Image

පොළොන්නරුව විශ්‍රාමික රණවිරුවන්ගේ සුබසාධනය වෙනුවෙන් විශේෂ වැඩසටහනක්!

පොළොන්නරුව විශ්‍රාමික රණවිරුවන්ගේ සුබසාධනය වෙනුවෙන් විශේෂ වැඩසටහනක්!

පොළොන්නරුව දිස්ත්‍රික්කයේ විශ්‍රාමික රණවිරුවන්ගේ සුබසාධන අවශ්‍යතා සපුරාලීමේ අරමුණින් සංවිධානය කළ විශේෂ සුබසාධන වෛද්‍ය කඳවුරක් 2026 නොවැම්බර් මස 18 දින මින්නේරිය 7 වන ශ්‍රී ලංකා කාලතුවක්කු රෙජිමේන්තු මූලස්ථාන පරිශ්‍රයේදී පැවැත්විණි.

යුද්ධ හමුදාපති ලුතිනන් ජෙනරල් නිලන්ත ප්‍රේමරත්න ගේ මඟපෙන්වීම යටතේ, විශ්‍රාමික රණවිරු කටයුතු හා පුනරුත්ථාපන අධ්‍යක්ෂ මණ්ඩලය සහ යුද්ධ හමුදා සේවා වනිතා ඒකකය එක්ව මෙම වැඩසටහන සංවිධානය කර තිබුණි. මෙම අවස්ථාවට ප්‍රධාන ආරාධිත අමුත්තා ලෙස යුද්ධ හමුදාපතිවරයා සහභාගී වූ අතර, යුද්ධ හමුදා සේවා වනිතා ඒකකයේ සභාපතිනි වින්ද්‍යා ප්‍රේමරත්න ද එම අවස්ථාවට එක් වූවාය.

WhatsApp Image 2026 11 19 at 1.46 PM

ඒ අනුව, යුද්ධ හමුදාව විසින් අඛණ්ඩව ක්‍රියාත්මක කරනු ලබන සුබසාධන වැඩසටහන් මාලාවේ තවත් එක් පියවරක් ලෙස සංවිධානය කරන ලද මෙම වැඩසටහන මඟින් පොළොන්නරුව දිස්ත්‍රික්කයේ පදිංචි විශ්‍රාමික රණවිරුවන්ගේ සෞඛ්‍ය හා අනෙකුත් සුබසාධන අවශ්‍යතා සපුරාලීම අපේක්ෂා කෙරිණි.

WhatsApp Image.46 PM

මෙහිදී විශ්‍රාමික රණවිරුවන් වෙත රෝද පුටු, කිහිලිකරු සහ අත්‍යවශ්‍ය වෛද්‍ය උපකරණ ඇතුළු උපකරණ රැසක් පරිත්‍යාග කෙරිණි. එමෙන්ම සාමාන්‍ය වෛද්‍ය සායන, කෘත්‍රිම අත් පා නඩත්තු සේවා, චර්ම රෝග හා දන්ත සායන, අක්ෂි සත්කාර සේවා සහ පෝෂණ උපදේශන සේවා ඇතුළු සෞඛ්‍ය සේවාවන් රැසක් ද මෙම කඳවුර තුළින් ලබාදීමට කටයුතු කරන ලදී. ඒ අනුව විශ්‍රාමික රණවිරුවන්, දැනට සේවයේ නියුතු යුද්ධ හමුදා සාමාජිකයන් සහ ඔවුන්ගේ පවුල්වල සාමාජිකයන් රැසකට මෙම වැඩසටහන තුළින් ප්‍රතිලාභ හිමිවිය.

WhatsApp Image 2026 9 at PM

 

නවීකරණය කළ මින්නේරිය යුද්ධ හමුදා මූලික රෝහල විවෘත කිරීම

අලුත්වැඩියා කර නවීකරණය කරන ලද මින්නේරිය යුද්ධ හමුදා මූලික රෝහල යුද්ධ හමුදාධිපතිතුමන් අතින් නිල වශයෙන් විවෘත කිරීමද මෙම වැඩසටහනට සමගාමීව සිදු කෙරිණි.

WhatsApp Image 2026 11 19 at 1.47.01 PM

රෝහලේ යටිතල පහසුකම් වැඩිදියුණු කිරීම, පවතින පහසුකම් ප්‍රතිසංස්කරණය කිරීම සහ සමස්ත රෝහල් පරිසරය වැඩිදියුණු කිරීම ඇතුළු කටයුතු රැසක් මෙම නවීකරණ වැඩසටහන යටතේ සිදුකර ඇත.

මෙම වැඩිදියුණු කිරීම් තුළින් යුද්ධ හමුදා සාමාජිකයන්ට සහ ඔවුන්ගේ පවුල්වල සාමාජිකයන්ට වඩාත් ගුණාත්මක සෞඛ්‍ය සේවාවක් සහ වැඩිදියුණු කළ වෛද්‍ය පහසුකම් සැලසීමට අපේක්ෂා කෙරේ.

මෙම ප්‍රතිසංස්කරණ කටයුතු 3 වන ඉංජිනේරු සේවා රෙජිමේන්තුවේ භටපිරිස් විසින් සිදුකරනු ලැබීය.

Related Articles

newstube.lk වෙබ් අඩවියේ පළවන සියළු ප්‍රවෘත්ති සහ විශේෂාංග ආශ්‍රිතව කිසිවකුට හානිකර යමක් පළ වී ඇත්නම් ඒ අගතියට පත් පාර්ශවයට ඊට ප්‍රතිචාර දැක්වීමට ඇති අයිතියට අපි ගරු කරමු.
ඔබගේ ප්‍රතිචාර This email address is being protected from spambots. You need JavaScript enabled to view it. යන විද්‍යුත් ලිපිනයට යොමුකරන්න.

logo newstube 2025

අප ගැන | අමතන්න