මැයි 9 වනදා අරගිලයගහ මන්දිරයේ සිට පැමිණි මැරයන් පිරිසක්, කොල්ලුපිටිය මයිනා ගෝ ගමදී සහ ගාලු මුවදොර ගෝටා ගෝ ගමදී සාමකාමී අරගලයේ නිරත තරුණ තරුණියන්ට පහරදීමේ සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව අත්අඩංගුවට ගත් පාර්ලිමේන්තු මන්ත්‍රීවරුන් වන සනත් නිශාන්ත සහ මිලාන් ජයතිලක ලබන 25 වැනිදා තෙක් රක්ෂිත බන්ධනාගාර ගතකරන ලෙස කොළඹ කොටුව මහේස්ත්‍රාත් තිළිණ ගමගේ අද (18) නියෝග කළේය.
එසේම ඔවුන්ට අවශ්‍ය ආරක්ෂාව සහ පැවැත්වෙන පාර්ලිමේන්තු සැසිවාර වලට සහභාගි කරවීමට අවශ්‍ය ප්‍රතිපාදන සලසා දෙන ලෙසත් මහේස්ත්‍රාත්වරයා බන්ධනාගාර කොමසාරිස් වරයාට නියෝග කළ බවත් වාර්තා වෙයි .
දේශබන්දුගෙන් පැය 8 1/2 ක් ප්‍රශ්න කරලා !
මේ අතර අදාළ ප්‍රහාරය සම්බන්ධයෙන් බස්නාහිර පළාත් බාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් වෙතින් අපරාධ පරීක්ෂණ දෙපාර්තමේන්තුව ඊයේ (17) පැය 8 1/2 ප්‍රකාශ සටහන් කරගත් බව පොලිසිය පවසයි .
අපරාධ පරීක්ෂණ දෙපාර්තමේන්තුව කළ දැනුම් දීමකට අනුව ඊයේ පස්වරු 4.00 ට පමණ ඔහු අපරාධ පරීක්ෂණ දෙපාර්තමේන්තුව හමුවට පැමිණි අතර මධ්‍යම රාත්‍රී 12.30 දක්වා මෙම ප්‍රකාශ සටහන් කර ගැනීම සිදු කර ඇති බවත් වාර්තා වෙයි .
මේ වන විට ප්‍රහාරයට අදාළව 22 කගේ නම් නීතිපති විසින් පොලිස්පති වෙත යොමුකර ඇති අතර එහි ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් ගේ නමත් සඳහන් ය.
එසේම මීට පෙර ඔහු මානව හිමිකම් කොමිසම වෙතද ප්‍රකාශයක් ලබාදී තිබිණ .
කෙසේ වුවත් මේ වන විට සමාජ මාධ්‍ය තුළ ජ්‍යෙෂ්ඨ නියෝජ්‍ය පොලිස්පතිවරයා අත්අඩංගුවට නොගැනීම සම්බන්ධයෙන් ප්‍රශ්න කෙරෙමින් පවතී.
