V2025

පුවත්

අද රාත්‍රී‍යේ සිට 25 අලුයම දක්වා යළිත් සංචරණ සීමා

අද (23) රාත්‍රී 10.00 සිට යළිත් රටපුරා සංචරණ සීමා ක්‍රියාත්මක වන බව යුද හමුදාපති ජෙනරල් ශවේන්ද්‍ර සිල්වා පවසයි.

 එලෙස පනවන සංචරණ සීමා එළඹෙන 25 වනදා එනම් සිකුරාදා අලුයම 4.00 දක්වා බලපැවැත්වෙන වේ.

අද (23) දිනයේ මේ දක්වා කොරෝනා ආසාදිතයින් 1,358 දෙනෙකු හඳුනා ගෙන තිබේ.

ඒ සමග මෙරටින් වාර්තා වන සමස්ත කොරෝනා ආසාදිතයින් සංඛ්‍යාව 245,271 ක් දක්වා ඉහළ ගොස් ඇත.

දීර්ඝ කලක් රක්ෂිත බන්ධනාගාරවල සිටින තරුණ ජීවිතවලට ඇමති නාමල් සාධාරණයක් ඉල්ලයි

තීන්දුවක් නොමැතිව දීර්ඝ කාලයක් රක්ෂිත බන්ධනාගාරගතව සිටින තරුණ සැකකරුවන්ගේ ජීවිතවලට යම් සාධාරණයක් ඉටු කරන්නැයි තරුණ හා ක්‍රීඩා අමාත්‍ය නාමල් රාජපක්ෂ  ඊයේ (22) පාර්ලිමේන්තුවේ දී විශේෂ ප්‍රකාශයක් කරමින් ඉල්ලා සිටියේය.

නඩු නිමිත්තක්වත් නොමැතිව රක්ෂිත බන්ධනාගාරවල ඉතා දීර්ඝ කාලයක් ගත කරන පිරිස් සිටින බව කියාසිටි අමාත්‍ය නාමල් රාජපක්ෂ, නඩු තීන්දුවේ දඬුවමට වැඩි කාලයක් රක්ෂිත බන්ධනාගාරයේ ගත කළ පුද්ගලයන් සිටින බව අනාවරණය කළේය.

මේ පිරිස අතර විශාල සංඛ්‍යාවක් එල්.ටී.ටී.ඊ සැකකරුවන් ද සිටින බව සඳහන් කළ අමාත්‍යතුමා, මේ අයට යම් සාධාරණයක් ඉටු කරන්නැයි කතානායක මහින්ද යාපා අබේවර්ධන ගෙන් ඉල්ලා සිටියේය.

අමාත්‍ය නාමල් රාජපක්ෂ විශේෂ ප්‍රකාශයක් කරමින් ගෙන ආ මෙම යෝජනාවට ආශිර්වාද කරමින් සහය දෙන බව පාර්ලිමේන්තු මන්ත්‍රී ෆීල්ඩ් මාර්ෂල් සරත් ෆොන්සේකා  ප්‍රකාශ කළ අතර අකිල ඉලංකෙයි තමිල් ක්‍රොංගසයේ මන්ත්‍රී ගජේන්ද්‍ර පොන්නම්බලම් ඊට වෙනස් මතයක් දරමින් කරුණු ඉදිරිපත් කළේය.

තරුණ කටයුතු අමාත්‍යවරයා ලෙස ගෙන ආ මෙම යෝජනාව දේශපාලන කෝණයෙන් බැලීමෙන් වළකින්නැයි ඉල්ලා සිටි අමාත්‍ය නාමල් රාජපක්ෂ, පොන්නම්බලම් මන්ත්‍රිවරයා ඇතුළු එම සන්ධානයේ මන්ත්‍රීවරුන් සහය දුන් පසුගිය ආණ්ඩු කාලයේදීවත් මෙවැනි සාධාරණයක් ඉටු කර ගැනීමට නොහැකිවුණ නිසා මේ සඳහා දැන් ලැබෙන විසඳුමකින් ඔවුන්ගේ දේශපාලනය අභියෝගයකට ලක්වනු ඇති බවට ඉඟි පළ කළේය.

තම පියාටත් උගන්වාගන්න බැරිවුණ පාඩමක් තමන් රක්ෂිත බන්ධනාගාරගත කරමින් අද විපක්ෂය එදා ඔවුන්ගේ ආණ්ඩු කාලය තුළ තමන්ට ඉගැන්වූ බව සිහිපත් කළ අමාත්‍ය නාමල් රාජපක්ෂ, ආණ්ඩුව කිසිවිටෙකත් ජනතා අසාධාරණයක් හමුවේ නිහඬව නොසිටින බවට විශ්වාසය පළ කළේය.

අමාත්‍ය නාමල් රාජපක්ෂ  පාර්ලිමේන්තුවේ දී කළ සම්පූර්ණ කතාව මෙසේය.

ගරු කථානායකතුමනි,

තරුණ හා ක්‍රීඩා අමාත්‍යවරයා විධියට රටේ තරුණ කොට්ඨාශයකට බලපාන සුවිශේෂී කාරණා කිහිපයක් පිළිබදව ඔබතුමාගේ ගරු අවධානයටත්, අධිකරණ ඇමතිතුමාගේ අවධානයටත් යොමු කරන්න මම බලාපොරොත්තු වෙන්නේ.

විශේෂයෙන්ම ගරු කථානායකතුමනි ඔබතුමා දන්නවා අපේ රටේ අධිකරණ පද්ධතිය තුළ සහ බන්ධනාගාර තුළ විශාල තරුණ පිරිසක් ඉන්නවා යම් යම් ප්‍රමාදවීම් නිසා ඇප ලබා ගැනීමට නොහැකි වූ සහ තමන්ගේ නඩු කටයුතු අවසන් කර ගැනීමට නොහැකි වූ අය.

ඒ අතර අපි දන්නවා ගරු කථානායකතුමනි, වසර ගණනාවක් එල්.ටී.ටී.ඊ ත්‍රස්තවාදී සැක පිට විශාල පිරිසක් රක්ෂිත බන්ධනාගාර ගත කර ඉන්නවා.

ගරු කථානායකතුමනි,

පසුගිය යහපාලන ආණ්ඩුව කාලයේදී අපිවත් රක්ෂිත බන්ධනාගාරගත කළා යම් කාල සීමාවක්.

මම විතරක් නොවෙයි. ජොන්ස්ටන් ප්‍රනාන්දු අමාත්‍යතුමා, උදය ගම්මන්පිල අමාත්‍යතුමා, විමල් වීරවංශ අමාත්‍යාතුමා, රෝහිත අබේගුණවර්ධන අමාත්‍යතුමා ඇතුලු විශාල පිරිසක්.

ඒ වෙලාවේ අපි බන්ධනාගාරය තුළ තිබෙන තත්ත්වය දැක්කා. ඔබතුමාලාට පිං සිද්ධ වෙන්න.

මම හැමදාම කියනවා අපේ තාත්තාටත් එතුමාට මට උගන්නන්න බැරි වෙච්ච පාඩමක් මෙතුමලා මට ඉගැන්නුවා.

ඒ තමයි මේ රටේ රක්ෂිත බන්ධනාගාරගතවන ජනතාව විඳින දුක ප්‍රායෝගික අත්දැකීමක් ඔබතුමාලා මට ලබා දුන්නා. ඉතිං මේ රක්ෂිත බන්ධනාගාරගත වෙලා ඉන්න පිරිස විශාල ප්‍රමාණයක් ඉන්නවා ගරු කථානායකතුමනි, නඩු නිමිත්තක්වත් නැති අය.

ඒ අතර විශේෂයෙන්ම එල්.ටී.ටී.ඊ සැක පිට විශාල ප්‍රමාණයක් ඉන්නවා. දීර්ඝ කාලයක් රක්ෂිත බන්ධනාගාරගතව නඩු විභාගවලින් අනතුරුව දඩුවම් විඳින සංඛ්‍යාව 35 යි.

හැබැයි මේ 35 දෙනාගෙන් බහුතරයක් තමන්ට ලැබිලා තිබෙන දඬුවමට වඩා වැඩි කාලයක් රිමාන්ඩ් බන්ධනාගාරයේ ඉදලා තිබෙනවා.

ඒ කියන්නේ තමන්ට ලැබිලා තිබෙන නඩු තීන්දුවේ දඬුවමට වඩා වැඩි කාල සීමාවක් රිමාන්ඩ් බන්ධනාගාරයේ ඉඳලා තිබෙනවා.

ඒ එක්කම දීර්ඝ කාලයක් රක්ෂිත බන්ධනාගාරව සිටිමින් දැනට මහාධිකරණවල චෝදනා ගොනු කර තිබෙන නඩු 38 ක් තිබෙනවා.

ඒ කියන්නේ අවුරුදු 20 කට වැඩි කාලයක් මේ නඩු අහනවා. හැබැයි ඒ අය තවමත් රක්ෂිත බන්ධනාගාරගත කොට තමයි මේ නඩු අහන්නේ. ගරු කථානායකතුමනි,

ඒ වගේම කිසිම නඩුවක් නොදාපු 13 දෙනෙකුත් ඉන්නවා. ඒ අතර පැමිණිලි කටයුතු, විභාග කටයුතු අවසන් කරලා අධි චෝදනා දාන්නෙ නැතිව 116 දෙනෙක් ඉන්නවා.

ඉතිං මේ අනුව බලනකොට ගරු කථානායකතුමනි, විශාල තරුණ පිරිසකගේ ජීවිත වල නොයෙක් වැරදි ඉතිහාසයක් තිබෙනවා වෙන්න පුළුවන්, සමහරු නොදැනුවත් කමින් වෙන්න පුලුවන්, සමහරු දැනුවත්ව වෙන්න පුලුවන්. හැබැයි වසර ගණනාවක් රක්ෂිත බන්ධනාගාර ගත වෙලා ඉන්නවා.

එක්කෝ මේ අයට සාධාරණව නඩු අහන්න ඕනේ. නඩු අහලා දඬුවම් දෙන්න ඕනේ. එහෙම නැත්නම් අධි චෝදනා දාන්න ඕනේ. එහෙම නැත්නම් අපිට මතකයි මහින්ද රාජපක්ෂ ජනාධිපතිතුමාගේ ආණ්ඩුවේ 12,000 කට වැඩි පිරිසක් පුනුරුත්ථාපනය කරලා සමාජගත කළා.

ඒ අතර ගරු කථානායකතුමනි, 3500 කට අපි සිවිල් ආරක්ෂක බලකායේ රජයේ රැකියා දුන්නා. හැබැයි ඒ ඒ එල්.ටී.ටී.ඊ ත්‍රස්තවාදයේ අවසාන කාලයේ සටන් බිමේ හිටපු අය.

