පුවත්

ශ්‍රී ලංකා මහාභාණ්ඩාගාරයේ සිදුවූ බව කියන රුපියල් මිලියන 800 ක (ලක්ෂ 8000ක) මූල්‍ය වංචාවක් සහ ප්‍රමුඛ පෙළේ වාණිජ බැංකුවක් වන NDB බැංකුවේ රුපියල් බිලියන 13.5 ක අරමුදල් අතුරුදන් වීම සම්බන්ධයෙන් රජය අනුගමනය කරන ක්‍රියාපිළිවෙත විපක්ෂයේ දැඩි දෝෂදර්ශනයට ලක්ව තිබේ.

ඊයේ (26) කොළඹ දී පැවැති ඒකාබද්ධ විපක්ෂ මාධ්‍ය හමුවක දී අදහස් දක්වමින් එක්සත් ජන රජ පෙරමුණේ නායක පාඨලී චම්පික රණවක අවධාරණය කළේ, රජය මෙම සිදුවීම් 'හැකර් ප්‍රහාර' (Cyber Attacks) ලෙස හුවා දක්වමින් සැබෑ වැරදිකරුවන් සහ වගකිවයුතු උසස් නිලධාරීන් ආරක්ෂා කිරීමේ සංවිධානාත්මක මෙහෙයුමක නිරත වන බවයි.

තාක්ෂණික දෝෂයක්ද? අභ්‍යන්තර මෙහෙයුමක්ද?

මහාභාණ්ඩාගාර වංචාව 2026 ජනවාරි මාසයේ දී අනාවරණය වුව ද, රජය ඒ පිළිබඳව මාස හතරක් තිස්සේ තොරතුරු වසන් කළ බව රණවක චෝදනා කළේය. රජයේ පාර්ශවයෙන් මෙය සයිබර් ප්‍රහාරයක් ලෙස හැඳින්වුවද, තාක්ෂණික විශ්ලේෂණයන්ට අනුව මෙය ව්‍යාපාරික විද්‍යුත් තැපෑල අවභාවිත කිරීමක් (Business Email Compromise - BEC) හෝ 'fishing attack' බව ඔහු පෙන්වා දුන්නේය.

"භාණ්ඩාගාරයේ හෝ මහ බැංකුවේ පවතින දැඩි ආරක්ෂක විධිවිධාන අනුව, අවම වශයෙන් නිලධාරීන් 18 දෙනෙකුගේ අනුමැතියකින් තොරව මෙවැනි ගනුදෙනුවක් සිදුකිරීම ප්‍රායෝගිකව කළ නොහැක්කක්. මෙය හැකර් ප්‍රහාරයක් ලෙස හඳුන්වන්නේ අමාත්‍යාංශ ලේකම්වරයා ඇතුළු වගකිවයුතු පිරිස ගලවා ගැනීමේ අරමුණින්," යැයි රණවක පැවසීය.

නීතිමය ක්‍රියාමාර්ග පිළිබඳ ගැටලු

මෙම මූල්‍ය අපරාධය සම්බන්ධයෙන් දණ්ඩ නීති සංග්‍රහය ප්‍රකාරව මහේස්ත්‍රාත්වරයා වෙත කරුණු වාර්තා කිරීමට හෝ නීතිපතිවරයා ස්වාධීන පියවර ගැනීමට අපොහොසත් වීම පිළිබඳව චම්පික රණවක මහතා ප්‍රශ්න කළේය. මීට පෙර රුපියල් ලක්ෂයක වියදමක් සම්බන්ධයෙන් අමාත්‍යාංශ ලේකම්වරයෙකු අත්අඩංගුවට ගත් නීතිය, රුපියල් මිලියන 800 ක වංචාවකදී නිහඬව සිටීම පරස්පර විරෝධී බව ඔහු සඳහන් කළේය.

NDB බැංකු අර්බුදය සහ 'Deloitte India' පරීක්ෂණය

National Development Bank (NDB) බැංකුවේ කොටස්වලින් 31% කට වඩා වැඩි ප්‍රමාණයක් රජයට සහ සේවක අර්ථසාධක අරමුදලට (EPF) අයත් වන පසුබිමක, එහි සිදුවූ රුපියල් බිලියන 13.2 ක අරමුදල් අක්‍රමිකතාව සේවකයන්ගේ සහ ආයෝජකයන්ගේ විශ්වාසය බිඳවැටීමට හේතු වී ඇති බව වාර්තා වේ.

මෙම සිද්ධිය සම්බන්ධයෙන් 'Deloitte India' සමාගම ලවා සිදුකරන වෝහාරික විගණනය (Forensic Audit) පිළිබඳවද රණවක මහතා සැක පළ කළේය. "මීට පෙර බාහිර සමාලෝචන සිදුකළ සමාගමට ම මෙම පරීක්ෂණය පැවරීම 'හොරාගේ අම්මගෙන් පේන ඇසීමක්' බඳු ක්‍රියාවක්. මෙහි ස්වාධීනත්වයක් අපට පෙනෙන්නට නැහැ," යැයි ඔහු වැඩිදුරටත් පැවසීය.

ආර්ථික සහ බලශක්ති අර්බුදයේ අවදානම

බංකොලොත්භාවයෙන් පසුව මෙරට මූල්‍ය ක්ෂේත්‍රයේ විශ්වසනීයත්වය රැක ගැනීම අතිශය වැදගත් බවත්, රජය මැදිහත් වී එම විශ්වාසය බිඳ දමන්නේ නම් එය සමස්ත ආර්ථිකයටම බලගතු තර්ජනයක් වන බවත් විපක්ෂය පවසයි. බලශක්ති සහ මූල්‍ය යන ප්‍රධාන කුළුණු දෙකම අස්ථාවර වීම තුළින් ලබන ජූලි මාසය වන විට රට යළිත් දැවැන්ත අර්බුදයකට තල්ලු වීමේ අවදානමක් පවතින බවට රණවක අනතුරු ඇඟවීය.

රජය සහ පොලිස් මූල්‍ය අපරාධ විමර්ශන අංශය මෙම චෝදනා සම්බන්ධයෙන් මෙතෙක් නිල ප්‍රකාශයක් නිකුත් කර නොමැති අතර, මෙම වංචනික ක්‍රියාවන් යටගැසීමට උත්සාහ කරන්නේ නම් ඒ පිළිබඳව දැඩි අවධානයෙන් පසුවන බව විපක්ෂය අවධාරණය කරයි.

මූලාශ්‍ර - Lakvahini