අන්රා නමින් හඳුන්වන එක්සත් ජාතීන්ගේ පලස්තීන සරණාගත ආයතනයට ලබා දෙන සියළු ආධාර කපා හැරීමට අමෙරිකාව තීරණය කර තිබෙන බව විදෙස් මාධ්‍ය වාර්තා කරයි.
1949 දෙසැම්බර් 8 වනදා ස්ථාපිත කරන ලද මෙම ආයතනයේ ලියාපදිංචිය ලබා ඇති සරණාගතයින් ප්‍රමාණය මිලියන 5ක් පමණ වන අතර අන්රා සරණාගත ආයතනය වෙනුවෙන් ලබා දෙන ආධාරවලින් අඩකටත් වැඩි ප්‍රමාණයක් ජනවාරි මාසයේ සිට නතර කරන බව ඇමරිකානු බලධාරීන් දන්වා ඇති බව විදෙස් මාධ්‍ය වාර්තා කර තිබේ.
ඊට ප්‍රතිචාර දක්වමින් පලස්තීන ජනාධිපති මොහොමඩ් අබ්බාස් ඇමරිකාවේ මෙම තීරණය පලස්තීන ජනතාවට එරෙහි ප්‍රබල ප්‍රහාරයක් බව සඳහන් කර ඇත.
WTO වෙතින් ඇමරිකාව ඉවත් වෙයි ?
මේ අතර ඇමරිකාව ලෝක වෙළෙඳ සංවිධානයෙන් ඉවත් කරගන්නා බවට අමෙරිකානු ජනපති ඩොනල්ඩ් ට්‍රම්ප් අනතුරු අඟවා ඇති බවද විදෙස් මාධ්‍ය වාර්තා කර ඇත.
ප්‍රවෘත්ති සාකච්ඡාවකට එක්වෙමින් තම පාලනයේ ආර්ථික ප්‍රතිපත්ති සමඟ WTO ආර්ථික ප්‍රතිපත්ති පරස්පර වන බවත් ලෝක වෙළෙඳ සංවිධානය අමෙරිකාව සම්බන්ධයෙන් කටයුතු කරන ආකරයේ වෙනසක් සිදු නොවන්නේ නම් ඉදිරියේදී එම සංවිධානයෙන් ඉවත්වන බවත් ඇමරිකානු ජනාධිපතිවරයා පවසා ඇත.