හැබැයි මේ තියෙන බොහෝ පිරිස් අපිට බන්ධනාගාරයේ දී හමු වුනාම ඒ අයත් එක්ක කතා කරනකොට සමහරුන් රක්ෂිත බන්ධනාගාරගත වෙච්ච කාල සීමාව මගේ වයසටත් වැඩී. මේක තමා ඇත්ත කතාව.

හැබැයි අද වෙනකල් චෝදනා ගොනු කර ගන්න අපොහොසත් වෙලා තිබෙනවා. ඒ හින්දා ගරු කථානායකතුමනි, මම කාරුණිකව ඔබතුමාගේ අවධානය යොමු කරන්නේ මේ අයට යම් සාධාරණයක් වෙන්න ඕනේ.

එක්කෝ මේ අයගේ නඩු අහලා අවසන් කරන්න ඕනේ. එහෙමත් නැත්නම් මේ අය පුනුරුත්ථාපනය කරන්න ඕනේ. 12,000 ක් පුනුරුත්ථාපනය කරන්න පුළුවන් වුණා.

මම ඔබතුමාගේ අවධානයට එක කතාවක් කියන්නම්. බන්ධනාගාරයේදී හමුවුණ එක්තරා පුද්ගලයෙක්ගේ සිදුවීමක්.

ලංකාවේ ප්‍රභූ ඝාතනයකට සැක පිට ගෙනැල්ලා ඔහු වැරදිකාරයා වෙලා තිබෙනවා. ඔහුගේ කතාව අහනකොට ගරු කථානායකතුමනි, ඔහු කරපු වැරැද්ද තමයි ගහක අත්තක් කපපු එක. ගහේ අත්ත කපපු එක.

දැන් ගහේ අත්ත කපපු කෙනා වැරදිකාරයා වෙලා හිරේ ඉන්නවා. ප්‍රධාන සැකකාරයා සමාව අරගෙන ගෙදර ගිහිල්ලා තිබෙනවා. එතකොට ගහේ අත්ත කපපු කෙනා ඇතුලේ. වැඩේ කරපු කෙනා එළියෙ.

මේ නිසා මම ගෞරවයෙන් ඉල්ලන්නේ, ගරු අධිකරණ අමාත්‍යතුමා ඉන්නවා 12,500 ක් පුනුරුත්ථාපනය කරලා 3500ක් අපිට සිවිල් ආරක්ෂක බලකායට ගන්න පුලුවන් නම් මේ ඉන්න අයගේ නඩු ගොනු දිහා ගරු අමාත්‍යතුමනි, සානුකම්පිතව බලන්න.

අපි දන්නවා ඒ දාලා තියෙන චෝදනාවලට අනුකූලව අධිකරණයට ඇප දෙන්න බැහැ. එහෙමනම් නීතිපතිවරයාට යන්න ඕනේ. නීතිපතිවරයා මාර්ගයෙන් හරි , වෙනත් මාර්ගයකින් හරි, පුනුරුත්ථාපනය කරන ක්‍රමවේදයකට හරි ගරු අමාත්‍යතුමනි, මේ අයට සාධාරණයක් කරලා දෙන්න කියන කාරුණික ඉල්ලීම මම කරනවා.

අපේ ආණ්ඩුව කිසි දවසක ජනතාවට අසාධාරණයක් වෙන තැනක නිහඬව ඉන්නේ නෑ කියන එකත් මතක් කරන්න ඕනේ යැයි අමාත්‍යතුමා පැවසීය.

රනිල් ඉල්ලපු විවාදයට : සජබ මන්ත්‍රීලාත් ඔලුව වනයි !

ලැබුණු ජනවරම හරියාකාරව යොදවන්නේ නැතිව රට හමුදාකරණයට ගෙන යමින් ඇති බවත්  පාර්ලිමේන්තු බලතල ක්‍රියාත්මක නොකිරීම සම්බන්ධයෙන් පාර්ලිමේන්තුවේ විවාදයක් අවශ්‍ය බවත් හිටපු අග්‍රාමාත්‍ය , එක්සත් ජාතික පක්ෂ නායක රනිල් වික්‍රමසිංහ අවධාරණය කරයි.
 
පාර්ලිමේන්තු මන්ත්‍රීවරයෙකු ලෙස අද උදෑසන කථානායකවරයා ඉදිරියේ දිවුරුම් දීමෙන් පසුව අමාත්‍ය බන්දුල ගුණවර්ධන අමාත්‍යවරයාගේ ප්‍රකාශයකට අදහස් දක්වමින් හිටපු අග්‍රාමාත්‍ය පාර්ලිමේන්තු මන්ත්‍රී රනිල් වික්‍රමසිංහ බව සඳහන් කළේය.
 
මෙම විවාදය ඉල්ලු අවස්ථාවේ හිටපු අග්‍රාමාත්‍යවරයා තමා වටා සිටි සමගි ජනබලවේගය මන්ත්‍රී පිරිසේ අදහසද ඒ සම්බන්ධව විමසූ අතර එය ඔවුන් අනුමත කරන බව හිසෙන් සංඥා කරනු දක්නට ලැබිණ.
 
අද වන විට ප්‍රශ්න ගණනාවක් එකට එකතු වී ඇති බවත් ආර්ථික අර්බුදයට මුලික හේතුව පවතින කොවිඩ් තත්ත්වය බවත්, ඒ සඳහා ක්‍රියාත්මක කාර්ය සාධක බළකාය සම්පූර්ණයෙන් අසාර්ථක වී ඇති බවත් හිටපු අග්‍රාමාත්‍යවරයා සඳහන් කළේය.
 
තවදුරටත් පාර්ලිමේන්තුව ඇමතු හිටපු අග්‍රාමාත්‍යවරයා  ආණ්ඩුක්‍රම ව්‍යවස්ථාවට අනුව රටේ ප්‍රශ්න ගැන වගකීම තිබිය යුත්තේ කැබිනට් මණ්ඩලයට සහ පාර්ලිමේන්තුවට බව පෙන්වා දුන්නේය.
 
මිලිටරිකරණයෙන් රට පාලනය කිරීම වැරදි සහගත බවද ඔහු එහිදී අවදාරණය කර සිටියේය.

"මේ කාර්ය සාධක බළකායට ඉදිරියට යන්න බෑ. අසාර්ථ වෙලා තියෙන්නේ. හැමදේම වැඩිවෙලා තියෙන්නේ. අපේ ව්‍යවස්ථාව අනුව මේ වගකීම තියෙන්න ඕනේ කැබිනට් මණ්ඩලයටයි. කැබිනට් මණ්ඩලය වගකියන පාර්ලිමේන්තුවටයි. ඇයි කැබිනට් මණ්ඩලයට මේ බලතළ දෙන්නේ නැත්තේ.
 
ව්‍යවස්ථාවට අනුව ආණ්ඩුව පාලනය කරන්න පුළුවන් කැබිනට් මණ්ඩලයට විතරයි. අගමැතිතුමා මෙතෙන ඉන්නවා ඇමතිවරුත් මෙතෙන ඉන්නවා. ඔබ තුමාලා භාරගන්න. වැරදි වුණොත් අපිට පුළුවන් මෙතෙන ඇවිත් කෑගහන්න. අඩු ගානේ පෝස්ටර් හරි උස්සන්න.
 
ඇයි මේක කැබිනට් මණ්ඩලයට භාරනොදෙන්නේ. WHO සංවිධානයටත් විශේෂඥ කණ්ඩායමක් තියෙනවා. ලංකාවේ ඒක නෑ. කොමිටියක් තියෙන්නේ. ඒක භාරදීලා තියෙන්නේ දෙපාර්තමේන්තු ප්‍රධානියෙක් ට. හමුදාපති කියන්නේ දෙපාර්තමේන්තු ප්‍රධානියෙක්. කොහොම ද එතුමා මේ වැඩකටයුතු කරන්නේ.
 
ලේකම්වරුන්ට නියෝග දෙන්න පුළුවන් ඇමතිට නැත්තන් කැබිනට් මණ්ඩලයට විතරයි. දෙපාර්තමේන්තු ප්‍රධානීන්ට නියෝග දෙන්නේ ලේකම්වරු ඇමතිවරුන්ගේ තත්ත්වය මත. ඇයි බලතල මේ ක්‍රියාත්මක නොවෙන්නේ. අපි කියන්නේ ඒ බලතල ගන්න." "ආයෝජන මණ්ඩල හමුවට මුදල් ඇමති හරි රාජ්‍ය මුදල් අමාත්‍ය හරි යන්න තිබුණා. ඒකට හමුදාපති ගිහින් කතා කරලා, හිටපු අයත් නැගිටලා ගිහින්."
 
එකම විකල්පය : IMF සමඟ ගනුදෙනුවට යන්න !

රට මේ වන විට පත්ව තිබෙන ආර්ථික අර්බුදයෙන් ගොඩ ඒමට නම් ඇති එකම මාර්ගය නැවතත් ජාත්‍යන්තර මූල්‍ය අරමුදල
සමඟ ගනුදෙනු කිරීම බවත් ඔහු පැවසීය. 

 අතීතය ගැන කථා කිරීමෙන් රට පත්ව සිටින තත්ත්වයෙන් ගොඩ ආ නොහැකි බව ද සඳහන් කර සිටි එජාප නායකයා, ජාත්‍යන්තර මූල්‍ය අරමුදල සමඟ ගනුදෙනු කිරීමට රජය අකමැති නම් එයට ඇති විකල්පය කුමක් දැයි හෙළි කරන ලෙස ද ඉල්ලා සිටියේය.

ආණ්ඩුව කළ එකම දෙය ලොකු මිනිහාට බදු සහනය දී පොඩි මිනිහාට බඩගින්න දීම යැයි ද  හිටපු අගමැති රනිල් වික්‍රමසිංහ මෙහිදී පැවසීය.
 

 

බැසිල් ඇවිත් !

සිය නිවස බලා පිටත්ව ගොස්සිටි පොදුජන පෙරමුණේ ජාතික සංවිධායක බැසිල් රාජපක්ෂ අද (23) මෙරටට පැමිණෙනු ඇති බවත් ඔහු ඒ සඳහා ඊයේ ඇමරිකාවෙන් පිටත්ව ඇති බවත් දැනගන්නට ඇත.

නැව් ගිලුණත් යට නොගිය බැසිල් රෝහණ !  
 
බැසිල් රාජපක්ෂ මෙරටින් පිටත්ව ඇමරිකාවේ සිය නිවස බලාගොස් මාසයක් පමණ වන අතර ඒ කාලය තුළත් පුවත් මවන්නෙකු විය. බැසිල් ගෙදර ගියේ වැඩි සද්දයක් බද්දයක් නැතිවය. දේශපාලන ආරංචිමාර්ග අනුව බැසිල්ගේ ගමන දන සිටියේ කිහිපදෙනෙකු පමණය.  පිටත්ව ගිය පසුව පොදුජන පෙරමුණේ ප්‍රධාන ලේකම් මාධ්‍යවෙත කියා තිබුණේ බැසිල් ගියේ සුළු රෝගී තත්ත්වයකට ප්‍රතිකාර ගන්නට කියාය. නමුත් ඇමති නාමල් කිව්වේ බාප්පිට ඉහෙන් බහින රෝගයක් තිබුණේ නෑ කියාය. කොහොමින් කොහොම හරි ගිය දවසේ සිට ලංකා දේශපාලනයේ මාතෘකාවෙන් කොටසක් බැසිල් සතුවිය.
 
