විශේෂාංග

සංගීතය යනු රටක ශ්‍රව්‍ය සංස්කෘතික ආත්මයේ ජීව නාඩියයි. හුදෙක් ශ්‍රව්‍ය මාධ්‍යයකින් ඔබ්බට යමින් ශ්‍රී ලාංකේය සමාජයේ කලාත්මක රසඥතාව උසස් තලයකට ඔසවා තැබීමට සුභාවිත ගීතය දැක්වූයේ අතිමහත් බලපෑමකි. එම සුභාවිත ගීත අඹරේ නව පුනර්ජීවනයක් සහ ගුණාත්මක වර්ධනයක් උදෙසා නිහඬවම අතිදැවැන්ත සංස්කෘතික මෙහෙවරක් ඉටුකළ ප්‍රවීණ කලාකරුවෙකු මෙන්ම 'සින්ග්ලංකා' කැසට් නිෂ්පාදන ආයතනයේ සූක්ෂ්ම දැක්මෙන් හෙබි නිර්මාතෘවරයා වූ ආනන්ද ගනේගොඩ මහතා අප අතරින් සමුගෙන තිබේ.

මෙරට ශ්‍රව්‍ය දෘශ්‍ය කලා ක්ෂේත්‍රයේ පෙරළිකාර සංධිස්ථානයක් සනිටුහන් කරමින් ඔහු දායාද කළ අගනා ශ්‍රව්‍ය උරුමය, ශ්‍රී ලාංකේය සංගීත වංශකතාවේ නොමියෙන අක්ෂරවලින් ලියැවී තිබෙනු නියතය.

1980 සිදුකළ ඓතිහාසික කැසට් පෙරළිය

1980 දශකයේ ආරම්භය වන විට මෙරට සංගීතයේ ප්‍රධාන ප්‍රවාහය පැවතියේ ගුවන්විදුලිය සහ ග්‍රැමෆෝන් තැටි මත පදනම්වය. එම සීමාසහිත තාක්ෂණික වටපිටාව මුළුමනින්ම වෙනස් කරමින් 1980 වසරේදී ආනන්ද ගනේගොඩ මහතා තැබූ පියවර මෙරට සංගීත ගමන් මඟ උඩුයටිකුරු කළ විප්ලවීය සන්ධිස්ථානයක් විය. පණ්ඩිත් ඩබ්ලිව්. ඩී. අමරදේවයන් සහ නන්දා මාලනියන් වැනි මෙරට අග්‍රගණ්‍ය ගායන ශිල්පීන්ගේ උසස් නිර්මාණ ඇතුළත් කැසට් පට 25ක් එකවර ජනගත කිරීමට ඔහු කටයුතු කළේය.

සුභාවිත ගීතය සාමාන්‍ය ජනතාවගේ ආලින්දයට, පෞද්ගලික ශ්‍රව්‍ය අවකාශයට සමීප කරවමින් මෙරට වාණිජමය කැසට් සංස්කෘතියේ ස්වර්ණමය යුගයකට මුලපිරීමට මෙම නිර්භීත පියවර සමත් විය.

නිර්මාණකරුවාගේ ස්වාධීනත්වය සහ අභිමානය වෙනුවෙන් පෙනී සිටීම

'සින්ග්ලංකා' ආයතනය යනු හුදෙක් ව්‍යාපාරික අරමුණකින් පමණක් ගොඩනැඟුණු ව්‍යවසායක් නොවේ. එය බිහිවූයේ මෙරට ගීත නිර්මාණකරුවන් සහ සංගීත ශිල්පීන් අත්විඳි ආර්ථික හා කලාත්මක ගැටලු හඳුනාගනිමිනි.

ආනන්ද ගණේගොඩයන්ගේ මයුරා ජෙල් නමින් වූ ඇඟළුම් ආයනය ආරම්භ කළ සමයේ, විටෙක වික්ටර් රත්නායක ශූරීන්ගේ “සා” ප්‍රසංගය වෙනුවෙන් සියළුම ඇඳුම් ඒ මහතාගේ සම්පූර්ණ දායකත්වයෙන් නොමිලයේ ලබා දී තිබුණී. එවැනි සැඟවුනු මනුසත් කමේ උල්පතක් ලෙස මෙතුමා හඳුන්වා දිය හැක.

