කොළඹ වරායේ නැගෙනහිර පර්යන්තය ඉන්දීය අදානි සමාගමට ලබාදීමට ආණ්ඩුවේ සූදානම සම්බන්ධව ජනාධිපති ගෝඨාභය රාජපක්ෂ සහ වරාය වෘත්තීය සමිති අතර අද (13) පැවති සාකච්ඡා අසාර්ථකවූ බව වාර්තා වෙයි.
වරාය නැගෙනහිර පර්යන්තය සුරැකීමේ අරගලයේ වරාය වෘත්තීය සමිති 23ක් තිබුණද මෙම සාකච්ඡාව සඳහා කැඳවා තිබුනේ 11ක් පමණක් බවත් රජයේ පාර්ශවයෙන් මෙම සාකච්ඡාව සඳහා ජනාධිපතිවරයාට අමතරව බැසිල් රාජපක්ෂ, වරාය ඇමති රෝහිත අබේගුණවර්ධන, ජනාධිපති ලේකම් පී.බී ජයසුන්දර, වරාය අමාත්‍යාංශ ලේකම් යූ.ජී.සී ජයලාල්, වරාය සභාපති ජෙනරාල් දයා රත්නායක යන අයද සහභාගීවූ බවත් වාර්තා වෙයි.
එහිදී වෘත්තීය සමිති වෙනුවෙන් ශ්‍රීලනිප වෘත්තීය සමිතියට හෝ වෙනත් වෘත්තීය සමිති වෙත ලැබුණේ සීමිත වෙලාවක් බවත් දැනගන්නට ඇත.
අදාළ සාකච්ඡාවේදී ජනාධිපතිවරයා විසින් නැගෙනහිර පර්යන්තය සම්බන්ධයෙන් ආණ්ඩුවේ ස්ථාවරය පැහැදිලි කල බවත් ඒ අනුව ඉන්දියාවේ අදානි සමාගම සඳහා 49%ක කොටස් ලබාදීමේ ආණ්ඩුවේ ස්ථාවරය වී ඇති බවත් වාර්තා වෙයි.