චන්දිමාල්ගේ උපන්දින සාදයේ සිට බස් හරව හරවා  පියුමි හංසමාලි ඇතුළු පිරිස නිරෝධායනයට ගිය නාටකය ආවත්, වරාය ඇමති රෝහිතගේ හැකියාව තහවුරු කළ එක්ස්ප්‍රස් පර්ල් නෞකාවේ ගින්න නිසා බටහිර මුහුද වැනසී - ධීවර කර්මාන්තයම අර්බුදයට ගියත් බැසිල් ගැන කතාව යටගියේ නැත.
 
කොයි දේටත් මුල්තැන හිටි බැසිල් රෝහණ !
 
සමහර විට ඒ කොවිඩ් මර්දන කටයුත්තේ මුල් වගකීම මෙන්ම ජනාධිපති කාර්ය සාධක බලකා කිහිපයක මුල්තැන බැසිල් සිටි නිසා වන්නට පුළුවන. කොහොමටත් බැසිල් ගෙදර ගියේ කොරෝනා තුන්වෙනි රැල්ල දරුණු ලෙස මෙරට තුළ මතුවෙන මොහොතේය. කොරෝනා මර්දන කටයුතු මුළුමනින්ම අවුල් කරගෙන තිබූ අතර එන්නත්කරණ වැඩසටහනත් පටන්ගත් තැනම අනාගෙන තිබිණ. අදටත් දෙවන මාත්‍රාව  ලබාදීම සඳහා ඇස්ට්‍රාසෙනෙකා එන්නත් ලක්ෂ 6 ක පමණ හිඟයක් පවතී. ඒ ගැන සුබ බලාපොරොත්තු දනවන පුවතක් ජපානය ඇසුරෙන් ජනාධිපති මාධ්‍ය ඒකකය හරහා නිවේදනය වූවත් ජපන් තානාපති කාර්යාලය කිව්වේ එවැන්නක් ගැන දැනුවත් නොමැති බවය. මාසයක් වසාගෙන හිටි රට විවෘත කරපු දවස වූ ජුනි 21  පමණක් කොරෝනා මරණ 71ක් වාර්තා කර තිබිණ. එන්නත්කරන වැඩ සටහන ගැන මොන කතාද ? දැන් කොරෝනා සංඛ්‍යා දත්ත ගැනත් කුමන්ත්‍රණ චෝදනා නැගෙමින් ඇත. වසංගත රෝග ඒකකයේ ප්‍රධානීන් රට හමුවේ ප්‍රසිද්ධියේ කුමන්ත්‍රණකරුවන් ලෙස චෝදනා ලබමින් ඇත. හෙට කවුරු කුමන්ත්‍රණ චෝදනා ලබනු ඇත්දැයි සෞඛ්‍ය කාර්ය මණ්ඩල පීඩනයෙන්ය.
 
ආර්ථිකේ හතේ හතනේ   බැසිල් රෝහණ !  
 
ගොවියන්ට පොහොර නැත. පොහොර නැති නිසා අස්වනු වෙනදා තරම්වත් විශ්වාස නැත. කාබනික යන නම ඇසුණු විට දැන් ගොවියන් අමතන්නේ කුනුහරපෙන්ය. කාබනික වැඩෙත් ප්‍රධානියා කර තිබුණේ බැසිල්ය. එහෙත් බැසිල් ගෙදර ගියේ ඊට පසුදාය. ධීවරයන්ට නැවේ ගින්න නිසා පමණක් නොව ඉන්ධන මිල ඉහළ යාමත් නිසා කබලෙන් ලිපට වැටී ඇත. ඉන්ධන මිලේ ඉතිහාසගත වැඩිවීම නිසා ආහාර ද්‍රව්‍ය පමණක් නොව අත්‍යාවශ්‍ය භාණ්ඩ හා සේවා රැසක මිල ඉහළ යන තත්ත්වයක් උද්ගතව ඇත. පාසල් විවෘත කරගන්නට වැඩපිළිවෙලක් නැතුව පමණක් නොව දරුවන්ට online ඉගෙන ගන්නත් data ප්‍රශ්නය. විශ්ව විද්‍යාල ප්‍රජාව පාරට බැස උද්ඝෝෂණයේය. පොලිසිය ඔවුන් සමඟ පඹයන් උස්සන සෙල්ලමේය. 
 
ඒ මදිවට යුරෝපා පාර්ලිමේන්තුව ලංකාව සම්බන්ධව යෝජනාවක් සම්මත කර ඇත. ඒ කියපු විදියට වෙනස් වුණේ නැත්නම් GSP + සහනය නැතිවීම අංක එකය. ඉතුරුවා පසුවටය. එසේම යුරෝපා පාර්ලිමේන්තුවෙන් පමණක් නොව  ජිනීවා මානව හිමිකම් කොමිසමේ මාධ්‍ය කමිටුව  වෙතින් නිවේදන පැමිණ ඇත්තේ හිරේ දාගත් ශානිගෙ සිට හිජාස් ඇතුළු පිරිස ගැන අවවාදාත්මක නිවේදන නිකුත් වෙමින් ඇත.
 
අම්මා මුත්තා කාලේ වැවක් හාරන විට චීන තොරන් ගසා චීන කතා අසා නැති නමුත් මුලින්ම එය අහන්න හම්බන්තොට ඇස්කන් පිංකර තිබිණ. ඒ අස්සේ වැව හාරන්න පැමිණි චීන ජාතිකයන්ගේ ඇඳුම් චීන හමුදා ඇඳුමට සමාන බවට මාධ්‍ය වාර්තා පලවෙමින් ඇත. ඒ සමඟ ඉන්දියාව කියන්නේ කලාපයේ චීන ක්‍රියාකාරකම් ඉන්දියාවේ ආරක්ෂාවට තර්ජනයක් බවය,එනිසා ශ්‍රී ලංකාව ආසන්නයේ ඇතුළු ඉන්දියානු සාගර කලාපය පුරා, සිය නිරීක්ෂණ කටයුතු වැඩි කිරීමට ‌‌,ප්‍රේඩේටර් (predator) වර්ගයේ ඩ්‍රෝන යානා යොදාගන්නා බවය. ඒ කියන්නේ ජාතික ආරක්ෂාව පමණක් නොව ස්වෛරීත්වය පවා අවධානමේ තත්වයක් කියා දේශපාලන විචාරකයන් අනතුරු අඟවමින් ඇත.
 
රටේ විදෙස් සංචිත ප්‍රමාණවත් වන්නේ මාස 3ක් වැනි කාලයකටය. එදාවේල රට දුවවමින් සිටින්නේ  බංගලිදේශයෙන් පවා අතමාරුවට සල්ලි ඉල්ලාගෙනය. පසුගිය වසර 9ක පමණ කාලය තුළ අච්චු ගැසූ මුදල් ප්‍රමාණය පසුගිය වසර 1 1/2 ක කාලය තුළ අච්චු ගසා ඇත. රටේ උද්ධමනය ඉහළ යාම ඒ හමුවේ අනිවාර්යය. රාජ්‍ය ආදායම් පවා මුළුමනින්ම බිඳගෙන ඇත.  රටේ ආර්ථිකය හොම්බෙන් යන්න පටන් ගෙන ඇති අතර දැන් පැමිණ ඇත්තේ ජනතාවට එය දැනෙන්න ගන්නා කාලයයි. 
  
නොකියා මාරු වෙලා ගියෙත් බැසිල් රෝහණ !
 
බැලූ බැල්මට සියල්ල අනාගෙන ඇත. වැඩිම ජනප්‍රසාදයක් සහිතව බලයගත් ආණ්ඩුව ඉක්මනින්ම අප්‍රසාදයට පත්වූ ආණ්ඩුව බවට පත්ව ඇත. ඔය අස්සේ බැසිල් චෝදනා ලබන්න ගත්තේ, සියලු තනතුරු බදාගෙන අමාරුම වෙලාවේ රට පැන්නා කියාය. ආණ්ඩුවේම තවත් අය කිව්වේ ඒ බැසිල්ගේ හැටි ප්‍රශ්නය බරපතළ නම් බැසිල් මාරුවෙන බවය. ඔවුන් උදාහරණයට ගත්තේ 2015 පරාජය අවස්ථාවේ අයියලා පවුල් පිටින් ලංකාවේ තනිකර බැසිල් ඇමරිකාවට යාමය.
 
නමුත් ප්‍රශ්න ඉස්සරහා බැසිල් මාරුවෙන කතා පස්සට ගියේ ඉන්ධන මිල ඉහල දැමීම සම්බන්ධව ගම්මන්පිළ වගකිව යුතු බවට පොදුජන පෙරමුණ ඇතුලෙන් චෝදනා කිරීමත් සමඟය. බැසිල්ගේ ප්‍රධාන ගෝලයකු වන පොදුජන පෙරමුණ ලේකම් සාගර කාරියවසම් ප්‍රසිද්ධ නිවේදනයක් නිකුත්කර කිව්වේ ගම්මන්පිළ ඉල්ලා අස්විය යුතු බවය. එපමණක් නොව ආණ්ඩුව වෙනයි, පක්ෂය වෙනයි කියන තැනටද බැසිල් පිල ගියේය. 
 
"තෙල් මිල වැඩි කිරීම වැරදියි. දුන්න වැඩේ හරියට නොකළ නිසා ගම්මන්පිල ඉල්ලා අස්වෙන්නම ඕන. ආණ්ඩුව තෙල් මිල වැඩි කලාට පක්ෂයක් හැටියට පොදුජන පෙරමුණ ඒ වැඩේට විරුද්ධයි" ඒ බැසිල් පිලේ ස්ථාවරය විය.
 
" බැසිල් හිටියා නම් ඉන්ධන මිල ඉහළ දාන්න දෙන්නේ නෑ" , " ආර්ථික ප්‍රශ්නයට විසඳුම තියෙන්නේ බැසිල් ළඟ" කියන කතා ඇසෙන්න ගත්තේද ඒ පසුබිමේය. ආණ්ඩුවේ සිටින බැසිල්ගේ ගෝලයන් දැන් වෙන කිසිවක් කියන්නේ නැත. ඊට වඩා දෙයක් ඔවුන් කරනවා නම් ඒ ආණ්ඩුවේ සිටින බැසිල් විරෝධී පාර්ශව වලට පහරදීමය. බැසිල්ගේ ප්‍රධාන පෙළේ ගෝලයකු වන රක්ෂණ සංස්ථාවේ සභාපති ජගත් වැල්ලවත්ත තමන්ගේ ෆේස්බුක් ගිණුමේ ලිව්වේ මෙවර වදය කැඩෙන තුරු ගල්ගහන බවය. විමල් - ගම්මන්පිල පාර්ශවයට අද ගහන්නේ රාජ්‍ය ආයතන සභාපතිලාය. ආණ්ඩුවේ සිටින ජනතා නියෝජිතයන් කියන ගෞරවයත් ඔවුන්ට අහිමි කරන්න තරම් බැසිල්ගේ ගෝලයන් ඉස්සරහට ගොස් ඇත.
 
