දකුණු කොරියාවේ සැහැල්ලු ට්‍රක් රථයක් වෙළඳ සලක් තුළට කඩා වැදීමෙන් අද (13) අනතුරක් සිදු විය. ඉන් 20 දෙනකුවත් තුවාළ ලබා ඇතැයි, වාර්තා වේ.
අනතුරින්, හෘදයාබාධ වලට ලක් වූ දෙදෙනකු සිහිසුන්ව සිටින බව හදිසි සේවා නිලධාරීහු පැවසූහ. සියොල් අගනුවර සිට කි.මී.20ක් පමණ බටහිරින් පිහිටි බූචන් (Bucheon) හි එම අනතුර සිදු විය.
රියදුරා විසින් පසුපසට ධාවනය කළ ට්‍රක් රථය, පසුව, මීටර 150ක පමණ දුරක් වෙළඳපොළ තුළ වේගයෙන් ඉදිරියට ඇදී ගිය බව ඇසින් දුටුවෝ පැවසූහ.
එය අනපේක්ෂිත ව සිදුවූවක් බව රියදුරා පවසයි. ඔහු මත්ද්‍රව්‍ය හෝ වෙනත් එවැනි කිසිත් පානය කර නොතිබි බව, පොලිසිය සඳහන් කළේය. ට්‍රක් රථය වැඩි දුර පරීක්ෂණ පිණිස විමර්ශන නිලධාරීන් වෙත භාර දී තිබේ.
(සටහන | Reuters ඇසුරින්; හර්ෂ උදයකාන්ත පීරිස්)
