆියාව එළිපිට සිදු කරන මෙම හොර ජාවාරම මර්දනය කළ නොහැකි බව ඔවුහු වැඩිදුරටත් කීහ.

මෙරටට අවශ්‍ය ඉන්ධන ඉල්ලුම සැපයීම ලංකා ඛනිජ තෙල් සංස්ථාවට පමණක් සිදුකළ නොහැකි බවත් ලංකා IOC වැනි තවත් සමාගම් මෙරට ඉන්ධන සැපයුම් ක්‍රියාවලියට එක් කර ගැනීම සඳහා වන කැබිනට් පත්‍රිකාවක් ඉදිරිපත් කිරිමට කටයුතු කරන බවත් විදුලි බල සහ බලශක්ති අමාත්‍ය කාංචන විජේසේකර පවසයි .

එසේම ඉදිරි දින 3-4 තුලදී පෙට්ට්‍රල් ලබා ගැනීම සඳහා පෝලිම්වල රැඳී නොසිටින ලෙසත් අමාත්‍යවරයා ජනතාවගෙන් ඉල්ලා සිටියි.

අද වන විට මෙරට ඇති ඉන්ධන සංචිතය සම්බන්ධයෙන් ද අමාත්‍යවරයා අදහස් දක්වා ඇත.

ඒ අනුව මෙරට සතුව, ඩීසල් මෙට්‍රික් ටොන් 40,000ක්, ඔක්ටේන් 92 වර්ගයේ පෙට්ට්‍රල් මෙට්‍රික් ටොන් 4,000ක්, ඔක්ටේන් 95 වර්ගයේ පෙට්‍රල් මෙට්‍රික් ටොන් 8,300ක් CPC සතුව ඇති අතර LIOC සමාගම සතුව පෙට්ට්‍රල් මෙට්ට්‍රික් ටොන් 10,000ක් ඇත .

ඉදිරියේදී මෙරටට පැමිණීමට නියමිත ඉන්ධන නෞකාවන් ලෙස මෙම මස 23 වෙනිදා පෙට්ට්‍රල් රැගත් නෞකාවක් සහ 24 වෙනිදා ඩීසල් රැගත් නෞකාවක් පැමිණීමට නියමිත බවත් අමාත්‍ය කාංචන විජේසේකර පවසයි .

මෙම මස 29 වෙනිදා සහ ජුලී මස 10 වෙනිදා බොර තෙල් රැගත් නෞකාවන් දෙකක් පැමිණීමට නියමිත බවත් ඔහු පවසයි .