මුදල් ඇමති වෙලා එන්න බැසිල් රෝහණ !
 
ඊට නමක් ලෙස ලැබී ඇත්තේ බැසිල් සුළඟය. කතාවේ හැටියට නම් බැසිල් සුළඟ එන්න යන්නේ මහින්ද සුළගේ නිර්මාතෘන් පවා සුනුවිසුණු කරගෙනය.  
 
විමල් වීරවංශ ඇමති එප්පාවල පොස්පේට් සමාගම තම විෂයෙන් ගැලෙව්වේ කවුද කොහොමද යන්න දැන සිටියත් තවමත් කම්පනයෙන්ය. දේශපාලන ආරංචිමාර්ග කියන්නේ  ගම්මන්පිළ ඉන්ධන මිල යළිත් පහළ දැමීමට කැබිනට් පත්‍රිකාවක් ඉදිරිපත් කලත් ජනාධිපති එය පැත්තකට කර ඇති බවය. ඒ කියන්නේ ඉන්ධන මිල අඩු කිරීමේ අවස්ථාව ගම්මන්පිල ඇමතිට දීමට ජනාධිපති තීන්දුකර නොමැති බවද ? "ඉන්ධන මිල අඩු කිරීමේ වීරයා" , "ජනතාවට සහන දෙන සූරයා" ලෙස බැසිල්ට අවස්ථාව සලසා ඇති බවද ? මේ ගැන ආණ්ඩුවේ අභ්‍යන්තර ආරංචි මාර්ග කියන්නේ, ලංකාවට ඇවිත් මුදල් ඇමති ලෙස වගකීම් අරගෙන විධිමත් ලෙස ආණ්ඩුවේ වැඩටික කරන ලෙස අගමැති මහින්ද රාජපක්ෂත්, ජනාධිපති ගෝඨාභය රාජපක්ෂත් ආරාධනා කර ඇති බවය. 
 
විමල් - ගම්මන්පිල - වාසු ඇතුළු බැසිල් විරෝධී පාර්ශව සමඟ වන බැසිල් පාර්ශවයේ  අවුල ගැන කියනවා නම්, දැන් කාටවත් exit නැති තැනකට පත්ව ඇත. ඒ කියන්නේ එක්කෝ දෙගොල්ලන්ගෙන් කවුරුන් හෝ යටත් විය යුතුය. නැත්නම් වෙන්විය යුතුය.
 
මේ සියල්ල ගැන දැනගන්න, බලාගන්න ලැබෙන්නේ බැසිල් ආවට පස්සෙය. 

ඉන්ධන මිළ අඩු නොකරන්නේ නම් වැඩකරන ජනතාව ක්‍රියාමාර්ග ගැනීමට සූදානම් - ලාල්කාන්ත

කොවිඩ් වසංගතය මරදනය කිරීමට අසමත් වීම ඇතුළුව අණ්ඩුව අනුගමනය කරන වැරදි ආර්ථික හා දේශපාලන ප්‍රතිපත්ති හා ක්‍රියාමර්ගත් හේතුවෙන් වැඩකරන ජනතාව ඉමහත් පීඩාවට පත්ව ඇති බවත් එවැනි තත්වයක් තුළ ඉන්ධන මිල ඉහළ දැමීම රාජ්‍ය පෞද්ගලික, වතු ඇතුළු ක්‍ෂේත්‍රවල වැඩකරන ජනතාව කබලෙන් ලිපට වැටී ඇති බවත් ජාතික වෘත්තීය සමිති මධ්‍යස්ථානයේ සභාපති කේ.ඩී ලාල්කාන්ත අගමැති, මුදල් ඇමති මහින්ද රාජපක්‍ෂ වෙත ලිපියක් යොමුකරමින් පවසයි.

මෙවැනි විටෙක වැඩකරන ජනතාවට සහන සැපයීමට ආණ්ඩුව අසමත් වන්නේ නම් ඔවුන්ට ඒ සඳහා ක්‍රියාමාර්ග ගැනීමට සිදුවන බවත් එබැවින් එවැනි වටපිටාවක් නිර්මාණය වීමට කලින් සියලු ජනතාවට බලපාන ඉන්ධන මිල පහළ හෙලීමට කටයුතු කරන ලෙසත් මෙම ලිපිය මගින් ඔහු දැනුම්දී ඇත.

එම ලිපිය වැඩිදුරටත් මෙසේය.

කොවිඩ් වසංගතය තුරන් කිරීම සඳහා ඔබගේ ආණ්ඩුව මේ දක්වාම අසමත් වීමත් ඒ වෙනුවෙන් අනුගමනය කරන ලද අදූරදර්ෂී ක්‍රියාමාර්ගත් මෙන්ම ඔබ අණ්ඩුව අනුගමනය කරන වැරදි ආර්ථික හා දේශපාලන ප්‍රතිපත්ති හා ක්‍රියාමර්ගත් හේතුවෙන් මේ වන විට රටතුල අත්‍යාවශ්‍ය භාණ්ඩ හා සේවා ඇතුළුව සියල්ලෙහිම මිළ සීඝ්‍ර ලෙස ඉහල දැමීමක් සිදුකර ඇත. පසුගිය කාල වකවානුව පුරාම අඛණ්ඩව සිදුවන මේ ක්‍රියාවලිය නිසා ජනතාව තුල ගොඩනැගී වර්ධනය වන්නේ බලවත් ආර්ථික පීඩනයක් හා අසහනයකි. මෙම තත්වයේ දී භාණ්ඩ හා සේවා සපයන්නන් විසින් ද තම තමන්ගේ හැකියාවන්ට අනුව මිළ ඉහල දමමින් සිටී. එසේ තම කාර්යයට අනුව, ලබා දෙන සේවාවට අනුව, වටිනාකම් ඉහල දමා ගත නොහැකි පිරිස වන රාජ්‍ය, පෞද්ගලික හා වතු ක්ෂේත්‍රයන්හි වැඩකරන ජනතාව වට ගණනාවකින් පීඩාවට පවත්වන කොට්ඨාශයන් බවට පත්ව ඇත.

ඔබ ආණ්ඩුව අත්තනෝමතික ලෙස ඉන්ධන මිළ වැඩි කරන්නේ මෙවැනි පීඩාකාරී තත්වයකට වැඩ කරන ජනතාව මුහුණ දී සිටින අවස්ථාවකදීය. එය ආණ්ඩුවේ වැරදි ආර්ථික කළමනාකරණයේ අනිටු ප්‍රතිඵල ජනතාව මත පැටවීමකි. එමගින් තව තවත් වට ගණනාවකින් ඉහල යන ජීවන වියදම හමුවේ තම ජීවිතය ගැටගසා ගැනීමේ අර්බුදයට මුහුණ දීමට නොහැකිව කබලෙන් ලිපට වැටීමේ තත්වයකට වැඩකරන ජනතාව පත්ව ඇත.

මෙම අතිශය පීඩාකාරී තත්වය යම් පමණකින් හෝ සමනය කර ගැනීමට නම් ආණ්ඩුව ජනතාව මත අලුතින් බර පැටවූ ඉන්ධන මිළ වැඩි කිරිම වහාම ඉවත් කරගත යුතුය. එසේ කිරීමට ආණ්ඩුව කටයුතු නොකරන්නේ නම් තව දුරටත් මෙම දැවැන්ත ජීවන බර දරා සිටීමට වැඩකරන ජනතාවට නොහැකිවා මෙන්ම ඒ සඳහා අප එකඟවන්නේ ද නැත. වැඩිවන ජීවන වියදමට සරිලන ලෙස වැටුප් වැඩි කළ යුතුය යන්න අපගේ පිළිගැනීමයි. එය වැඩකරන ජනතාවගේ අයිතියක් ලෙස ද අපි සලකන්නෙමු.

එබැවින් පළමු ක්‍රියාමාර්ගය ලෙස ආණ්ඩුව වැඩිකළ ඉන්ධන මිළ අඩු කළ යුතුය. එසේ කිරීමට ආණ්ඩුව කටයුතු නොකරන්නේ නම් වහාම වැඩි වන ජීවන වියදමට සරිලන වැටුප් වැඩි කිරීමකට ආණ්ඩුව කටයුතු කළ යුතුය. නොඑසේනම්, එය දිනා ගැනීම වෙනුවෙන් අරගල මාවත තෝරා ගැනීමට වෘත්තීය සමිති ව්‍යාපාරය ලෙස අපි පසුබට නොවෙමු. අනෙකුත් වෘත්තීය සමිති සමගින් වැඩකරන පන්තිය ඒකරාශි කරගනිමින් වෘත්තීය ක්‍රියාමාර්ග වෙත එළඹීමට අපට සිදුවන බවද අවධාරනය කරන අතර, එමගින් ජනතාවගේ දෛනික කටයුතු වලට සිදුවන බාධාවන්හි පූර්ණ වගකීම ජනතාව වෙත බර පැටවූ ආණ්ඩුව විසින් භාරගත යුතු බව අපි අවධාරණය කරමු. එම නිසා එවැනි තත්වයකට රට පත්නොකර වැඩිකළ ඉන්ධන මිළ අඩු කිරීමට ආණ්ඩුව වහාම ක්‍රියාමාර්ග ගත යුතුය. එසේ කිරීමට ආණ්ඩුවට බලකරන අප එය ඉටුනොකරන්නේ නම් වෘත්තීය ක්‍රියාමර්ග වලට අවතීර්ණ වන බවද අවධාරණය කරමු.

ස්තුතියි,

මීට විශ්වාසී

කේ.ඩී. ලාල්කාන්ත

 

තවත් ප්‍රදේශ කිහිපයක් හුදකලා කෙරේ

අද (22) උදෑසන 6.00 සිට බලපැවැත්වෙන පරිදි කොළඹ සහ රත්නපුර දිස්ත්‍රික්ක දෙකේ ග්‍රාම නිලධාරී කොට්ඨාස කිහිපයක් හුදකලා කර තිබේ.

ඒ අනුව කොළඹ දිස්ත්‍රික්කයේ කොළොන්නාව පොලිස් බලප්‍රදේශයේ සේරපුර ග්‍රාම නිලධාරී වසමේ ශ්‍රී ආනන්දරාම පාර අද උදෑසන සිට හුදකලා කර ඇත.

