බස්නාහිර පළාත් සභාවේ සභාපති පිවිසුම් දොරේ වටිනාකම රුපියල් කෝටියක් නොව රුපියල් 83,76,000ක් පමණක් යැයි මහඇමති ඉසුර දේවප‍්‍රිය අද (18) බස්නාහිර පළාත් සභාවේ දී පවසා ඇත.
ඒ දොරෙහි වටිනාකම හා එහි ටෙන්ඩර් කැඳවීම සම්බන්ධයෙන් ජනතා විමුක්ති පෙරමුණේ මන්ත‍්‍රී ලක්ෂ්මන් නිපුණආරච්චි යොමු කළ ප‍්‍රශ්නයකට පිළිතුරු දෙමිනි.
මෙම දොරෙහි ඇස්තමේන්තුව 72,00,000ක් වන අතර මේ වන විට එයට ගෙවා ඇති මුදල 83,76,000ක් බවද සියලූ ඉදිකිරිම් සඳහා සම්බන්ධ වුයේ එකම සමාගමක් වන බැවින් මෙම දොරද එම සමාගම මගින් නිර්මාණය කරවන ලද බවද එහිදී මහඇමතිවරයා පවසා ඇත.
තමන් වෙත ලැබී තිබෙන වාර්තාවේ 83,76,000 සටහන් වන්නේ දොර වෙනුවෙන් දැනට ගෙවා ඇති වටිනාකම ලෙස බැවින් මෙයට තවත් මුදලක් ගෙවන්නට සිදුවේදැයි සැකයක් ඇතැයි නිපුණ ආරච්චි මන්ත්‍රීවරයා පවසා ඇති අතර එහිදී මහඇමතිවරයා පවසා ඇත්තේ මේ වන විට දොරට අදාල සියලූ මුදල් ගෙවා ඇති බවය.