විදෙස්

ඉරානයේ සහාය ලබන හිස්බුල්ලා සංවිධානය සහ ඊශ්‍රායලය අතර පසුගිය සති හයක් පුරා පැවති දරුණු ගැටුම් තාවකාලිකව නතර කරමින් දින 10ක සටන් විරාමයකට දෙපාර්ශවය එකඟ වී ඇති බව ඇමරිකානු ජනාධිපති ඩොනල්ඩ් ට්‍රම්ප් නිවේදනය කළේය.

මෙම සටන් විරාමය බ්‍රහස්පතින්දා දින දේශීය වේලාවෙන් මධ්‍යම රාත්‍රියේ සිට ක්‍රියාත්මක වීමට නියමිතය.

ඊශ්‍රායලයේ කොන්දේසි
සටන් විරාමය සම්බන්ධයෙන් අදහස් දක්වමින් ඊශ්‍රායල අගමැති බෙන්ජමින් නෙතන්යාහු ප්‍රකාශ කළේ තම රට මීට සහභාගී වන නමුත් ලෙබනනයේ දකුණු දිග ප්‍රදේශයේ කිලෝමීටර් 10ක ගැඹුරකින් යුත් "ආරක්ෂක කලාපයක්" (Security Zone) පවත්වාගෙන යන බවයි. "අප එහි සිටිනවා, අප ඉන් පිටව යන්නේ නැහැ" යනුවෙන් ඔහු දැඩිව අවධාරණය කළේය.

හිස්බුල්ලා සහ ඉරාන ප්‍රතිචාරය

හිස්බුල්ලා සංවිධානය සටන් විරාමයට කැමැත්ත පළ කර ඇති අතර, ඔවුන් පවසන්නේ මෙය මුළු ලෙබනනය පුරාම එල්ල වන ප්‍රහාර නතර කිරීමක් විය යුතු බවත්, ඊශ්‍රායල හමුදාවන්ට ලෙබනනය තුළ නිදහසේ හැසිරීමට ඉඩ නොදිය යුතු බවත්ය.

මේ අතර ඉරාන විදේශ අමාත්‍යාංශය ද මෙම සටන් විරාමය සාදරයෙන් පිළිගෙන ඇත. මීට පෙර ඇමරිකාව සමඟ ඇති කරගත් සති දෙකක සටන් විරාමයට ලෙබනනය ද ඇතුළත් විය යුතු බවට ඉරානය කළ ඉල්ලීමට ඇමරිකාව සහ ඊශ්‍රායලය එකඟ වී නොතිබුණ ද, නව එකඟතාවත් සමග තත්ත්වය සමනය වී ඇත.

ට්‍රම්ප් ගේ ප්‍රකාශය සහ ඉරාන න්‍යෂ්ටික එකඟතාව
ඇමරිකාව සහ ඉරානය අතර දෙවන වටයේ සාම සාකච්ඡා පකිස්ථානයේ දී පැවැත්වීමට නියමිතව ඇති පසුබිමක ජනාධිපති ට්‍රම්ප් මාධ්‍ය වෙත අදහස් දක්වමින් කියා සිටියේ, කරුණු රැසක් සම්බන්ධයෙන් දෙරට දැනටමත් එකඟ වී ඇති බවයි.

විශේෂයෙන්ම ඉදිරි වසර 20ක කාලය සඳහා ඉරානය න්‍යෂ්ටික අවි නිෂ්පාදනය නොකිරීමට එකඟ වී ඇති බවත්, කිසියම් හෙයකින් මෙම සාම ගිවිසුම අසාර්ථක වුවහොත් යළිත් සටන් ආරම්භ වනු ඇති බවත් ඔහු අනතුරු ඇඟවීය.

ඉරාන උත්තරීතර නායක අයතුල්ලා අලි කමේනි ඝාතනය කිරීමට ප්‍රතිචාර ලෙස හිස්බුල්ලා සංවිධානය ඊශ්‍රායලයට රොකට් ප්‍රහාර එල්ල කිරීමත් සමඟ මෙම යුද්ධය ආරම්භ විය. පසුගිය මාර්තු 2 වැනිදා මෙම ගැටුම් ඇවිළී ගියේ ඇමරිකාව සහ ඊශ්‍රායලය එක්ව ඉරානයට ඒකාබද්ධ ප්‍රහාරයක් එල්ල කිරීමෙන් දින දෙකකට පසුව ය.

Israel and Lebanon agree 10-day ceasefire, Trump says