එමෙන්ම රත්නපුර දිස්ත්‍රික්කයේ ගොඩකවෙල පොලිස් බලප්‍රදේශයේ කොටවල ග්‍රාම නිලධාරී වසමද අද උදෑසන සිට හුදකලා කර තිබේ.

මේ අතර, මාදිවෙල, ප්‍රගතිපුර ප්‍රදේශයේ පුද්ගලයෙක් කොවිඩ් "ඩෙල්ටා ප්‍රභේදය" ආසාදිතයෙක් යැයි සැකයක් මතුවීම හේතුවෙන්= එම ප්‍රදේශයේ සංචරණ කටයුතු සීමාකිරීම සඳහා පියවර ගෙන තිබේ.

ඒ අනුව අදාළ ප්‍රදේශයෙන් කිසිදු පුද්ගලයෙකුට පිටවීම හෝ ඇතුළුවීම තහනම් කර ඇති බව වාර්තා වේ.

ආණ්ඩුව සමගි කරන සමගියේ යෝජනාව කතානායකට බාරදෙයි !

ඉන්ධන මිල ඉහළ දැමීම නිසා  සමගි ජන බලවේගය පක්ෂය විසින් බලශක්ති අමාත්‍ය උදය ගම්මන්පිලට එරෙහිව සකස් කළ විශ්වාසභංග යෝජනාව කථානායකවරයා වෙත අද (22) භාරදී තිබේ.

විපක්ෂයේ ප්‍රධාන සංවිධායක ලක්ෂ්මන් කිරිඇල්ල  විසින් විශ්වාසභංග යෝජනාව කථානායක මහින්ද යාපා අබේවර්ධන වෙත භාරදුන් අතර ඊට සජබ මන්ත්‍රීවරුන් 43ක් අත්සන් තබා ඇත.

මෙම විශ්වාසභංග යෝජනාව කරුණු 10 කින් යුතුය. 

වඩාත් සිත්ගන්නා සුළු කරුණ වන්නේ පොදුජන පෙරමුණේ ප්‍රධාන ලේකම් පාර්ලිමේන්තු මන්ත්‍රී සාගර කාරියවසම් ඉල්ලා අස්වෙන්න කියමින් ගම්මන්පිල අමාත්‍යවරයා ට නැගූ චෝදනාවම මේ විශ්වාසභංග යෝජනාවේ ප්‍රධාන කරුණ කරගෙන තිබීමය.

දේශපාලන විචාරකයන් මේ විශ්වාසභංග යෝජනාව විවේචනය කරන්නේ එකිනෙකා කුලල්කා ගන්නා ආණ්ඩුවේ සමගිය ඇතිකිරීමට සමගි ජනබලවේගය ලබාදුන් අවස්ථාවක් බව පවසමින් ය.

IMG 20210622 WA0003

IMG 20210622 WA0005

IMG 20210622 WA0004

IMG 20210622 WA0002

ස්වයංපෝෂිත කතා පැත්තක : සහල් ආනයනයට කැබිනට් අනුමැතිය !

පොන්නි සම්බා සහල් මෙට්‍රික් ටොන් ලක්ෂයක් විදේශයන්ගෙන් මෙරටට ආනයනයට කැබිනට් අනුමැතිය හිමිව ඇත.

ඒ සඳහා වන කැබිනට් පත්‍රිකාව ඉදිරිපත් කර ඇත්තේ  වෙළෙඳ අමාත්‍ය බන්දුල ගුණවර්ධනය.ආනයන සීමා කිරීමට කියමින් ආණ්ඩුව කහ පවා ආනයනය නැවැත්වූ  අතර එහිදී සඳහන් කර සිටියේ රට ස්වයංපෝෂිත කරන බවයි. 

මේ වන විට කෘෂිකර්මය කාබනික පොහොර වෙත යොමුකරන බව පවසමින් රසායනික පොහොර ආනයනය ද  නවතා ඇත. ඊට හේතු ලෙස කියනු ලැබුවේ වකුගඩු රෝග ඇතුළු රසායනික ද්‍රව්‍ය හේතුවෙන් සෞඛ්‍ය ප්‍රශ්න ඇතිවීම වලක්වන්නට කියාය.

දැන් ප්‍රශ්නය මේ ආනයනය කිරීමට යන සහල් කාබනික පොහොර භාවිතය හරහා සිදුකළ ගොවිතැන් මඟින් ලබාගත් ඒවාද යන්නය.

අනෙක් අතට මතුව ඇති පොහොර අර්බුදය නිසා මෙවර අනිවාර්යයෙන් අස්වනු අඩු වනු ඇති අතර එවිටත් සහල් ආනයනය කිරීමට සිදුවෙයි. ඒ ආනයනය කරන සහල් ද සකසා ඇත්තේ රසායනික ද්‍රව්‍ය භාවිතයෙන් ද  නැද්ද යන ගැටළුව මතුවෙයි.

ඒ අනුව මේ ආණ්ඩුවේ සිස්ටම් හැදීම  කොහොමද කියනවා නම්, ආහාර ස්වයංපෝෂිත බවත් , කාබනික ගොවිතැන ආශ්‍රිත ආහාර යන්න වෙනුවට එහි ප්‍රතිවිරෝධය ජනතාව වෙත පැමිණෙමින් තිබේ.

අගමැති - මැණික්,ස්වර්ණාභර්ණ අපනයනකරුවන් හමුවේ

මැණික් හා ස්වර්ණාභරණ අපනයනකරුවන් මුහුණ දෙන ගැටලු විසදීමට රජය අවධානය යොමු කරන බව අගමැති මහින්ද රාජපක්ෂ  අද (21) පැවසීය.

ඔහු මෙසේ පැවසුවේ මැණික් හා ස්වර්ණාභරණ අපනයනකරුවන් මුහුණ දෙන ගැටලු සම්බන්ධයෙන් එම අපනයන කරුවන් පිරිසක් සමග අරලියගහ මන්දිරයේදී අද (21)පැවති සාකච්ඡාවකදීය.

අපනයන විනිමය වර්ධනය කිරීම සඳහා සංචාරක ක්ෂේත්‍රය මෙන්ම මැණික් හා ස්වර්ණාභරණ අංශයද සැලකිය යුතු දායකත්වයක් ලබා දිය යුතු බව අගමැතිවරයා මෙහිදී පෙන්වා දුන්නේය.

මැණික් හා ස්වර්ණාභරණ අපනයනකරුවන් සඳහා සියලු පහසුකම් දැනටමත් ලබා දී ඇති බවත් අපනයනකරුවන්ගේ අලවිය මත පදනම්වූ ආදායම් බදු මෙරටදී විදේශ මුදල් භාවිතා කෙරෙන අවස්ථාවලදී නිදහස් කිරීම කෙරෙහිද අවධානය යොමු කර ඇති බවත් මහින්ද රාජපක්ෂ  පැවසීය.

මෙරට මැණික් හා ස්වර්ණාභරණ ක්ෂේත්‍රය ලෝ පුරා වඩාත් ප්‍රචලිත කිරීම කෙරෙහි ගත යුතු ක්‍රියාමාර්ග සම්බන්ධයෙන්ද මෙහිදී අගමැතිවරයාගේ අවධානය යොමු විය.

මහින්ද රාජපක්ෂ = ජනාධිපතිවරයා වශයෙන් සිටියදී 2015 වර්ෂයේ දී තමන්ට ලබා දුන් සහන පසුගිය රජය අහෝසි කළ බවත් අපනයනය කෙරෙහි සෘජුව බලපාන එම සහන යළි ලබාදෙන ලෙස ඉල්ලා සිටින බවත් මැණික් හා ස්වර්ණාභරණ අපනයනකරුවෝ පිරිසක් මෙහිදී අගමැතිවරයාගෙන් ඉල්ලා සිටියහ .

අයවැය මගින් අපනයනකරුවන් සඳහා දැනටමත් සහන ලබාදී දී ඇති බවට මෙහිදී පෙන්වා දුන් අගමැතිවරයා එම හන ප්‍රායෝගිකව ක්‍රියාත්මක වන්නේදැයි අවධානය යොමු කරන ලෙස අදාළ නිලධාරීන්ට උපදෙස් දුන්නේය .

විවෘත විශ්වවිද්‍යාලයට උපකුලපති පත්කර ගැනීමත් අවුල් කරගෙන !

ලංකා විවෘත විශ්වවිද්‍යාලය සඳහා නව උපකුලපතිවරයකු පත්කිරීම අර්බුදයට පත්ව ඇති බව වාර්තා වෙයි.

ජාතික ජනබලවේගය නිකුත්කර ඇති නිවේදනයක දැක්වෙන්නේ පුරප්පාඩු වන උපකුලපති ධුරය සඳහා විශ්වවිද්‍යාල ප්‍රතිපාදන කොමිෂන් සභාව විසින් ඉදිරිපත් කරන ලද අපේක්ෂකයින්ගේ ලැයිස්තුව අත්තනෝමතික ලෙස ජනාධිපතිවරයා විසින් ප්‍රතික්ෂේප කරනු ලැබුණු නිසා මේ අර්බුදය මතුව ඇති බවයි.

ඒ සම්බන්ධව ජාතික ජනබලවේගය පක්ෂය නිකුත්කළ නිවේදනය පහත දැක්වෙයි.

නව උපකුලපතිවරයෙකු පත් කිරීම සම්බන්ධයෙන් ශ්‍රී ලංකා විවෘත විශ්වවිද්‍යාලයේ මතුවී ඇති අර්බුදය පිළිබඳව ජාතික ජන බලවේගය දැඩි අවධානයෙන් සිටී.  මෙම තත්වය පැන නැගී ඇත්තේ ජුනි 23 වැනි දින පුරප්පාඩු වන උපකුලපති ධුරය සඳහා විශ්වවිද්‍යාල ප්‍රතිපාදන කොමිෂන් සභාව විසින් ඉදිරිපත් කරන ලද අපේක්ෂකයින්ගේ ලැයිස්තුව අත්තනෝමතික ලෙස ජනාධිපතිවරයා විසින් ප්‍රතික්ෂේප කරනු ලැබ ඇති බැවිනි.  2020 මැයි 04 වැනි දින විශ්වවිද්‍යාල ප්‍රතිපාදන කොමිෂන් සභාවේ චක්‍රලේඛ අංක 02/2020 හි නියම කර ඇති පරිදි පියවර දෙකක තේරීමේ ක්‍රියාවලියකින් පසුව මෙම කෙටි ලැයිස්තුව සකස් කරනු ලැබ තිබුණි. උත්ප‍්‍රාසාත්මක ලෙස, ජනාධිපතිවරයාගේ අත්තනෝමතික කි‍්‍රයාවෙන් ඇඟවෙන්නේ ඔහුගේ ආණ්ඩුව විසින් හඳුන්වා දුන් ක්‍රමයක් කෙරෙහි ඔහුටම විශ්වාසයක් නොමැති බවයි.  ඊට අමතරව, ජනාධිපතිවරයාගේ ක්‍රියාවන් විශ්වවිද්‍යාල කවුන්සිලයේ ස්වාධිපත්‍යය සහ අධිකාරයද ප්‍රශ්න කෙරේ. ආයතනය පාලනය කිරීමේ වගකීම පැවරී ඇති ඉහළම ආයතනය ලෙස අවසාන කෙටි ලැයිස්තුව තෝරාගෙන එය විශ්වවිද්‍යාල ප්‍රතිපාදන කොමිෂන් සභාව වෙත යොමු කරනු ලබන්නේ  විශ්වවිද්‍යාල කවුන්සිලය විසිනි.