ආනන්ද ගනේගොඩ මහතා සංගීත ක්ෂේත්‍රයේ ජ්‍යෙෂ්ඨ මෙන්ම නවක නිර්මාණකරුවන් සමඟ ද සමීප සහෘදත්වයකින් කටයුතු කරමින්, ඔවුන්ගේ නිර්මාණාත්මක ස්වාධීනත්වය, ගීතවල උසස් ගුණාත්මකභාවය මෙන්ම කලාකරුවාගේ ආර්ථික යහපැවැත්ම හා අභිමානය තහවුරු කිරීම වෙනුවෙන් නිරන්තරයෙන් පෙනී සිටියේය.

ගුවන් විදුලියෙන් පසු මෙරට රසික රුචිකත්වය ඉහළ නැංවූ 2,000කට අධික ගීත එකතුව

‘සින්ග්ලංකා’ ලාංඡනය යටතේ ආනන්ද ගනේගොඩයන්ගේ සංකල්පීය මඟපෙන්වීමෙන් මෙරට සංගීත ශ්‍රව්‍ය කෝෂයට එකතු වූ සමස්ත ගීත සංඛ්‍යාව 2,000කට අධිකය. ශ්‍රී ලංකා ගුවන්විදුලි සංස්ථාවෙන් පසුව මෙරට රසික ප්‍රජාවගේ ශ්‍රව්‍ය රසඥතාවට මහත් ගෞරව කරමින්, ශාස්ත්‍රීය හා සුභාවිත ගීත නිර්මාණ අඛණ්ඩව ප්‍රජාගත කළ ප්‍රමුඛතම පෞද්ගලික ආයතනය ලෙස ‘සින්ග්ලංකා’ නාමය ක්ෂේත්‍රය තුළ ඉහළම ගෞරවාදරයට හා ඇගයීමට ලක්විය.

සංස්කෘතික නායකත්වය සහ ව්‍යාපාරික ක්ෂේත්‍රයේ විශිෂ්ටත්වය

 ආනන්ද ගනේගොඩයන්

ආනන්ද ගනේගොඩයන් යනු හුදෙක් සංගීත කලා ක්ෂේත්‍රයේ පෝෂකයන් අතලොස්ස අතර සිටි පූර්වාදර්ශී සංස්කෘතික නායකයෙකු පමණක් නොවේ. කලා ක්ෂේත්‍රය තුළ ඔහු පෙන්වූ සූක්ෂ්ම කළමනාකරණ හැකියාව සහ දැක්ම, ඔහුගේ ව්‍යාපාරික ජීවිතය තුළ ද එකසේ පිළිබිඹු විය. ඒ මහතා මෙරට ප්‍රමුඛ පෙළේ ව්‍යාපාර ජාලයක සභාපතිවරයා ලෙස ද කටයුතු කරමින්, කලාත්මක සුභාවිතභාවයත් සාර්ථක ව්‍යවසායකත්වයත් මනාව මුසු කළ හැකි විශිෂ්ට නායකයෙකු බව සනාථ කළේය.

ආනන්ද ගනේගොඩ මහතා යනු කැසට් තාක්ෂණයේ ආගමනයත් සමඟ මෙරට සුභාවිත ගීතයේ නව පද්‍යමය හා සංගීතමය යුගයක් නිර්මාණය කිරීමට අඩිතාලම දැමූ පරිපූර්ණ සංස්කෘතික මැදිහත්කරුවෙකි. උසස් ගීත සංගීතය වාණිජමය වශයෙන් ද සාර්ථකව ජනගත කළ හැකිය යන විශ්වාසය ක්ෂේත්‍රය තුළ ස්ථාපිත කිරීමට ඔහු ලැබූ සාර්ථකත්වය විශිෂ්ට සාක්ෂියකි.

ඔහු භෞතිකව අප අතරින් නික්ම ගිය ද, ‘සින්ග්ලංකා’ හරහා ඔහු දායාද කළ 2,000කට අධික සදාතනික ගීත එකතුව ශ්‍රී ලාංකේය සංගීත ලෝකය පවතින තාක් නොමියෙනු ඇත.

ආනන්ද ගනේගොඩ මහතාණෙනි ඔබගේ නික්මයාම ඉතාමත් වේදනාව දනවන පුවතකි...

ඔබට සුබ ගමන් …..

රෂිකා හෙන්නායක

උපුටා ගැනීම - lankanewsweb (LNW)