Language Switcher

V2025

ME නිව් ඩයමන්ඩ් නෞකාවට රටින් පිටවීමට දීම වරදක් !

එම්.ඊ නිව් ඩයමන්ඩ් නෞකාව ගිනි බත් වූවාට පසු එම නැවට මෙරටින් පිටවීමට ඉඩදීම කනගාටුදායක තත්වයක් බවත් එසේ කටයුතු කිරීම සම්බන්ධයෙන් එම කාලසීමාවේදී අදාල අමාත්‍යාංශය බාරව සිටි දේශපාලන අධිකාරියටද විදේශ කටයුතු අමාත්‍යංශයේ ලේකම්වරයාට සහ නාවික හමුදාපතිවරයාටද තමා කෙළින්ම චෝදනා කරන බවත් රාජ්‍ය අමාත්‍ය අරැන්දික ප්‍රනාන්දු පවසයි.

නැවට යෑමට ඉඩ දුන්නේ විශාල ප්‍රශ්නයක් පැවතුණු අවස්ථාවක බව පැවසූ රාජ්‍ය අමාත්‍යවරයා මේ සමග නාලක ගොඩහේවාගේ නමද ඉදිරියට ඇවිත් තිබෙන බවද සඳහන් කළේය.

රාජ්‍ය අමාත්‍යවරයා මේ බව සඳහන් කර සිටියේ අද (30) පාර්ලිමේන්තුවේදී විපක්ෂ නායක සජිත් ප්‍රේමදාස විසින් ස්ථාවර නියෝග 27 (2) යටතේ මතු කළ ප්‍රශ්නයකට පිළිතුරු දෙමින්ය.

එක්ස්ප්‍රස් පර්ල් වන්දිය ඩොලර් වලින් මිස රුපියල්වලින් ගැනීමට නීතිපති දෙපාර්තමේන්තුව එකඟවීම කණගාටුදායක බවද ඔහු පැවසීය.

එසේම එක්ස්ප්‍රස් පර්ල් සම්බන්ධයෙන් මුල් අවස්ථාවේදී ඩොලර් කෝටි 700 ක වගේ වන්දියක් ගැන කතා කළ නමුත් මේ වන විට එය ඩොලර් කෝටි තුන්සියයකට පහත බැස ඇති බවත් මෙම සිද්ධියට අදාළව නඩු දැමිය යුතු යැයි තමා මුලසිටම සිටින ස්ථාවරය බවත් සඳහන් කළේය.

සමුද්‍රීය ආරක්ෂක අධිකාරියට වරාය ඇතුළේ කාර්යාලයක් පවා නොමැති බවත් ඇත්තේ කන්ටේනර් පෙට්ටි දෙකක් පමණක් බවත් රාජ්‍ය අමාත්‍යවරයා පැවසීය.