මෙම අත්තනෝමතික ක්‍රියාව මගින් 1978 විශ්වවිද්‍යාල පනතේ හරය උල්ලංඝනය වන අතර එහි පැහැදිලිවම සඳහන් වන්නේ විශ්වවිද්‍යාල ප්‍රතිපාදන කොමිෂන් සභාව විසින් තමා වෙත ඉදිරිපත් කරන ලද නම් තුනෙන් එකක් තෝරා ගැනීම ජනාධිපතිවරයාගේ යුතුකම බවයි. නැවත තේරීමේ ක්‍රියාවලිය නැවැත්වීමට විශ්වවිද්‍යාල ප්‍රජාව විසින් කරන ලද ඉල්ලීම්වලට ජාතික ජන බලවේගය වශයෙන් අපි සහාය දෙන අතර, අත්‍යවශ්‍ය උසස් අධ්‍යාපන ආයතනයක් තවදුරටත් අර්බුදයකට ඇද වැටීමට මඟ නොසලසමින්, ස්ථාපිත පාලන මූලධර්මවලට ගරු කරන ලෙසත්, දැනටමත් පවතින කෙටි ලැයිස්තුවෙන් වහාම ශ්‍රී ලංකාවේ විවෘත විශ්වවිද්‍යාලයට උපකුලපතිවරයෙකු පත් කරන ලෙසත් ජනාධිපතිවරයාගෙන් ඉල්ලා සිටිමු.  මෙම අත්තනෝමතික ක්‍රියාමාර්ගය මගින් අද පැන නැගී ඇති රටේ වැදගත් තනතුරු සඳහා පත්වීම් සම්පුර්ණයෙන්ම දේශපාලනීකරණය කිරීම පිළිබිඹු කරන බව ජාතික ජන බලවේගය තවදුරටත් සඳහන් කරයි. මෙය, විධායකය විසින් වැදගත් රාජ්‍ය ආයතනවල ස්වාධීනත්වයට සහ ස්වාධිපත්‍යයට මැදිහත් වෙමින් ඒවා අඩපණ කරන ආකාරය පිළිබඳ තවත් උදාහරණයක් බව අපි විශ්වාස කරමු. 

රට විවිධ අභියෝගයන්ට මුහුණ දෙන මෙවැනි කාලයකදී, අපගේ රාජ්‍ය ආයතන මෙහෙයවිය යුත්තේ දක්ෂ, ඉහළ සුදුසුකම් ඇති සහ දේශපාලනික වශයෙන් පක්ෂග්‍රාහී නොවන පුද්ගලයින් විසිනි.  

කෙසේ වෙතත්, මෙම අත්තනෝමතික ප්‍රතික්ෂේප කිරීම මගින් උද්ගත වන පණිවිඩය දැඩි බලපෑමක් ඇති කරනු ඇත. එය සුදුසුකම් ලත් සහ දේශපාලනික වශයෙන් මධ්‍යස්ථ අපේක්ෂකයින් වැදගත් රාජ්‍ය තනතුරු සඳහා ඉල්ලුම් කිරීම අධෛර්යමත් කරනු ඇත. මෙබඳු ක්‍රියාවන් රට තුළ දැනට පවතින විවිධ අර්බුද විසඳීමට කිසිසේත්ම හිතකර නොවන අතර, රට තුළ අස්ථාවරත්වය සහ අවුල් සහගත හැඟීම උග්‍ර කරවයි. රජයේ ආයතන කෙරෙහි ඇති විශ්වාසය බිඳ වැටෙන හා දුර්වල කරන ක්‍රියාවලින් වැළකී සිටින ලෙස අපි ජනාධිපතිවරයා සහ ආණ්ඩුවේ අනෙකුත් වගකිවයුතු සාමාජිකයින්ගෙන් ඉල්ලා සිටිමු.

ජාතික ජන බලවේගය

2021. ජුනි 21 දින

ගිලුණු නැව වටා විෂ රසායන තට්ටුවක් !

ශ්‍රී ලංකාව ආසන්න මුහුදේ හානියට පත් බහාලුම් නෞකාව වන එම්වී එක්ස්ප්‍රස් පර්ල් හි බහාලුම වටා විෂ රසායනික තට්ටු දිස්වන බවත් ඒවා තෙල් තට්ටුදැයි පැහැදිලිනොවන නමුත් කිසියම් රසායනිකයක් බවත් පාරිසරික හා සමුද්‍ර ජීව විද්‍යාඥ රනිල් නානායක්කාර අදහස් දක්වා තිබේ.

නෞකාව විනාශ වී මුහුදේ ගිළී කොටසක් මතුපිටට පෙනෙමින් තිබෙන අතර සිදුවීමෙන් අනතුරව ඉන් සාගරයට එකතු වූ විෂ රසායනික ද්‍රව්‍ය හේතුවෙන් නැගෙනහිර වෙරළ තීරයේ යාපනය දක්වා වෙරළට මිය ගිය මුහුදු ජීවින්ගේ සිරුරු මේ වනවිට ගොඩගසමින් තිබේ. මේ දක්වා කැස්බෑවුන් 50කට අධික ප්‍රමාණක්ද, ඩොල්පින්, තල්මසුන් ඇතුළු තවත් මුහුදු ජීවීන් විශාල ප්‍රමාණයක්ද වෙරළට ගොඩගසමින් තිබේ.

“ශ්‍රී ලංකාවේ දරුණුතම සාගර පාරිසරික ව්‍යසනය” මෙය බවත් පවසන සමුද්‍ර ජීව විද්‍යාඥ රනිල් නානායක්කාර මහතා වැඩිදුරටත් මෙලෙස පවසයි.

“තොරතුරු හා දර්ශන වලට අනුව, රසායන කාන්දු වීමක් ඇති බව මට පෙනෙනවා. මා විශ්ලේෂණය කරන විට ජලය කොළ පැහැති කහ පැහැයට සමාන බැවින් රසායනික දූෂණයක් සේ පෙනේ. සාමාන්‍යයෙන් එවැනි පැහැයක් දිස්වන්නේ රසායනික දූෂණයක් ඇති විට පමණි මීට පෙර අපට අනාවරණය වූයේ එය ‘නයිට්‍රික් අම්ලය’ බවත්, ‘නයිට්‍රික් අම්ලය’ කාන්දු වීම නිසා ජලයේ එවැනි පැහැයක් ඇතිවීමට ඉඩ ඇති බවත් ය. තවත් හැකියාවක් තිබෙනවා විවිධ රසායනික ද්‍රව්‍ය මිශ්‍ර වූ විට ඇල්ගී ඇල්ගී පිහාටු වල අසමතුලිතතාවයක් පැවතිය හැකියි. තෙල් කාන්දුවක් ඇති බවට අපට 100% ක් සහතික විය නොහැකියි. මේ දක්වා ලැබී ඇති දර්ශනවල තෙල් කාන්දුවක් නොපෙන්වයි.” යනුවෙනි.

(lanka truth) 

(ජායාරූපය පුවත සඳහා අන්තර්ජාලයෙන් ලබාගත්තකි.  )

ලැජ්ජයි : මහ බැංකු වාර්තාවෙන් සංචිත හලයි !

රජය පසුගිය සතියේ සිට රටේ තුළ පවතින සංචිත ප්‍රමාණය ශ්‍රී ලංකා මහ බැංකු වාර්තාවෙන් ඉවත් කර ඇති බව සමගි ජන බලවේගයේ පාර්ලිමේන්තු මන්ත්‍රී ආචාර්ය හර්ෂ ද සිල්වා පවසයි.

මාධ්‍ය හමුවකට එක්වෙමින් මන්ත්‍රීවරයා සඳහන් කරන ලද්දේ දිනෙන් දින ශීඝ්‍රයෙන් පහත වැටෙන මෙරට සංචිත පිළිබඳ තොරතුරු මෙලෙස සැඟවීමෙන් රටේ ආර්ථික අර්බුදය වසන් කළ නොහැකි බවයි.

‘ආණ්ඩුව ගිය සතියේ ඉඳලා සංචිත තිබෙන ප්‍රමාණය මහ බැංකු වාර්තාවේ දැන්වීමෙන් ඉවත් කරලා. ආණ්ඩුව ලැජ්ජාවිය යුතුයි. මේ විදිහට කොච්චර කල් රවට්ටන්න පුළුවන් කියලද හිතන්නේ. මැයි මාසයේ සංචිත තිබුණේ ඩොලර් මිලියන හාරදාස් දහඅටයි. එයින් රත්තරන් අයින් කළාහම ඩොලර් මිලියන තුන්දාස් පන්සීය තිහයි.

මහබැංකු වාර්තාවට අනුව ඉදිරි මාස දොළහට සංචිතවල අවශ්‍යතාවය ඩොලර් මිලියන අටදාහකට ආසන්න වෙනවා. එය රජය විසින් ගෙවිය යුතු ණය, හුවමාරු ණය සහ පෞද්ගලික අංශයෙන් ගෙවිය යුතු ණය වශයෙන්.

රජයට මේ මාසයේ ඩොලර් මිලියන දහඅටක් ගෙවන්න තියෙනවා. ජූලි ඩොලර් මිලියන එක්දාස් දෙසිය විසිඅටක්
ගෙවන්න තියෙනවා. අගෝස්තුවේදී මිලියන එකසිය පනස් අටක්. සම්පූර්ණ ඩොලර් මිලියන දෙදාස් තිස්හතරක්
තියෙනවා. ඒ ආණ්ඩුවට විතරක් ඉදිරි මාස හය සඳහා ගෙවීමට ඇති ණය පමණයි. ඉන්පසු සාමාන්‍ය ව්‍යාපෘති
ණය තිබෙනවා. ඒවායේ එකතුව ඩොලර් මිලියන දෙදාස් හයසිය තිහක් විතර වෙනවා. නමුත් අතේ තිබෙන්නේ
තුන්දාස් පන්සීය ගණනක්.’

(මව්රට )

කොරෝනා ඩෙල්ටා ප්‍රභේදය ගැන විශේෂ නිවේදනයක් !

ඉන්දියාවේ වේගයෙන් ව්‍යාප්ත වූ කොරෝනා ඩෙල්ටා ප්‍රභේදය ශ්‍රී ලංකාවේ පැතිරීගෙන යාමේ දැඩි අවදානමක් ඇති බව සෞඛ්‍ය ප්‍රවර්ධන කාර්යාංශය පවසයි.

ඒ හේතුවෙන් එය ආසාදනයෙන් වැලකීමට ගත යුතු අත්‍යවශ්‍ය පියවර කිහිපයක් ඔවුන් නිවේදනය කරයි.

එම සම්පූර්ණ නිවේදනය මෙසේය.

පසුගිය දිනකදී ශ්‍රී ලංකාව තුළ, ඉන්දියාව පුරා වේගයෙන් පැතිර ගිය, කොවිඩ් වෛරසයේ ඩෙල්ටා ප්‍රභේදය හඳුනාගැනීම බොහෝ දුරට කතාබහට ලක්වුණා. මෙතෙක් ලංකාවේ පැවති ප්‍රභේද වලට වඩා සීඝ්‍රයෙන් ව්‍යාප්ත විය හැකි විභවතාවයක් පවතින මෙම ඩෙල්ටා ප්‍රභේදය සොයා ගැනීමත් සමග covid පැතිරීම තීව්‍ර දීමේ අවධානමක් ඇතිවෙනවා. එසේ සිදු නොවීමට නම් අප අත්‍යාවශ්‍යයෙන්ම ගත යුතු පියවර කිහිපයක් තිබෙනවා.

අනික් සෑම ප්‍රභේදයක් ම වගේම ඩෙල්ටා ප්‍රභේදයේ පැතිරයාම අවම කිරීමටත් ඉතාමත්ම තීරණාත්මක සාධකය වන්නේ අප විසින් හැකිතාක් අවදානම් අවස්ථා මග හැරීමයි.

1. සෙනග වැඩියෙන් ගැවසෙන ස්ථාන
2. ජනෙල් දොරවල් වසා ඇති හොඳ වාතාශ්‍රයක් නොලැබෙන අවකාශ
3. මිනිසුන් එකිනෙකා ආසන්නයේ ගැවසීමට සිදුවන ස්ථාන
එවැනි අවදානම් ස්ථාන අතරින් ප්‍රධාන වනවා.

ඩෙල්ටා ප්‍රභේදය නිසා ඇතිවිය හැකි අධි වසංගත තත්ත්වයකට රට ගමන් නොකිරීමට නම් වඩාත්ම වැදගත් වන්නේ මෙවැනි ස්ථාන මගහැර සිටීමයි.

යම්කිසි නොවැලැක්විය හැකි හේතුවක් නිසා මෙවැනි ස්ථානයකට යෑමට සිදු වුවහොත්, සියලු ආරක්ෂක පිළිවෙත් අකුරටම ක්‍රියාත්මක කිරීම මත කෙනකුගේ ආරක්ෂාව තීරණය වෙනවා.

1. නිවැරදි පරිදි මුඛ ආවරණ පැළඳීම
2. දෑත් පිරිසිදුව තබා ගැනීම
3. එකිනෙකා අතරේ අවම වශයෙන් මීටර් දෙකක වත් දුර පවත්වා ගැනීම
මේ අතරින් ඉතා වැදගත් වනවා

ඔබට යම් හෙයකින් උණ සෙම්ප්‍රතිශ්‍යා කැස්ස වැනි රෝග ලක්ෂණ කිසිවක් පවතී නම් ප්‍රතිකාර ලබා ගැනීමට මිස වෙන කිසිම දෙයකට නිවසෙන් පිට නොවීමත් වැදගත්. මෙය ඔබගේ සමාජ වගකීමක්.

ඔබ මේ වන විට එන්නත්කරණය සම්පූර්ණ කර ඇති අයකු වුවද, ඔබටත් කොව්ඩි රෝගය වැළඳීමේ යම් අවදානමක් තියෙනවා. එන්නත්කරණයෙන් ලැබුණු ආරක්ෂාව නිසා, ඔබට දැඩි සත්කාර අවශ්‍ය හෝ මාරාන්තික අවස්ථාවකට පත් වීමට ඇති ඉඩකඩ අඩු වුවද, ඔබ විසින් ඔබේ පවුලේ ආදරණීයයන්ට රෝගය සම්ප්‍රේෂණය කිරීමක් සිදුවිය හැකියි.

සංචරණ සීමා වල යම්තාක් දුරකට ලිහිල් කිරීමක් සිදු වන අවස්ථාවකදී, ඉහත උපදෙස් අකුරටම පිළිපැදීම තුලින් ඔබටත් ඔබගේ පවුලේ ආදරණීයයන්ටත් අන් කොවිඩ් ප්‍රභේද වලින් වගේම ඩෙල්ටා කොවිඩ් ප්‍රභේදයෙනුත් ආරක්ෂාව සපයා ගත හැකියි.

– HPB

එහෙනම් චමල්ගේ වාරිමාර්ගත් කෘෂිකර්මයට දෙන්න : වාසු ගේමට !

කෘෂිකර්මයට පොහොර අවශ්‍ය නිසා පොස්පේට් සමාගම තිබිය යුත්තේ කෘෂිකර්ම අමාත්‍යාංශය යටතේ නම් ඒ අර්ථයෙන්ම වාරිමාර්ග දෙපාර්තමේන්තුව ද තිබිය යුත්තේ කෘෂිකර්ම අමාත්‍යාංශය යටතේ බවත් එනිසා දැනට චමල් රාජපක්ෂ මහතා යටතේ තිබෙන වාරිමාර්ග දෙපාර්තමේන්තුව ද කෘෂිකර්ම අමාත්‍යාංශය යටතට පවරා පැවරිය යුතු බව අමාත්‍ය වාසුදේව නානායක්කාර පවසයි.

අමාත්‍යවරයා සිය අමාත්‍යංශයේ මාධ්‍ය හමුවක අදහස් දක්වමින් මේ බව සඳහන් කළ අතර එහිදී වත්මන් ආණ්ඩු බලය හොබවන සන්ධානය  නියෝජනය කරන්න සුළු පක්ෂ සිටින්නේ පීඩනයෙන් බවත් පැවසීය. 

විමල් වීරවංශ සහ උදය ගම්මන්පිල ඇමතිවරුන්ට ඇතිකර තිබෙන තත්ත්වයන් යුක්තිසහගත නැති බවද පෙන්වාදුන් වාසුදේව අමාත්‍යවරයා විමල් වීරවංශ මහතාගේ යටතේ තිබූ පොස්පේට් සමාගම අලාභ ලබන තත්ත්වය සිට ලාභ ලබන තත්ත්වයට ගෙනැවිත් තිබියදී එය ඉවත් කිරීම කුඩා පක්ෂ මත ඇති කරන ලද පීඩනයක් හා සිත් රිදවීමක් යයිද පැවසීය.

දිස්ත්‍රික්ක 12ක ග්‍රාම නිලධාරී වසම් 24ක් හෙට (21) සිට LOCKDOWN…

හෙට (21) අලුයම 4 සිට බලපැවැත්වෙන පරිදි දිස්ත්‍රික්ක 12ක ග්‍රාම නිලධාරී කොට්ඨාස 24ක්  හුදකලා කරන බව යුද හමුදාපති, ජෙනරාල් ශවේන්ද්‍ර සිල්වා  පවසයි.

එලෙස හුදකලා කරනු ලබන ප්‍රදේශ ලැයිස්තුව පහතින්

1

2

සංචරණ සීමා ඉවත් නොකරන්නැයි ශ්‍රී ලංකා වෛද්‍ය සංගමය ඉල්ලයි

හෙට (21) දිනයේ සංචරණ සීමා ඉවත් නොකර තවදුරටත් අඛණ්ඩව පවත්වාගෙන යන ලෙස ශ්‍රී ලංකා වෛද්‍ය සංගමය ජනාධිපති ගෝඨාභය රාජපක්ෂගෙන් ඉල්ලීමක් කර ඇතැයි වාර්තා වෙයි.

ජනාධිපතිවරයා වෙත ලිපියක් යොමු කරමින් එම සංගමය පෙන්වා දී ඇත්තේ දින කිහිපයකට හෝ සංචරණ සීමා ඉවත් කිරීමෙන් අප්‍රේල් මාසයේ පැවති දරුණු තත්ත්වයට රට යළි ගමන් කිරීමේ අවදානමක් නිර්මාණය වනු ඇති බවය.

පවතින තත්ත්වය හමුවේ සංචරණ සීමා ලබන 28 වෙනි දින දක්වා හෝ දීර්ඝ කරන ලෙස සිය සංගමය මීට පෙර ඉල්ලීමක් කර තිබූ අතර ලබන 21 වනදා සිට 23 වනදා දක්වා දින කිහිපයක් සංචරණ සීමා ඉවත් කර යළි පැනවීමේ පදනම කුමක් ද යන්න පැහැදිලි නොවන බවද ඔවුන් පවසයි.

සංචරණ සීමා ක්‍රියාත්මක වර්තමානයේ ද දෛනිකව නව ආසාදිතයින් 2,000 ඉක්මවූ සංඛ්‍යාවක් සහ මරණ 50 ඉක්මවා වාර්තා වන බවත් ශීඝ්‍ර ව්‍යාප්තියක් සහිත ඩෙල්ටා කොවිඩ් ප්‍රභේදය ද මෙරට සමාජයෙන් හමුවීමෙන් පවතින අවදානම තවදුරටත් ඉහළ යන බවත් ශ්‍රී ලංකා වෛද්‍ය සංගමය පෙන්වා දෙයි.

මේ හේතුවෙන් මෙම තීරණාත්මක මොහොතේ සංචරණ සීමා ඉවත් කිරීමකින් තොරව තවදුරටත් අඛණ්ඩව ක්‍රියාත්මක කරන ලෙස ඔවුන් ජනාධිපතිවරයාගෙන් ඉල්ලා ඇත.

එසේ නොවුනහොත් සති තුනක කාලයක් සංචරණ සීමා ක්‍රියාත්මක කරමින්, වෛරස ව්‍යාප්තිය පාලනය සඳහා සිදුකළ කැපකිරීම ප්‍රතිඵල රහිත වනු ඇති බව ද ශ්‍රී ලංකා වෛද්‍ය සංගමය ජනාධිපතිවරයා වෙත යොමු කළ ලිපියේ වැඩිදුරටත් සඳහන්ය.

මේ අතර සංචාරණ සීමා ඉවත් කිරිමෙන් පසුවද ජනතාව නිසි මාර්ගෝපදේශ අනුව කටයුතු කළ යුතු බව රජයේ වෛද්‍ය නිළධාරින්ගේ සංගමය පවසයි.

එම සංගමයේ මාධ්‍ය කමිටු සාමාජික වෛද්‍ය ප්‍රසාද් කොළඹගේ  ජනතාවගෙන් ඉල්ලා සිටින්නේ අත්‍යාවශ්‍ය කටයුත්තකට හැර නිවසින් බැහැරව නොයන ලෙසය.

(දෙරණ)

ආණ්ඩුව අභ්‍යන්තරයේ කුමණ්ත්‍රණයක් : ශ්‍රිලනිප මහ ලේකම් අනාවරණයක් !

ආණ්ඩුව අභ්‍යන්තරයේ ක්‍රියාත්මක කුමණ්ත්‍රණයක් සම්බන්ධව ශ්‍රී ලංකා නිදහස් පක්ෂයේ මහ ලේකම් රාජ්‍ය අමාත්‍ය  දයාසිරි ජයසේකර අවධාරණය කරයි.

ශ්‍රී ලංකා පොදුජන පෙරමුණ සමඟ සම්බන්ධව සිටින සෙසු පක්ෂ ආණ්ඩුවෙන් ඉවත් කිරීම එම කුමන්ත්‍රණ යැයි ද ඇමැතිවරයා පවසයි.

මාධ්‍ය වෙත ප්‍රකාශයක් කරමින් ඔහු මේ බව සඳහන් කරන අතර ආණ්ඩුව බිහි කිරීමට ශක්තිය දුන් පක්ෂ නායකයන් කැබිනෙට්ටුවෙන් ඉවත් කිරීමට එම පක්‍ෂ ආණ්ඩුවෙන් ඉවත් කිරීමට සැලසුමක් සැලසුමක් ඇතැයි ද පැවසූ ඔහු මෙයාකාරයට ගියොත් අනාගතයේදී ශ්‍රී ලංකා නිදහස් පක්ෂයද මෙම තත්ත්වය අත් බවද පෙන්වාදෙයි.

ඉන්ධන මිල වැඩි කරන ලද්දේ උදය ගම්මන්පිල අමාත්‍යවරයාගේ තනි කැමැත්තෙන් නොවන බවත්, තෙල් මිල ඉහළ දැමීම අග්‍රාමාත්‍යවරයා ප්‍රමුඛ  ආණ්ඩුවේ තීරණයක් බවද කී අමාත්‍යවරයා ගම්මන්පිල ට එරෙහිව ගෙන ආ විශ්වාසභංගය මෙම ආණ්ඩුවේ දෙපාර්ශවයක් අතර ඇති මතයෙන් භේදය වාසි ලබාගැනීම සඳහා විපක්ෂයේ සැලසුමක් යයිද පැවසීය.

තෙල් මිළ වැඩි කලේ ජාත්‍යන්තර මූල්‍ය අරමුදලෙන් ඩොලර් මිලියන 785 ක් ගන්නද?

නොබෝදා මුදල් අමාත්‍යංශයත් ජනාධිපති කාර්යාලයත් බලශක්ති අමාත්‍යංශයත් ඒකාබද්ධව මෑත ඉතිහාසයේ කරන ලද වැඩිම තෙල් මිළ ඉහල දැමීම කරන ලදී.
 
එය බලශක්ති ඇමතිගේ ක්‍රියාවක් ලෙස හුවා දක්වන්නට බලයේ සිටින පොදු ජන පෙරමුණ උත්සාහ කලත් පැය 24 ක් නිහඬව සිට ජනාධිපති මාධ්‍ය අංශය විසින් නිවේදනයක් නිකුත් කරනු ලැබුවේ රජයේ ජීවන වියදම් අනු කමිටුව විසින් ගන්නා ලද තීරණයක් මත තෙල් මිළ වැඩි කිරීමට කටයුතු කරන ලද බවයි. 
 
මේ සම්බන්ධව තීරණය ගත් කමිටු රැස්වීමට ජනාධිපතිතුමා අගමැතිතුමා නාමල් රාජපක්ෂ ඇමතිතුමා සහ තවත් අමාත්‍යායවරු කිහිප දෙනෙකු සහ උසස් නිලධාරීන්ද සහභාගි වූ අතර  තෙල් මිළ වැඩි කිරීමේ නාටකයේ පොතේ ගුරාගේ කාර්යය පමනක් බලශක්ති ඇමති ගම්මන්පිල  විසින් කරනු ලැබූ අතර ඉන් පසුව එය නාට්‍යානුසාරයෙන් ජනතාව වෙත ගෙන එන ලදී.
 
 රජයට ඩොලර් නොමැති බව ඛණිජ තෙල් නීතිගත සංස්ථාව මහා පරිමාණයෙන් පාඩු ලබන බව ඒ නිසාම රාජ්‍ය බැංකු දෙක මූල්‍ය අවදානමට   ලක්ව ඇති බව ආදි කී නොකී කතා  රාශියක් ජනගත කරන ලදී.
 
එහෙත් මේ නිදහසට කියන කාරනා සියල්ලම අර්ධ සත්‍යක් පමණි.
 
මෙම තීරනයත් සමග ආන්ඩුවේ මධුසමය  අවසන් වී ඇති බවත් සෞභාග්‍යයේ රජයේ පශ්චාත් කොරෝනා ආර්ථික  ගමන් මඟ ආරම්භ වී ඇති බව ජනතාව තේරුම් ගත යුතුය.
 
රජයේ නව දැක්ම කුමක්ද?
 
මීට මාස කිහිපයකට  පෙර අග්‍රාමාත්‍ය / මුදල් අමාත්‍ය මහින්ද රාජපක්ෂ  ප්‍රකාශ කළේ මොන තරම් බාධක පැමිණියත් ජාත්‍යන්තර මූල්‍ය අරමුදල පසුපස තම රජය නොයන බවයි. 
 
ඔවුන්ගේ කොන්දේසිවලට යට වී ජනතාව අපහසුතාවයට පත් කරන තීන්දු තීරණ නොගන්නා බවයි.
 
එහෙත් ලෝකය වටේම ඩොලර් මිලියන 100, 200 හෝ ණය පහසුකම් සොයා ගියත් ,හැකි තරම් දුරට ආනයනයන් සඳහා සීමාවන් දැමුවත් ඉදිරියට යාමට නොහැකි බව දන්නා රජය  ජාත්‍යන්තර මූල්‍ය අරමුදල සමඟ ලංකාවට ලබා ගත  හැකි නය සීමාව පිලිබද සාකච්ඡා ආරම්භ කර ඇති අතර ඩොලර් මිලියන 785 ක ණය මුදලක් ලබා  ගැනීමට කටයුතු කරමින් සිටින බව නොරහසකි.
 
යහපාලන රජය බලයට පත් වූ විගසම ඒ අවස්ථාවේ තිබූ විදේශ සංචිත ශක්තිමත් කර ගැනීමටත් විදේශ ණය ගෙවීම ආදිය සඳහාත් ඩොලර් මිලියන 1300 ක ණයක් ගත් බව අප දන්නා කාරුණකි.
 
ඒ සඳහා ජාත්‍යන්තර මූල්‍ය අරමුදලේ කොන්දේසි ක්‍රියාත්මක කිරීමට යහපාලන රජයට සිදුවිය.
 
රාජ්‍ය ආයතනවලට බඳවා ගැනීම් සම්පූර්ණයෙන් නතර කිරීමට සිදු වූ අතර අප්‍රිකාවේ ගානා රාජ්‍ය වෙත ජාත්‍යන්තර මූල්‍ය අරමුදල විසින් හඳුන්වා දෙන ලද ආදායම් බදු පණත ඒ ආකාරයෙන්ම ශ්‍රී ලංකාවට හඳුන්වා දීමත් සිදු විය. උපයන විට ගෙවීමේ සිට ලක්ෂ 100,000 කට වඩා ආදායම් ලබන සෑම අයෙකුටම ස්වයංක්‍රීයව බදු ලිපි ගොණුවක් විවෘත විය. රුපියල් බිලියන 1000 මට්ටමක  තිබූ රාජ්‍ය ආදායම 2018 වන විට රුපියල් බිලියන 1800 දක්වා ඉහළ ගියේය.
 
ඒ ජාත්‍යන්තර මූල්‍ය අරමුදලේ  කොන්දේසි ක්‍රියාත්මක කිරීම නිසාය.
 
ණය හෝ අත්තිකාරම් ලබා දී කොන්දේසි පණවන පුරුද්දක් ජාත්‍යන්තර මූල්‍ය අරමුදලට නැත. මේ පූර්ව කොන්දේසිය නිසා ණය මුදල ලබා දීමට  පෙර ආර්ථිකය  පාලනයට නතු කිරීම, අනවශ්‍ය වියදම් කපා හැරීම ,බදු අනුපාත ඉහළ දැමීම, සහනාධාර කපා හැරීම යන සියල්ල කිරීමට රජයට සිදුවනු ඇත. එසේ කිරීමට රජය අපොහොසත් නම් ඩොලර් මිලියන 785 ක ණය මුදල නොලැබෙනු ඇත.
 
ශ්‍රී ලංකාවේ ණය ශ්‍රේනි ගත කිරීම මේ වන විට. CCC මට්ටමට පහල දමා ඇත. රටක් ඉදිරියට යාමට ආයෝජන ආකර්ශනය කර ගැනීමට නම් මේ දර්ශක නැවත සකසා ගත යුතුය.
 
අවම වශයෙන් දැනට ශ්‍රී ලංකා මහ බැංකුව සතුව පවතින ඩොලර් සංචිතය ඩොලර් මිලියන 4.3 සිට අඩුම වශයෙන් මිලියන 8.6 ක ප්‍රමාණයකට ඉහළ නංවා ගත යුතුය.රජයේ වියදම් අඩුකරගෙන පෞද්ගලික අංශය ශක්තිමත් කිරීමට සිදුවනු ඇත.
 
සිදුවිය හැක්කේ කුමක් ද?
 
රජයටත් බදු ආදායමක් ලැබෙන පරිදි ලෝක වෙළඳපළේ මිළට සමාන්තරව තෙල් මිළ වැඩි කළාක් මෙන් ඉදිරියේදී ගෑස් මිළ ඉන්පසු ජලය විදුලිය, දුරකථන සේවා යන ගාස්තු වැඩි රාජ්‍ය අංශය  කර සංවිධානයට ලක් කිරිමට සිදුවනු ඇත.
 
මේ හා සමානව පෞද්ගලික අංශය විසින්ද  ප්‍රවාහන ගාස්තු, මගී ප්‍රවාහන ගාස්තු ආහාර ද්‍රව්‍ය මිළ, ගුවන් ගමන් ගාස්තු හෝටල් ගාස්තු ආදී සියලුම සේවා මිළ ඉහළ දමනු ඇත.
 
එබැවින් ආන්ඩුවේ මේ ජිමික්ස් දෙස බලා සිටිනවා වෙනුවට ‍රටේ ජනතාව මේ සැබෑ ආර්ථික අර්බූදයට මුහුණදීමට පෙළ ගැසිය යුතුව ඇති බව පමනක් අවධාරණය කරමු.
 
විශේෂ ලියුම්කරුවකු විසිනි 

Page 374 of 377